Yia 1914 na Yu

NAMBA WAN pait bilong olgeta hap i bikpela pait tru, winim olgeta narapela pait i bin kamap paslain long en, na em i bagarapim planti man. Namba tu pait bilong olgeta hap i moa nogut. Long dispela tupela bikpela pait winim 25 milion ami ol i dai, na planti narapela man tu ol i dai.

Sapos namba tri pait bilong olgeta hap i kirap na ol man i tromoi ol bom nogut bilong nuklia, bai olgeta lain man i bagarap. Ol saveman i tok, kain pait olsem bai pinisim olgeta wok ol man i bin kamapim long graun na ating em bai pinisim olgeta manmeri. Sampela manmeri i stap long yia 1914, long taim ol man i kilim i dai dispela man bilong kamap king bilong Austria, ol i stap yet na nau ol i lukim ol man i laik mekim pait nogut na bagarapim olgeta man na meri na pikinini.

Tasol i no ol samting bilong politik tasol i makim dispela taim nau i bikpela taim. Nogat. Tok pret bilong Baibel i makim dispela taim i bikpela taim. Baibel i kolim ol samting i bin kamap insait long 70 yia i go pinis na ai bilong ol man i no inap lukim. Ol dispela samting i bikpela samting long YU na i opim gutpela rot long YU. Orait, nau yumi ken stori long sampela bilong ol dispela bikpela samting tru i bin kamap.

Jisas na 1914

Wanpela taim Jisas i stap wantaim fopela disaipel tasol na ol i tokim em: ‘Wanem taim bambai ol dispela samting i kamap? Wanem mak bai i kamap pastaim, na mipela i ken save, yu kam bek pinis i stap na pasin bilong dispela graun i laik pinis?’ Jisas i bekim tok long ol, tasol em i no kolim wanpela de o aua stret. Nogat. Em i kolim sampela samting i mas kamap long graun na bai ol disaipel bilong em inap save em i kam bek pinis na i stap king. Em i tok: “Wanpela lain man bai i kirapim pait long narapela lain man. Na lain bilong wanpela king bai ol i kirapim pait long lain bilong narapela king. Long sampela hap bai ol i gat bikpela hangre, na graun i guria.” Na em i tok: “Dispela olgeta samting em i olsem pen i save kamap pastaim long meri i laik karim pikinini.”—Matyu 24:3, 7, 8.

Ating nau yu save olsem wanem ol bikpela pait long taim bilong yumi ol i bikpela samting. Ol i truim tok profet bilong Jisas. No gat narapela pait i bikpela olsem dispela tupela pait bilong olgeta hap. Ating namba tri pait tasol inap winim dispela tupela pait, long wanem sapos ol i kirapim namba tri pait bilong olgeta hap bai olgeta manmeri i bagarap. Tasol Jisas i no tok profet long dispela samting, long wanem ol pait em i tok long en i olsem “pen i save kamap pastaim.” Bihain bai ol hevi i kamap bikpela moa. Olsem na ol dispela pait bilong olgeta hap, em ol i kirap long yia 1914, ol i truim tok bilong Jisas.

Sapos yumi skelim ol narapela samting tu i bin kamap i olsem mak bilong soim ol man Jisas i kam bek pinis, yumi inap save ol dispela samting i kirap long kamap long yia 1914. Yu ken kaunim Matyu sapta 24 na sampela hap moa bilong Baibel na bai yu save long ol dispela samting i olsem mak. Sampela Wastaua tu i bin stori long ol dispela samting i olsem mak na yumi ken save, long taim bilong yumi Jisas i kam bek na em i stap king nau long heven. Jisas i kam bek olsem king na wanem samting i kamap?

Kingdom bilong God long heven i kirap mekim wok bilong en. Krais Jisas em i King bilong dispela Kingdom. Yumi no inap lukim dispela Kingdom, long wanem em i stap long heven, em i no bilong dispela graun. (Jon 18:36) Olsem na i mas i gat wanpela “mak” bambai yumi ken save ol dispela samting i bin kamap. Tasol tru tumas, long 1914, taim ol olpela gavman na kingdom i wok long bagarap na ol nupela gavman i laik kamap, nambawan bikpela gavman i winim olgeta narapela gavman em i kamap. Dispela gavman em Kingdom bilong God.

Seten na 1914

Tasol sapos yumi no inap lukim Jisas i kam bek na i stap, bilong wanem em i bikpela samting? Long wanem dispela samting i mekim planti samting long ol manmeri hia long graun. Hap bilong Revelesen long Baibel i stori long ol samting i kamap taim Jisas i kisim wok king long heven. Aposel Jon i tok: “Nau bikpela pait i kirap long heven. Maikel wantaim ol ensel bilong en ol i pait wantaim bikpela snek. Na dispela snek wantaim ol ensel bilong en ol i bekim pait long ol. Tasol ol i no gat strong bilong winim pait. Olsem na ol i no inap i stap moa long heven. Na ol ensel bilong God ol i tromoi dispela snek i go daun. Em i dispela snek bilong bipo yet, na ol i kolim em Seten na ‘Man I Save Kotim Olgeta Man.’ Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en ol i go daun wantaim em.”—Revelesen 12:7-9.

Namba wan pait bilong olgeta hap em i kamap long graun long 1914, tasol i gat narapela pait tu i kamap long dispela yia. Dispela pait i bikpela pait moa na i kamap long heven. Ol man i no inap lukim dispela pait i kamap long heven, tasol ol i pilim ol hevi dispela pait i kamapim. Baibel i tok: “Long heven ․․․ wanpela maus i singaut strong olsem, ‘Nau God bilong yumi em i kisim bek pinis yumi, na strong bilong em i kamap pinis long ples klia, na em i stap king! Na Krais bilong en i kisim pinis bikpela namba! ․․․ Olsem na yu heven, na yupela olgeta i stap long heven, yupela i ken amamas! Tasol yu graun, na yu solwara, yupela lukaut! Bikpela hevi i laik kamap long yupela! Seten i go daun pinis long yupela, na em i gat bikpela belhat tru. Em i save, em i gat sotpela taim tasol.’”—Revelesen 12:10, 12.

Bikpela hevi moa i painim ol manmeri long dispela taim nau. Ol i tromoi Seten na ol ensel nogut i kam daun long graun. Olsem na long taim bilong yumi sampela man nogut tru ol i bin i stap na pasin nogut i kamap bikpela. Ol dispela wok bilong Seten i bilong i stap “sotpela taim tasol.” Tasol dispela “sotpela taim” bilong Seten i stap yet, na ol hevi tu i stap. Olsem na Jisas i tok, namba wan pait na ol narapela samting i kamap long dispela taim, em i olsem “pen i kamap pastaim.” Hevi bai i go bikpela moa!

Tasol dispela pen na hevi i no ken i stap oltaim oltaim. Jisas i soim yumi, ol dispela samting nogut i bilong liklik taim tasol. Em i stori long ol manmeri i stap long 1914 na ol i lukim ol samting i makim Jisas i kam bek pinis olsem king, na Jisas i tok: “Mi tok tru long yupela: Ol manmeri bilong dispela taim ol i no i dai pinis yet, na bai dispela olgeta samting i kamap. (Matyu 24:34) I gat narapela samting tu i mas kamap nau long dispela taim. Dispela samting i truim wanpela tok profet i stap long Olpela Testamen.

1914 na Gavman Bilong Bosim Olgeta Hap Graun

Planti handet yia paslain long taim bilong Jisas, wanpela profet Hibru, em Danyel, em i stori long ol bikpela bikpela gavman bai kamap long graun kirap long taim bilong em na i kam inap long taim bilong yumi. Long pinis bilong dispela tok profet, em i stori long ol gavman bai stap long taim bilong yumi na em i tok: “Long taim bilong ol dispela king God bilong heven bai kamapim wanpela kingdom i no inap bagarap. Ol narapela lain man i no ken kisim dispela kingdom. Em bai bagarapim na pinisim ol dispela narapela kingdom, na em wanpela bai stap inap long taim bihain bihain.”—Danyel 2:44, NW.

Olsem na taim Kingdom bilong God i kamap long heven long 1914, dispela i bikpela samting long yumi ol man. Dispela gavman em i wanpela gavman bilong bosim olgeta hap bilong graun. Liklik taim na bai em i kirap mekim dispela wok. Bai em i bosim olgeta hap bilong graun.

Narapela kain taim bai kamap. Long yia 1914 taim bilong ol man i longlong nabaut na taim bilong pait i kirap. Tasol taim Amagedon i pinis, Kingdom bilong God bai kamapim gutpela taim bilong pasin sekan na bel isi. Taim Jisas i stap king na bosim dispela graun, bai olgeta manmeri i stap wanbel wantaim. Wanpela olpela tok profet i stori gut long dispela samting, olsem: “Ol pipel i ken bihainim stretpela pasin tasol. Taim mun i lait yet, planti gutpela samting i ken kamap. Em bai i stap king na i bosim olgeta manmeri.”—Sam 72:7, 8.

Olsem na ol pait bilong olgeta lain man na ol hevi i bin kamap long graun kirap long yia 1914 i olsem “mak” na yumi ken save, yumi stap long ‘taim bilong pinis.’ Seten i belhat, long wanem em i gat sotpela taim tasol na nau dispela sotpela taim bilong em i laik pinis. Gutpela nupela taim i klostu pinis!

1914 na Ol Kristen

Bilong wanem Jisas i no kirap kwik na kamapim gutaim long graun na helpim olgeta manmeri long i stap wanbel? Long wanem i gat wanpela bikpela wok i mas kamap pastaim. Jisas i tok profet long dispela wok taim em i kolim ol samting bai kamap olsem “mak” bilong em i kam bek pinis na em i stap king. Em i tok: “Bai ol i autim dispela gutnius bilong kingdom long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Ol man i mas save pastaim long ol samting i wok long kamap na bihain bai las de i kamap. Olsem wanem? Sampela man i tokim ol long ol dispela samting?

Yes. Ol Witnes Bilong Jehova i mekim. Bihain liklik long taim bilong Namba Wan Pait Bilong Olgeta Hap na i kam inap long nau, ol Witnes Bilong Jehova i bin wok strong long autim tok long Kingdom bilong God. Ol i no pret long autim dispela tok. Long nau, long 200 samting kantri ol i save go long haus bilong ol man na autim tok long ol. Ol i tokim ol long as tru bilong ol hevi i kamap long nau. Na ol i tokim ol long Nupela Taim i laik kamap taim Kingdom bilong God i bosim graun. Ol i tokim ol man long ol gutpela samting ol yet i wet long en. Ol i mas pinisim dispela wok bilong autim tok pastaim na bihain bai las de i kamap.

Ol i tokim ol manmeri long Kingdom bilong God na dispela wok bilong autim tok i mekim narapela wok tu: Em i opim rot long ol man bambai ol inap i stap aninit long dispela Kingdom hia long graun. God Jehova i tokim ol lain man wantaim ol hetman bilong ol: “Yupela mas pret long God na guria long em. Yupela mas aninit tru long em na brukim skru. Nogut em i kros long yupela na bai yupela i dai.” (Sam 2:11, 12) Ol lain man i no bihainim dispela tok, tasol ol wan wan man ol i mekim. O1 i no bikhet long ol hetman na ol gavman i bosim graun long nau. Nogat. (Rom 13:1-7) Tasol ol i laik lain na kisim save long ol tu bilong dispela Kingdom bilong God na ol i bihainim ol dispela lo.

Na wanem samting i bin kamap? Narapela kain samting i kamap na i truim narapela tok profet i makim ol samting i mas kamap long taim bilong yumi: “Planti lain man bai go na ol bai tok: ‘Yupela ol man yupela kam, na yumi go antap long maunten bilong Jehova, na long haus bilong God bilong Jekop; na bai em i lainim yumi long pasin bilong em, na bai yumi wokabaut long rot bilong em.’ ․․․ Ol i mas wokim ol bainat bilong ol i kamap samting bilong wokim gaden, na ol i mas wokim ol spia bilong ol i kamap sisis bilong katim han bilong diwai. Narapela lain i no ken holim bainat bilong pait long narapela lain, na ol i no ken lain moa long pait.”—Aisaia 2:2-4, NW.

Ol wan wan manmeri long nau ol i truim dispela tok profet. Planti milion manmeri bilong olgeta lain na tok ples, nau ol i bihainim ol lo bilong Kingdom bilong God, na ol i stap wanbel wantaim. Ol i lusim pinis ol kros bilong lotu na bilong ol tumbuna, em ol i bin i stap inap planti handet yia pinis. Ol i laik i stap long nupela taim Kingdom bilong God bai kamapim.—Revelesen 7:9-17.

1914 na Yu

Ating nau yu save yia 1914 em i bikpela yia, na ating yu save long ol samting dispela yia i mekim long yu. Ol samting i kirap long kamap long yia 1914, i bin senisim tru i stap bilong ol man. Kingdom bilong God yet i as bilong ol dispela senis. Taim Jisas i kirap mekim wok king bilong em long Kingdom, ol samting i senis. Em i rausim Seten long heven. Pasin bilong graun i senis na ol man i no inap stretim. Liklik taim na, bai Kingdom bilong God i pinisim olgeta gavman ol man i bin kamapim. Dispela Kingdom bai senisim ol na em bai stap oltaim.

Olsem na long yia 1914 taim bilong mekim hariap ol wok em i kirap, tasol em i gutpela taim tu, long wanem rot i op yet. Liklik hap taim i stap yet na ol man i laik ‘aninit tru long God’ ol i ken daun long em. Ol manmeri i mekim olsem ol bai winim taim bilong pinis bilong dispela pasin bilong nau na i stap bel isi na amamas aninit long dispela wanpela King tasol, em Krais Jisas.

Olsem na yia 1914 i bikpela samting long yu. Ol samting i bin kamap kirap long yia 1914 inap helpim yu long i stap gutpela long bihain.

[Rait long pes 6]

Long 1914 nambawan bikpela gavman bilong bosim olgeta hap bilong graun em i kamap—em Kingdom bilong God

[Rait long pes 8]

Olgeta samting Jisas i tok profet long en bai kamap long taim bilong sampela manmeri ol i stap long yia 1914