“Wanem Taim Bai Yumi Mekim Narapela Kibung?”

LONG pinis bilong Novemba 1932, ol niuslain i stori long ol man i wokim trafik lait long Mexico City, em biktaun we winim 1 milion manmeri i stap long en. Tasol nau ol i no stori moa long dispela samting. Ol i tingim wanpela bikpela bung i laik kamap long dispela wik. Ol niuslain i kisim ol kamera na i go long tren stesin long bungim presiden bilong Was Taua Sosaiti, em Joseph F. Rutherford. Ol Witnes long Mexico City i amamas tru long welkamim Brata Rutherford bikos em bai mekim ol tok long 3-pela de kibung.

Nius The Golden Age i tok: “Yumi ken bilip olsem dispela kibung bai helpim ol manmeri long Meksiko long kisim save long Tok i Tru.” Inap olsem 150 manmeri i go long dispela kibung. Olsem wanem dispela kibung i kamapim bikpela senis?

Paslain long dispela kibung, wok bilong Kingdom i no kamap bikpela long Meksiko. Kirap long 1919, ol i mekim ol liklik kibung, tasol namba bilong ol kongrigesen i wok long i go daun long ol yia bihain. Long 1929, ol brata i sanapim brens ofis long Mexico City, na i luk olsem dispela bai helpim tru wok bilong Kingdom. Tasol hevi i kamap. Taim ol brata i kisim save olsem ol i no ken mekim wok autim tok i kamap olsem wok bisnis, wanpela brata husat i mekim wok olsem kolpota (wok painia) i no laik bihainim dispela tok. Olsem na em i kirapim Baibel stadi grup bilong em yet. Na tu, wasman bilong brens (kodineta bilong Brens Komiti) i mekim pasin i no stret na narapela brata i kisim ples bilong em. Ol bratasista long Meksiko i nidim sampela helpim long strongim bilip bilong ol.

Taim Brata Rutherford i visitim ol, em i mekim 2-pela tok long kibung bilong strongim ol bratasista, na tu, em i mekim 5-pela tok long rot bilong redio stesin. Em festaim long ol redio stesin long Meksiko i pilaim ol tok bilong gutnius, na olgeta manmeri long dispela kantri i harim. Bihain long kibung, nupela kodineta bilong Brens Komiti i oganaisim wok autim tok. Dispela i givim nupela strong long ol Witnes na ol i givim bel tru long mekim dispela wok.

Long yia bihain, ol i mekim 2-pela kibung. Wanpela kibung em long Veracruz na narapela long Mexico City. Ol Witnes i givim bel tru long autim tok na gutpela samting i kamap. Long 1931, i gat 82 pablisa. Tenpela yia bihain, i gat 820 pablisa! Long 1941, inap olsem 1 tausen manmeri i go long Kibung Tiokratik long Mexico City.

“OL I STAP LONG OLGETA STRIT”

Kirap long 1936, ol Witnes i yusim ol sain long autim tok. Ol i save pasim ol dispela sain long fran na long baksait bilong ol. Long 1943, ol Witnes i mekim wankain bilong tokaut long Kibung Tiokratik (“Free Nation’s”) bai kamap long 12-pela siti long Meksiko.a

Nius La Nación i stori long gutpela samting i kamap taim ol Witnes long Mexico City i yusim ol sain long autim tok. Dispela nius i tok: “Long fes de [bilong kibung], [ol Witnes] i invaitim planti manmeri moa. Long neks de, planti manmeri i kam na ples bung i pulap.” Misin Katolik i no amamas long ol Witnes i mekim olsem, na ol i mekim kempein bilong stopim ol. Maski i olsem, ol bratasista i autim tok yet long ol strit. Nius La Nación i tok moa: “Olgeta manmeri long siti i lukim ol . . . man na meri i pasim ol sain na autim tok.” Dispela nius i raitim wanpela atikol na putim piksa bilong ol brata i sanap long ol strit bilong Mexico City, na ol i raitim dispela tok: “Ol i stap long olgeta strit.”

“GUTPELA BET I WINIM SIMEN PLUA”

Long bipo, planti Witnes long Meksiko i save lusim bikpela taim na mani long i go long ol kibung. Planti manmeri i save kam long ol ples i stap longwe tru we tren na kar i no save ron. Sampela i save raidim hos o wokabaut inap planti de bilong i go kamap long rot bilong tren bambai ol i ken i go long kibung.

Planti Witnes i no gat mani bilong i go long kibung. Taim ol i kamap long siti, ol bratasista i invaitim ol long i go stap wantaim ol. Sampela i slip long ol Haus Kingdom. Wanpela taim, inap 90 bratasista i stap long brens, na “wan wan i yusim 20 katen na wokim i kamap olsem bet bilong slip.” Yearbook i stori olsem ol bratasista i amamas tru bikos ol i gat “gutpela bet i winim simen plua.”

Ol dispela bratasista i amamas tru long i kam long dispela kibung, na ol i kisim planti blesing. Long nau, klostu 1 milion pablisa long Meksiko i save givim bel tru long i go long ol kibung.b Long 1949, brens ripot bilong Meksiko i tok: “Ol bratasista i no larim wanpela samting i pasim ol long i go long ol kibung. Taim mipela i mekim kibung, ol i save askim olsem, Wanem taim bai yumi mekim narapela kibung?” Dispela ripot i stret tru long pasin bilong ol Witnes long Meksiko long nau, wankain olsem long bipo.—Histori bilong yumi long Sentral Amerika.