Yu Ting Olsem Wanem long Kingdom?
LONG nau olgeta manmeri i mas tingting: Ol i laikim Kingdom bilong God o nogat? God i makim Krais Jisas i stap king bilong dispela kingdom. Kirap long yia 1919, long 205 hap, Ol Witnes Bilong Jehova i bin truim wanpela tok profet dispela King i mekim, em olsem: “Na bai ol i autim dispela gutnius bilong kingdom long olgeta hap bilong graun, bai olgeta lain manmeri i ken harim, na bihain tasol bai las de i kamap.”—Matyu 24:14.
Na wanem samting i kamap? Olsem: Olgeta gavman na bos bilong graun i mas tingim Kingdom maski ol i laik tingim o nogat. Na nau yumi save, ol i no laik tingim. Yumi stap long taim ol kingdom bilong graun i laik pinis. Tupela bikpela pait bilong olgeta hap i bin kamap na planti kingdom i pinis na ol nupela narapela narapela kain gavman i senisim ol. Tasol i gat 15 kingdom i stap yet, olsem Yunaitet Kingdom bilong Gret Briten na Noten Ailan, na kingdom bilong Jodan, na kingdom bilong Nepal long Esia, na kingdom bilong Tonga long Saut Pasifik, na kingdom bilong Swasilan long Afrika.
Ol Kingdom Bilong Ol Man Bai Pinis
Liklik taim na bai olgeta kingdom bilong ol man i pinis. I no olsem ol man i no laikim moa dispela kain gavman na bai ol i pinis; nogat; olgeta kain gavman bai pinis. Na bai i gat wanpela gavman tasol i bosim olgeta hap bilong graun, na ol man i no kamapim dispela gavman. Nogat. Tok profet bilong Danyel bilong 2,580 yia bipo i olsem: “Long taim bilong ol dispela king God bilong heven bai kamapim wanpela kingdom i no inap bagarap. Ol narapela lain man i no ken kisim dispela kingdom. Em bai bagarapim na pinisim ol dispela narapela kingdom, na em wanpela bai stap inap long taim bihain bihain.” (Danyel 2:44, NW) Taim Namba Wan Pait Bilong Olgeta Hap kirap long yia 1914 ol samting i no kamap olsem dispela gutpela tok profet bilong Danyel i makim, tasol ol samting i kamap i makim God bilong heven i bin putim King em i makim i sindaun long sia king long heven. God i givim strong long dispela King bilong kamapim ol samting dispela tok profet i makim.
Long nau bagarap i laik painim olgeta gavman bilong graun long han bilong ol. yet tu, long wanem ol i bin wokim kain kain bom nogut. Ol man i gat save long ol samting i kamap long graun long nau ol i toksave olsem: Inap yumi olgeta man na meri na pikinini i bagarap. Ol i lukim yumi stap long dispela taim Baibel kolim olsem “taim bilong pinis” o “las taim.” (Danyel 12:4, NW; 2 Timoti 3:1. Ol lain man i pret long kirapim pait, nogut: namba tri bikpela pait bilong olgeta hap i kirap na olgeta wantaim i bagarap. Ol i laik mekim ol samting bambai ol inap tok olsem “Em i gutaim nau, yumi stap gut.” (1 Tesalonaika 5:3) Liklik taim bai ol tokaut olsem, tasol bai i no olsem ol stap gut wantaim God bilong heven. Nogat. Long wanem kirap long yia 1914 na i kam inap long nau ol gavman bilong graun i bin pait wantaim God. Ol i sakim ol samting God i laik mekim bilong helpim ol man. God i larim ol i stap na nau yumi save, ol i no inap bosim gut dispela graun na helpim olgeta man inap oltaim, na ol samting ol i mekim i no litimapim nem bilong God.
Nambawan Bikpela God i save long taim stret bilong pinisim dispela pasin nogut bilong nau. Long taim stret olsem em i makim pinis bai em i pinisim dispela pasin bilong nau. Long rot bilong Ol Witnes Bilong Jehova olgeta lain man i bin harim tok long dispela samting. Ol i no inap tok, ‘Mipela i no save.’
Man i Bosim o God i Bosim?
Ol lain man, o ol gavman bilong ol, ol i no laikim Kingdom bilong God i stap long han bilong Krais. Ol i laik bai ol man i bosim yet dispela graun. Ol i no laik bai God i bosim. Ol i birua long kingdom bilong God na bihainim “hetman bilong dispela graun,” em Seten. Jisas i tokim ol aposel bilong em: “Hetman bilong dispela graun em i kam nau. Em i no inap mekim wanpela samting long mi.”—Jon 14:30; lukim tu Matyu 4:8-11; 2 Korin 4:4.
Ol lain man i tingting pinis na ol i bikhet i stap. Tasol yumi olgeta wan wan man na meri yumi mas askim skin bilong yumi yet: Mi ting olsem wanem long Kingdom bilong God? Mi laikim dispela Kingdom i bosim graun o nogat? Yumi olgeta yumi mas tingim dispela samting. Yumi no inap i stap nating na abrusim hevi bai i kamap. Nogat. Yumi olgeta yumi mas tingting gut: Mi laikim Kingdom bilong God o mi birua long en?
Planti manmeri nau ol i stap, ol i no bin lukim Namba Wan Pait Bilong Olgeta Hap i kamap long yia 1914; ol i no i stap long dispela taim. Na ol i no bin lukim ol bikpela samting i kamap bihain long dispela taim. Tasol olgeta samting i bin kamap olsem Jisas i kolim bilong makim taim bilong pinis bilong dispela taim nau. Na olgeta lain man inap lukim dispela “mak.” Ol i pilim pinis ol dispela hevi. Matyu sapta 24 na sapta 25 na Mak sapta 13 na Luk sapta 21 i stori long ol samting Jisas i tok bai kamap. Jisas i tok, bikpela pait na hangre na guria bai kamap, na bai ol man i mekim nogut long lain bilong em, na kain kain hevi bai kamap na ol man bai pret na tingting planti, na bai lain bilong Krais i autim dispela “gutnius” bilong kingdom i go inap long taim dispela pasin nogut bilong nau i pinis.
Tru, long taim bilong ol Kristen bilong pastaim, ol Kristen tru i bin autim tok long planti hap bilong Esia na ol i autim tok long Afrika na Yurop tu. Ol i autim tok long dispela Kingdom i laik kamap. Tasol long dispela taim bipo ol Yuropin i no i go yet long hap bilong Not na Saut Amerika na Australia na long ol planti ailan bilong Solwara Atlantik na Solwara Pasifik. Long yia 1500 samting ol i kirap long i go long ol dispela hap. Na bihain ol manmeri bilong mekim wok misin, olsem ol misinari ol i go. Tasol ol dispela pris pasto bilong ol misin bilong Krisendom ol i no kirapim ol manmeri long ol dispela hap long tingim Kingdom bilong God, ol i laikim o nogat. Ol i no autim tok bilong Kingdom olsem Jisas i tok lain bilong em bai mekim, olsem hap bilong dispela “mak” i makim taim bilong pinis bilong dispela taim nau.