Julai! Longwe Teritori—Yupela i Mas Redi Gut
1 Yumi mas redi gut pastaim bambai yumi inap autim gut tok long olgeta hap bilong longwe teritori bilong yumi. Ol elda na pablisa na draiva bilong ol ka i mas redi gut. Yumi olgeta i laik save olsem: Kongrigesen bai autim tok long wanem hap? Gutpela sapos yupela i wokim mep long blekbot. I gat hamas haus long ol wan wan rot? Yumi no ken wet inap long taim yumi go long dispela hap na nau yumi skelim hamas haus i stap; nogat. Sapos ol elda na ol pablisa i skelim gut ol samting pastaim, orait bai ol inap mekim bikpela wok moa na ol i no ken lusim nating taim.
2 Ating yumi sampela i mas wokabaut longwe bambai yumi inap autim tok long longwe teritori bilong yumi, na yumi mas i go antap long ol maunten na brukim ol wara. Na taim yumi kamap pinis long ol haus, ating i no gat man i stap o man i no laik harim tok. Olsem na yumi mas strongim bel na sori tru long ol man na bai yumi inap mekim dispela wok. Tasol Jehova bai blesim ol gutpela wok yumi mekim.—1 Ko 15:58.
3 Ating yumi sampela i mas ran longwe long ka bilong kamap long ples bilong autim tok long en. Olsem wanem? Olgeta samting long ka i wok gut? Bateri na brek na olgeta taia i gutpela? Gutpela sapos yumi inap redim ol dispela samting long de paslain long yumi laik i go na bai ka i no ken bagarap taim yumi raun long longwe hap. Na ol brata sista i stap long ka, ol draiva i mas tingim gut laip bilong ol em bikpela samting long ai bilong Jehova, olsem na olgeta samting long ka i mas wok gut na i no bagarap samting, na draiva i mas draiv gut.
OL PABLISA I MAS REDI
4 Olgeta wan wan pablisa i mas redi gut pastaim. Yu kisim pinis planti buk na magasin bilong tilim? Yu holim sampela liklik nius yu inap putim aninit long dua bilong haus sapos i no gat man i stap? Taim yu lukim ol man i wokabaut long rot, bai yu redi long autim tok long ol long pasin isi? Ol dispela man i wokabaut long rot, planti taim em ol man i no i stap long haus taim yumi go long haus bilong ol. Sapos yu laik i go long ka bilong wanpela brata, yu redi long givim sampela mani long em bilong helpim em long baim bensin? Em i gutpela yu redi long helpim papa bilong ka, maski yu inap givim liklik mani tasol long em. Tasol sapos yu no inap helpim em long baim bensin, ating em i no ken tingim.
5 Ating i gat sampela hevi yu mas winim bambai yu inap autim gut tok long olgeta hap bilong longwe teritori bilong yumi, tasol sapos yu mekim dispela wok bai yu amamas tru. Jehova bai blesim tru ol wok yu mekim bilong “autim tok bilong kingdom bilong God” long longwe teritori.—Lu 9:60.
[Ol Askim]
1. Bilong wanem yumi mas redi gut pastaim? Yumi mas save gut long wanem ol samting pastaim?
2. Yumi mas i gat wanem kain tingting na bai yumi inap winim ol hevi taim yumi autim tok long longwe teritori?
3. Olgeta draiva i mas save gut long wanem ol samting?
4. Olgeta wan wan pablisa i mas tingting long mekim wanem ol samting bilong redi? Sapos wanpela man i no pablisa na em i laik raun tasol wantaim yumi, yu ting i gutpela yumi kisim em i go wantaim yumi?
This article is unique to PNG.