Wanem Samting Bai Painim Ol Sipsip na Ol Meme?

“Em bai i tilim ol na putim ol long tupela lain, olsem wasman i save tilim ol sipsip i go long hap na ol meme i go long hap.”​—⁠MATYU 25:⁠32.

KRAIS JISAS em i nambawan Tisa tru i bin stap long graun. (Jon 7:46) Wanpela pasin bilong em long skulim ol man, em i save mekim ol tok piksa. (Matyu 13:​34, 35) Em i mekim ol liklik stori, tasol ol dispela tok piksa i gat strong bilong skulim ol man long ol tok i tru bilong God na ol tok profet.

² Long tok piksa bilong ol sipsip na meme, Jisas i makim taim bilong em i mas kirap mekim wanpela bikpela wok: “Taim Pikinini Bilong Man i kam [long bikpela lait, NW] . . .” (Matyu 25:31) Yumi mas tingim dispela tok piksa, long wanem, Jisas i mekim bilong pinisim ol tok em i bekim long askim olsem: “Wanem mak bai i kamap na mipela i ken save, yu kam i stap na pasin bilong dispela graun i laik pinis?” (Matyu 24:​3, NW) Tasol yumi gat wanem wok long dispela?

³ Jisas i tok, taim “bikpela hevi” i kirap pinis, orait “kwiktaim” bai sampela bikpela samting i kamap, na yumi wetim ol dispela samting i kamap. Em i tok, long dispela taim “mak bilong Pikinini Bilong Man” bai i kamap. Dispela bai givim bikpela hevi long “olgeta lain manmeri bilong graun,” em ol bai i “lukim Pikinini Bilong Man i stap antap long ol klaut bilong heven na i kam wantaim bikpela strong na bikpela lait bilong en.” Pikinini Bilong Man bai kam wantaim “ol ensel bilong en.” (Matyu 24:​21, 29-31)a Orait, olsem wanem long tok piksa bilong ol sipsip na meme? Long planti Baibel bilong nau ol i putim long Matyu sapta 25, tasol em i hap bilong bekim bilong Jisas, na i makim sampela samting moa i mas kamap long taim Jisas i kam long bikpela lait na em i wok long skelim “olgeta lain manmeri.”​—⁠Matyu 25:⁠32.

Ol Lain Insait Long Tok Piksa

⁴ Bilong kirapim dispela tok piksa, Jisas i tok olsem: “Taim Pikinini Bilong Man i kam.” Yu save “Pikinini Bilong Man” em i husat, a? Planti taim ol man bilong raitim Gutnius i kolim dispela tok long Jisas. Jisas tu i kolim long em yet, na yumi ken save em i tingim driman bilong Daniel, em Daniel i lukim ‘wanpela man i wankain olsem pikinini bilong man’ em i kam long Man bilong bipo bipo yet na dispela Man i “mekim em i kamap king na i givim em strong na biknem.” (Daniel 7:​13, 14; Matyu 26:​63, 64; Mak 14:​61, 62) Jisas em i nambawan man long dispela tok piksa, tasol i gat sampela lain moa i stap. Pastaim, long Matyu 24:​30, 31, em i tok taim Pikinini Bilong Man “i kam wantaim bikpela strong na bikpela lait bilong en,” i gat bikpela wok bilong ol ensel bilong en. Na olsem tasol, long tok piksa bilong ol sipsip na meme, taim Jisas i “sindaun long sia king bilong en” bilong mekim kot, ol ensel i stap wantaim em. (Skelim wantaim Matyu 16:27.) Tasol Jas wantaim ol ensel bilong em ol i stap long heven, olsem na yu ting tok piksa i stori tu long sampela man bilong graun?

⁵ Sapos yumi lukim dispela tok piksa, i gat 3-pela lain yumi mas save long ol. Em ol sipsip na ol meme, na Pikinini Bilong Man i stori long narapela lain em yumi mas save long en bambai yumi inap save long ol sipsip na ol meme. Jisas i kolim dispela namba 3 lain olsem ol brata bilong em bilong spirit. (Matyu 25:​40, 45) Yumi save em ol man i lotu tru long God, long wanem, Jisas i tok: “Man o meri i save bihainim laik bilong Papa bilong mi . . . , em i brata na susa na mama bilong mi.” (Matyu 12:50; Jon 20:17) Na Pol i stori long ol Kristen ol i “lain bilong Abraham” na pikinini bilong God. Pol i kolim ol olsem “ol brata” bilong Jisas na em i tok, ‘God i singautim ol bilong i stap long heven.’​—⁠Hibru 2:9–3:1; Galesia 3:​26, 29.

⁶ Bilong wanem Jisas i tok long ol brata bilong em “i no gat nem liklik”? Dispela tok i kain olsem sampela tok ol aposel i harim em i mekim bipo. Jon Bilong Baptais i dai paslain long Jisas, olsem na em i bilong kisim laip long graun, na taim Jisas i stori long Jon na skelim em wantaim ol man bilong kisim laip long heven, Jisas i tok: “Jon Bilong Baptais em i winim olgeta man i bin kamap long graun. Tasol man i stap liklik tru long kingdom bilong heven, em i winim Jon.” (Matyu 11:11) Sampela bilong i go long heven, ating ol i gat nem insait long kongrigesen, olsem ol aposel, na sampela i no gat bikpela nem olsem, tasol olgeta ol i brata spirit bilong Jisas. (Luk 16:10; 1 Korin 15:9; Efesus 3:8; Hibru 8:11) Olsem na maski long graun i olsem ol i no gat nem, ol i brata bilong Jisas na ol manmeri i mas tingim dispela samting na mekim gut long ol.

Ol Sipsip na Ol Meme Ol i Husat?

⁷ Baibel i stori long Jisas i skelim pasin bilong ol sipsip na Baibel i tok: “Orait na [Jisas] bai i tokim ol manmeri i stap long han sut bilong en olsem, ‘Yupela i gat blesing bilong Papa bilong mi. Em i laik mekim gut long yupela. Yupela kam kisim kingdom Papa i bin redim na makim bilong yupela pinis, long taim graun i kamap nupela yet. Long wanem, bipo mi stap hangre, na yupela i bin givim kaikai long mi. Mi dai long wara, na yupela i givim wara long mi. Mi man bilong narapela ples na yupela i bringim mi i go long haus bilong yupela. Mi no gat laplap, na yupela i givim laplap long mi. Mi gat sik na yupela i lukautim mi. Mi stap long kalabus, na yupela i kam lukim mi.’ Na ol stretpela manmeri bai i bekim tok bilong en olsem, ‘Bikpela, long wanem taim mipela i lukim yu i stap hangre, na mipela i givim kaikai long yu? Na wanem taim yu dai long wara, na mipela i givim wara long yu? Long wanem taim mipela i lukim yu i stap man bilong narapela ples, na mipela i bringim yu i go long haus bilong mipela? Na long wanem taim yu no gat laplap, na mipela i givim laplap long yu? Long wanem taim mipela i lukim yu gat sik, o yu stap long kalabus, na mipela i go lukim yu?’ Na king bai i bekim tok bilong ol olsem, ‘Mi tok tru long yupela, olgeta samting yupela i bin mekim long wanpela bilong ol dispela brata bilong mi i no gat nem liklik, ol dispela samting yupela i bin mekim long mi.’ ”​—⁠Matyu 25:​34-40.

⁸ Ol sipsip i winim kot na i stap long han sut bilong Jisas, olsem ol i kisim gutnem long ai bilong em na em i orait long ol, na yumi save ol i makim wanpela lain manmeri. (Efesus 1:20; Hibru 1:⁠3) Ol i bin mekim wanem na long wanem taim? Jisas i tok ol i bin mekim gutpela pasin long em na givim planti samting long em, olsem kaikai na wara na klos, na ol i bin helpim em taim em i gat sik o em i stap kalabus. Taim ol sipsip i tok, ol i no bin mekim olsem long Jisas yet, Jisas i tok ol i bin mekim long ol brata bilong em bilong spirit, em lain remnan bilong ol Kristen God i makim long spirit holi, olsem na i olsem ol i bin mekim long em yet.

⁹ Dispela tok piksa i no makim Taim Bilong Wan Tausen Yia, long wanem, long dispela taim bai ol Kristen God i makim long spirit holi ol i no i stap long graun na pilim hangre, na dai long wara, na kisim sik, na i stap kalabus. Tasol ol dispela samting i painim planti bilong ol nau long dispela taim bilong las de. Kirap long taim Satan i kam daun long graun, em i birua tru long lain remnan; em i kirapim ol man long tok bilas long ol, na givim pen long ol, na kilim sampela i dai.​—⁠KTH 12:⁠17.

¹⁰ Yu ting Jisas i tok olgeta man i mekim liklik gutpela pasin long wanpela brata bilong em, olsem givim liklik hap bret o kap wara long em, dispela i makim olsem ol i sipsip? Tru, ol i mekim gutpela pasin sori, tasol ol sipsip long dispela tok piksa i mekim bikpela samting moa. Yumi save Jisas i no tok long ol man i no bilip long God o ol pris pasto i mekim nating liklik pasin sori long wanpela brata bilong em. Nogat. Tupela taim Jisas i kolim ol sipsip olsem “ol stretpela manmeri.” (Matyu 25:​37, 46) Olsem na ol sipsip em ol manmeri inap longtaim liklik ol i bin mekim ol samting bilong helpim ol brata bilong Krais; bilip i kirapim ol long mekim wok na God i kolim ol stretpela manmeri.

¹¹ Insait long ol handet yia bipo planti manmeri, olsem Abraham, ol i bin kisim nem olsem stretpela man long ai bilong God. (Jems 2:​21-23) Noa na Abraham na ol narapela bilipman bilong bipo ol i insait long lain “arapela sipsip,” em ol bai kisim laip long Paradais aninit long Kingdom bilong God. Long dispela taim nau sampela milion manmeri moa i kamap “ol arapela sipsip”​—⁠ol i kirap bihainim lotu i tru na ol i kamap “wanpela lain sipsip” wantaim ol Kristen em God i makim long spirit holi. (Jon 10:16; KTH 7:⁠9) Ol dispela manmeri i gat tingting long i stap oltaim long graun, ol i save ol brata bilong Jisas ol i mausman bilong Kingdom, olsem na ol i helpim ol​—⁠long samting bilong skin na spirit. Ol samting ol arapela sipsip i mekim long ol brata bilong Jisas long graun, Jisas i tingim dispela i olsem ol i bin mekim long em yet. Ol manmeri olsem, sapos ol i stap laip long taim Jisas i kam bilong skelim olgeta lain manmeri, bai em i tokaut olsem ol i sipsip.

¹² Ol arapela sipsip i wok wantaim lain remnan long nau long autim tok bilong Kingdom na helpim ol, olsem na i gat wanem as na ol i tok: “Bikpela, long wanem taim mipela i lukim yu i stap hangre, na mipela i givim kaikai long yu? Na wanem taim yu dai long wara, na mipela i givim wara long yu?” (Matyu 25:37) I gat planti samting inap i stap olsem as bilong dispela. Yumi mas save, dispela em i wanpela tok piksa. Long rot bilong en Jisas i kamapim bel bilong em, em i wari long ol brata bilong em bilong spirit; em i sori long ol na pilim hevi bilong ol. Pastaim Jisas i bin tok: “Man i kisim yupela na i mekim gut long yupela, em i kisim mi na i mekim gut long mi. Na man i kisim mi, em i kisim God, em i bin salim mi na mi kam.” (Matyu 10:40) Long dispela tok piksa, Jisas i kamapim klia moa dispela tok na em i makim olsem samting (gutpela o nogut) ol man i mekim long ol brata bilong em, dispela i go antap long heven; i olsem ol i mekim long em long heven. Na Jisas i kamapim klia olsem pasin bilong Jehova long skelim ol man i gutpela na i stret, maski man i winim kot o lus long kot. Ol meme i no inap tok, ‘Sori! Sapos mipela i bin lukim yu yet, bai mipela i helpim yu.’

¹³ Taim yumi save pinis wanem taim dispela kot bai kamap bilong skelim ol manmeri, olsem dispela tok piksa i stori long en, yumi inap save gut ol meme i husat. Truim bilong dispela tok piksa i kamap long taim “mak bilong Pikinini Bilong Man” i kamap “na olgeta lain manmeri bilong graun bai i krai. Na ol bai i lukim Pikinini Bilong Man . . . i kam wantaim bikpela strong na bikpela lait bilong en.” (Matyu 24:​29, 30) Ol man i stap laip yet long taim Bikpela Babilon i bagarap na ol i bin mekim nogut long ol brata bilong King, ating nau bel bilong ol bai guria na ol bai kolim Jisas olsem “Bikpela,” long wanem, ol i laik abrusim bagarap.​—⁠Matyu 7:​22, 23.

¹⁴ Ol man pastaim ol i bin i go long lotu, na ol man i no bilip long God, na ol narapela, Jisas i no ken tingim ol tok nating ol i mekim bilong abrusim bagarap na em i skelim ol long kot. Nogat. (2 Tesalonaika 1:⁠8) Em i stap Jas na em bai skelim bel bilong ol na ol samting ol i bin mekim long “wanpela bilong ol dispela brata bilong [em] i no gat nem liklik.” Tru, long nau lain Kristen em God i bin makim ol i go liklik; i no gat planti bilong ol i stap yet long graun. Tasol i gat sampela i stap na ol i olsem ‘gutpela wokboi’ na ol i wok yet long givim ol kaikai bilong spirit long lain bilong God na stiaim ol, olsem na ol manmeri i laik kamap sipsip ol i gat rot yet bilong mekim gut long dispela lain, olsem ‘bikpela lain planti manmeri tru bilong olgeta lain man na olgeta kantri na olgeta kain skin’ i bin mekim.​—⁠KTH 7:​9, 14.

¹⁵ Tasol ol manmeri i bin mekim wanem kain pasin long ol brata bilong Krais na long sampela milion arapela sipsip i pas wantaim ol olsem wanpela lain sipsip tasol? Planti man ol yet i no bin mekim nogut long ol mausman bilong Krais, tasol ol i no bin mekim gut long ol tu. Ol manmeri i kain olsem meme ol i laikim pasin nogut bilong dispela graun na ol i sakim tok bilong Kingdom, maski man i autim stret long ol o ol i harim long narapela rot. (1 Jon 2:​15-17) Tasol yumi no ken skelim husat ol i sipsip na husat ol i meme. God i makim Jisas i stap jas na em bai skelim.​—⁠Mak 2:8; Luk 5:22; Jon 2:​24, 25; Rom 14:​10-12; 1 Korin 4:⁠5.

Wanem Samting Bai Painim Dispela Tupela Lain?

¹⁶ Taim Jisas i skelim pinis ol sipsip, bai em i tok: “Yupela i gat blesing bilong Papa bilong mi. . . . Yupela kam kisim kingdom Papa i bin redim na makim bilong yupela pinis, long taim graun i kamap nupela yet.” Em i mekim gutpela tok tru long ol: “Yupela kam”! Kam kisim wanem samting? Laip i stap oltaim. Bilong pinisim tok piksa em i tok: “Ol stretpela manmeri bai i kisim laip i stap oltaim oltaim.”​—⁠Matyu 25:​34, 46.

¹⁷ Long tok piksa bilong ol wokboi i kisim mani, Jisas i kolim ol samting ol manmeri bilong mekim wok king wantaim em long heven ol i mas mekim. Tasol long dispela tok piksa em i makim ol samting ol manmeri i stap aninit long Kingdom ol i mas mekim. (Matyu 25:​14-23) Em i tok klia olsem ol sipsip bai kisim laip long graun aninit long Kingdom bilong em, long wanem, ol i bin givim bel olgeta long helpim ol brata bilong em. Bai ol i stap long Paradais long graun​—⁠em God i redim dispela bilong ol “stat long taim God i mekim kamap dispela graun,” em ol manmeri em inap baim bek ol.​—⁠Luk 11:​50, 51.

¹⁸ Tasol taim Jisas i skelim pasin bilong ol meme, em i mekim narapela kain tok, olsem: “Orait na king bai i tokim ol lain i stap long han kais olsem, ‘Yupela manmeri bilong lus, yupela klia long mi na yupela go long paia i no save dai, em dispela paia ol i redim pinis bilong Satan wantaim ol ensel bilong en. Long wanem, bipo mi stap hangre, na yupela i no givim kaikai long mi. Mi dai long wara, na yupela i no givim wara long mi. Mi man bilong narapela ples, na yupela i no bringim mi i go long haus bilong yupela. Mi no gat laplap, na yupela i no givim laplap long mi. Mi gat sik, na mi stap long kalabus, na yupela i no kam lukim mi.’ Na bai ol tu i bekim tok bilong en olsem, ‘Bikpela, long wanem taim mipela i lukim yu i stap hangre, o yu dai long wara, o yu man bilong narapela ples, o yu no gat laplap, o yu gat sik, o yu stap long kalabus, na mipela i no mekim gut long yu?’ Na em bai i bekim tok bilong ol olsem, ‘Mi tok tru long yupela, samting yupela i no bin mekim long wanpela bilong ol dispela manmeri i no gat nem liklik, ol dispela samting yupela i no bin mekim long mi tu.’ ”​—⁠Matyu 25:​41-45.

¹⁹ Ol man i skul gut long Baibel ol i save, dispela tok i no makim olsem ol meme i gat tewel na tewel bai kisim pen long paia oltaim oltaim. Ol man i gat laip; ol i no gat tewel. (Stat 2:7; Saveman 9:​5, 10; Esekiel 18:⁠4) Taim Jas i tok ol meme bai go long “paia i no save dai,” dispela i makim olsem bai ol i bagarap na pinis olgeta na ol i no inap kirap bek; Satan na ol ensel bilong em tu bai pinis olgeta olsem. (KTH 20:​10, 14) Dispela Jas God i makim em i mekim narapela narapela tok long dispela tupela lain. Em i tokim ol sipsip: “Yupela kam”; em i tokim ol meme: “Yupela klia long mi.” Ol sipsip bai “kisim laip i stap oltaim oltaim”; ol meme bai “kisim pe nogut”​—⁠bai ol i lus olgeta.​—⁠Matyu 25:46.b

Yumi Gat Wanem Wok?

²⁰ Ol 4-pela aposel i bin harim bekim bilong Jisas em i tok long mak bilong taim em i kam bek na las de bai kamap, na nau i gat planti samting ol i mas tingim. Ol i mas was i stap na was gut. (Matyu 24:42) Na ol i mas autim tok olsem Mak 13:10 i tok. Ol Witnes Bilong Jehova i wok strong long mekim dispela wok long nau.

²¹ Tasol nau yumi kisim nupela save long tok piksa bilong ol sipsip na meme na yumi gat wanem wok? Ol manmeri i wok long bruk long tupela lain. Sampela i bihainim ‘bikpela rot i go long ples bilong lus,’ na sampela i wok long i stap long ‘liklik rot i go long laip.’ (Matyu 7:​13, 14) Tasol taim bilong Jisas long skelim ol manmeri i no kamap yet; bihain bai em i skelim ol long kot na tok ol i sipsip o meme. Taim Pikinini Bilong Man i kam olsem Jas, em bai tok planti Kristen tru​—⁠olsem bikpela lain sipsip i dediket long God​—⁠ol inap winim laspela hap bilong “bikpela hevi” na i stap long nupela taim. Dispela i mas mekim yumi i amamas long nau. (KTH 7:​9, 14) Tasol planti planti manmeri bilong “olgeta lain man” bai kamapim klia olsem ol i man bilong bikhet olsem meme. Ol bai “i go bilong kisim pe nogut.” Bai ol i pinis olgeta. Gutpela taim bai kamap long graun!

²² Tok piksa i makim olsem taim bilong skelim ol lain manmeri i klostu. Tasol long dispela taim nau wanpela bikpela wok i kamap. Yumi ol Kristen i mekim wok bilong helpim ol man long kisim laip​—⁠wok yumi mekim long autim tok i save brukim ol man i go tupela lain. (Matyu 10:​32-39) Pol i tok: “ ‘Olgeta manmeri i askim Bikpela long helpim ol, em bai i kisim bek ol.’ Tasol sapos ol i no bilip long em, olsem wanem bai ol i askim em long helpim ol. Na sapos ol i no harim tok long em, olsem wanem bai ol i bilip long em? Na sapos i no gat wanpela i autim tok long ol, olsem wanem bai ol i harim?” (Rom 10:​13, 14) Wok bilong yumi long autim tok long ol man em i go kamap long 230 samting kantri; yumi tokim ol man long nem bilong God na long tok bilong em long kisim bek ol. Ol brata bilong Krais, em God i makim ol long spirit holi, ol i go pas yet long mekim dispela wok. Na nau inap 5 milion arapela sipsip i wok wantaim ol. Ol manmeri long olgeta hap i harim dispela tok ol brata bilong Jisas i autim na ol i bilip.

²³ Taim yumi go long ol haus o yumi autim tok long kain kain taim na ples, dispela i givim rot long planti man moa bilong harim tok. Sampela i kisim save long ol Witnes Bilong Jehova na tok bilong ol long narapela rot em yumi no save long en. Taim Jisas i kirap na skelim ol manmeri long kot, yu ting em bai tingim pasin bilong planti manmeri bilong wanpela lain na tok olgeta manmeri bilong dispela lain i gat asua? Yu ting em bai skelim ol pikinini long ol samting papamama yet i bin mekim? Yumi no save, olsem na yumi no ken askim nabaut long dispela. (Skelim wantaim 1 Korin 7:14.) Long nau planti manmeri i pasim yau na sakim tok yumi autim long ol, o ol i mekim ol tok bilas, o ol i poromanim ol narapela man long mekim nogut long lain bilong God. Olsem na nau em i bikpela taim bilong ol; nogut ol i wok long kamap ol man em long taim bilong kot bai Jisas i tok ol i meme.​—⁠Matyu 10:22; Jon 15:20; 16:​2, 3; Rom 2:​5, 6.

²⁴ Tasol gutpela tru, planti manmeri i save harim tok, na ol i stadi long Baibel, na ol i kamap Witnes Bilong Jehova. Sampela man nau ol i olsem meme, ol inap tanim bel na kamap olsem sipsip. Bikpela samting em olsem: Ol manmeri nau ol i harim tok na mekim ol wok bilong helpim lain remnan bilong ol brata bilong Krais, ol i mekim ol samting em inap helpim ol long winim kot, na klostu nau, taim Jisas i sindaun long sia king bilong em bilong mekim kot, bai em i putim ol i stap long han sut bilong em. Ol dispela manmeri i kisim blesing long nau na bai ol i kisim yet. Olsem na dispela tok piksa i mas kirapim yumi long wok strong moa long wok Kristen. Nogut taim i pinis. Olsem na yumi laik mekim bikpela wok inap tru long strong bilong yumi bambai yumi inap helpim planti moa long harim tok na bilip. Na bai Jisas yet i skelim, ol i bilong kisim strafe o kisim laip oltaim.​—⁠Matyu 25:⁠46.

[Ol Futnot]

Yu Inap Tingim?

◻ Wanem ol tok bilong Matyu 24:​29-31 na Matyu 25:​31-33 i wankain na i kamapim klia olsem tok piksa bilong ol sipsip na meme i makim taim bihain? Em i makim wanem taim bihain?

◻ Husat ol dispela brata bilong Jisas “i no gat nem liklik”?

◻ Tok bilong Jisas long “ol stretpela manmeri” i helpim yumi olsem wanem long save long lain ol i makim na lain ol i no makim?

◻ Truim bilong tok piksa bai kamap long bihain, tasol olsem wanem wok autim tok bilong yumi long nau em i bikpela samting na yumi mas mekim hariap?

[Askim Bilong Stadi]

1, 2. Bilong wanem yumi mas tingim tok piksa bilong ol sipsip na ol meme?

3. Taim bikpela hevi i kirap pinis, wanem samting bai kamap kwiktaim, olsem Jisas i tok pastaim?

4. Long kirap bilong tok piksa bilong ol sipsip na ol meme, i gat wanem tok long Jisas? Tok piksa i stori long husat moa?

5. Olsem wanem yumi inap save long “ol brata” bilong Jisas?

6. Husat ol dispela brata bilong Jisas “i no gat nem liklik”?

7, 8. Jisas i tok wanem long ol sipsip? Dispela i givim wanem save long yumi long ol sipsip?

9. Olsem wanem na dispela tok piksa i no makim Taim Bilong Wan Tausen Yia?

10, 11. (a) Olsem wanem i no stret yumi ting olgeta manmeri i mekim gutpela pasin long ol brata bilong Jisas ol i bilong lain sipsip? (b) I stret ol sipsip i makim husat?

12. I gat wanem as na ol sipsip i tokim Jisas, ‘Wanem taim mipela i bin mekim gut long yu?’

13. Bilong wanem sampela manmeri olsem meme bai kirap kolim Jisas “Bikpela”?

14. Jisas bai tingim wanem samting na skelim ol sipsip na ol meme?

15. (a) Planti ol i bin mekim wanem na dispela i makim olsem ol i meme? (b) Bilong wanem yumi mas abrusim pasin bilong skelim man na tok em i sipsip o meme?

16, 17. Wanem samting bai painim ol sipsip long bihain?

18, 19. (a) Jisas bai tok ol meme i mas kisim wanem pe? (b) Olsem wanem yumi inap save ol meme i no ken kisim pen oltaim oltaim?

20, 21. (a) Ol Kristen i gat wanem bikpela wok ol i mas mekim? (b) Long nau ol man i bruk olsem wanem? (c) Taim truim bilong tok piksa bilong ol sipsip na meme i wok long kamap, olsem wanem long ol manmeri?

22, 23. Tok piksa i makim taim bihain, orait olsem wanem wok bilong yumi bilong autim tok long nau em i bikpela samting?

24. (a) Bilong wanem i bikpela samting olgeta wan wan manmeri i mas harim tok yumi autim na ol i mas bilip? (b) Dispela stadi i helpim yu yet long ting olsem wanem long wok bilong yu long autim tok?

[Blok/Piksa long pes 24]

OL TOK I WANKAIN

Matyu 24:​29-31 Matyu 25:​31-33, NW

Bikpela hevi i kirap pinis na Pikinini Bilong Man i kam

Pikinini Bilong Man i kam

Kam wantaim bikpela lait Kam long bikpela lait na

sindaun long sia king bilong

en

Ol ensel i stap wantaim em Ol ensel i kam wantaim em

Olgeta lain manmeri i lukim em Olgeta lain manmeri i kam

bung; ol meme i kot

laspela samting (bikpela

hevi i pinis)

[Kredit Lain]

Garo Nalbandian