Ol i Litimapim Kingdom!

“Yupela mas singim nupela song long [Jehova] … Yupela mas tokim olgeta lain manmeri olsem, ‘[Jehova] i stap king.’”—SAM 96:1, 10.

1. (a) Kirap long yia 1919 i stret ol i ken singsing na tok wanem? Bilong wanem i stret ol i ken mekim olsem kirap long dispela yia? (b) Long Luk 21:24 Jisas i tok long wanem wok bilong krungutim samting?

KIRAP long yia 1914 i stret ol inap singim song na tok olsem: “Nau taim bilong ol Jentail i pinis. Ol king bilong ol i lus.”a Long Oktoba 1, long yia 1914, Namba Wan Pait Bilong Olgeta Hap i stap pinis inap tupela mun. Dispela tok “taim bilong ol Jentail,” em wanpela tok profet Krais Jisas i mekim bilong makim taim Jerusalem bilong pastaim wantaim haus lotu bilong en i mas bagarap. Jerusalem i bagarap long yia 70 CE. Luk 21:24 i kolim tok bilong Jisas Olsem: “Bai bainat i pinisim ol [ol Juda]. Bai ol birua i kalabusim ol na kisim ol i go i stap namel long olgeta arapela lain. Na lek bilong ol Jentail [ol man bilong ol arapela lain] bai i krungutim Jerusalem, inap long taim bilong ol Jentail i pinis.” (Baibel Authorized Version) Long taim bilong King Devit, Jerusalem i kamap nambawan biktaun bilong lain bilong God, em lain Isrel. God yet i save makim ol king bilong bosim ol Isrel, olsem na ol i kamap olsem wanpela kingdom bilong God long graun. Na biktaun bilong ol, em Jerusalem, makim dispela kingdom. Olsem na Jisas i tok, “lek bilong ol Jentail bai krungutim Jerusalem,” insait bilong dispela tok i olsem: Ol man bilong ol arapela lain bai i krungutim dispela kingdom bilong God long graun em i makim kingdom tru bilong God long heven.

2. (a) Wanem taim dispela wok bilong krungutim i kirap? Ol i mekim olsem wanem? (b) Olsem wanem na Kingdom bilong Krais i no kamap taim Jerusalem i bagarap long yia 70 CE?

² Orait, wanem taim ol i kirap long krungutim dispela kingdom bilong God? I no long yia 70 CE taim ol Rom i bagarapim Jerusalem. Nogat. Planti handet yia bipo “lek bilong ol Jentail” o ol man bilong ol arapela lain i kirap long krungutim Jerusalem, olsem long yia 607 BCE. Long dispela taim ol Babilon i bin bagarapim Jerusalem. Orait, “ol Jentail” i kirap krungutim dispela kingdom bilong God long graun long yia 607 BCE, na taim ol Rom i bagarapim gen Jerusalem long 70 CE, taim bilong “ol Jentail” i no pinis yet. Jisas i save long dispela samting, olsem na em i no tok taim Jerusalem i bagarap long 70 CE wantu kingdom tru bilong God long han bilong Mesaia o Krais bai i kamap. Nogat. “Ol Jentail” o “ol man bilong ol arapela lain” ol i mas krungutim dispela kingdom bilong God long graun i go inap long taim God yet i makim, na bai em i kamapim kingdom tru bilong em long heven.

3. (a) Olsem wanem yumi inap save long ol yia bilong taim bilong ol Jentail, na long pinis bilong dispela taim? (b) Wanem bikpela tok i kamap long 1914?

³ Orait, nau yumi laik save hamas yia i mas lus pastaim. Danyel sapta 4 i makim “sevenpela yia” i mas lus. Tasol dispela “sevenpela yia” i no sevenpela yia tru. Nogat. Dispela “sevenpela yia” i makim bikpela hap taim inap olsem 2,520 yia. Olgeta wan wan yia i gat 360 de, olsem na “sevenpela yia” em inap olsem 2,520 de. Tasol long tok profet bilong Baibel, wanpela de i makim wanpela yia. Olsem na dispela 2,520 de i makim 2,520 yia. Lukim Danyel 4:16, 23, 25, 32.) Taim ol Babilon i bagarapim dispela kingdom bilong God long Jerusalem long yia 607 BCE, long dispela taim “lek bilong ol Jentail” o ol man bilong ol arapela lain i kirap long krungutim Jerusalem, dispela kingdom bilong God. Olsem na taim bilong ol Jentail i mas pinis 2,520 yia bihain, olsem long yia 1914 CE. Long mun Oktoba samting, long yia 1914, taim bilong ol Jentail o ol man bilong ol arapela lain i pinis. Na long dispela taim tu Namba Wan Pait Bilong Olgeta Hap i kirap. Tasol bikpela samting em olsem: Taim dispela “taim bilong ol Jentail” i pinis, kingdom tru bilong God long han bilong Krais em i kamap long heven. Tasol planti bikpela man bilong ol misin bilong Krisendom na sampela man moa ol i no bilip long dispela samting. Olsem na bikpela tok i bin kamap long Kingdom, na yumi olgeta wan wan i mas tingim dispela tok!

4. Taim yumi skelim ol samting i bin kamap yumi save tok bilong husat i stret?

⁴ Orait, husat i bin tokim ol manmeri bilong olgeta hap graun taim bilong ol Jentail bai pinis long yia 1914? Husat i bin tokim ol manmeri long dispela samting planti yia paslain long taim dispela samting i kamap? Em Ol Witnes Bilong Jehova, bipo ol i kolim ol olsem Intenesenel Baibel Stiudens. Long rot bilong Wastaua na sampela buk bilong Sosaiti Was Taua ol i bin autim dispela tok. Olsem wanem? Ol samting i bin kamap olsem Ol Witnes i tok? Tru tumas!

5. (a) Ol man i tok Kingdom i no bin kamap long heven long 1914, yumi ken bekim wanem tok long ol? (b) Ol samting i kamap olsem Luk 21:25-27 i kolim, olsem wanem dispela i soim yumi, taim bilong ol Jentail i pinis long yia 1914?

⁵ Planti planti man long nau ol i no save tingim ol yia God i makim long Baibel, na ol misin bilong Krisendom i tok pait wantaim Ol Witnes na ol i tok, kingdom bilong God i no kamap long heven long 1914. Orait, tok bilong husat i stret? Tok bilong ol dispela bikpela lain birua o tok bilong Ol Witnes? Ol samting i kamap long yia 1914 na bihain long dispela taim i makim kingdom bilong God i kamap long heven long 1914 o nogat? Olgeta samting Jisas i kolim bilong makim taim bilong pinis bilong dispela pasin bilong nau i kamap pinis, olsem na yumi ken bekim tok olsem: Tru tumas kingdom bilong God i bin kamap long heven long yia 1914! Yumi stap 69 yia bihain long dispela taim na yumi lukim ol samting i kamap long graun olsem Jisas i tok profet long en long Luk 21:25-27, Jisas i tok: “Bel bilong olgeta lain man bai i bagarap tru na ol i pret long pairap bilong bikpela si em i bruk bruk long solwara. Planti manmeri bai ol i tingting long ol samting i laik kamap long graun, na bai bel bilong ol i pret tru, na ai bilong ol i raun. Long wanem ol sta samting long skai bai i guria. Dispela i kamap, na bai ol i lukim Pikinini Bilong Man em i kam long wanpela klaut, na em i gat bikpela strong na bikpela lait.” Olgeta samting i kamap long graun i makim taim bilong “ol arapela lain” o taim bilong ol Jentail i pinis long yia 1914. Dispela tok em i wanpela tok i tru bilong kingdom yumi mas holimpas long nau.

6. Long nau ol lain man i pret na tingting planti, tasol olsem wanem na lain bilong Jisas ol i amamas?

⁶ Olsem wanem? Olgeta manmeri i pret long ol samting i kamap long graun? Jisas i tok olgeta manmeri bai pret? Nogat! Jisas i tok lain bilong em ol i no ken pret. Em i tokim ol: “Bihain ol dispela samting i stat long kamap, long dispela taim yupela i mas sanap na litimapim het bilong yupela. Taim bilong God i kisim bek yupela em i kam klostu nau.” (Luk 21:28) Na tu, long Matyu 24:32, 33 Jisas i tok: “Yupela i ken kisim save long diwai fik. Taim han bilong en i gat wara na nupela lip i kamap, yupela i save, taim bilong gutpela san i laik kamap nau. Olsem tasol, bihain yupela i lukim dispela olgeta samting i kamap, orait yupela i ken save, em i kam klostu pinis, na i stap long dua.” (Lukim tu Mak 13:28, 29.) Ol Kristen tru i lukim ol samting i kamap long graun na ol i save, taim bilong God i kisim bek ol em i klostu pinis, olsem na ol i amamas. Ol i no pret na tingting planti olsem ol lain man bilong dispela graun.

Ol i Givim Bel long Kingdom

7, 8. (a) Ol “brata” spirit bilong Krais ol i mekim wanem long Kingdom? Bilong wanem ol i mekim olsem? (b) I gat wanem wok ol i mas mekim?

⁷ Ol dispela Kristen i ting olsem wanem long kingdom bilong God long nau? Lain remnan, em liklik lain “brata” spirit bilong Krais ol i stap yet long graun na ol i bilong kisim wok king wantaim em long heven, ol i givim bel tru long kingdom bilong Jehova i stap long han bilong Krais. (Matyu 25:40) Ol i skelim gut ol mak bilong dispela taim nau na ol i save, dispela Kingdom em longtaim ol Kristen i bin beten long en, em i kamap pinis long heven long 1914. Ol i save, nau em i taim bilong tokim ol man, dispela strongpela gavman bilong heven i kirap pinis long mekim wok bilong en na bai em i pinisim dispela pasin nau i stap long graun na stretim bek nem bilong Nambawan Bikpela God. Ol i gat wok long bihainim tok bilong Jisas, em Jisas i tok:

⁸ “Bai ol i autim dispela gutnius bilong kingdom long olgeta hap bilong graun, bai olgeta lain manmeri i ken harim, na bihain tasol bai las de i kamap.”—Matyu 24:14. Mak 13:10.

“Ol Sipsip” i Sanap We?

9. Olsem wanem ol “brata” bilong Krais i bin bihainim dispela tok bilong em? Wanem samting i bin kamap?

⁹ Krais Jisas, dispela king i winim olgeta narapela king, em i kirap pinis long mekim wok king bilong em. Olsem na lain. bilong em long graun, em spirit holi i makim ol, ol i mas bihainim dispela tok bilong em na autim tok bilong Kingdom long olgeta hap bilong graun. Ol i wok strong long bihainim dispela tok bilong em na ol i bin autim tok bilong Kingdom long 205 hap na long ol ailan. Ol i autim dispela gutpela tok long 174 samting tok ples. Tru, bikpela wok i stap yet, tasol i gat kain kain samting bilong nau yumi inap mekim wok long en bilong autim dispela tok na taim “Las de i kamap” yumi ken save, bai “olgeta lain manmeri” i bin harim.

10, 11. (a) Wok bilong autim tok bilong Kingdom i mekim wanem long ol man? (b) Taim Jisas i laik kolim laspela hap bilong dispela “mak,” em i tok wanem?

¹⁰ Maski ol man i birua long lain bilong Krais, olsem Krais i tok ol bai mekim taim em i kolim “mak” bilong em i kam bek olsem king na dispela taim i laik pinis, tasol lain bilong em i bin autim dispela gutpela tok bilong Kingdom. Na olsem wanem? Sampela man i harim? Dispela wok i brukim ol man i stap tupela lain, olsem ol man i harim na ol i laikim kingdom bilong God, na ol man i birua long Kingdom. Dispela samting i kamap olsem Jisas i tok pinis. Em i kolim ol samting bai kamap olsem “mak” bilong “las taim” na em i mekim wanpela tok piksa, olsem:

¹¹ “Bihain bai Pikinini Bilong Man i kam bek olsem king, na olgeta ensel wantaim em, long dispela taim bai em i sindaun long sia king bilong en. Na olgeta lain manmeri bai ol i bung long pes bilong em. Na em bai i tilim ol na i putim long tupela lain, olsem wasman i save tilim ol sipsip i go long hap na ol meme i go long hap. Em bai i putim ol sipsip long han sut bilong en, na ol meme long han kais. Olsem na king bai i tokim ol man i stap long han sut bilong en, i spik, ‘Yupela i gat blesing bilong Papa bilong mi! Yupela i kam kisim kingdom Papa i bin redim na makim bilong yupela pinis.’”—Matyu 25:31-34.

12. Jisas i kisim dispela tok “Pikinini Bilong Man” long wanem tok profet? Dispela i helpim yumi long save olsem wanem long Kingdom?

¹² Long dispela tok piksa, Jisas i kolim dispela tok “Pikinini Bilong Man” olsem i stap long Danyel sapta 7. Danyel sapta 7 ves 13, 14 i tok: “Mi lukim wanpela man kain olsem pikinini bilong man, na em i kam wantaim smok bilong antap; na em i kam insait long ples bilong Bikpela Man Bilong Bipo, na ol i bringim em i kam klostu long dispela Man. Na Bikpela Man Bilong Bipo i givim wok king na strong na kingdom long em, na bai ol lain man na ol man bilong narapela narapela tok ples, ol i mas daun long em. Wok king bilong em i bilong i stap inap long taim bihain bihain; em i no ken pinis. Na kingdom bilong em i no ken bagarap.”

13. (a) Jisas i stap King long heven na em i mekim wanem long ol manmeri bilong graun? (b) Olsem wanem yumi inap save, Lig ov Nesen em i no olsem Kingdom bilong God i kamap long graun?

¹³ Taim bilong ol Jentail i pinis long yia 1914 na kirap long dispela taim olgeta lain manmeri i bung long pes bilong King Krais Jisas. Em i stap long heven na em inap skelim olgeta manmeri i stap long graun. Em i save, taim Namba Wan Pait Bilong Olgeta Hap i kamap, ol man i no pait bilong helpim Kingdom bilong em! Nogat. Taim dispela pait nogut i pinis, ol i kamapim Lig ov Nesen na Kaunsil Bilong Ol Sios Bilong Krais long Amerika i tok, dispela i olsem “kingdom bilong God i kamap long graun”! Tasol sapos dispela Lig ov Nesen i olsem “kingdom bilong God i kamap long graun,” olsem wanem na i bagarap long taim bilong Namba Tu Pait Bilong Olgeta Hap na ol man i kamapim senis bilong en, em Yunaitet Nesen?

14. (a) Nau yumi olgeta wan wan i mas tingim wanem askim? (b) Yumi mas mekim wanem na bai King inap belgut long yumi? (c) Ol “sipsip” i bin mekim wanem wanem ol samting bilong helpim ol “brata” bilong King?

¹⁴ Tru tumas, ol lain man bilong dispela graun ol i no givim bel long kingdom bilong God em i kamap long heven long 1914. Ol i givim bel long ol gavman samting ol man i bin kamapim. Tasol yumi olgeta wan wan yumi mas askim skin bilong yumi yet, olsem: “Mi yet mi ting olsem wanem long Kingdom?” Yu givim bel long dispela Kingdom olsem “ol sipsip” ol i stap long han sut bilong King Krais Jisas? Dispela King i kolim wanpela samting man i mas mekim bambai God i ken orait long em na em i ken kamap wanpela “sipsip.” Em i mas mekim wanem? Em i mas mekim gut long ol “brata” spirit bilong King Krais Jisas em ol i stap yet long graun na ol i bilong mekim wok king wantaim em long heven. Sapos ol i mekim gut long ol dispela “brata” spirit bilong Krais i olsem ol i amamas long wok bilong autim tok bilong Kingdom dispela lain i mekim. Ol i mekim olgeta samting ol inap mekim bilong helpim dispela wok. Ol i no sem long ol dispela man bilong autim tok bilong Kingdom, maski ol i kalabus tu. Ol i wok long helpim ol bambai ol i ken lusim kalabus, olsem ol i bin mekim long yia 1919. Na ol yet i insait long dispela wok bilong autim tok. Ol i wok wantaim lain remnan long autim gutpela tok bilong Kingdom long ol man, olsem Jisas i tok ol i mas mekim long Matyu 24:14. Ol i autim dispela tok long rot na long ol ples bung na long olgeta haus.

15. (a) Olsem wanem pe ol “sipsip” i kisim i narapela kain long pe ol “brata” bilong Krais i kisim? (b) Olsem wanem dispela i stret wantaim laik bilong God long pastaim? (c) Bilong wanem i mas i gat wanpela Kingdom bilong heven bilong kamapim dispela laik bilong God?

¹⁵ Ol dispela manmeri i kain olsem “sipsip,” ol bai kisim gutpela pe. Bai King i singautim ol i kam “kisim kingdom Papa i bin redim na makim bilong [ol]” (Matyu 25:34) I no olsem ol bai i dai na kirap bek i go long heven wantaim ol “brata” spirit bilong King. Nogat. King i no kolim ol olsem ol “brata” bilong em. Ol i manmeri bilong graun na ol i stap long pes bilong sia king bilong em. Ol bai kisim blesing, long wanem kingdom bilong Krais wantaim ol “brata” bilong em bai blesim ol. Ol bai stap long graun aninit long dispela kingdom na bai graun i kamap gutpela ples paradais gen. Taim God i wokim dispela graun em i laik bai olgeta hap bilong graun i ken kamap gutpela ples paradais. Em i putim man na meri long graun bilong mekim olsem. Maski Adam tupela Iv i mekim rong na sin na i dai i kamap long graun, tasol laik bilong God i no ken lus nating. (Aisaia 55:11) Taim tupela i mekim rong, wantu God i kirap long redim rot bambai wanpela kingdom o gavman bilong heven i ken kamapim bek Paradais long graun. Na em i makim gutpela Pikinini bilong em bilong bosim dispela kingdom, olsem King bilong en. Dispela kingdom o gavman em i bilong heven, olsem na i gat strong bilong pinisim Seten em i as bilong sin na pasin bilong tok giaman, em strongpela ensel nogut.—Jenesis 3:15.

16. (a) Ol “sipsip” i kisim wanem bikpela blesing? (b) Wanem taim ol “meme” i kisim pe nogut na ol i lus olgeta?

¹⁶ Ol manmeri i kain olsem “sipsip” ol bai stap long Paradais long graun aninit long dispela kingdom bilong heven. ‘Bikpela lain manmeri’ ol i olsem “sipsip” bai ol i winim taim bilong pinis bilong dispela pasin bilong nau, olsem na ol i no ken i dai na kirap bek. (Revelesen 7:9; 21:4) Em gutpela samting tru! Bai ol i kamap olsem “ol stretpela man” na bai ol i “kisim laip i stap oltaim oltaim”! Bai ol i lukim “ol meme” i go bilong “kisim pe nogut.” Bai ol i lus olgeta. (Matyu 25:41-46) Dispela samting bai kamap long taim bilong “bikpela hevi tru.” Em bai kamap long “pait bilong bikpela de bilong God I Gat Olgeta Strong,” em Amagedon. (Revelesen 7:14; 16:14-16) Long Amagedon ol manmeri i kain olsem “meme” bai ol i kisim pe nogut; bai ol i pinis olgeta long graun na i no ken i stap laip moa inap long olgeta taim bihain.

17. (a) I gat wanem bikpela askim yu mas tingim long nau? (b) Sapos yu givim bel tru long Kingdom, bai yu inap kisim wanem gutpela blesing?

¹⁷ Yumi inap kisim blesing o kisim pe nogut, olsem na long dispela taim nau i gat wanpela bikpela askim olgeta manmeri bilong graun i mas tingim, em olsem: ‘Yu ting olsem wanem long Kingdom?’ Yu laik i stap long lain bilong “ol sipsip” o long lain bilong “ol meme”? Ol manmeri i givim bel tru long Kingdom bilong God, bihain bai ol inap i stap long Paradais long graun, na ol i ken amamas tru, long wanem ol inap insait long wok bilong stretim bek nem bilong Jehova, em i Nambawan Bikpela God na King i winim olgeta narapela king.—Sam 136:2; Danyel 2:47.

[Futnot]

Taim yu tingim dispela bikpela tok long Kingdom i bin kamap bai yu bekim ol dispela askim olsem wanem?

□ Taim Bilong Ol Jentail o taim bilong “ol man bilong ol arapela lain,” em Luk 21:24 i stori long en, em inap hamas yia?

□ Wanem samting i mas kamap long pinis bilong Taim Bilong Ol Jentail, olsem Luk 21:25-27 i tok?

□ Planti hevi i kamap long nau, tasol Ol Witnes Bilong Jehova i bihainim tok bilong Luk 21:28 na mekim wanem?

□ Ol tok profet bilong Baibel i stori long “Pikinini Bilong Man” i kisim wanem samting? Na taim em i kam ol man i mas mekim wanem?

[Piksa long pes 16]

Dispela tok i stap long buk singsing Hymns of the Millenial Dawn i stret kirap long yia 1914