Buk Stadi Bilong Kongrigesen—Bilong Wanem Yumi Mas i Gat?
1 Long yia 1895, ol grup stadi bilong ol Sumatin Bilong Baibel, em nem bilong ol Witnes Bilong Jehova bipo, ol i kisim nem olsem Dawn Circles for Bible Study. Ol i stadi long ol buk Millennial Dawn. Bihain, ol i kolim ol dispela miting olsem Berean Circles for Bible Study. (Ap. 17:11) Ol grup i gat liklik lain long en i save bung long haus bilong wanpela brata long wanpela apinun i stret long olgeta. Long dispela rot miting bilong Buk Stadi Bilong Kongrigesen i kirap.
2 Strongim na Helpim: Liklik lain tasol i save bung long wan wan grup, olsem na i gat rot long olgeta inap bekim tok na kamapim bilip bilong ol. Dispela i mekim na olgeta long grup inap strongim bilip bilong narapela narapela.—Ro. 1:12.
3 Taim yumi lukim gut pasin bilong wasman bilong Buk Stadi long mekim wok tisa, dispela inap helpim yumi long “autim stret tok tru bilong God.” (2 Ti. 2:15) Lukim gut na lain long pasin bilong em long yusim Baibel long kamapim klia as bilong ol tok. Sapos i stret long buk samting yupela i stadi long en, em inap yusim Baibel tasol bilong kamapim klia ol bikpela tok long rot bilong riviu. Gutpela pasin bilong em inap helpim yumi long mekim wok tisa bilong yumi long wok Kristen bilong autim tok i kamap gutpela moa.—1 Ko. 11:1.
4 Long olgeta wik, wasman bilong Buk Stadi i save lukautim miting bilong Buk Stadi, na tu, em i save go pas long wok autim tok. Em i save wok wantaim wasman autim tok na stretim ol samting bilong dispela wok. Em i save wok strong long helpim olgeta long grup long inapim wok Kristen bilong ol long autim gutnius na kamapim disaipel.—Mt. 28:19, 20; 1 Ko. 9:16.
5 Wasman bilong Buk Stadi i tingim tru olgeta wan wan long grup bilong em, olsem ol i stap gut long ol samting bilong spirit o nogat. Em i kamapim klia dispela pasin long ol miting bilong kongrigesen na long taim em i wok wantaim ol arapela long wok autim tok. Taim em i go lukim ol brata long haus bilong ol, long dispela taim tu em i save helpim ol long ol samting bilong spirit. Olgeta i mas amamas long toktok long wasman bilong Buk Stadi taim ol i mas kisim helpim long ol samting bilong spirit.—Ais. 32:1, 2.
6 Strongim Narapela Narapela: Long ol kantri we ol i tambuim wok bilong ol manmeri bilong God, planti taim ol brata i save bung long ol grup i liklik moa. Wanpela brata i tok: “Maski ol i tambuim wok Kristen bilong mipela, taim mipela inap, mipela i save mekim ol miting long ol grup i gat 10-pela o 15 manmeri i bung. Long ol dispela miting, em stadi mipela i mekim long Baibel na taim mipela i bung wantaim ol bratasista bihain long stadi, mipela i kisim strong long ol samting bilong spirit. Mipela i save stori long ol ekspiriens bilong mipela, na dispela i helpim mipela long luksave olsem mipela wan wan i karim wankain hevi.” (1 Pi. 5:9) Olsem ol dispela brata, i gutpela yumi tu i strongim narapela narapela long rot bilong sapotim ol miting bilong Buk Stadi Bilong Kongrigesen.—Ef. 4:16.
[Askim Bilong Stadi]
1. Buk Stadi Bilong Kongrigesen i bin kirap olsem wanem?
2. Long wanem rot yumi inap strongim bilip bilong ol arapela long Buk Stadi?
3, 4. Olsem wanem miting bilong Buk Stadi i helpim yumi long mekim gut wok autim tok?
5. Wasman bilong Buk Stadi inap givim wanem kain helpim long olgeta wan wan long Buk Stadi?
6. (a) Olsem wanem pasin bilong bung long ol liklik liklik grup i bin strongim ol brata bilong yumi long ol narapela kantri? (b) Buk Stadi i bin helpim yu yet olsem wanem?