Autim Tok Long Longwe Teritori
1 Sosaiti i makim gen mun Julai, 1991, olsem gutpela taim bilong autim tok long longwe teritori bilong kongrigesen. Sosaiti bai raitim pas i go long olgeta kongrigesen na olgeta grup i stap longwe long kongrigesen, na makim hap teritori bilong ol i go autim tok bilong Kingdom long en.
2 Lukim lista daunbilo na bai yumi ken skelim ol wok yumi mekim long yia 1990 wantaim yia 1989.
1989 1990 1989 1990
Ol kongrigesen 43 37 Ol buklet 693 772
Ol pablisa 550 497 Ol magasin 1680 1828
Ol buk 161 459
3 Ol buk samting yumi tilim long yia 1990 i winim yia bilong 1989. Olsem na yumi bin planim planti “pikinini bilong kaikai.” Planti kongrigesen i laik kisim hap teritori ol i kisim long yia i go pinis na bai ol i ken autim tok gen long dispela hap long yia 1991. Em gutpela—no gat rong long dispela. Olsem wanem? Yu tingting long “givim wara” long ol pikinini bilong kaikai yu planim pinis na planim sampela moa?—1 Ko 3:6, 7.
4 Long yia 1990, inap olsem 116 kongrigesen i bin autim tok long longwe teritori. Tasol lukim lista na bai yumi save 37 kongrigesen tasol i salim ripot long Sosaiti long wok ol i mekim. Olsem wanem? Yupela i autim tok long longwe teritori na lusim tingting long salim ripot i go long Sosaiti? O sampela samting i mekim na yupela i no bin mekim wok long dispela hap teritori Sosaiti i makim bilong yupela. Tasol maski yu no salim ripot long yia 1990, Sosaiti bai amamas long kisim ripot long wok autim tok yupela i mekim long longwe teritori long dispela yia 1991. Aposel Jon i save gut long dispela lo bilong wokim ripot long ol samting em i lukim na harim. (1 Jo 1:2) Gutpela tok man i harim, i olsem kolwara long man em skin bilong em i les pinis. (Snd 25:25) Olsem wanem? Kongrigesen inap wokim ripot bilong autim tok long longwe teritori na salim i kam long Sosaiti long dispela yia 1991?
BILONG WANEM YUMI MAS AUTIM TOK LONG LONGWE TERITORI?
5 Planti manmeri long Papua Niugini i save sindaun long ol liklik ples i stap longwe long ol bikpela na liklik taun, na i hatwok long bungim ol. Olsem na yumi ol Witnes i dediket na baptais pinis, yumi gat sampela wok yumi mas mekim, olsem Rom 10:13-15 i makim. (Plis kaunim tok bilong ol dispela ves.) Yumi tok pinis olsem yumi laik kamap man God i salim bilong i go autim tok, a? Olsem na yumi mas mekim dispela wok.
YUMI MAS AUTIM WANEM GUTPELA TOK LONG LONGWE TERITORI BILONG YUMI?
6 Ol ensel i bosim wok bilong ol Witnes Bilong Jehova, em ol i bin kisim wok long autim gutpela tok long olgeta manmeri i stap long graun, ol i bilong olgeta lain na olgeta tok ples na olgeta kain skin. Taim bilong kot bilong olgeta manmeri i kamap pinis. Dispela gutpela tok ol Witnes i autim i stori long Kingdom bilong God i kamap pinis long heven long yia 1914. Krais Jisas em i King bilong dispela Kingdom. Long rot bilong dispela Kingdom tasol bai ol manmeri i kisim gutpela sindaun na i stap amamas, na stretpela pasin bai stap long olgeta hap bilong graun.—Ais 9:6; Lu 1:33.
7 Yumi gat wanpela gutpela wok tru long bihainim dispela tok: “Olgeta man i harim dispela tok, em tu i mas tok, ‘Yu kam.’ ” (KTH 22:17) Sapos yumi mekim bikpela wok long hap teritori bilong yumi, inap long dispela skel bai yumi litimapim nem bilong Jehova na helpim ol man em nek bilong ol i drai long kisim wara bilong tok i tru, na taim yumi givim dispela wara long ol, bel bilong yumi tu bai gutpela.—Snd 11:25.
This article is unique to PNG.