God I Mekim Pinis Wanem Samting?

Sapos yu laik save gut long wanpela, i gutpela yu save long ol samting em i bin mekim pinis na ol hevi em i bin winim. Olsem tasol, bilong save gut long God, yu mas kisim save long ol samting em i bin mekim pinis. Taim yu mekim olsem, bai yu kirap nogut long save long ol samting em i mekim long bipo we i helpim yumi long nau na dispela bai mekim sampela samting long i stap bilong yumi long bihain.

GOD I WOKIM OLGETA SAMTING BILONG HELPIM YUMI

Jehova God em Bikpela Krieta, na “ol man i lukim ol samting God i bin wokim na long dispela rot ol inap save long ol pasin bilong en i stap hait.” (Rom 1:20) “Em Man Bilong Wokim graun long strong bilong em, Na em i dispela Man i bin wokim graun na olgeta samting i stap long en long rot bilong savetingting bilong em. Na long save bilong em, em i pulim na opim skai i go bikpela olsem laplap.” (Jeremaia 10:12) Ol samting God i wokim i soim tu olsem God i laik save long ol samting i painim yumi.

Tingim hau Jehova i wokim yumi ol man “i kamap olsem [em] yet,” na dispela i mekim laip bilong yumi i narakain. (Stat 1:27) Em i opim rot long yumi inap kamapim sampela bilong ol gutpela pasin bilong em. Em i wokim yumi na bai yumi inap lotuim em, o yumi inap kliagut long tingting bilong em na ol samting em i tingim olsem i bikpela samting. Taim yumi wok strong long mekim olsem, bai yumi stap amamas tru na laip bilong yumi bai i gat as bilong en. Tasol bikpela samting moa, em i opim rot long yumi inap pas gut wantaim.

Ol samting long graun i tokaut long tingting bilong God long yumi. Aposel Pol i kamapim dispela taim em i tok, God “i bin mekim ol gutpela samting na ol dispela samting i tokaut long em. Em i mekim ren i lusim skai na i kam daun long [yumi], na mekim planti gutpela kaikai i kamap na mekim bel bilong [yumi] i amamas.” (Aposel 14:17) God i givim yumi ol samting yumi nidim na ol narapela samting tu bilong helpim yumi long i stap laip. Em i givim planti samting we i narapela narapela kain na bai yumi inap i stap amamas. Olgeta dispela samting i olsem piksa bilong ol samting em i laik givim long yumi.

Jehova i wokim graun na bai ol man i ken stap oltaim long en. Baibel i tok: “Graun em i givim long ol manmeri,” na “em i no wokim graun bilong i stap nating, nogat, em i wokim bilong ol samting i ken stap long en.” (Buk Song 115:16; Aisaia 45:18) Husat bai stap long dispela graun? Ol bai i stap i go inap wanem taim? “Ol stretpela man bai kisim graun olgeta, Na ol bai stap oltaim long en.”—Song 37:29.

Jehova i wokim fes man na meri, Adam na Iv, na em i putim ol long wanpela ples paradais long graun na bai ol i “mekim wok na lukautim dispela gaden.” (Stat 2:8, 15) God i givim 2-pela gutpela asainmen long ol: “Kamapim ol pikinini na kamap planti na go sindaun long olgeta hap bilong graun.” (Stat 1:28) Gutpela samting i wetim Adam na Iv, ol inap stap oltaim na amamas long graun. Sori tru, ol i mekim disisen long sakim tok bilong God na long dispela risen ol i no stap namel long “ol stretpela man” husat “bai i kisim graun.” Tasol yumi luksave olsem disisen bilong ol i no senisim samting Jehova i tingting pinis long mekim long ol man na long dispela graun. Pastaim yumi laik stori long samting God i mekim pinis.

GOD I GIVIM TOK BILONG EM

Ol man i kolim Baibel olsem Tok Bilong God. Bilong wanem Jehova i givim Baibel long yumi? Namba wan risen em yumi inap kisim save long em. (Provep 2:1-5) Tru, Baibel i no bekim olgeta askim yumi gat long God—i no gat wanpela buk inap mekim olsem. (Eklisiastis 3:11) Tasol olgeta tok Baibel i kamapim i helpim yumi long save long God. Yumi luksave long ol pasin bilong em taim yumi tingim pasin em i mekim long ol man. Na tu, yumi luksave long wanem kain man em i laikim na i no laikim. (Buk Song 15:1-5) Yumi kisim tingting bilong em long pasin bilong lotu, stretpela pasin, na mani kago. Baibel i kamapim tingting na pasin bilong Jehova long rot bilong ol tok na pasin bilong Pikinini bilong em, Jisas Krais.—Jon 14:9.

Narapela risen na Jehova i givim Baibel, em bilong helpim yumi long save hau yumi inap i stap amamas. Long rot bilong Baibel, Jehova i tokim yumi long hau famili inap i stap amamas, yumi inap ting ol samting yumi holim pinis em inap, na hau yumi inap karim hevi bilong tingting planti. Na olsem ol narapela tok long dispela nius bai stori, Baibel i kamapim bekim bilong ol bikpela askim bilong laip, olsem: Bilong wanem i gat planti pen na hevi? Wanem samting bai kamap long bihain? Na tu, em i stori long ol samting God i mekim pinis na dispela bai inapim laik bilong em long pastaim tru.

Tru tumas, Baibel i narakain buk—God yet i kamapim—planti samting i kamapim klia dispela. Winim 1,600 yia klostu 40 man i raitim Baibel, maski i olsem bikpela tok bilong en i wankain bikos God em Man husat i raitim ol tok bilong en. (2 Timoti 3:16) Dispela buk i narapela kain long ol narapela buk, ol i lukautim gut ol tok bilong en i kam inap long nau, planti tausen manuskrip bilong Baibel long bipo i kamapim dispela. Na tu, Baibel i stap yet maski sampela i traim long pasim ol man long trensletim, tilim ol kopi, na ritim. Long nau, ol i trensletim na tilim planti kopi bilong dispela buk. Baibel i stap yet long nau na dispela i kamapim klia olsem “tok bilong God bilong yumi i save stap oltaim oltaim.”—Aisaia 40:8.

GOD I TOK LAIK BILONG EM BAI KAMAP

God i mekim tu narapela samting bilong makim olsem ol samting em i tingting pinis long mekim bai kamap tru. Olsem yumi stori pinis, em laik bilong God long pastaim long ol man i mas stap oltaim long graun. Tasol taim Adam i mekim disisen long sakim tok bilong God na mekim sin, em i lus long stap laip oltaim, na dispela bai painim tu ol pikinini bilong em i kamap bihain. “Long rot bilong wanpela man tasol sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.” (Rom 5:12) Taim ol man i sakim tok, i olsem laik bilong God bai i no inap kamap tru. Jehova i mekim wanem taim dispela samting i kamap?

Ol samting Jehova i mekim i stret wantaim ol pasin bilong em. Long stretpela kot, em i tokaut olsem hevi bai painim Adam na Iv long pasin ol i mekim, tasol long pasin laikim em i opim rot long gutpela samting bai painim ol pikinini bilong ol i kamap bihain. Jehova i yusim savetingting bilong em na kwiktaim em i tokaut long rot bilong stretim dispela hevi. (Stat 3:15) Long rot bilong Pikinini Bilong God, Jisas Krais, yumi inap abrusim sin na dai. Wanem samting i insait long dispela?

Bilong kisim bek ol man long hevi em pasin bikhet bilong Adam i kamapim, Jehova i salim Jisas i kam long graun long skulim ol man long rot bilong laip na em i “givim laip bilong em olsem pe bilong baim bek planti manmeri.”a (Matyu 20:28; Jon 14:6) Jisas inap givim pe bilong baim bek man bikos em i gutpela olgeta wankain olsem Adam. Jisas i holimpas pasin bilong bihainim tok i go inap long em i dai. Em i no sakim tok olsem Adam na em i mas i dai, nogat, olsem na Jehova i kirapim em bek na em i stap laip long heven. Nau Jisas inap mekim samting Adam i no bin mekim—opim rot long ol man i bihainim tok long ol inap kisim laip oltaim. “Wanpela man i bin sakim tok na long dispela pasin planti manmeri i kamap sinman. Olsem tasol, wanpela man i bin bihainim tok, na long dispela pasin planti manmeri i kamap stretpela manmeri.” (Rom 5:19) Long rot bilong pe bilong baim bek man, God bai inapim tok promis bilong em long ol man i ken stap laip oltaim long graun.

Yumi kisim planti save long Jehova long ol samting em i mekim taim Adam i sakim tok na hevi i kamap. Yumi luksave olsem nogat wanpela samting bai pasim Jehova long pinisim ol wok em i kirapim; ol samting em i tok em bai “mekim tru.” (Aisaia 55:11) Na tu, yumi amamas long bikpela pasin laikim bilong Jehova long yumi. “Pasin laikim bilong God i kamap ples klia long yumi olsem: God i salim Pikinini bilong em, em pikinini tru bilong em, i kam long dispela graun bai yumi inap kisim laip long rot bilong em. I no olsem yumi laikim God na em i mekim dispela samting, nogat. Em olsem, God i laikim yumi na salim Pikinini bilong em i kam olsem sakrifais long ol sin bilong yumi bilong mekim yumi kamap wanbel wantaim God.”—1 Jon 4:9, 10.

God “i larim Pikinini bilong em yet i karim pen na hevi, na em i larim ol man i kilim em i dai bilong helpim yumi olgeta,” olsem na yumi bilip olsem God “bai amamas long givim yumi olgeta arapela samting tu” em i promis long givim. (Rom 8:32) God i promis long em bai mekim wanem bilong helpim yumi? Rit i go.