Askim

“Wastaua” bilong Ogas 15, 1996, i tok: “Long laspela hap bilong bikpela hevi tru, ol ‘manmeri’ ol i bin ranawe i kam long lain bilong Jehova, em bai kisim bek ol na ol i no ken lus.” Olsem wanem? Dispela tok i makim olsem taim namba wan hap bilong bikpela hevi tru i pinis, planti nupela man bai kam insait long lain bilong God?

Wastaua i no tok olsem.

Tok bilong Jisas long Matyu 24:22 bai kamap tru long bihain, taim God i kisim bek ol “manmeri” long namba wan hap bilong dispela bikpela hevi tru i laik kamap, taim ol lain i kirap na bagarapim ol lotu. Wastaua i tok: “Olsem yumi stori pinis, ol ‘manmeri’​—⁠em lain remnan God i bin makim ol wantaim dispela lain ‘planti manmeri tru’​—⁠God i kisim bek ol na ol i no lus taim Bikpela Babilon i bagarap olgeta, olsem wantu tasol, long namba wan hap bilong bikpela hevi tru.”

Ol dispela lain i bin i stap gut long God ol i no ken kisim bagarap taim Jisas wantaim ami bilong em long heven i kirap na mekim pait long laspela hap bilong bikpela hevi tru. Tasol husat bai abrusim bagarap long dispela laspela hap bilong bikpela hevi tru? Kamapim Tok Hait 7:​9, 14 i soim yumi olsem bikpela lain manmeri em ol i gat tingting long i stap oltaim long graun ol bai abrusim bagarap. Orait, olsem wanem long ol Kristen em God i bin makim ol long spirit holi? “Askim” long Wastaua bilong Februeri 1, 1991, i stori olsem i gat wanem as na yumi no inap kolim stret wanem taim lain remnan bai go long heven. Olsem na dispela Wastaua bilong nau (Ogas 15, 1996) i no kolim wanpela taim stret. Em i tok tasol olsem: “Long laspela hap bilong bikpela hevi tru, ol ‘manmeri’ ol i bin ranawe i kam long lain bilong Jehova, em bai kisim bek ol na ol i no ken lus.”

Tasol bilong skelim dispela tingting olsem sampela nupela man inap kisim save long tok i tru na kam insait long lain bilong God taim bikpela hevi tru i kirap pinis, yumi mas tingim tok bilong Jisas long Matyu 24:​29-31. Taim bikpela hevi tru i kirap pinis, mak bilong Pikinini bilong man bai kamap. Jisas i tok olgeta lain manmeri bilong graun bai krai na paitim bros bilong ol. Em i no tok, ol manmeri bai kisim tingting long samting i laik kamap na ol bai tanim bel na kam insait long lain bilong God na kamap disaipel tru, nogat.

Na long tok piksa bilong ol sipsip na meme tu, Pikinini bilong man i kamap na em i mekim wok olsem jas na skelim ol man long ol samting ol i bin mekim o ol i no bin mekim bipo, na em bai tilim ol i go narapela narapela. Tasol Jisas i no mekim sampela tok olsem ol man bipo ol i bin bihainim pasin olsem bilong meme, wantu ol bai kirap na mekim pasin olsem sipsip. Em i kam bilong skelim ol man long pasin ol i bihainim pinis na ol i kamapim klia pinis olsem ol i wanem kain man.​—⁠Matyu 25:​31-​46.

Tasol long dispela samting nau yumi toktok long en, yumi no ken strong long tok, samting bai kamap olsem olsem, nogat. Lain bilong God, em ol remnan wantaim bikpela lain, ol i save long wok ol i mas mekim long nau​—⁠ol i mas autim tok na kamapim ol disaipel. (Matyu 28:​19, 20; Mak 13:10) Nau em i taim bilong yumi mas tingim gut dispela tok: “Yupela i kisim pinis marimari bilong God, na nogut yupela i lusim nating marimari bilong em. God i tok olsem, ‘Mi yet mi bin makim taim bilong kisim bek yu na mekim gut long yu, na long dispela taim stret mi bin harim krai bilong yu na helpim yu.’ Harim. Nau tasol em i taim bilong God i mekim gut long yumi. Nau tasol em i taim bilong God i kisim bek yumi.”​—⁠2 Korin 6:​1, 2.