Rot Bilong Kamap Gutpela Papa na Mama
1 Planti papamama long nau ol i hatwok long mekim bikpela long pikinini bilong ol. Dispela samting i painim planti papamama, tasol nem bilong Jehova i stap long yumi, olsem na yumi gat wok long lukautim gut pikinini bilong yumi, na mekim gut wok papa na wok mama bilong yumi, na bai pikinini bilong yumi i go bikpela na ol i bilip strong long Jehova na long ol samting Em i laik mekim.
GUTPELA PAPAMAMA I SAVE MEKIM WANEM OL SAMTING
2 Gutpela papamama i save mekim bikpela long pikinini bilong ol na lainim ol gut, na taim pikinini i go bikpela ol i bihainim stretpela tingting na pasin, na ol i stap gut long wok bilong Jehova na mekim gutpela pasin long ol narapela man. (Mt 22:37-39) Tasol sori tru, planti pikinini, taim ol i go bikpela, ol i no bihainim gutpela pasin. Bilong wanem ol i mekim olsem? Ating em asua bilong papamama na ol i bikhet o olsem wanem?
3 Wok bilong papamama i kain olsem wok bilong wokim haus. Papamama i laik bai pikinini bilong ol i go bikpela na bihainim ol gutpela pasin. Papamama i mas helpim pikinini bilong ol long kisim strongpela bilip na save bilong God long ol samting, na helpim ol long kamap strong long spirit, na stap gut long God na laikim tru God na ol lo bilong em. Baibel i stori gut long ol dispela pasin na i tok ol i kain olsem ‘gol na silva na ston i dia tumas.’—Kaunim 1 Korin 3:10-13 na 1 Pita 1:6, 7.
4 Na taim pikinini i wok long i go bikpela, em yet i gat wok long lain long bihainim stretpela pasin. Em i mas redi long bihainim tok bilong God long Baibel, na mekim wok long ol gutpela samting papamama bilong em i bin mekim wok long en bilong lainim em. Taim pikinini i go bikpela, sapos em i no laik mekim olsem, o em i givim baksait long ol gutpela pasin papamama i bin lainin em long en, orait asua bilong em yet na hevi i painim em.—Lo 32:5.
OLGETA PIKININI I NARAPELA NARAPELA KAIN
5 Olgeta pikinini i narapela narapela kain, na papamama i mas tingim dispela samting taim ol i wok long lainim pikinini bilong ol. Baibel i tok olsem long dispela samting. Baibel i mekim wanpela gutpela tok bilong helpim ol papamama na ol i no ken ting olgeta pikinini i gat wankain pasin na tingting. Baibel i tok: “Olgeta man i mas skelim wok bilong ol yet, em i gutpela o nogat. Man i mekim olsem, em i ken amamas long pasin em yet i mekim na em i no mas skelim pasin bilong en wantaim pasin bilong narapela man.”—Ga 5:26; 6:4.
LAINIM OL TAIM OL I STAP “LIKLIK PIKININI YET”
6 Gutpela sapos olgeta papamama i bihainim pasin bilong Yunis. Baibel i tok em i bihainim gutpela pasin, long wanem em i lainim pikinini bilong em Timoti, kirap long taim em i “liklik pikinini yet.”—2 Ti 1:5; 3:15.
7 Tru tumas, sapos yu laik mekim gut wok papa o wok mama bilong yu, em bikpela wok tru, tasol gutpela samting bai kamap. Na sapos papamama inap mekim wankain tok long pikinini bilong ol olsem aposel Jon i bin mekim long ol “pikinini” bilong em, orait papamama bai amamas tru. Aposel Jon i tok: “Taim mi harim tok long ol pikinini bilong mi i bihainim tok tru, orait mi save amamas tru, na dispela amamas i winim ol arapela kain amamas bilong mi.”—3 Jo 4.
[Ol Askim]
1. Ol papamama Kristen long nau ol i gat wanem bikpela wok?
2. Gutpela papamama i save mekim wanem ol samting?
3. Yumi mas kirapim pikinini bilong yumi long bihainim wanem ol pasin?
4. Pikinini tu i gat wanem bikpela wok?
5. Bilong wanem papamama i mas tingim olgeta pikinini wan wan?
6. Kolim nem bilong dispela meri em Baibel i tok em i mekim gutpela wok mama.
This article is unique to PNG.