Ol Miting Bilong Helpim Yumi Long Kamapim Ol Disaipel
WIK I KIRAP LONG JULAI 29
Singsing 15 (nupela) 119 (olpela)
(10 min) Ol toksave bilong kongrigesen.
(20 min) “Autim Gutpela Tok—Putim Gut Yau na Mekim Gut Dispela Wok.” Paslain long miting makim wanpela brata i save gut long kaunim tok na bai em inap kaunim ol paragraf. Kaunim pinis paragraf, orait kamapim askim bilong en. Taim yu kamapim tok bilong paragraf 4, mekim liklik soim, olsem man bilong haus i kamapim tingting bilong em long wanpela samting, tasol pablisa i no putim gut yau, olsem na rot i pas long em i ken toktok gut wantaim dispela man. Askim ol brata olsem: ‘Bai yu mekim wanem sapos yu yet yu bin bungim kain man olsem?’ Orait, nau dispela pablisa i ken mekim gen dispela soim, tasol dispela taim em i mas putim gut yau na bai em i gat rot long toktok gut wantaim man bilong haus.
(15 min) Sampela Tok Bilong Helpim Kongrigesen. Ol elda yet i ken redim sampela tok bilong helpim kongrigesen.
Singsing 48 (nupela) 21 (olpela) na beten.
WIK I KIRAP LONG OGAS 5
Singsing 100 (nupela) 81 (olpela)
(10 min) Ol toksave bilong kongrigesen.
(20 min) “Mekim Gut Wok Bilong Kingdom Insait long Kongrigesen.” Wanpela brata i ken stori long ol dispela tok, na bihain mekim wanpela soim. Redim gut dispela soim, olsem: Brata bilong lukautim Buk-Stadi i stori wantaim tupela marit long olsem wanem ol inap mekim wok long buk Lo, na bai ol i ken save bilong wanem ol sista i mas karamapim laplap samting long het bilong ol, na wanem taim em i mas mekim olsem.—Lukim buk Lo, pes 77.
(15 min) “Skulim Maus Bilong Yumi long Helpim Ol Man i Bel Hevi.” Wanpela brata i ken mekim dispela tok na kamapim sampela askim.
Singsing 200 (nupela) 107 (olpela) na beten.
WIK I KIRAP LONG OGAS 12
Singsing 170 (nupela) 95 (olpela)
(10 min) Ol toksave bilong kongrigesen. Ripot bilong ol akaun.
(20 min) “Mekim Wok long Baibel Taim Yu Autim Tok.” Paslain long miting makim wanpela brata i save gut long kaunim tok na bai em i ken kaunim ol paragraf. Kaunim pinis paragraf, orait kamapim askim bilong en. Taim yu kamapim tok bilong paragraf 6, mekim liklik soim long samting bilong tilim long mun Ogas. Mekim wok long wanpela skripsa tasol bilong Stori Bilong Dispela Mun.
(15 min) Askim. Wanpela brata i ken mekim dispela tok na kamapim sampela askim. Kamapim ol blesing ol brata sista bai kisim sapos ol i bihainim ol tok bilong oganaisesen bilong Jehova.
Singsing 191 (nupela) 95 (olpela) na beten.
WIK I KIRAP LONG OGAS 19
Singsing 116 (nupela) 108 (olpela)
(10 min) Ol toksave bilong kongrigesen. Toksave long ol bung bilong i go autim tok long dispela mun Ogas. Ogas em i laspela mun bilong yia bilong wok bilong 1991.
(20 min) “Helpim Ol Narapela Taim Yu Autim Tok Wantaim Ol.” Paslain long miting makim wanpela brata i save gut long kaunim tok na bai em i ken kaunim ol dispela paragraf. Kaunim pinis paragraf, orait kamapim askim bilong en. Singautim sampela pablisa i save mekim gut wok autim tok i kam antap long pletfom. Ol dispela pablisa i ken stori liklik long olsem wanem pasin bilong wok wantaim ol narapela long autim tok i bin helpim ol yet.
(15 min) Autim Tok long Ol Haus. Brata i mekim dispela tok em i ken lukim buk Lo, pes 84-86, na kisim sampela tok long en. Brata i mas givim bel long mekim dispela tok na strongim bel bilong ol brata sista. Stori long olsem wanem dispela tok inap helpim ol pablisa, na toktok long ol ples na taim kongrigesen i makim bilong ol grup i ken autim tok long ol haus. Stori tu long olsem wanem i bikpela samting yumi lainim ol nupela pablisa long autim gut tok long ol haus.
Singsing 117 (nupela) 50 (olpela) na beten.
WIK I KIRAP LONG OGAS 26
Singsing 211 (nupela) 115 (olpela)
(10 min) Ol toksave bilong kongrigesen.
(20 min) “Tingim Ol Narapela.” Paslain long miting makim sampela brata o sista i save gut long kaunim tok na bai ol i ken kaunim ol dispela paragraf. Kaunim pinis paragraf, orait kamapim askim bilong en.
(15 min) Sampela Stori long Wok Bilong Kingdom. Gutpela sapos yu wokim gutpela mep long blekbot, na bai ol brata sista inap save ol dispela kantri i stap we.
OSTRIA: Lain pablisa i go bikpela inap 18,962 long mun Disemba.
MATINIK: Dispela kantri em i wanpela liklik ailan i stap namel long Not na Saut Amerika. Long Disemba lain pablisa i go bikpela inap 3,005. Inap 5,410 manmeri i go long ol bikpela de kibung na 92 manmeri i kisim baptais.
ISRAEL: Long taim bilong pait ol bom i bin bagarapim ol haus bilong sampela brata, tasol i no gat wanpela brata i bagarap.
LAIBERIA: Long sampela hap bilong Laiberia, ol wan wan pablisa i autim tok inap 20 aua samting, maski bikpela hevi i painim ol. Tupela brens-ofis bilong Siera Leon na Aivori Kos i stap klostu long Laiberia, na ol brata long dispela tupela brens-ofis i mekim pasin sori na salim ol samting i go long ol brata, olsem kaikai na klos na laplap na ol narapela samting ol i sot long en.
YUKREN: Long kirap bilong dispela yia 1991, gavman i orait long ol Witnes Bilong Jehova i rejista long gavman. Olsem na nau long Yukren, ol Witnes Bilong Jehova i fri long mekim lotu bilong ol.
RASIA: Long Fonde, Mas 28, 1991, tupela brata long komiti bilong lukautim wok bilong yumi long Rasia, wantaim tupela brata long Lain Bilong Bosim Ol Witnes Bilong Jehova, na tupela brata bilong brens-ofis long Jemani, ol i go lukim Minista bilong Jastis, olsem Minista bilong bosim ol lo na kot, na ol i toktok wantaim em long ofis bilong em. Long dispela taim dispela dipatmen bilong gavman i givim sampela pepa long ol brata bilong makim olsem gavman bilong Rasia i orait long ol Witnes Bilong Jehova i mekim lotu bilong ol. Olsem na gavman i larim ol Witnes long Rasia i mekim ol miting na kibung, na kisim ol buk buklet samting, na kisim sampela haus olsem Haus Kingdom bilong ol, na mekim wok autim tok.
Singsing 15 (nupela) 21 (olpela) na beten.