Ol Miting Bilong Helpim Yumi Long Kamapim Ol Disaipel
WIK I KIRAP LONG DISEMBA 31
Singsing 41
(10 min) Ol toksave bilong kongrigesen.
(20 min) “Mekim Gut Famili-Stadi.” Makim sampela bilong kaunim paragraf na nau yu ken kamapim ol askim bilong en. Sapos taim i no sot, singautim wanpela o tupela papa o mama i kam antap long pletfom na ol i ken stori long ol samting ol yet i mekim long famili-stadi na bai ol pikinini i lain gut na ol i laikim tru dispela stadi.
(15 min) Yupela Save Toktok Gut Wantaim? Wanpela elda i ken lukim buk Famili na stori long tupela o 3-pela bikpela tok bilong sapta 11. Mekim ol liklik soim long ol tok i stap long paragraf 5-8 long olsem wanem papamama i ken kirapim pikinini long toktok gut wantaim papamama, na wanem ol samting i mekim na pikinini i no save toktok gut wantaim papamama.
Singsing 73 na beten.
WIK I KIRAP LONG JANUERI 7
Singsing 84
(10 min) Ol toksave bilong kongrigesen.
(22 min) “Jehova i Save Skulim Yu?” Wasman bilong lukautim Skul i ken mekim dispela tok na kamapim sampela askim. Singautim wanpela brata i save gut long mekim tok long skul na em i ken kam antap long pletfom. Askim em olsem: Taim em i redim gut tok bilong em long Skul, na em i bihainim gut ol tok bilong helpim sumatin long mekim gut tok, dispela i helpim em olsem wanem?
(13 min) “No Ken Slip—Ai i Mas Op na Tingting i Klia.” Kamapim ol bikpela tok bilong dispela hap.
Singsing 70 na beten.
WIK I KIRAP LONG JANUERI 14
Singsing 20
(10 min) Ol toksave bilong kongrigesen. Stori long ripot bilong ol Akaun.
(10 min) Bilong Helpim Famili long i Stap Amamas—Wok Bilong Man Marit. Wanpela brata i ken lukim buk Stap Oltaim, sapta 29, paragraf 6-9, na mekim dispela tok.
(10 min) Askim. Wanpela elda i lukautim dispela hap.
(15 min) Sampela Stori long Wok Bilong Kingdom. Gutpela sapos yu wokim gutpela mep long blekbot, na bai ol brata sista inap save gut ol dispela ples i stap we. Wanpela brata i save gut long kaunim tok em i ken kaunim ol dispela ekspiriens.
ALASKA: Long mun Julai, em namba wan taim lain pablisa i go bikpela inap 2,053 pablisa; dispela i winim yia i go pinis inap 12 pesen. Inap olsem 2,929 manmeri i bin bung long “Gutpela Tok Ples” Kibung Distrik na 50 i kisim baptais.
BRASIL: Em i wanpela bikpela kantri i stap long Saut Amerika, na i gat wanpela bikpela wara tru, em wara Amason. Planti man long dispela hap i save mekim tok Potugal. Ol i gat planti gaden kopi. Long mun Julai 1990, lain pablisa i go bikpela inap 293,466, dispela i winim olgeta mun bipo. Ol i mekim 369,999 Baibel-stadi.
Long Brasil ol liklik pikinini tu i save autim tok bilong Kingdom. Buk Yearbook i tok olsem: “Pikinini i gat 4-pela krismas tasol, em tu i ken autim tok. Wanpela taim wanpela wantok i kam lukim famili bilong em. Dispela wantok i gat laik long kaunim sampela nius samting na em i tok olsem, ‘I no gat wanpela samting hia long haus na bai mi ken kaunim.’ Na dispela pikinini Witnes i tok: ‘Yu ting i no gat wanpela samting bilong kaunim, a? Yu wet liklik.’ Em i go long rum bilong mama bilong em; em i sanap long wanpela sia na kisim ol nius bilong mama, em ol Wastaua na Kirap! Em i kisim ol i go long dispela wantok na em i tok, ‘Em nau. Yu no inap tok, i no gat wanpela samting bilong kaunim!’ Wantok hia i laikim tru ol dispela nius, olsem na pikinini i tok: ‘Yu inap kisim ol dispela nius long rot bilong pos-ofis.’ ” Olsem na dispela wantok i kisim sabskripsen bilong tupela nius.
FIJI: Inap 67 mun, lain pablisa long Fiji i go bikpela, na long mun Julai inap 1,534 pablisa i autim tok. Na nau i gat planti man moa i laik stadi, inap 2,605.
Wanpela painia long Fiji i save stadi Baibel wantaim wanpela bikman bilong ples. Dispela bikman i bin i go long wanpela miting bilong ol bikman bilong ples. Na long dispela miting wanpela bikman i laik kamapim wanpela lo bilong tambuim ol Witnes Bilong Jehova long mekim wok autim tok. Tasol dispela bikman i stadi Baibel em i katim tok bilong em na tokim em olsem wanpela Witnes i save kam long haus bilong em bilong stadi Baibel wantaim em. Na em i tok: “Nau tingting bilong mi i klia liklik long ol Witnes Bilong Jehova ol i wanem kain lain, na mi save olsem wanem bilip bilong ol i kirapim ol long kam lukim mipela long ol haus.” Na em i askim dispela man i laik tambuim ol Witnes olsem: “I gat wanpela taim na yu bin opim dua bilong harim tok bilong ol Witnes?” Em i tok, “Nogat.” Na bikman i stadi Baibel em i tok: “Olsem na em i pasin kranki tru sapos yu tingting long tambuim wanpela misin na yu no bin harim wanpela tok bilong ol.” Na bilong daunim dispela tok narapela bikman i bin mekim long tambuim ol Witnes, em i tokim ol dispela 30 bikman i stap long dispela bung: “Sapos yupela i harim pinis sampela tok bilong ol Witnes Bilong Jehova na yupela i laik bai ol i mekim yet dispela wok autim tok, orait putim han i go antap.” Orait 20 man i putim han i go antap.
Singsing 105 na beten.
WIK I KIRAP LONG JANUERI 21
Singsing 66
( 8 min) Ol toksave bilong kongrigesen. Ripot bilong wok autim tok. Kamapim ol gutpela samting long ripot bilong kongrigesen na tokim ol long ol gutpela wok ol i bin mekim. Sapos sampela hap bilong ripot i no gutpela tumas, orait toktok long rot bilong stretim na bai dispela hap wok tu i ken kamap gutpela.
(22 min) “Long 1991 Bai Yu Mekim Wanem long Skul?” Tokim narapela narapela brata long kaunim paragraf 1 i go 5. Taim brata i kaunim pinis wanpela paragraf, kamapim askim long pinis bilong en. Bihain, kaunim ol ekspiriens i stap long paragraf 6 i go inap long pinis bilong dispela hap.
(15 min) Ol Pikinini na Ol Yangpela–Yupela Ken Mekim Wanem long 1991 Bilong Amamasim Jehova? Klostu nau na bai ol pikinini na ol yangpela bilong yumi i go bek long skul long dispela yia.
Wanpela elda i toktok wantaim sampela skulmanki long dispela samting. (Em i mas redim gut dispela hap paslain long taim bilong miting.)
Givim ol dispela askim long ol:
1. Sapos yu wok strong long kisim save long skul, bilong wanem Jehova bai amamas long yu?
2. Bilong wanem yu mas bihainim tok bilong tisa bilong yu?
3. Ol tisa i save amamas long wanem kain sumatin?
4. Yu inap mekim wanem bilong amamasim ol tisa bilong yu?
5. Yu ting i gutpela sapos long sampela taim yu kisim presen i go givim long tisa bilong yu? Bilong wanem i gutpela yu mekim olsem?
6. Bai yu tokim ol tisa bilong yu long Jehova?
7. Yu ting olsem wanem long ol holide bilong ol man bilong graun?
8. Yumi save lotuim husat tasol?
9. Bai yu mekim wanem taim ol narapela sumatin i subim yu long kisim buai o smok o drak o bia samting?
HARIM: Taim yu givim ol dispela askim long ol pikinini na ol yangpela, yu mas tingim gut krismas na save bilong ol.
Singsing 42 na beten.