Buk Stadi i Save Helpim Yumi Olsem Wanem?
1 Pasin bilong mekim 5-pela miting bilong yumi na wok bilong ol dispela miting i narapela narapela. Tasol olgeta dispela miting i bikpela samting bilong helpim yumi long “tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol.” (Hi. 10:24, 25) Wanem sampela wok bilong Buk Stadi Bilong Kongrigesen em ol i save helpim yumi?
2 Helpim Yumi Long Kamap Strong: Namba bilong ol manmeri i save bung long buk stadi i liklik na i no olsem ol narapela miting bilong kongrigesen. Dispela i opim rot bilong yumi long pas gut wantaim ol arapela na dispela i strongim yumi long ol samting bilong spirit. (Snd. 18:24) Olsem wanem? Yu save wok strong long kisim save long olgeta bratasista i stap long buk stadi bilong yu, olsem askim olgeta wan wan long wok wantaim yu long wok autim tok? Buk Stadi i helpim wasman bilong Buk Stadi long save gut long sindaun bilong olgeta wan wan bratasista insait long grup na em inap helpim gut ol.—Snd. 27:23.
3 Olsem wanem? Yu bin singautim ol Baibel sumatin bilong yu long kam long buk stadi wantaim yu? Ol nupela husat i pret liklik long kam long ol bikpela miting bilong yumi, ating bai ol i no pret tumas long kam long bung i no gat planti man long en, na i kamap long wanpela haus. Pasin pren i stap long buk stadi bai mekim na ol pikinini na ol nupela man bai amamas long bekim tok. Grup i liklik, olsem na yumi inap bekim tok planti taim na givim biknem long Jehova.—Sng. 111:1.
4 Ol buk stadi i save kamap long ol hap bilong teritori we em i isi long ol bratasista i ken go long en. Tru, ol i no inap makim olgeta bratasista long i go long buk stadi i stap klostu long ol, tasol sapos yumi go long buk stadi ol i makim yumi long en, ating em i no longwe olsem ples we ol narapela miting bilong kongrigesen i save kamap long en. Ating ples bilong buk stadi bai i stap tu olsem ples bilong mekim bung bilong autim tok.
5 Helpim Yumi Long Autim Tok: Wasman bilong Buk Stadi i laik helpim olgeta wan wan long grup bilong em long autim tok oltaim, na mekim gut wok autim tok, na kisim amamas long en. Olsem na em i laik wok wantaim olgeta wan wan long grup bilong em, na helpim ol long sampela pasin bilong autim tok. Sapos yu pilim olsem i hatwok long yu mekim wanpela hap bilong wok autim tok olsem mekim gobek, orait toksave long wasman bilong Buk Stadi bilong yu. Ating em inap stretim rot bilong yu long wok wantaim wanpela pablisa i save gut long autim tok. Pasin bilong yu long skulim ol Baibel sumatin bai kamap gutpela moa sapos yu lukluk gut long pasin bilong wasman bilong Buk Stadi long skulim ol man long buk stadi.
6 Buk Stadi Bilong Kongrigesen em i wanpela gutpela samting tru! Dispela gutpela samting em Jehova i givim long yumi i helpim yumi long stap gut long ol samting bilong spirit long dispela taim nogut yumi stap long en.—Sng. 26:12.
[Askim Bilong Stadi]
1. Faipela miting bilong yumi i save helpim yumi olsem wanem?
2. Grup bilong buk stadi i liklik, dispela i kamapim wanem ol gutpela samting?
3. Olsem wanem buk stadi i save kirapim yumi long bekim tok na kirapim ol Baibel sumatin long kam long buk stadi?
4. Ol ples buk stadi i kamap long en i klostu, bilong wanem dispela i gutpela?
5. Olsem wanem wasman bilong Buk Stadi inap helpim yumi long mekim wok autim tok?
6. Bilong wanem yumi mas i gat laik long kisim helpim long buk stadi?