Samting Ol Wasman Bilong Buk-Stadi i Save Mekim Bilong Tingim Ol Wan Wan
1 Buk-Stadi Bilong Kongrigesen i no bikpela, olsem na “wasman i ken helpim gut ol wan wan bilong grup long ol samting bilong spirit. . . . Long rot bilong Buk-Stadi Jehova i mekim pasin sori long lain bilong em na em i lukautim gut ol.” (om p. 75; Ais. 40:11) Em nau, wasman bilong Buk-Stadi i gat wok long helpim gut ol wan wan long grup.
2 Long Buk-Stadi: Grup bilong Buk-Stadi i liklik tasol, olsem na wasman bilong Buk-Stadi inap save gut long ol wan wan long grup. (Snd. 27:23) Paslain na bihain long stadi long olgeta wik ating i gat rot bilong toktok wantaim ol. Insait long wanpela mun, ating em inap toktok wantaim klostu olgeta long grup. Dispela i save mekim na ol i no hatwok long go toktok wantaim em long taim hevi i painim ol o long taim ol i mas kisim sampela tok bilong strongim bel bilong ol.—Ais. 32:2.
3 Wasman bilong Buk-Stadi i laik kirapim olgeta long grup long bekim sampela tok. Wanpela rot i olsem: Em i save mekim stadi long pasin isi. (1 Te. 2:7, 8) Em i save painim rot bilong helpim olgeta—ol yangpela tu—long bekim tok insait long stadi. Sapos sampela i pret liklik, orait paslain long stadi em i ken askim ol long redi long ritim wanpela skripsa o bekim tok long wanpela paragraf. O em i ken helpim ol long save long rot bilong bekim tok long toktok bilong ol yet.
4 Sapos wanpela kongrigesen sevent i stap olsem helpim bilong wasman bilong Buk-Stadi, orait wasman i ken stretim rot bilong em i ken lukautim stadi wanpela taim long olgeta tupela tupela mun. Long dispela rot wasman inap skelim pasin bilong em na kamapim sampela tok bilong helpim em. Dispela em wanpela gutpela rot tru bilong helpim wok tisa bilong ol brata i kamap gutpela moa, a?—Ta. 1:9.
5 Long Wok Autim Tok: Wanpela bikpela wok bilong wasman bilong Buk-Stadi i olsem: Em i mas go pas long wok bilong autim tok. (Nam. 27:16, 17) Em i save stretim rot bilong grup i ken autim tok na em i wok strong long helpim olgeta long grup long kisim amamas long dispela wok. (Ef. 4:11, 12) Bilong mekim olsem, em i putim mak bilong go wantaim olgeta wan wan pablisa bilong grup long autim tok. Na tu, em i wok wantaim wasman autim tok long stretim rot na bai ol pablisa i laik kamap gutpela moa long wanpela hap wok bilong autim tok ol i ken kisim helpim long wanpela pablisa i gat save pinis long dispela wok.
6 Em Wasman i Gat Pasin Sori: Wasman bilong Buk-Stadi i save tingim ol lain em ol i hatwok tru long autim tok long wanem ol i lapun, o ol i no inap lusim haus, o ol i gat sampela bikpela sik o bagarap long skin i bilong sotpela taim tasol. Em i mas toksave olsem ol inap putim olgeta 15 minit 15 minit long ripot bilong ol long wok autim tok, maski ol i no winim wanpela aua long mun. (Kongrigesen Sevis Komiti bai makim wanem ol pablisa i ken putim kain ripot olsem.) Em i tingim tu ol pablisa long grup em ol i lusim wok autim tok, na em i ken wok long helpim ol long kirap gen long autim tok wantaim kongrigesen.—Lu. 15:4-7.
7 Yumi amamas tru long ol samting ol wasman bilong Buk-Stadi i save mekim bilong tingim yumi, a? Wok ol i mekim bilong helpim gut yumi i save helpim yumi olgeta long “stap wanbel tru” na ‘kamap strong na kisim ol wankain gutpela pasin olsem Krais yet.’—Ef. 4:13.