“Tokim Mipela, Wanem Taim Bai Ol Dispela Samting i Kamap?”

1. Olsem ol aposel, yumi tu i laik save long wanem ol samting?

EM KLOSTU long taim we Jisas bai pinisim wok autim tok bilong em long graun, na ol disaipel bilong em i laik save long wanem ol samting bai kamap bihain. Olsem na sampela de paslain long em i dai, 4-pela aposel bilong em i askim em olsem: “Wanem taim bai ol dispela samting i kamap? Na wanem sain bai kamap bilong soim olsem yu kam i stap na pinis bilong dispela taim i kamap pinis?” (Mat. 24:3; Mak 13:3) Bilong bekim askim bilong ol, Jisas i mekim wanpela bikpela tok profet we i stap long Matyu sapta 24 na 25. Long dispela tok profet, Jisas i kolim planti bikpela samting. Tok profet bilong em bai helpim yumi tu, long wanem, yumi tu i laik save long ol samting bai kamap bihain.

2. (a) Inap planti yia pinis, yumi laik kliagut moa long wanem samting? (b) Bai yumi skelim wanem 3-pela askim?

² Inap planti yia pinis, ol wokman bilong Jehova i bin beten na skelim gut tok profet bilong Jisas long ol samting bai kamap long taim bilong las de. Ol i laik kliagut moa long wanem taim stret ol bai lukim truim bilong tok profet bilong Jisas. Nau save bilong yumi i kamap klia moa, olsem na yumi ken skelim 3-pela askim long “wanem taim” truim bilong tok profet bai kamap. Wanem taim bai “traipela hevi tru” i kirap? Wanem taim bai Jisas i stap olsem Jas bilong skelim “ol sipsip” na “ol meme”? Wanem taim bai Jisas i “kam”?—Mat. 24:21; 25:31-33.

WANEM TAIM BAI TRAIPELA HEVI TRU I KIRAP?

3. Long bipo, yumi bin ting olsem traipela hevi tru bai kamap long wanem taim?

³ Bipo yumi bin ting olsem traipela hevi tru i kirap long 1914 long taim bilong Wol Woa 1, na Jehova i bin “sotim dispela taim” long 1918, olsem na woa i pinis na liklik lain remnan inap autim gutnius long olgeta hap. (Mat. 24:21, 22) Taim ol i inapim wok bilong autim tok, God bai bagarapim na pinisim lain bilong Satan. Olsem na yumi bin ting olsem traipela hevi tru i gat 3-pela hap bilong en: Kirap bilong en (1914 i go 1918), God bai sotim taim bilong en (kirap long 1918 na i go), na em bai pinis long Armagedon.

4. Wanem save i opim rot long yumi inap kliagut moa long tok profet bilong Jisas long ol samting bai kamap long taim bilong las de?

⁴ Bihain yumi bin luksave olsem wanpela hap bilong tok profet bilong Jisas long taim bilong las de i gat 2-pela truim bilong en. (Mat. 24:4-22) Namba 1 truim i bin kamap long Judia long taim bilong ol aposel, na namba 2 truim bai kamap long olgeta hap bilong graun nau long taim bilong yumi. Dispela save i opim rot bilong yumi long kliagut long sampela samting moa.a

5. (a) Haptaim bilong wanem kain hevi i bin kirap long 1914? (b) Dispela haptaim i wankain long wanem haptaim long bipo?

⁵ Yumi bin kisim save tu olsem namba 1 hap bilong traipela hevi tru i no bin kirap long 1914. Bilong wanem? Long wanem, tok profet bilong Baibel i kamapim klia olsem traipela hevi tru bai kirap taim wanpela lain i kirapim pait long ol lotu giaman, na i no long taim pait i kamap namel long ol kantri. Olsem na ol samting i kamap long 1914 i no kirap bilong traipela hevi tru, nogat, em “stat tasol bilong ol hevi.” (Mat. 24:8) Dispela haptaim i olsem “stat tasol bilong ol hevi” i wankain olsem ol samting i bin kamap long Jerusalem na Judia kirap long yia 33 C.E. i go inap 66 C.E.

6. Wanem samting bai makim olsem traipela hevi tru i kirap?

⁶ Wanem samting bai makim olsem traipela hevi tru i kirap? Jisas i tok profet olsem: “Taim yupela i lukim dispela stingpela samting bilong kamapim bagarap, bipo profet Daniel i bin tok long en, em i sanap long ples i holi (man i ritim dispela tok i mas skelim gut), orait ol manmeri long Judia i mas ranawe i go long ol maunten.” (Mat. 24:15, 16) Namba 1 truim bilong dispela tok profet i bin kamap long 66 C.E. Ami bilong Rom (“stingpela samting”) i go pait long Jerusalem na tempel bilong en (ples ol Juda i ting em i holi), na long dispela rot i olsem “stingpela samting” i go “sanap long ples i holi.” Long bikpela truim, Yunaitet Nesen (“stingpela samting” long nau) bai pait long Kristendom (samting i holi long ai bilong ol man em ol i tok ol i Kristen) na olgeta arapela lotu giaman em ol i hap bilong Bikpela Babilon, na long dispela rot “stingpela samting” bai i go “sanap long ples i holi.” Revelesen 17:16-18 i stori tu long dispela samting. Taim dispela samting i kamap, dispela em kirap bilong traipela hevi tru.

7. (a) Olsem wanem ol man i bin “abrusim bagarap” long taim bilong ol aposel? (b) Wanem samting bai kamap long bihain?

⁷ Jisas i tok profet tu olsem God “bai sotim dispela taim.” Long namba 1 truim, dispela samting i bin kamap long 66 C.E. taim ami bilong Rom i lusim pait em ol i bin kirapim long Jerusalem. Long dispela taim, ol Kristen God i bin makim ol i ranawe lusim Jerusalem na Judia bambai ol inap “abrusim bagarap.” (Ritim Matyu 24:22; Mal. 3:17) Olsem na yumi ken ting wanem samting bai kamap long taim bilong traipela hevi tru? Taim Yunaitet Nesen i kirapim pait long ol lotu giaman, Jehova bai “sotim” dispela haptaim bambai lotu i tru i no ken bagarap wantaim lotu giaman. Long dispela taim, God bai kisim bek ol manmeri bilong em.

8. (a) Bihain long namba 1 hap bilong traipela hevi tru, wanem ol samting bai kamap? (b) Long wanem taim bai laspela memba bilong lain 144,000 i kisim prais bilong em long heven? (Lukim blok “Ol Futnot.”)

⁸ Bihain long namba 1 hap bilong traipela hevi tru, wanem ol samting bai kamap? Tok bilong Jisas i makim olsem bai i gat wanpela haptaim, na dispela haptaim bai pinis taim Armagedon i kirap. Wanem ol samting bai kamap long dispela haptaim? Bekim bilong dispela askim i stap long Esekiel 38:14-16 na Matyu 24:29-31. (Ritim.)Bihain long en, Armagedon bai kamap na dispela bai pinisim taim bilong traipela hevi tru, na dispela bai wankain long bagarap i painim Jerusalem long 70 C.E. (Mal. 4:1) Taim Armagedon i kamap bilong pinisim taim bilong traipela hevi tru, dispela samting bai narapela kain tru, long wanem, “kirap long taim God i wokim graun na i kam inap long nau, kain hevi olsem i no bin kamap.” (Mat. 24:21) Wan Tausen Yia Bilong Krais i Stap King bai kirap bihain long Armagedon.b

9. Ol manmeri bilong Jehova i pilim olsem wanem long tok profet bilong Jisas long traipela hevi tru?

⁹ Dispela tok profet bilong traipela hevi tru i strongim bilip bilong yumi. Bilong wanem? Long wanem, em i strongim yumi long bilip olsem maski wanem wanem hevi i painim yumi, ol manmeri bilong Jehova olsem wanpela lain, ol bai abrusim bagarap long taim bilong traipela hevi tru. (Rev. 7:9, 14) Yumi amamas tru, long wanem, taim Armagedon i kamap Jehova bai kamapim klia olsem i stret long em i stap nambawan bos na em bai mekim holi nem bilong em.—Sng. 83:18; Ese. 38:23.

WANEM TAIM BAI JISAS I SKELIM OL SIPSIP NA MEME?

10. Long bipo, yumi bin ting olsem wanem long wok bilong skelim ol man olsem ol sipsip na meme?

¹⁰ Orait nau yumi ken stori long wanem taim yumi bai lukim truim bilong narapela hap bilong tok profet bilong Jisas—tok piksa bilong kot bai painim ol sipsip na meme. (Mat. 25:31-46) Long bipo, yumi bin ting olsem wok bilong skelim ol man olsem sipsip na meme i kamap long taim bilong las de we i bin kirap long 1914 na i kam. Yumi bin ting olsem ol lain husat i sakim tok bilong Kingdom na ol i dai paslain long traipela hevi tru i kirap, ol i olsem ol meme na ol i no inap kirap bek.

11. Bilong wanem yumi ken tok wok bilong skelim ol man olsem sipsip na meme i no bin kirap long 1914?

¹¹ Long 1995, Wastaua i skelim gen tok bilong Matyu 25:31, na skripsa i tok: “Taim Pikinini bilong man i kam wantaim glori bilong en, na olgeta ensel i kam wantaim em, long dispela taim em bai sindaun long gutpela sia king bilong en.” Dispela Wastaua i tok Jisas i bin kamap King long Kingdom Bilong God long 1914, tasol em i no “sindaun long gutpela sia king bilong en” na stap olsem Jas bilong skelim “olgeta lain man.” (Mat. 25:32; skelim Daniel 7:13.) Tasol tok piksa bilong ol sipsip na meme i soim olsem Jisas i mekim wok olsem Jas. (Ritim Matyu 25:31-34, 41, 46.) Long 1914, Jisas i no mekim yet wok olsem Jas bilong olgeta lain, olsem na em i no kirapim yet wok bilong skelim ol man olsem sipsip na meme. Orait wanem taim stret bai Jisas i kirapim wok bilong stap olsem Jas na skelim ol man?c

12. (a) Long wanem taim em bai namba 1 taim bilong Jisas long mekim wok Jas na skelim olgeta lain man? (b) Matyu 24:30, 31 na Matyu 25:31-33, 46 i stori long wanem ol samting?

¹²d Tok profet bilong Jisas long las de i kamapim klia olsem bihain long ol lotu giaman i bagarap, em bai namba 1 taim bilong Jisas long mekim wok Jas na skelim olgeta lain man. Olsem yumi stori pinis long paragraf 8, Matyu 24:30, 31 i stori long sampela samting we bai kamap long dispela taim. Taim yu skelim gut ol dispela ves, yu bai luksave olsem Jisas i tok profet long ol samting we i wankain long ol samting em i kolim long tok piksa bilong ol sipsip na ol meme. Olsem: Pikinini bilong man i kam wantaim glori na ol ensel; olgeta lain man na ol kantri i kam bung; na ol man i stap olsem ol sipsip, ol i “litimapim het bilong [ol],” long wanem, ol bai kisim “laip inap oltaim oltaim.” Ol manmeri i stap olsem ol meme, ol bai “paitim bros bilong ol na krai sori,” long wanem, ol i luksave olsem ol bai “i dai na stap olsem inap oltaim oltaim.”—Mat. 25:31-33, 46.

13. (a) Wanem taim bai Jisas i stap olsem Jas na skelim ol manmeri olsem ol sipsip na meme? (b) Dispela save i helpim yumi long kisim wanem tingting long wok bilong yumi long autim tok?

¹³ Orait nau yumi kisim wanem save? Taim traipela hevi tru i kamap, Jisas bai kam na stap olsem Jas na skelim olgeta lain man olsem sipsip na meme. Orait taim Armagedon i kamap, ol man i stap olsem ol meme ol bai “dai” na pinis olgeta. Dispela save i helpim yumi long kisim wanem tingting long wok bilong yumi long autim tok? Dispela i helpim yumi long luksave olsem wok autim tok em i bikpela samting tru. Paslain long traipela hevi tru i kamap, ol manmeri i gat taim long senisim tingting bilong ol na kirap wokabaut long liklik rot i bringim man “i go long laip.” (Mat. 7:13, 14) Long nau, ol man inap bihainim pasin i makim olsem ol i stap olsem sipsip o meme. Tasol yumi mas tingim olsem long taim bilong traipela hevi tru, laspela kot bai kamap bilong makim husat i stap olsem sipsip na husat i stap olsem meme. Olsem na i gat gutpela risen long yumi mas wok yet long helpim planti manmeri moa long harim tok bilong Kingdom na bilip long en.

WANEM TAIM BAI JISAS I KAM?

14, 15. Wanem 4-pela tok bilong Baibel i makim olsem Krais bai kam olsem Jas?

¹⁴ Nau yumi skelim pinis tok profet bilong Jisas, olsem na yu ting dispela i makim olsem yumi mas stretim save bilong yumi long ol narapela bikpela samting? Dispela tok profet yet bai bekim dispela askim. Orait nau yumi ken skelim ol dispela tok.

¹⁵ Long tok profet i stap long Matyu 24:29 i go inap long Matyu 25:46, Jisas i stori moa long ol samting bai kamap long taim bilong las de na long taim bilong traipela hevi tru. Long dispela tok profet, inap 8-pela taim Jisas i tok olsem em bai “kam.” Jisas i tok taim traipela hevi tru i kamap, “ol bai lukim Pikinini bilong man i stap antap long ol klaut na kam.” “Yupela i no save long wanem de Bikpela bilong yupela bai i kam.” “Long taim yupela i no ting long en, Pikinini bilong man bai i kam.” Long tok piksa bilong Jisas long sipsip na meme, em i tok: “Pikinini bilong man i kam wantaim glori bilong en.” (Mat. 24:30, 42, 44; 25:31) Ol dispela 4-pela tok i makim taim bihain we Krais bai kam olsem Jas. Orait long wanem hap bilong tok profet bilong Jisas bai yumi lukim 4-pela narapela tok long em bai kam?

16. Wanem ol narapela skripsa i kamapim klia olsem Jisas bai kam?

¹⁶ Long gutpela wokboi i gat savetingting, Jisas i tok: “Kain wokboi olsem i ken amamas tru sapos Bosman bilong en i kam na lukim em i mekim olsem!” Long tok piksa bilong ol yangpela meri, Jisas i tok: “Taim ol i go long baim oil, man i laik marit i kam kamap.” Long tok piksa bilong mani talen, Jisas i tok: “Longpela taim i go pinis na bosman bilong ol dispela wokboi i kam.” Long wankain tok piksa, bosman i tok: “Long taim mi kam mi inap kisim mani bilong mi.” (Mat. 24:46; 25:10, 19, 27) Dispela 4-pela tok bilong Jisas long em bai kam i makim wanem taim stret?

17. Yumi bin stori olsem wanem long kam bilong Jisas long Matyu 24:46?

¹⁷ Long bipo, ol buk na nius bilong yumi i stori olsem dispela laspela 4-pela tok bilong Jisas i makim taim we Jisas i bin kam long 1918. Olsem: Skelim tok bilong Jisas long “gutpela wokboi i gat savetingting.” (Ritim Matyu 24:45-47.) Yumi bin ting olsem “kam” bilong Jisas long ves 46 i makim olsem long 1918 em i bin kam bilong skelim ol Kristen God i bin makim, na long 1919 em i bin makim wokboi long lukautim olgeta samting bilong Bosman. (Mal. 3:1) Tasol taim yumi skelim gut moa tok profet bilong Jisas, yumi luksave olsem yumi mas stretim save bilong yumi long wanem taim sampela samting long tok profet bilong Jisas bai kamap. Bilong wanem?

18. Taim yumi skelim olgeta samting long tok profet bilong Jisas, dispela i givim wanem save long yumi long kam bilong Jisas?

¹⁸ Long ol ves i stap paslain long Matyu 24:46, oltaim dispela tok “kam” i makim dispela taim we Jisas bai kam bilong mekim kot na givim strafe long taim bilong traipela hevi tru. (Mat. 24:30, 42, 44) Na tu, olsem yumi bin skelim long paragraf 12, Matyu 25:31 i tok Jisas bai “kam,” na dispela tu i makim wankain taim bihain we Jisas bai kam bilong mekim kot. Olsem na i stret long yumi ken tok taim Jisas i kam bilong makim gutpela wokboi long lukautim olgeta samting bilong em olsem Matyu 24:46, 47 i stori long en, dispela tu i makim taim bihain we em bai kam, long taim bilong traipela hevi tru. Tru tumas, taim yumi skelim olgeta samting long tok profet bilong Jisas, dispela i soim klia olsem dispela 8-pela tok i stori long kam bilong Jisas, i makim taim bilong kot we bai kamap long taim bilong traipela hevi tru.

19. Yumi bin kisim wanem ol nupela save? Bai yumi stori long wanem ol askim long ol stadi i kamap bihain long dispela?

¹⁹ Orait, yumi bin kisim wanem ol nupela save? Long kirap bilong dispela stadi, yumi bin kamapim 3-pela askim long “wanem taim” ol samting bai kamap. Namba 1: Traipela hevi tru i no bin kirap long 1914, nogat, em bai kirap taim Yunaitet Nesen i kirapim pait long Bikpela Babilon. Namba 2: Taim bilong Jisas long mekim kot long ol sipsip na meme i no bin kirap long 1914, nogat, em bai kamap long taim bilong traipela hevi tru. Namba 3: Kam bilong Jisas long makim gutpela wokboi long lukautim olgeta samting bilong em i no bin kamap long 1919, nogat, em bai kamap long taim bilong traipela hevi tru. Olsem na olgeta 3-pela askim long “wanem taim” ol samting bai kamap i makim wankain haptaim, em taim bilong traipela hevi tru bai kamap bihain. Olsem wanem dispela nupela save i helpim yumi long kliagut moa long tok piksa bilong gutpela wokboi? Na tu, olsem wanem dispela nupela save i helpim yumi long kliagut moa long ol narapela tok piksa bilong Jisas we i wok long kamap tru nau long dispela taim bilong pinis? Bai yumi stori long ol dispela askim long ol stadi i kamap bihain long dispela.