Namba 9 Hap
Olsem Wanem Yumi Save Yumi Stap Long “Taim Bilong Las De”?
1, 2. Olsem wanem yumi inap save, tru yumi stap long taim bilong las de?
OLSEM WANEM yumi ken save tru, yumi stap long taim Kingdom bilong God bai kirap pinisim ol gavman bilong graun? Olsem wanem yumi ken save, klostu nau bai God i pinisim olgeta pasin nogut na hevi?
2 Ol disaipel bilong Krais i laik save long dispela. Ol i askim em, wanem “mak” bai kamap na ol i ken save, em i kam bek i stap King na pasin bilong dispela graun i laik pinis? (Matyu 24:3) Bilong bekim tok, Jisas i kolim ol bikpela bikpela samting i mas kamap long graun, olsem “mak,” na bai ol man i ken save, ol i stap long “taim bilong las de,” em “las de” bilong pasin nau i stap long graun. (Daniel 11:40; 2 Timoti 3:1) Olsem wanem? Yumi bin lukim ol dispela samting i kamap long taim bilong yumi? Tru tumas!
Ol Bikpela Pait
3, 4. Ol pait i bin kamap long taim bilong yumi, olsem wanem ol i truim tok profet bilong Jisas?
3 Jisas i tok, “ol man bilong sampela lain bai i kirapim pait long ol narapela narapela lain.” (Matyu 24:7) Long yia 1914 narapela kain pait tru i bin kamap—em bikpela pait na planti lain moa yet i insait long en. Olsem na sampela man i kolim olsem Bikpela Pait Tru. Em namba wan taim kain pait olsem i bin kamap. Em namba wan pait bilong olgeta hap. Inap olsem 20,000,000 soldia na ol narapela i bin dai long dispela pait, i winim tru lain i bin bagarap long ol pait bilong bipo.
4 Namba Wan Pait Bilong Olgeta Hap i kirapim taim bilong las de. Jisas i tok, dispela pait na ol narapela samting i kamap long dispela taim i olsem “pen i save kamap pastaim long meri i laik karim pikinini.” (Matyu 24:8) Na tru tumas, bihain ol narapela samting nogut i bin kamap. Namba 2 Pait Bilong Olgeta Hap i bagarapim olsem 50,000,000 soldia na ol narapela. Long taim bilong yumi inap olsem 100,000,000 manmeri i bin dai long ol pait, winim tru lain i bin dai long olgeta pait insait long 400 yia bipo! Em samting nogut tru i kamap long wok bos bilong ol man!
Sampela Samting Moa
5-7. I gat wanem samting moa i kamapim klia olsem yumi stap long las taim?
5 Jisas i kolim sampela samting moa i mas kamap long taim bilong las de, em i tok: “Ol bikpela bikpela guria bai i kamap [na bai i gat] bikpela hangre na bikpela sik.” (Luk 21:11) Ol dispela samting nogut i bin kamap tru bihain long 1914 na bagarapim planti man moa yet.
6 Planti taim ol bikpela guria i save kamap na kilim i dai planti man. Bihain liklik long Namba Wan Pait wanpela kain sik fiva i bin kirap long Spen na i kilim i dai olsem 20,000,000 manmeri—sampela i tok em i bin kilim i dai 30,000,000 o planti moa. Sik AIDS i bin kilim i dai planti handet tausen, na nau i laik kilim i dai planti milion moa. Long olgeta yia olkain sik bilong klok na sik kensa na ol narapela sik i save kilim i dai planti milion. Na hangre i wok long bagarapim planti milion moa na isi isi ol i dai. Tru tumas, ol man i sindaun long hos olsem Kamapim Tok Hait i stori long ol, ol i bin kam wantaim bikpela pait na hangre na sik na kilim i dai planti milion manmeri bihain long yia 1914.—Kamapim Tok Hait 6:3-8.
7 Jisas i tok tu, bai pasin raskol i go bikpela long olgeta hap. Em i tok: “Pasin nogut bai i kamap bikpela, olsem na planti man bai i lusim pasin bilong laikim ol arapela.”—Matyu 24:12.
8. Olsem wanem tok profet bilong 2 Timoti sapta 3 i sutim stret taim bilong yumi?
8 Na Baibel i tok profet olsem pasin bilong ol man bai i go nogut, olsem yumi lukim long nau: “Long taim bilong las de planti hevi nogut tru bai i kamap. Ol man bai i laikim ol yet tasol, na ol bai i laikim tumas long kisim mani. Ol bai i . . . hambak nabaut, na ol bai i tok kros na tok nogut long ol arapela. Ol bai i sakim tok bilong papamama, na ol bai i . . . givim baksait long ol pasin bilong God. . . . Ol bai i no bosim laik bilong bodi bilong ol, na ol bai i pait na bagarapim ol man nabaut. . . . Ol bai i laikim tumas ol kain kain pasin bilong amamas bilong dispela graun, na ol bai i no laikim God. Ol bai i bihainim pasin bilong God long skin tasol . . . Ol man nogut na ol giaman profet ol bai i wok long giamanim ol manmeri.” (2 Timoti 3:1-13) Olgeta dispela samting i bin kamap tru na yumi yet i bin lukim.
Narapela Samting
9. Taim bilong las de i kirap long graun, na long dispela taim stret wanem samting i bin kamap long heven?
9 I gat narapela samting i bin mekim na ol manmeri long nau i karim bikpela pen na hevi moa. Taim bilong las de i kirap long 1914, na long dispela yia wanpela samting i bin kamap em inap bagarapim moa yet ol man. Baibel i tok profet long dispela olsem: “Bikpela pait i kirap long heven. Maikel [em Krais i kisim pinis strong long heven] wantaim ol ensel bilong en ol i pait long dispela traipela snek [Satan]. Na snek wantaim ol ensel bilong en [ol spirit nogut] ol i bekim pait long ol, tasol . . . ol ensel bilong God i tromoi dispela snek i go daun. Em dispela snek bilong bipo yet, na ol i kolim em Satan . . . Em i man bilong giamanim olgeta manmeri bilong graun. Ol i tromoi em [wantaim ol ensel bilong em] i go daun long graun.”—Kamapim Tok Hait 12:7-9.
10, 11. Ol i tromoi Satan na ol spirit nogut i kam daun long graun na dispela i mekim wanem long ol man?
10 Dispela i mekim wanem long ol man? Baibel i stori moa olsem: “Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” Tru tumas, Satan i save i no longtaim na bai em yet wantaim lain bilong em i pinis, olsem na insait long dispela liklik hap taim i stap yet, em i wok strong moa long pulim ol man bambai ol i lusim God. (Kamapim Tok Hait 12:12; 20:1-3) Ol dispela ensel inap bihainim laik bilong ol, tasol ol i mekim nabaut long dispela na kamap nogut tru! Ol i bin bosim graun na ol samting nogut moa yet i bin kamap bihain long 1914!
11 Olsem na Jisas i bin mekim tok profet i makim dispela taim nau na em i tok: “Tingting bilong olgeta lain man bai i bagarap tru . . . Planti manmeri bai i tingting long ol samting i laik kamap long graun, na ol bai i pret tru.”—Luk 21:25, 26.
Klostu Nau Bai Wok Bos Bilong Ol Man na Ol Spirit Nogut i Pinis
12. Wanem wanpela tok profet i stap yet na i mas kamap tru pastaim, na bai las de i kamap?
12 Hamas tok profet moa i mas kamap tru na bai God i pinisim dispela taim nogut bilong nau? I no planti! Wanpela i stap long 1 Tesalonaika 5:3, olsem: “Ol manmeri bai i tok olsem, ‘Nau em i gutpela taim tru. Yumi stap gut,’ na wantu tasol samting bilong bagarapim ol bai i kamap long ol.” Dispela i makim olsem taim ol i toktok yet, pinis bilong dispela taim nau bai kirap. Taim ol i no tingim, wantu bai bagarap i painim ol, em long taim ol i tingting long ol samting ol yet i laik mekim bilong kamapim gutaim.
13, 14. Jisas i bin mekim tok profet long wanem taim bilong bikpela hevi tru? Long pinis bilong dispela taim, wanem laspela samting bai kamap?
13 No gat bikpela hap taim moa bilong dispela graun Satan i bosim. Em bai pinis long taim bilong bikpela hevi tru, olsem Jisas i tok: “Long dispela taim bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.”—Matyu 24:21.
14 Laspela bikpela samting bilong taim bilong “bikpela hevi tru” em pait bilong God, olsem Armagedon. Daniel i stori long dispela na em i tok, long dispela taim bai God i ‘daunim na bagarapim’ ol narapela kingdom. Olgeta gavman ol bikhetman i bin kamapim bai pinis. Na bai Kingdom o gavman bilong God long heven i bosim tru olgeta samting long graun. No gat wanpela man inap “daunim kingdom bilong God,” olsem na bai i no gat narapela gavman inap kamap.—Daniel 2:44; Kamapim Tok Hait 16:14-16.
15. Wanem samting bai painim strong bilong Satan na ol spirit nogut long bosim ol man?
15 Long dispela taim Satan na olgeta spirit nogut i bin bikhet long God ol bai i pinis, na bai ol i “no inap giamanim moa ol manmeri.” (Kamapim Tok Hait 12:9; 20:1-3) God i skelim ol pinis long kot na em i tok ol i mas i dai, olsem na ol i wet tasol long bagarap. Taim ol i no inap pulim moa ol man long mekim pasin nogut, bai bikpela hevi i pinis long ol man!
Husat Bai Abrusim Bagarap? Husat Bai Bagarap?
16-18. Husat ol bai abrusim bagarap long las de? Husat ol i no ken abrusim bagarap?
16 Taim God i givim strafe long ol man bilong dispela graun, husat ol bai abrusim bagarap? Husat ol i no ken abrusim bagarap? Baibel i makim olsem: Ol man i laik bai God i bosim ol, bai God i lukautim ol na bai ol i abrusim bagarap. Ol man i no laik bai God i bosim ol, ol bai bagarap wantaim ol lain bilong Satan.
17 Sindaun 2:21, 22 i tok: “Ol gutpela stretpela man [ol i daun long wok bos bilong God] bai i stap gut oltaim long graun bilong yumi. Tasol God bai i rausim ol man i save mekim pasin nogut na i no save bihainim em [ol i no daun long wok bos bilong em]. Em bai i kamautim ol, olsem man i kamautim kaikai long gaden bilong en.”
18 Na Buk Song 37:10, 11 i tok: “I no longtaim na bai ol man nogut i lus olgeta. . . . Tasol ol manmeri i daunim nem bilong ol yet bai God i givim olgeta graun long ol. Bai ol i sindaun gutpela tumas na amamas i stap.” Na ves 29 i tok: “Ol stretpela man bai i kisim graun God i givim ol, na bai ol i stap oltaim long en.”
19. Yumi mas bihainim wanem gutpela tok?
19 Yumi mas bihainim gut tok bilong Buk Song 37:34 olsem: “Yu mas bilip long Bikpela na prea long em na bihainim pasin bilong em. Sapos yu mekim olsem, bai em i givim biknem long yu, na yu ken holim dispela graun em i givim yu. Na bai yu lukim em i bagarapim ol man nogut.” Ves 37 na 38 i tok: “Yu tingting long man i no gat asua long wanpela samting, na lukim stretpela man. Man i save sindaun isi wantaim ol arapela manmeri, lain bilong en bai i stap oltaim. Tasol Bikpela i save bagarapim tru ol man bilong mekim sin.”
20. Olsem wanem na yumi ken tok, yumi stap long gutpela taim?
20 Em nau, God i save tingim tru yumi, na klostu nau bai em i pinisim olgeta pasin nogut na pen na hevi. Dispela i strongim tru bel bilong yumi, a? Yumi amamas long save, i no longtaim na bai em i truim ol dispela gutpela tok promis bilong em!
[Piksa long pes 20]
Baibel i kolim ol samting i mas kamap olsem “mak” bilong las taim
[Piksa long pes 22]
Klostu nau, long Armagedon, ol man i no daun long wok bos bilong God bai pinis. Ol man i daun long wok bos bilong em bai abrusim bagarap na i stap long stretpela nupela taim