Bikpela Lain i Lotu Tru Long God—Ol i Kam We?

“Mi lukim planti manmeri tru . . . ol i bilong olgeta lain man na bilong olgeta kantri na bilong olgeta kain skin na bilong olgeta tok ples. Ol i sanap i stap long pes bilong sia king na long ai bilong Pikinini Sipsip.”—KTH 7:9

KLOSTU long yia 100, long piksa aposel Jon i lukim ol gutpela samting tru i kamap, em ol i insait long ol samting God i laik mekim bilong kamapim laik bilong em. Sampela samting Jon i lukim long piksa, truim bilong en i wok long kamap long nau. Truim bilong sampela moa bai kamap liklik taim. Olgeta dispela samting i insait long ol laspela samting Jehova bai mekim bilong mekim gut nem bilong em long ai bilong olgeta man na ensel. (Esekiel 38:23; KTH 4:11; 5:13) Na tu, i stap bilong yumi olgeta wan wan long bihain i insait long ol dispela samting Jon i lukim long piksa. Tasol olsem wanem i stap bilong yumi i insait long ol dispela samting?

² Long namba 4 piksa bilong Kamapim Tok Hait, Jon i lukim ol ensel i holimpas ol win bilong graun na bai i no ken bagarapim ol samting inap long taim ol i putim mak long pes bilong “ol wokman bilong God bilong yumi.” Orait nau Jon i lukim wanpela samting em i kirap nogut long en​—⁠em “planti manmeri tru ol i bung i stap, na i no inap man i kaunim namba bilong ol. . . . Ol i bilong olgeta lain man na bilong olgeta kantri na bilong olgeta kain skin na bilong olgeta tok ples,” na ol i wanbel long lotuim Jehova na litimapim nem bilong Pikinini bilong em. Ensel i tokim Jon, dispela lain ol bai winim taim bilong bikpela hevi. (KTH 7:​1-17) Husat ol dispela “wokman bilong God”? Na husat bai insait long dispela lain “planti manmeri tru” i abrusim bagarap long taim bilong bikpela hevi? Bai yu insait long dispela lain?

‘Ol Wokman Bilong God’ i Husat?

³ Inap 4-pela mun samting paslain long taim Jisas i dai, em i tok em yet em i “gutpela wasman” na lain bilong em ol i “sipsip,” na em bai lusim laip bilong em yet bilong helpim ol. Em i tok piksa long ol sipsip em i bin bungim ol na ol i stap insait long wanpela banis sipsip na em i lukautim gut ol. (Jon 10:​1-18)a Na tru tumas, long pasin sori Jisas i bin lusim laip bilong em bilong helpim ol sipsip bilong em, na dispela ofa i olsem pe bilong baim bek ol na bai ol i ken lusim kalabus bilong sin na dai.

⁴ Tasol pastaim, Jisas, olsem Gutpela Wasman, em i bungim ol man bilong kamap disaipel bilong em. Jon Bilong Baptais, em dispela “wasman bilong dua” long tok piksa bilong Jisas, em i bringim ol namba wan man bilong dispela lain i kam long Jisas. Jisas i laik painim ol man i amamas long kam insait long lain ‘pikinini bilong Abraham.’ (Stat 22:18; Galesia 3:​16, 29) Em i wok long kamapim laik long bel bilong ol long laikim tru Kingdom, na em i tokim ol long em bai go na redim ples bilong ol long haus bilong Papa bilong em long heven. (Matyu 13:​44-46; Jon 14:​2, 3) Olsem na em i tok: “Stat long taim Jon Bilong Baptais i autim tok na i kam inap nau, ol strongpela man . . . i bin wok strong long kisim kingdom bilong heven.” (Matyu 11:12) Ol man i bihainim em bilong kisim Kingdom, ol i insait long dispela banis sipsip em Jisas i toktok long en.

⁵ Kamapim Tok Hait 7:​3-8 i toktok long ol man i wok strong long kisim Kingdom bilong heven na i kolim ol olsem ‘ol wokman bilong God.’ (Lukim 1 Pita 2:​9, 16.) Olsem wanem? Ol Juda bilong skin tasol i insait long dispela lain 144,000? Ol man insait long banis sipsip long tok piksa bilong Jisas, olgeta i Juda tasol? Nogat tru. Ol i bilong lain Israel spirit bilong God, na olgeta i insait wantaim Krais long lain “pikinini” bilong Abraham. (Galesia 3:​28, 29; 6:16; KTH 14:​1, 3) Tasol bihain bai dispela lain 144,000 em inap pinis. Orait, olsem wanem nau? Olsem Baibel i tok profet pinis, ol narapela​—⁠em planti manmeri tru​—⁠ol bai kam bung wantaim ol dispela Israel bilong spirit long lotuim Jehova.​—⁠Sekaraia 8:⁠23.

“Ol Arapela Sipsip”—Em Ol Kristen Bilong Ol Narapela Lain?

⁶ Orait Jisas i stori pinis long wanpela banis sipsip long Jon 10:​7-15, na nau em i stori long narapela lain. Em i tok: “Mi gat ol arapela sipsip tu, na ol i no bilong dispela banis. Mi mas bringim ol dispela sipsip tu i kam. Na bai ol i harim maus bilong mi. Na bai i gat wanpela lain sipsip tasol na wanpela wasman tasol bilong ol sipsip.” (Jon 10:16) Husat dispela “ol arapela sipsip”?

⁷ Sampela man i ting ol dispela arapela sipsip em ol manmeri bilong ol narapela lain ol i kamap Kristen, tasol ol man insait long banis sipsip yumi stori pinis long en, ol i bilong lain Juda tasol, em ol i aninit long Lo, na tupela lain wantaim i bilong i go long heven. Tasol Jisas i kamap insait long lain Juda, olsem na em i aninit pinis long Lo. (Galesia 4:⁠4) Na tu, ol man i ting ol arapela sipsip i olsem ol manmeri bilong ol narapela lain em ol bai kisim laip long heven, ol i no tingim bikpela samting God i laik mekim bilong kamapim laik bilong em. Taim Jehova i wokim namba wan man na meri na putim ol long gaden Iden, em i kamapim klia laik bilong em, olsem ol man i mas kamap planti long graun, na olgeta hap graun i mas kamap olsem paradais, na ol man bilong lukautim graun ol i ken i stap oltaim oltaim​—⁠sapos ol i daun na bihainim tok bilong Man bilong wokim ol.​—⁠Stat 1:​26-28; 2:​15-17; Aisaia 45:⁠18.

⁸ Taim Adam i mekim rong, dispela i no daunim laik bilong Jehova. Long pasin sori God i wokim rot bambai ol pikinini bilong Adam i ken kisim ol samting Adam i no bin amamas long kisim. Jehova i tok profet long em bai kamapim wanpela “pikinini,” em man bilong kisim bek ol, na long rot bilong em ol manmeri bilong olgeta lain bai kisim blesing. (Stat 3:15; 22:18) Tasol dispela tok promis i no makim olsem olgeta gutpela man long graun bai go long heven, nogat. Jisas i skulim ol disaipel long beten olsem: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:​9, 10) Klostu long taim Jisas i mekim tok long Jon 10:​1-16, em i tokim ol disaipel olsem Papa bilong em i laik givim Kingdom long wanpela “liklik lain sipsip” tasol. (Luk 12:​32, 33) Olsem na taim yumi kaunim tok piksa bilong Jisas olsem em i Gutpela Wasman na em bai lusim laip bilong em bilong helpim ol sipsip, yumi no ken lusim tingting long ol dispela planti manmeri moa Jisas i bringim ol i kam, em ol i bilong i stap long graun aninit long Kingdom.​—⁠Jon 3:⁠16.

⁹ Bipo, long yia 1884, Wastaua i kamapim klia olsem ol arapela sipsip em ol manmeri i gat rot long i stap long graun taim ol samting i kamap long en bilong truim laik bilong God bilong pastaim tru. Ol dispela Sumatin Bilong Baibel bipo ol i save, sampela bilong ol dispela arapela sipsip em ol manmeri i bin i dai taim Jisas i no kirap yet long mekim wok bilong God long graun. Tasol i gat sampela samting ol i no klia gut long en. Ol i ting wok bilong bungim ol arapela sipsip bai kamap taim olgeta man God i bin makim ol long spirit holi ol i go pinis long heven. Tasol ol i save tru olsem ol arapela sipsip i no ol manmeri bilong ol narapela lain tasol em ol i kamap Kristen. Ol Juda wantaim ol narapela lain na skin ol i gat rot long kam insait long lain bilong ol arapela sipsip.​—⁠Skelim wantaim Aposel 10:​34, 35.

¹⁰ Ol man i laik i stap insait long lain bilong ol arapela sipsip, ol i mas mekim wankain pasin olsem Jisas i bin kolim long tok piksa bilong em​—⁠maski ol i bilong wanem lain na skin, ol i mas save, Krais Jisas em dispela Gutpela Wasman. Ol i mas mekim pasin daun na larim em i go pas na soim rot long ol, olsem ol sipsip tru i save mekim. (Song 37:11) Olsem “liklik lain sipsip” i mekim, ol tu i mas “save long maus bilong [gutpela wasman]” na ol i no ken bihainim ol narapela man i laik givim narapela kain tok long ol. (Jon 10:4; 2 Jon 9, 10) Ol i mas pilim tru bikpela samting Jisas i bin mekim, em i bin lusim laip bilong em bilong helpim ol sipsip bilong em, na ol i mas bilip tru long dispela ofa bilong em. (Aposel 4:12) Ol i mas “harim” maus bilong Gutpela Wasman taim em i tokim ol long mekim wok holi bilong Jehova tasol, na ol i mas wok long painim Kingdom pastaim, na i stap narapela kain long ol man bilong dispela graun, na narapela i mas laikim tru narapela. (Matyu 4:10; 6:​31-33; Jon 15:​12, 13, 19) Olsem wanem? Yu save mekim ol dispela samting i olsem mak bilong ol arapela sipsip bilong Jisas? Yu laik insait long dispela lain? Ol man i kamap olsem ol arapela sipsip bilong Jisas, ol i gat rot long pas gut wantaim em, olsem pren tru bilong ol. Em gutpela samting tru!

Daun Long Kingdom

¹¹ Sampela mun bihain long taim Jisas i mekim dispela tok piksa, em i stap gen long Jerusalem. Em i sindaun long maunten Oliv na haus lotu i stap long hap daunbilo, na em i tokim ol disaipel long ol samting bai kamap olsem ‘mak bilong taim em i laik i kam bek na dispela graun i laik pinis.’ (Matyu 24:⁠3) Long dispela taim tu em i toktok long bungim ol sipsip. Em i tok: “Taim Pikinini Bilong Man i kam bek olsem king wantaim olgeta ensel, orait em bai i sindaun long sia king bilong en. Na olgeta lain manmeri bai ol i kam bung long pes bilong em. Na em bai i tilim ol na putim ol long tupela lain, olsem wasman i save tilim ol sipsip i go long hap na ol meme i go long hap. Em bai i putim ol sipsip long han sut bilong en, na ol meme long han kais.” Long dispela tok piksa Jisas i kamapim klia olsem em bai skelim ol man long ol samting ol i bin mekim long ol “brata” bilong em. (Matyu 25:​31-46) Husat ol dispela brata bilong Jisas? Em ol Kristen God i bin makim long spirit holi, olsem na ol i “pikinini bilong God.” Jisas em i namba wan Pikinini bilong God, olsem na ol i brata bilong Krais. Em ol dispela ‘wokman bilong God’ Kamapim Tok Hait 7:3 i tok long en, em dispela lain God i bin kisim ol namel long ol man bilong graun na bai ol i stap wantaim Krais long Kingdom.​—⁠Rom 8:​14-17.

¹² Pasin ol narapela man i mekim long dispela lain bilong kisim Kingdom em i bikpela samting tru. Tingting bilong yu long dispela lain i wankain olsem tingting bilong Krais Jisas na Jehova? (Matyu 24:​45-47; 2 Tesalonaika 2:13) Tingting bilong man long dispela lain God i bin makim ol, dispela i kamapim tingting bilong em long Krais Jisas na Papa bilong em, em King bilong heven na graun.​—⁠Matyu 10:40; 25:​34-46.

¹³ Wastaua bilong Ogas 1884 i tokaut stret olsem ol “sipsip” long dispela tok piksa em ol man i gat tingting long i stap oltaim long graun. Na long dispela taim ol i save, ol samting bilong dispela tok piksa bai kamap taim Krais i kamap King pinis long heven. Tasol ol i no klia gut long wanem taim em bai kirap na tilim ol man i go tupela lain, o dispela wok bai stap inap hamas yia samting.

¹⁴ Tasol long wanpela kibung i kamap long 1923, presiden bilong Sosaiti Was Taua long dispela taim, em J. F. Rutherford, i mekim wanpela tok i kamapim klia taim bilong ol samting bai kamap bilong truim tok piksa bilong ol sipsip na meme. Bilong wanem? Wanpela as i olsem: Dispela tok piksa i makim olsem ol brata bilong King​—⁠olsem sampela bilong ol​—⁠ol bai stap yet long graun. Namel long ol man, dispela lain bilong em God i bin makim long spirit holi, ol tasol inap holim dispela nem olsem brata bilong em. (Hibru 2:​10-12) Dispela lain i no ken i stap long graun long Taim Bilong Wan Tausen Yia olgeta na bai ol man inap mekim gut long ol olsem Jisas i bin tok, nogat.​—⁠KTH 20:⁠6.

¹⁵ Long dispela tok long 1923, ol i laik kamapim klia husat ol dispela man i gat pasin olsem sipsip o meme, olsem Jisas i stori long en. Tasol ol i mas kisim gut save long ol narapela samting pastaim na bai ol inap kisim gut insait bilong dispela tok piksa. Long ol yia i kam bihain, Jehova i wok long givim save long ol wokman bilong em long ol dispela bikpela samting, olsem: Long 1927 ol i save, dispela “wokboi i gat gutpela tingting” em olgeta Kristen God i bin makim long spirit holi na ol i stap long graun. Na long 1932 ol i kisim save olsem ol man olsem sipsip i mas strongim bel na bung wantaim ol dispela wokman bilong Jehova, olsem Jonadap i bin mekim long Jehu. (Matyu 24:45; 2 King 10:15) Long dispela taim ol i tokim ol man i olsem sipsip long givim tok bilong Kingdom long ol narapela man, olsem Kamapim Tok Hait 22:​17 i tok. Sapos ol i pilim tru ol gutpela samting Kingdom bai mekim, bai ol i no tingting tasol long mekim gutpela pasin long ol brata bilong Bikpela​—⁠ol bai kirap na givim ol yet long Jehova long rot bilong Krais, olsem dediket, na bung wantaim lain bilong em, em God i bin makim ol, na givim bel long mekim dispela wok em lain bilong Krais i mekim. Olsem wanem long yu? Yu mekim olsem? Ol man i mekim dispela wok, King bai tokim ol: “Yupela i gat blesing bilong Papa bilong mi . . . yupela kam kisim kingdom Papa i bin redim na makim bilong yupela pinis, long taim graun i kamap nupela yet.” Em nau, ol i gat rot long kamap gutpela olgeta na i stap oltaim oltaim long graun aninit long Kingdom.​—⁠Matyu 25:​34, 46.

‘Bikpela Lain’—Ol i Laik Go We?

¹⁶ Pastaim ol wokman bilong Jehova i ting dispela bikpela lain olsem planti manmeri tru bilong Kamapim Tok Hait 7:​9, 10 i no dispela lain sipsip em Jon 10:16 na Matyu 25:33 i tok long en. Baibel i tok ol i “sanap long pes bilong sia king,” olsem na ol i bin ting dispela lain bai stap long heven, tasol ol i no ken sindaun long ol sia king na mekim wok king wantaim Krais​—⁠ol bai stap olsem nambatu lain tasol na sanap long pes bilong sia king. Ol i bin ting, dispela lain i no bin i stap gut tru long God olsem ol narapela, na ol i no bin daunim olgeta laik bilong ol. Tasol long 1935 ol i stretim dispela tingting.b Ol i skelim tok bilong Kamapim Tok Hait 7:9 wantaim Matyu 25:​31, 32 na nau ol i save, ol man i stap hia long graun ol inap “sanap long pes bilong sia king.” Na ol i tokaut tu olsem God i no gat tupela kain lo bilong i stap gut long em. Olgeta man i laik bai em i orait long ol, ol i mas i stap gut long em na holimpas bilip.​—⁠Matyu 22:​37, 38; Luk 16:⁠10.

¹⁷ Inap planti yia lain bilong Jehova i bin toktok long ol tok promis bilong God long dispela graun. Samting ol i ting bai kamap long 1925 samting, dispela i as na ol i tokaut olsem “Planti Milion Man i Stap Nau Ol i No Ken i Dai.” Planti man i bin kisim tok i tru long dispela taim, spirit holi i givim tingting long ol long i go long heven. Tasol bihain long 1935 bikpela senis i kamap. Tru, i no olsem Wastaua i no laik tingim laip oltaim ol man inap kisim long graun, nogat. Inap planti yia ol wokman bilong Jehova i bin toktok long dispela samting, na ol i wok long painim ol man i wankain olsem dispela lain Baibel i stori long en. Tasol long taim Jehova i makim, em i stiaim ol samting bambai ol manmeri bilong dispela bikpela lain ol i ken kamap ples klia.

¹⁸ Ol ripot bilong ol man i bin bung long Memorial i kamapim klia olsem inap planti yia klostu olgeta man i kam long Memorial ol i kisim bret na wain. Tasol 25 yia bihain long 1935, planti moa yet i bung long Memorial bilong tingim dai bilong Krais​—⁠long olgeta wan handet wan handet i bung, wanpela tasol i kisim bret na wain. Husat dispela narapela lain? Em ol manmeri ol i gat rot long i stap insait long dispela lain “planti manmeri tru.” Taim bilong Jehova i kamap pinis long bungim na redim ol bilong abrusim bagarap long taim bilong bikpela hevi klostu i laik kamap. Olsem Baibel i tok, ol i bilong ‘olgeta lain na olgeta kain skin na olgeta tok ples.’ (KTH 7:⁠9) Ol i wok strong long mekim dispela wok Jisas i tok long en, olsem: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”​—⁠Matyu 24:⁠14.

[Ol Futnot]

Yu Laik Bekim Wanem Tok?

◻ Bilong wanem yumi mas tingim gut dispela piksa i stap long Kamapim Tok Hait sapta 7?

◻ Olsem wanem yumi save, ol arapela sipsip long Jon 10:16 i no ol manmeri bilong ol narapela lain tasol em ol i kamap Kristen?

◻ Bilong ol i ken wankain stret olsem tok bilong Baibel long ol arapela sipsip, ol man i mas mekim wanem?

◻ Olsem wanem tok piksa bilong ol sipsip na meme i kamapim klia olsem yumi mas daun long lo bilong Kingdom?

◻ Wanem samting i kamap na i makim olsem em i taim bilong Jehova long kirap bungim dispela lain planti manmeri tru bilong Kamapim Tok Hait 7:⁠9?

[Askim Bilong Stadi]

1. Bilong wanem ol tok profet olsem piksa long Kamapim Tok Hait i bikpela samting long yumi ol man bilong nau?

2. (a) Aposel Jon i lukim wanem samting long namba 4 piksa? (b) Wanem ol askim bilong dispela piksa nau bai yumi toktok long en?

3. (a) Long Jon 10:​1-18, Jisas i mekim wanem tok piksa long em i stap olsem wanem wantaim lain bilong em? (b) Taim Jisas i dai olsem ofa, em i opim rot na bai ol sipsip bilong em inap mekim wanem?

4. Husat ol i namba wan lain Jisas i bungim ol olsem sipsip, olsem em i tok long en?

5. (a) Husat dispela ‘ol wokman bilong God’ em Kamapim Tok Hait 7:​3-8 i stori long en? (b) Olsem wanem yumi inap save, planti moa bai ol i kam bung wantaim ol Israel bilong spirit long lotuim God?

6. Jon 10:16 i toktok long wanem samting i mas kamap?

7, 8. (a) Olsem wanem yumi save, dispela tingting olsem ol arapela sipsip em ol manmeri bilong ol narapela lain na ol i kamap Kristen, em i wanpela tingting kranki? (b) God i gat wanem laik long dispela graun na dispela inap helpim yumi long save, husat ol dispela arapela sipsip?

9. Bipo, long 1884, ol Sumatin Bilong Baibel i ting ol arapela sipsip ol i husat?

10. Bilong i stap insait long lain arapela sipsip bilong Jisas, yumi mas mekim wanem?

11. (a) Taim Jisas i kolim ol samting bai kamap olsem mak bilong i stap bilong em, em i tok wanem long ol sipsip na meme? (b) Husat ol dispela brata Jisas i toktok long en?

12. Ol samting ol man i mekim long ol brata bilong Krais, bilong wanem em i bikpela samting tru?

13. Long yia 1884, ol Sumatin Bilong Baibel i gat wanem save long tok piksa bilong ol sipsip na meme?

14. Olsem wanem wanpela tok bilong kibung long 1923 i helpim ol Sumatin Bilong Baibel long save, wanem taim truim bilong dispela tok profet bilong Jisas bai kamap?

15. (a) Wanem ol samting i kamap na i helpim ol Sumatin Bilong Baibel long save gut husat ol dispela sipsip long tok piksa bilong Jisas? (b) Olsem wanem ol sipsip i bin kamapim bel bilong ol, ol i pilim tru ol gutpela samting Kingdom bai mekim?

16. (a) Ol Sumatin Bilong Baibel long bipo i gat wanem tingting kranki long dispela lain “planti manmeri tru” bilong Kamapim Tok Hait 7:9? (b) Wanem taim ol i kisim stretpela tingting long dispela samting? Ol i mekim wanem na dispela i helpim ol long stretim tingting kranki bilong ol?

17, 18. (a) Wanem samting i mekim na bihain long 1935 dispela lain ol i gat tingting long i stap oltaim long graun ol i kamap planti tru? (b) Wanem bikpela wok dispela bikpela lain i wok strong long mekim?