Buk-Stadi Bilong Kongrigesen
Namba 2 Hap: Yumi Mas Redim Gut na Bekim Sampela Tok
1 Tok bilong Jehova long Baibel i tok, man i kisim gutpela tingting na save em i ken amamas, long wanem, em bai kisim gutpela pe long en. (Snd 3:13, 14, 16-18) Gutpela tingting long ol samting bilong spirit i gutpela samting tru na em inap helpim man long kisim laip. Sapos ol Kristen i gat gutpela tingting long ol samting bilong spirit, dispela bai helpim ol long mekim gutpela wok long ol save ol i bin kisim long Tok bilong God. Dispela bai helpim ol long lotu tru long God, na long stretim ol hevi i save painim ol, na long tingim gut ol wok samting ol i putim olsem wanpela mak ol i laik winim.
2 Buk-Stadi i gat wok bilong helpim yumi long stadi na bihainim ol Tok bilong God, na long dispela rot bai yumi inap kisim gutpela tingting long ol samting bilong spirit na kisim gut ol tok bilong en. Olsem na olgeta taim yumi mas i go long Buk-Stadi, long wanem, long dispela rot bai yumi kisim gutpela tingting na save long ol samting bilong spirit.—Snd 4:7-9.
REDI GUT
3 Sampela brata sista bilong kongrigesen long taim bilong ol aposel ol i no bin taitim bun tru bambai ol inap kisim save long tok i tru na ol i no wok long kisim ol nupela save bilong sampela tok i tru em oganaisesen bilong Jehova i bin kamapim long dispela taim bipo. Ol i stap olsem liklik pikinini long Krais, em ol i dring susu yet, na ol i no save gut long wanem ol pasin i stret. (Hi 5:11-13) Pol i wok long kirapim kongrigesen long kamap olsem “man i bikpela pinis.” (Hi 6:1) Bilong kamap olsem “man i bikpela pinis,” orait taim ol narapela i toktok long ol tok i tru, yumi no ken putim yau nating—yumi mas wokim tingting na skelim gut ol tok bilong buk o Baibel samting bambai “tingting bilong [yumi] i stap stret olgeta.” Bilong mekim ol dispela samting yumi “mas taitim bun tru.”—2 Pi 3:1, 2; Lu 13:24.
4 Sapos paslain long Buk-Stadi yumi redim gut ol tok bai kamap, dispela tu bai helpim yumi long kisim gut ol tok na bai yumi laikim tru ol tok bilong Buk-Stadi. Bilong redim gut, yumi no ken kaunim nating ol paragraf na katim hariap ol bekim. Nogat. Yumi mas isi isi na tingim gut ol tok bilong Buk-Stadi na olsem wanem ol dispela tok inap helpim yumi yet. Opim Baibel na lukim ol skripsa em paragraf i kolim na tingting long olsem wanem ol dispela skripsa i helpim ol bikpela tok long paragraf.
5 Sampela bilong yumi, taim ol yet i stadi, ating ol i gat hatwok liklik na ol i mas lusim bikpela hap taim long mekim, tasol maski, ol dispela samting bai helpim tru ol. Aposel Pol i stori long ol gutpela samting pasin bilong stadi gut bai kamapim, na em i tok: “Strongpela kaikai em i bilong ol man i kamap bikpela pinis. Ol kain man olsem ol i bin lain gut long pasin bilong skelim wanem ol pasin i gutpela na wanem ol pasin i nogut, na ol i save gut pinis na tingting bilong ol i klia.” (Hi 5:14) Sapos yumi yet yumi stadi, dispela bai helpim yumi long kamap olsem “man i bikpela pinis,” na bai yumi inap tingim gut ol samting yumi mas mekim.
BEKIM SAMPELA TOK
6 Yumi mas wok strong na bai yumi ken bekim sampela tok long olgeta Buk-Stadi. Bilong wanem yumi mas bekim tok? Sapos yumi redim gut na yumi bekim sampela tok, dispela bai kamapim bilip bilong yumi na strongim bel bilong ol brata bilong yumi. (Ro 10:10; Hi 10:23-25) Na tu, pasin bilong bekim tok long Buk-Stadi bai helpim yumi long kamap strong long ol samting bilong spirit. Ol man i save gut long pasin bilong bekim tok, na ol pikinini, na ol nupela man, sapos ol i bekim tok na ol i no pret, orait, ol brata sista bai harim ol kain kain bekim. Ol tok ol narapela i kamapim bai skulim yumi na givim nupela strong long yumi.
7 Sapos yumi wok strong long redim ol tok bilong Buk-Stadi, na oltaim yumi go long Buk-Stadi, na yumi bekim tok na yumi no pret, orait bai yumi inap kisim gutpela tingting na bai yumi “save gut long God.”—Snd 2:4, 5.
[Ol Askim]
1, 2. (a) Buk-Stadi i gat wanem wok? (b) Ol save yumi kisim long Buk-Stadi, olsem wanem dispela inap helpim yumi taim hevi i painim yumi?
3. (a) Kaunim Hibru 5:11-13. Sampela brata sista bilong kongrigesen long taim bilong ol aposel ol i stap olsem wanem? Yumi mas mekim wanem na bai yumi bihainim tok bilong Pol long Hibru 6:1? (b) Aposel Pita tu i givim wanem gutpela tok long yumi long 2 Pita 3:1, 2?
4. Yumi mas mekim wanem na bai yumi redi gut long Buk-Stadi?
5. Olsem Hibru 5:14 i tok, wanem ol gutpela samting bai kamap sapos yumi yet yumi stadi gut?
6. Bilong wanem i gutpela sapos ol pikinini na ol nupela man i bekim tok long Buk-Stadi?
7. Kaunim Sindaun 2:4, 5. Yumi mas mekim wanem na bai yumi inap “save gut long God”?