Strongim Bilip Bilong Yu Bambai Yu Bilip Strong Moa Long Baibel
1 Dispela taim nau yumi stap long en, em i taim bilong strongim bilip, winim ol narapela taim bipo. Planti man i no bilip, na i no gat wanpela gutpela samting ol i wetim i kamap bihain. Planti taim ol bos bilong lotu na gavman i bin tok promis long kamapim gutpela taim, tasol ol i no bin truim, olsem na planti man i les na ol i no bilip moa. Aposel Pol i tok tru olsem, “planti man ol i no bilip.” (2 Te 3:2) Tasol yumi ol Witnes Bilong Jehova, yumi bilip. Yumi bilip strong olsem God bai truim ol tok promis i stap long Baibel.
2 Yumi ol Witnes Bilong Jehova yumi gat strongpela bilip, na dispela i makim yumi i narapela kain. Kain bilip olsem i kirapim yumi long mekim ol gutpela wok i save helpim yumi yet na ol narapela tu, na dispela samting i save litimapim nem bilong God. Yumi gat strongpela bilip olsem, long wanem, yumi larim Tok bilong God i wok strong long bel bilong yumi. Lain Kristen tru bilong nau i stap olsem brata brata long olgeta hap bilong graun, na dispela i kamapim klia olsem sapos yumi bilip strong moa olsem Baibel em i Tok bilong God, dispela bai kamapim ol gutpela samting.—2 Ti 3:16.
BILONG WANEM YUMI MAS HELPIM OL NARAPELA LONG STRONGIM BILIP?
3 Bagarap i laik painim ol man, olsem na i gat gutpela as na yumi mas helpim ol man long bilip strong moa long Baibel. Ol tok bilong Baibel inap helpim man long bihainim gutpela tingting na kirapim em long senisim tru pasin bilong em na kirap bihainim gutpela pasin, na dispela i soim yumi olsem Baibel em i Tok bilong God. Tasol i gat sampela samting moa i makim Baibel em i Tok bilong God, na yumi gat wok long helpim ol man long kisim save long ol dispela samting. Bilong mekim olsem, pastaim yumi mas lainim ol man long bilipim ol tok bilong Baibel.
4 Wanem samting i helpim planti bilong yumi long bilip strong long Baibel? Ating wanpela Witnes i bin kam long haus bilong yumi na long pasin isi em i bin lainim yumi long Baibel. Olsem na taim yumi tilim wanpela Baibel o buk long man, yumi no ken ting yumi no gat wok moa long strongim bilip bilong em. Nogat. I gat sampela samting moa yumi mas mekim. Sapos wanpela Witnes i bin lainim yumi long Baibel na dispela i bin helpim yumi, orait dispela i mas kirapim yumi long hariap go bek lukim man i kisim buk samting na tokim em, yumi laik kam long haus bilong em na lainim em long Baibel bilong helpim em long bilip strong moa long ol tok bilong en.
5 Yumi laik helpim ol narapela long bilip olsem Baibel em i Tok bilong God na helpim ol long bihainim ol tok bilong en. Ol man i mekim olsem, ol bai wanbel long dispela beten, em wanpela man bilong raitim song long Baibel i bin mekim, olsem: “Yu lukim mi, mi laikim tumas tok bilong yu. Yu save laikim mi tumas, olsem na yu mas kisim bek mi. As bilong lo bilong yu em i tok tru tasol. Na olgeta stretpela lo bilong yu i save stap oltaim oltaim.”—Sng 119:159, 160.
6 Long rot bilong Baibel, Jehova i sori long ol man na soim rot long olgeta man i laik bai Jehova i kisim bek ol long taim bilong “bikpela hevi tru.” (Mt 24:21) Long mun Februeri bai yumi tilim sampela buk, em Sosaiti i wokim, na long dispela rot bai yumi inap kirapim ol narapela long kaunim na stadi long Baibel.
[Ol Askim]
1. (a) Bilong wanem planti man i no bilip? (b) Olsem wanem ol Witnes Bilong Jehova i narapela kain long ol dispela man?
2. Ol Witnes Bilong Jehova ol i gat strongpela bilip, na dispela i bin helpim ol olsem wanem? Tok bilong 2 Timoti 3:16 i strongim bilip bilong yumi long wanem samting?
3. (a) Kolim wanpela samting i makim Baibel em i Tok bilong God? (b) Ol Witnes i gat wanem wok? Bilong mekim dispela wok, ol i mas mekim wanem?
4. (a) Wanem samting i helpim planti bilong yumi long bilip strong long Baibel? (b) Dispela samting i kirapim yumi long mekim wanem?
5, 6. (a) Long Buk Song 119:159, 160, man bilong raitim song i tok em i laikim tumas wanem samting? (b) Man i mas mekim wanem na bai Jehova i kisim bek em long taim bilong “bikpela hevi tru”?