Sapta 15
Tok Bilong Kingdom i Brukim Ol Man i Kamap Tupela Lain
I GAT wanpela bikpela samting yumi olgeta wan wan i mas tingim gut, em olsem: Yumi ting olsem wanem long Kingdom bilong Jehova i stap long han bilong Krais Jisas? Tok bilong dispela Kingdom i brukim ol manmeri bilong olgeta hap i kamap tupela lain, na ol samting olgeta man wan wan i mekim, dispela i makim em i bilong wanem lain. Wanpela lain tasol bai abrusim bagarap i laik painim ol manmeri bilong dispela graun liklik taim bihain.—Matyu 24:40, 41.
2 Jehova i putim pinis Pikinini bilong em, Krais Jisas, i stap king long heven. Long pinis bilong ‘taim bilong ol arapela lain’ long yia 1914, God i givim olgeta lain manmeri long Krais Jisas—olgeta hap graun i bilong em. (Sam 2:6, 8) Dispela Kingdom o gavman, em Jehova i makim Krais i stap King bilong en, em i rot bilong God bilong kamapim gutpela laik bilong em long graun. Olsem na tingting bilong yu long dispela Kingdom, dispela i kamapim bel bilong yu, yu ting olsem wanem long wok king bilong Jehova. Dispela Kingdom o gavman i stap long han bilong Krais, liklik taim bai em i “bagarapim na pinisim” olgeta gavman bilong graun, na bai dispela wanpela gavman tasol i bosim graun. (Danyel 2:44, NW; Revelesen 19:11-21) Taim dispela gavman i kirap mekim graun i kamap Paradais, bai yu stap long dispela Paradais? Bai yu stap wantaim ol manmeri em dispela gavman i stiaim ol i go bilong i stap gutpela olgeta? Jisas i kolim ol samting ol man i mas mekim bambai ol inap kisim dispela gutpela sindaun long bihain.
DISPELA KING NA OL “BRATA” BILONG EM
3 Taim Jisas i tokim ol aposel bilong em long ‘pinis bilong dispela taim,’ em i mekim sampela tok piksa. Long laspela tok piksa em i tok: “Bihain bai Pikinini Bilong Man i kam bek olsem king, na olgeta ensel wantaim em, long dispela taim bai em i sindaun long sia king bilong en. Na olgeta lain manmeri bai ol i bung long pes bilong em. Na em bai i tilim ol na i putim long tupela lain, olsem wasman i save tilim ol sipsip i go long hap na ol meme i go long hap. Em bai i putim ol sipsip long han sut bilong en, na ol meme long han kais.”—Matyu 24:3; 25:31-33.
4 Jisas i kolim em yet olsem “Pikinini Bilong Man,” olsem em i mekim planti taim long dispela tok profet. (Matyu 24:27, 30, 37, 39, 44) Em i kolim dispela nem na dispela i kirapim yumi long tingim driman o piksa Danyel i bin lukim 600 yia paslain long taim Jisas i kam long graun. Dispela driman i makim ol samting i mas kamap long bihain. Profet Danyel i stori long ol samting em i lukim long dispela driman na em i tok: “Long nait mi wok long lukim yet ol samting olsem piksa na mi lukim wanpela man kain olsem pikinini bilong man [Krais Jisas], na em i kam wantaim smok bilong antap; na em i kam insait long ples bilong Man i bin i stap oltaim [God Jehova] na ol i bringim em i kam klostu long dispela Man. Na dispela Man i givim wok king na biknem na kingdom long em, na ol man bilong olgeta hap graun, na olgeta lain man, na ol man i gat kain kain tok ples bai ol i mekim wok bilong em. Em bai i stap king inap long taim bihain bihain; wok king bilong em i no ken pinis. Na kingdom bilong em i no ken bagarap.” (Danyel 7:13, 14, NW; Hibru 2:5-8) Krais i kisim pinis dispela Kingdom. Kirap long yia 1914 em i sindaun long sia king bilong em long heven na mekim wok king. Orait, olsem wanem long yu? Ol samting yu mekim i kamapim long ples klia olsem yu daun tru long dispela Man em God yet i bin putim em i stap King bilong olgeta hap bilong graun?
5 Sapos long maus tasol yumi tok yumi daun long em, dispela i no inap. I no hatwok long yumi tok, ‘Mi bilip long Kingdom bilong God na mi laikim tumas Krais Jisas.’ Tasol long tok piksa bilong ol sipsip na ol meme, Jisas i makim olsem taim em i kamap king long heven bai ol man i no inap lukim em. Orait, wanem samting bai makim ol man i laikim tumas Krais na Kingdom bilong God? Em samting ol i mekim long lain “brata” bilong Krais long graun.—Matyu 25:40, 45.
6 Ol dispela “brata” bilong Krais i husat? Em ol manmeri God i makim ol bilong mekim wok king wantaim Krais long Kingdom bilong heven. Lain bilong ol em inap olsem 144,000; liklik hap lain tasol i stap yet long graun. (Revelesen 14:1, 4) Ol i “kamap nupela gen” long rot bilong spirit bilong God, olsem na ol i stap pikinini bilong God, na long dispela as Baibel i kolim ol olsem ol “brata” bilong Krais Jisas. (Jon 3:3; Hibru 2:10, 11) Long ai bilong Jisas, ol samting ol man i mekim long ol dispela “brata” bilong em o long “wanpela brata” tasol “i no gat nem liklik,” i olsem ol i mekim long em yet.
7 Nau long taim bilong yumi ol dispela “brata” bilong Krais i stap we? Yu ting ol i stap insait long ol lotu bilong graun ol i kolim Kristen? Orait, Jisas i tok wanem long ol disaipel tru bilong em? Jisas i tok: “Ol i no bilong dispela graun, olsem mi no bilong dispela graun.” (Jon 17:16) Orait, olsem wanem long ol misin ol i kolim Kristen na lain bilong ol? Yumi ken tok ol i no bilong dispela graun? Nogat, yumi no ken tok olsem. Ol i save bihainim tingting na pasin bilong ol manmeri bilong dispela graun. Planti man i save ol misin i insait long ol wok politik. Taim ol gavman i wok long kamapim ol lo bilong Yunaitet Nesen long yia 1945, ol lotu Talatala na Katolik na Juda i bung wantaim ol bilong givim tingting long ol. Na long dispela taim ol pop bilong Rom i bin litimapim nem bilong Yunaitet Nesen na ol i tok, ‘em i nambawan rot bilong kamapim gutaim na stretpela pasin,’ na ‘i no gat narapela rot bilong kamapim pasin sekan na gutaim long graun.’ Kaunsil Bilong Ol Misin long Olgeta Hap, em 300 misin i insait long en, em i givim mani bilong helpim sampela lain politik ol i mekim pait bilong daunim gavman long sampela hap. Tasol Krais Jisas i tokim gavena Pailat: “Kingdom bilong mi em i no bilong dispela graun.”—Jon 18:36.
8 Yumi save i gat wanpela lain tasol ol i givim bel tru long Kingdom, na ol i wok strong long autim tok bilong en long olgeta hap bilong graun, na ol i no save insait liklik long ol wok politik. Dispela lain em ol Witnes Bilong Jehova. Namel long ol i gat dispela liklik hap lain bilong ol “brata” bilong Krais ol i stap. Ol i bihainim pasin bilong Bikpela bilong ol wantaim ol aposel bilong em na ol i givim bel long i go long ol taun na ol haus na autim gutpela tok bilong Kingdom bilong God. (Luk 8:1; Aposel 8:12; 19:8; 20:20, 25) Long yia 1919, long Sida Poin, Ohaio, i gat wanpela kibung bilong ol Witnes Bilong Jehova (long dispela taim ol i kolim ol olsem ol Intenesenel Baibel Studen); man bilong mekim tok em i kirapim ol manmeri long tingim nambawan bikpela wok bilong ol, em bilong ‘autim tok bilong gutpela kingdom bilong Krais.’ Na i gat wankain kibung i kamap long yia 1922, na ol i mekim ol tok bilong kirapim ol manmeri i kam bung na bai ol i wok strong long “autim tok, autim tok, autim tok long King na kingdom bilong em.” Ol i painim kain kain rot na ol i wok strong long autim dispela tok long olgeta hap bilong graun i kam inap long nau. (Matyu 24:14) Ol i mekim dispela wok, olsem na yu tu yu bin harim tok bilong Kingdom. Yu harim dispela tok na yu mekim wanem?
‘SAMTING YU MEKIM LONG WANPELA BRATA BILONG MI’
9 Ol “brata” bilong Krais, em spirit holi i bin makim ol, ol i wok strong long autim tok bilong Kingdom na ol i klia olgeta long pasin bilong dispela graun, olsem na kain kain bikpela hevi i bin painim ol. (Jon 15:19, 21) Sampela i gat hangre, o ol i dai long wara, o ol i no gat laplap. Planti ol i bin lusim ples bilong ol na i go mekim wok bilong God long narapela hap na ol i stap olsem ol man bilong narapela ples. Taim ol i mekim wok bilong God, sik i bin painim ol, na sampela ol i kalabus, na sampela em ol birua i bin kilim ol i dai. Ol dispela samting i bin painim ol “brata” bilong Krais i traim bel bilong ol manmeri bilong olgeta lain, olsem: Ol i laikim tumas God na Krais na dispela i kirapim ol long helpim ol dispela man i autim tok bilong Kingdom o nogat? (Matyu 25:35-40; lukim tu 2 Korin 5:20.) I no olsem ol i sori tasol long ol dispela man na ol i mekim. Nogat. Sapos ol i tingim ol i lain bilong Krais na ol i helpim ol, orait long ai bilong King Krais Jisas i olsem ol i mekim gut long em yet.—Mak 9:41; Matyu 10:42.
10 Jisas i tok, ol manmeri i helpim ol “brata” bilong em, ol i olsem “sipsip.” Na ol manmeri i no helpim ol “brata” bilong em, ol i olsem “meme.” Ating ol dispela “meme” bai tok ol i no bin lukim Krais Jisas. Tasol em i bin salim ol wokboi bilong em i go long ol, na ol samting ol dispela wokboi i mekim em i kamapim long ples klia olsem ol i wokboi bilong Krais. Ating sampela “meme” ol i no mekim nogut long ol “brata” bilong Krais, tasol ol i no givim bel long dispela King bilong heven, olsem na bel bilong ol i no kirapim ol long helpim lain bilong em. (Matyu 25:41-45) Ol i holim strong pasin bilong dispela graun em Seten i bosim. Ol “sipsip” tu ol no inap lukim Krais. Tasol ol i narapela kain tru long ol “meme”—ol “sipsip” i no pret long sanap wantaim ol “brata” bilong Krais na helpim ol dispela man ol i autim tok bilong Kingdom bilong God. Ol “sipsip” i no kirap nating na mekim dispela samting; nogat; ol i givim bel pinis long Kingdom bilong God i stap long han bilong Krais Jisas. Olsem na samting ol i mekim i gutpela long ai bilong King.
11 Tasol olsem wanem Krais inap skelim ol manmeri bilong olgeta lain long ol samting ol i mekim long ol “brata” bilong em? Jisas i tok, ol dispela “brata” bilong em ol i bilong kisim Kingdom bilong heven ol i “liklik lain” tasol, a? (Luk 12:32) Planti man ol i no inap bungim wanpela “brata” bilong Krais. Tasol ol “brata” bilong Krais i stap olsem as bilong oganaisesen bilong ol Witnes Bilong Jehova i stap long olgeta hap bilong graun. Long rot bilong dispela oganaisesen, ol man long olgeta hap i harim tok bilong Kingdom na ol i mas tingting—ol i laikim Kingdom bilong God o nogat. Krais i sindaun long sia king long heven na em yet i bosim dispela wok na ol ensel bilong em i wok wantaim em. Long 200 samting kantri na ailan long olgeta hap bilong graun, dispela wok i kamap strong na i go moa yet—maski sampela gavman i tambuim wok bilong autim tok bilong Kingdom. Dispela wok i brukim ol man i kamap tupela lain, na bikpela lain manmeri ol i kirap givim bel long Kingdom bilong God.
12 Ol i mekim wanem na yumi ken save ol i givim bel long Kingdom? Ol i wok wantaim ol manmeri, em spirit holi i bin makim ol, na ol i wok strong long autim tok olsem Kingdom i kirap pinis long mekim wok na liklik taim bai em i pinisim pasin bilong dispela graun. Long dispela rot ol i kamapim long ples klia olsem ol i givim bel long Kingdom bilong Jehova i stap long han bilong Krais, na long pasin sori ol i kirapim ol narapela man tu long mekim olsem. Ol dispela manmeri i gat gutpela bel ol i no tingting tasol long abrusim bagarap. Nogat. Ol i laikim tru Jehova na ol pasin bilong em. Bel bilong ol i pilim tru gutpela pasin em i mekim—em i kamapim Kingdom bilong em na putim Krais i stap King bilong em. Ol i laik tokim ol narapela man long dispela Kingdom bambai Kingdom i ken helpim ol tu. Olsem na ol i givim bel long mekim wok bilong autim tok bilong Kingdom. Ol i ‘painim Kingdom pastaim’ olsem Jisas i tok ol disaipel i mas mekim. Ol i no tingting planti long kisim ol samting bilong skin na putim Kingdom i stap nambatu. Nogat. Olsem na rot i op bilong ol i ken kisim gutpela blesing tru.—Matyu 6:31-33.
BAI YU “KISIM KINGDOM”?
13 Gutpela samting tru bai painim ol “sipsip” Jisas i bin tok piksa long ol. Jisas i sindaun long sia king long heven na em i tokim ol: “Yupela i gat blesing bilong Papa bilong mi! Yupela i kam kisim kingdom Papa i bin redim na makim bilong yupela pinis, long taim graun i kamap nupela yet.” (Matyu 25:34) Kirap long “taim graun i kamap nupela yet,” Jehova i bin tingim gutpela pe em i laik givim long ol dispela “sipsip.” Dispela “taim graun i kamap nupela yet,” i olsem taim Adam tupela Iv i kirap long kamapim ol pikinini ol inap long God i kisim bek ol, olsem Jenesis 3:15, 16 i makim. (Lukim tu Luk 11:50, 51.) Ol i gat rot bilong i stap long Paradais i kamap bek long graun na i stap gutpela olgeta olsem Adam long pastaim. Ol i “kisim kingdom,” tasol ol i no ken i go long heven. Nogat. Long wanem dispela tok piksa i makim ol “sipsip” i narapela lain na ol “brata” bilong King i narapela lain, em ol i bilong kisim Kingdom bilong heven. Olsem na ol “sipsip” bai stap long graun aninit long dispela gavman bilong heven. Dispela tok “kingdom” ol i kisim long tok Grik basileiʹa na wanpela buk i kamapim insait bilong en (Greek-English Lexicon bilong Liddell na Scott) em i tok, dispela tok “kingdom” inap makim tu ol man “i stap aninit long king,” olsem king i bosim ol. Em dispela samting tasol “kingdom” i makim long dispela ves.
14 Ol “meme” i “kisim pe nogut”—bai ol i lus olgeta. Bai ol i pinis olgeta olsem samting i go insait long paia. Tasol long dispela taim bai King Krais Jisas i lukautim ol “sipsip.” (Matyu 25:41, 46; lukim tu Revelesen 21:8.) Ol i no ken i dai. Bai ol i abrusim bagarap long taim bilong bikpela hevi tru na i stap long gutpela “nupela graun”; olgeta samting nogut Seten i bin kamapim long dispela graun bai pinis na i no ken bagarapim “nupela graun.” Ol inap kisim dispela blesing, long wanem nau ol i tingting gut na givim bel long Kingdom.
15 Ol “meme” bai lus olgeta, tasol nogut yu ting dispela tok piksa i makim samting em i mas kamap bihain bihain, ating long dispela 1,000 yia bilong Krais i bosim graun. Nogat. Sapos yumi ting olsem yumi popaia tru. Long wanem dispela tok piksa Jisas i mekim em i hap mak bilong “las taim.” (Matyu 24:3) Ol samting em i stori long en i mas kamap taim em i kisim pinis wok king na taim ol “brata” bilong em i stap yet long graun na karim ol hevi em i tok bai painim ol. Nau yumi stap long dispela taim na i no gat bikpela hap taim moa. Olsem na i bikpela samting yumi mas givim bel tru long Kingdom na helpim ol narapela man long save, ol tu i mas mekim olsem long nau.
[Askim Bilong Stadi]
1. Long nau tok bilong Kingdom i brukim ol man i kamap tupela lain na bilong wanem dispela i bikpela samting long yumi olgeta wan wan?
2. (a) Olsem wanem long Kingdom i stap long han bilong Krais na wok king bilong Jehova? (b) Liklik taim na bai Kingdom i mekim wanem? Orait, yumi mas tingim gut wanem samting?
3. Long Matyu 25:31-33 Jisas i stori long wanem samting?
4. (a) Olsem wanem long dispela tok piksa na tok bilong Danyel 7:13, 14? (b) Gutpela sapos yu tingim wanem askim?
5. Ol man i tok ol i laikim tumas Krais i stap King, Krais i skelim ol olsem wanem?
6. Husat ol i “brata” bilong Krais?
7. Bilong wanem ol “brata” bilong Krais i no insait long ol misin ol i kolim Kristen?
8. (a) Olsem wanem yu inap save long ol “brata” bilong Krais? (b) Ol i tingim wok bilong autim tok bilong Kingdom i bikpela samting o nogat?
9. (a) Olsem wanem long ol samting Matyu 25:35-40 i stori long en na wok bilong autim tok bilong Kingdom? (b) Olsem na wanem samting i traim bel bilong ol manmeri long olgeta hap?
10. (a) Bilong wanem i no gat as long tok bilong ol “meme”? (b) Tasol ol “sipsip” i mekim wanem?
11. (a) Planti man ol i no bin bungim wanpela “brata” bilong Krais, orait olsem wanem Krais inap skelim ol long ol samting ol i mekim long ol “brata” bilong em? (b) Olsem wanem yumi save bai ol inapim tru wok bilong autim tok bilong Kingdom?
12. (a) Ol “sipsip” i mekim wanem na dispela i kamapim long ples klia olsem ol i givim bel long Kingdom? (b) Bilong wanem ol i mekim olsem?
13. (a) Kirap long wanem taim Jehova i bin tingim gutpela pe em i laik givim long ol “sipsip”? (b) Wanem insait bilong dispela tok olsem ol bai “kisim kingdom”?
14. Olsem wanem samting ol “meme” i kisim i narapela kain long samting ol “sipsip” i kisim?
15. (a) Olsem wanem yumi save dispela tok piksa i makim ol samting i kamap long nau? (b) Olsem na wanem wok i bikpela samting tru long nau?