Namba 1 Hap: Stretim Rot Nau Bilong Kam Long “Ol Man Bilong Laikim Pasin Bilong i Stap Fri” Kibung Distrik Bilong 1991/92
1 Long nau planti hevi i kamap long graun na ol manmeri long planti kantri ol i stap nogut na ol i pilim olsem ol i stap kalabus. Ol i laik bai ol i ken i stap fri. Tasol olsem wanem ol inap i stap fri tru? Jisas i tok: “Sapos yupela i holim strong tok bilong mi, orait yupela bai i stap ol disaipel tru bilong mi. Na yupela bai i save long tok tru, na tok tru bai i mekim yupela i kamap fri.” (Jo 8:31, 32) Ol man i stap fri olsem, ol i stap fri tru. Ol i no olsem ol man i laik i stap fri liklik na ol i daunim gavman na kamapim narapela kain gavman. Dispela kain pasin bilong i stap fri em Jisas i tok long en i kamapim long ples klia as bilong ol hevi bilong ol man. Jisas i tok long i stap fri long sin, na bai sin i no kalabusim ol moa. (Lukim Jon 8:24, 34-36.) Olsem na taim man i kamap disaipel tru bilong Jisas, bikpela senis i painim em; nau em i stap fri.
2 TRIPELA DE KIBUNG: Klostu nau ol kibung distrik “Ol Man Bilong Laikim Pasin Bilong i Stap Fri” bilong 1991/92, bai kamap long Papua Niugini. Namba wan kibung distrik bai kamap long Pot Mosbi, long Disemba 27-29, 1991. Ol kibung bilong 3-pela de bai kirap long Fraide long 10:20 long moningtaim na pinis long Sande long 4 klok samting long apinun. Long olgeta tok i kamap long kibung, bai i gat sampela gutpela tok bilong helpim yumi long i stap strong long ol samting bilong spirit. Ol bai toktok long kain kain samting i kamapim klia, olsem wanem yumi inap kisim dispela kain pasin bilong i stap fri em Rom 8:21 i stori long en. Bai yumi harim sampela gutpela tok ol bai kamapim insait long ol tok, na ol soim samting, na wanpela pilai bilong Baibel.
3 Yu mas pasim tok long bel bilong yu olsem: Yu no ken lusim wanpela hap tok bilong dispela kibung. Ating yu mas lusim sampela wok o laik bilong yu o yu mas senisim sedyul bilong yu bambai yu ken mekim olsem. Na ating sampela i mas stretim tok wantaim bos bilong ol paslain long taim bilong kibung na bai ol i no ken lusim sampela tok bilong kibung. Sampela brata, taim ol i go long kibung, ol i save bos bai katim hap pe bilong ol, na sampela ol i lusim wok bisnis bilong ol na ol i go long kibung long olgeta de, maski bikpela hap mani i lus long dispela. Sapos wok mani o narapela samting i laik pasim yu, orait yu mas beten strong long Jehova, tasol yu yet mas wok strong bambai yu no ken lusim wanpela hap tok bilong kibung. Sapos yu mekim olsem, bai yu kisim gutpela blesing long Jehova.—Lu 13:24.
4 KAMAP PASLAIN: Ol Witnes Bilong Jehova i gat nem long truim tok bilong ol, na ol i gat nem tu long kamap long wok long taim stret, na ol i no save abrusim taim. (Lu 16:10) Dispela pasin i bikpela samting tu taim yumi go long kibung distrik. Yumi mas kam hariap long kibung long olgeta de, na taim program i no kirap yet yumi sindaun pinis. Bilong mekim olsem yumi mas skelim gut taim bambai yumi gat taim bilong painim ples bilong putim ka na bilong painim ples sindaun bilong famili.
5 Taim bilong kibung em i gutpela taim bilong yumi ken kisim amamas long bung wantaim ol brata sista na toktok wantaim ol. Tasol taim program i pinis long apinun na yumi go bek long ples slip, nogut yumi bung na toktok wantaim i go inap biknait na yumi no slip gut. Sapos yumi no slip gut, orait bai yumi no inap kirap kwik long moningtaim bilong i go long kibung, na bai yumi kamap bihaintaim. Sapos yumi no kirap kwik long moningtaim, bai yumi mas mekim hariap ol samting, na dispela inap givim hevi long yumi na bel bilong yumi bai i no stap isi long kibung. Tasol sapos olgeta de yu kamap long ples kibung taim program i no kirap yet, bai yu inap bung na toktok na amamas wantaim ol brata na sista. Sapos yumi daun long Jehova na yumi laikim tru na tingim gut ol brata Kristen bilong yumi, orait bai yumi wok strong long kamap long kibung long taim stret ol i bin makim.
6 PUTIM GUT YAU: Dispela tok “putim gut yau” i olsem: Yumi mas putim gut tingting na bel na yau bilong yumi long ol tok. Yumi mas putim yau long “harim tok bilong [Jehova].” (Jer 2:4) Long Aisaia 55:2, Jehova i tokim ol Israel olsem: “Putim gut yau long tok bilong mi.” Sapos yumi putim gut yau long ol tok bilong kibung, bai yumi “kisim save moa yet.” (Snd 1:5) Taim yumi go long kibung distrik bai yumi hatwok liklik long harim gut tok na kisim save. Tasol taim yumi go long ol miting bilong kongrigesen em i narapela kain. Bilong wanem? As bilong dispela i olsem: Long kibung bai yumi sindaun longpela taim liklik na i gat planti samting bilong pulim ai na tingting bilong yumi, long wanem, planti manmeri ol i bung i stap. Yumi ken mekim wanem? Planti man long kibung ol i save raitim sampela hap tok long notbuk samting na bai tingting bilong ol i no ken raun. Gutpela sapos yumi olgeta long kibung i raitim sampela bikpela tok long notbuk—putim dispela wok i olsem wanpela mak bilong winim, long wanem, dispela bai helpim yumi long tingim gut ol tok ol brata i mekim. Gutpela tu sapos yumi givim pen na notbuk samting long ol pikinini na bai ol inap raitim sampela skripsa na bikpela hap tok ol i harim long kibung.
7 KAM LONG “OL MAN BILONG LAIKIM PASIN BILONG I STAP FRI” KIBUNG DISTRIK: Sapos yumi kam long dispela “Ol Man Bilong Laikim Pasin Bilong i Stap Fri” Kibung Distrik na yumi harim gut ol tok bai kamap, bai yumi save bilong wanem yumi inap mekim gutpela wok long pasin bilong i stap fri tru em yumi ol Kristen i kisim. Nau yu ken kirap long stretim ol samting na bai yu ken kam hariap long kibung na redi long harim namba wan singsing na olgeta tok i go inap long laspela beten long Sande long apinun.
“Ol Man Bilong Laikim Pasin Bilong i Stap Fri” Kibung Distrik Bilong 1991/92
1 STAP WANBEL LONG SINGSING NA BETEN: Olsem Jisas na ol aposel bilong em i bin mekim, pasin bilong singsing na litimapim nem bilong Jehova em i wanpela hap wok bilong lotuim tru Jehova. (Mk 14:26) Tok Pol i mekim long 1 Korin 14:15 i makim olsem taim ol Kristen i bung long mekim lotu, ol i save mekim singsing. Kibung distrik em wanpela rot bilong yumi ken stap wanbel wantaim planti handet handet o planti tausen tausen brata sista long litimapim nem bilong Jehova long singsing na beten.
2 Tasol sampela i no bin tingim ol dispela bikpela hap wok bilong lotuim Jehova—i olsem i samting nating tasol. Ol i bin kamap long ples kibung bihain long taim singsing i kirap o bihain long taim singsing na beten i pinis, na i no gat gutpela as bilong mekim olsem. Na sampela, taim kibung i laik pinis long apinun, ol i bin lusim ples bilong sindaun taim singsing i no pinis yet o paslain long brata i mekim beten. Ating wan wan taim tasol i gat gutpela as long mekim olsem. Tasol sapos sampela i sakim dispela rot bilong i stap wanbel wantaim ol brata sista long singsing na beten, long wanem ol i laik kamap long ka bilong ol hariap o ol i laik kisim kaikai hariap, yu ting ol i daun long Jehova na pilim tru ol gutpela samting em i redim bilong yumi?—Mt 6:33.
3 Taim yumi wok long tingim ol samting bilong helpim yumi yet, nogut yumi kisim tingting kranki bilong ol man bilong dispela graun na yumi tingting tumas long kisim ol samting bilong yumi yet tasol, olsem kaikai samting, a? Long wanem, dispela kain tingting inap bagarapim yumi long ol samting bilong spirit. Long dispela taim bilong yumi, planti brata sista long sampela kantri long Is Yurop nau ol i stap fri long mekim singsing na beten long kibung samting. Ol i amamas tru long ol inap singsing na beten wantaim bikpela lain brata sista, na olsem tasol yumi tu mas kisim amamas long lotuim Jehova na kisim ol kaikai bilong spirit na mekim singsing na beten wantaim ol narapela long kibung—nogut yumi tingim ol dispela samting i olsem samting nating tasol.
4 BIHAINIM PASIN KRISTEN: Ol man i bin lukim pasin Kristen yumi save bihainim long ol kibung, na pasin bilong yumi long bilas gut na kom gut, na dispela i mekim na ol Witnes Bilong Jehova i gat gutpela nem. Taim yumi lotuim Jehova, yumi no save mekim nabaut—yumi bihainim gutpela pasin; na taim yumi kibung tu, yumi save em i no taim bilong bung na toktok tasol wantaim narapela narapela. Long kain taim olsem, yumi mas bihainim gutpela pasin Kristen na yumi mas tingting long ol samting bilong spirit, na long olgeta taim yumi mas bihainim pasin olsem bilong wokman bilong God.—1 Ko 10:31-33.
5 Sapos yumi no mekim olsem, bai yumi mekim ol narapela i bel hevi, na ating bai yumi pundaunim sampela nupela man. Olsem wanem? Yumi save kamapim bel bilong yumi olsem yumi pilim tru ol gutpela samting ol narapela i bin mekim long yumi, maski em i liklik samting tasol? Yumi mas tingim gut ol narapela na daun long ol. Olgeta i mas save, taim tok bilong kibung i kirap, ol i mas putim yau na harim gut. Long dispela taim em i no taim bilong yumi toktok o wokabaut nating.—Kaunim Lo 31:12.
6 BILONG OL PAPAMAMA: Yumi amamas long ol pikinini na ol yangpela i ken kam long “Ol Man Bilong Laikim Pasin Bilong i Stap Fri” Kibung Distrik. Pasin bilong i stap fri em ol man bilong graun i laik kisim, em inap mekim na ol man i bagarap long ol samting bilong spirit, olsem Adam i mekim na em i no stap fri moa. Oganaisesen bilong Jehova i laikim yumi tumas na i bin givim gutpela tok long yumi na bai yumi kisim stretpela tingting long pasin bilong i stap fri em yumi ol Kristen i kisim. Yumi save amamas long ol yangpela, em papamama i bin lainim ol long putim gut yau long ol miting Kristen na ol i gat bikpela laik long harim ol tok long kibung! (Sng 148:12, 13) Papamama yet i mas bihainim gutpela pasin long kibung na ol i mas bosim gut ol pikinini tu. Sapos yupela papamama i no bin lainim yet pikinini bilong yupela long raitim ol tok ol i harim, orait, nau yupela ken kirap lainim ol nau long ol miting paslain long kibung. Na ol liklik pikinini tu i ken lain long raitim sampela skripsa na hap tok ol i harim long kibung.
7 Tru, papamama i save, ol pikinini i laik pilai tasol—em pasin bilong ol. Ol i no gat save long ol samting, na ol i no bin lain tu. Olsem na yumi mas lainim ol long putim yau na harim tok na bihainim gutpela pasin long ol miting na kibung. Olsem na papamama i mas bosim gut pikinini long dispela taim. Sampela papamama i no bin mekim olsem. Long taim bilong beten, ating papamama i harim gut brata i beten long Jehova, tasol pikinini i wok long pilai na dispela i pulim tingting bilong ol narapela man na ol i no inap putim gut tingting i go long beten em brata i wok long mekim. Papamama i mas save pikinini bilong tupela i mekim wanem long taim bilong beten na long taim ol i lusim sia na i go ausait samting. Mas bosim pikinini long taim ol brata i mekim yet ol tok long kibung; na taim dispela hap bilong program i pinis, papamama i mas bosim yet ol pikinini.—Kaunim Sindaun 29:15.
8 Mipela i laik kirapim gen olgeta brata na sista long kam long “Ol Man Bilong Laikim Pasin Bilong i Stap Fri” Kibung Distrik. Sapos yumi mekim olsem bai yumi inap pilim tru dispela pasin bilong i stap fri i kam long rot bilong Krais, na bai yumi mekim stretpela wok long pasin bilong i stap fri em yumi ol Kristen i kisim. Gutpela sapos nau yu kirap long stretim ol samting na bai yu ken kam hariap long kibung na redi long harim namba wan singsing na olgeta tok i go inap long laspela beten long Sande long apinun.
This article has been taken partly from km-E 5/91 “Arrange Now to Attend the 1991 ‘Lovers of Freedom’ District Convention.” Part 2 is in km 12/91 taken from box on p. 6.