Wok Autim Tok Long Ol Ailan Pasifik
Baibel i tok: “Long olgeta hap graun ol manmeri i save litimapim nem bilong yu.” (Sng 48:10) Long rot bilong wok magasin, tok i tru bilong Baibel i go long ol ailan i stap “long olgeta hap graun,” olsem man bilong raitim dispela hap bilong Buk Song em i tok.
VANUATU: Dispela kantri em planti ol liklik ailan, na i hatwok long autim tok long ol man i stap long ol dispela ailan. Olsem na ol magasin na buk na buklet em gutpela rot bilong autim tok—ol i olsem ol gutpela tul bilong mekim wok long en. Sampela taim yu inap lukim sampela Wastaua o buk samting bilong yumi long ol liklik ples o ailan i stap longwe. Olsem na ol i wokim Kirap! long tok ples Bislama, na namba wan magasin ol i wokim em i stori long pasin bilong smok; het-tok bilong en em olsem: “Ol i Laik Bai Yu Baim Dai.” Ol i amamas long kisim dispela magasin. Minista bilong helt i bin kaunim dispela magasin na em i save ol i bin kamapim gut ol tok long dispela nius na em i laik kisim sampela moa bilong tilim. Na tu, meri bilong praim minista em i save raitim stori long nius, na em i save kamapim sampela tok bilong Kirap! long ol nius. Maski ol bikman bilong gavman i birua long wok bilong yumi, planti man i laikim ol buk na magasin bilong yumi na ol i gutpela tru bilong helpim man i gat gutpela bel long painim tok i tru.
NIU KALEDONIA: Ol manmeri i stap long teritori em brens-ofis bilong Niu Kaledonia i lukautim, ol i amamas long kisim ol magasin. Olsem: Siaman bilong asosiesen bilong lukautim ol bikpela bus samting, i telefon long wanpela brata na em i tok em i laik kisim 200 Kirap! bilong Oktoba 8, 1990. Dispela Kirap! i kamapim bikpela tok long “Ol Bikbus i Laik Bagarap.” Dispela man i laik tilim ol dispela magasin long ol skul na long ol memba bilong asosiesen bilong em. Em i tok: “Ol i kamapim gut ol tok long dispela nius na ol man i raitim dispela nius i stori gut long ol samting i wok long painim ol bikbus na ol i laik bagarap.”
PAPUA NIUGINI: Wok bilong autim tok i wok long go bikpela hariap. Long yia i go pinis yumi bin tilim planti buk moa, winim yia bipo inap 20 pesen. Em namba wan taim yumi bin tilim planti buk olsem inap long sampela yia nau. Wok i go bikpela tu long rot bilong magasin. Olsem: Brens-ofis i bin kisim pas long wanpela meri i laikim tok i tru long Not Solomon. Em i tok: “Pikinini meri bilong mi em i gat 12-pela krismas na em i wokim klas 6 long skul intenesenel na planti taim em i mekim wok long Kirap! long ol projek samting long skul. Taim ol sumatim i mekim gutpela wok long skul, tisa i save givim sta long ol, em ol i wokim long pepa na kala bilong en i olsem gol. Mi amamas long wanem planti taim pikinini meri bilong mi i kisim sta olsem, na em i kisim bikpela namba o mak long projek bilong em. Na tu mi amamas long tokim yupela, pikinini i bin tilim ol nius long wanskul bilong em. Long wanpela de em i bin tilim 13 magasin.” Long pinis bilong pas bilong em, dispela meri i tok: “Mi laik tok tenkyu long ol gutpela magasin yupela i save wokim.”
Singsing 59 (31) na beten.