Buk-Stadi Bilong Kongrigesen
Namba 5 Hap: Wasman Bilong Wok Autim Tok i Kam Lukim Buk-Stadi
1 Wasman bilong wok autim tok em i mas autim tok na lainim gut ol man, olsem tisa. Em i mekim bikpela wok long helpim kongrigesen long inapim wok bilong ol long autim tok na lainim ol man long tok bilong Kingdom long teritori bilong ol. (Mk 13:10) Sapos em i tingim gut dispela wok bilong em na olgeta pablisa i wok gut wantaim em, bai ol i lain long autim gut tok bilong Kingdom, na bai ol inap autim tok long olgeta hap bilong teritori bilong ol.
2 Wasman bilong wok autim tok i wok strong long kirapim ol pablisa long mekim bikpela wok moa long wok autim tok. Buk-Stadi em wanpela bikpela rot bilong helpim ol long mekim olsem. Wasman bilong wok autim tok em i lukautim wanpela Buk-Stadi, tasol wanpela taim long olgeta mun em i ken i go lukim narapela Buk-Stadi, na long dispela taim helpim bilong em i ken lukautim Buk-Stadi bilong em.
3 Redim Gut Ol Samting Pastaim: Paslain long wasman bilong wok autim tok i go lukim Buk-Stadi, em i mas lukim Kat Ripot bilong ol pablisa bilong dispela Buk-Stadi. Em i mas stretim rot tu long bung wantaim brata i lukautim Buk-Stadi na toktok wantaim em long ol wok ol dispela pablisa i bin mekim. Sapos i gat sampela hevi bilong wok autim tok, em ol dispela kat i no kamapim, orait brata i lukautim Buk-Stadi i ken toksave long wasman. Kirapim tingting bilong brata i lukautim stadi long em i mas mekim stadi insait long 45 minit tasol bambai wasman bilong wok autim tok i ken mekim wanpela tok em inap long 15 minit.
4 Tok bilong wasman i mas helpim ol pablisa long laikim moa yet wok bilong autim tok. Sapos sampela pablisa i no save gut long pasin bilong mekim gut sampela hap bilong wok autim tok, orait, wasman bilong wok autim tok i ken kamapim sampela gutpela tok bilong helpim ol long mekim gutpela moa. Ol tok em i mekim i mas kirapim ol na strongim ol, nogut em i semim ol o mekim ol i bel hevi, sapos olsem, bai tok bilong em i no kamapim gutpela wok. Tok em i mekim i mas kirapim ol long mekim wok bilong ol i kamap gutpela moa.
5 Sapos em i gat taim long mekim, wasman bilong wok autim tok i laik helpim olgeta wan wan brata na sista long Buk-Stadi. Em i ken makim taim bilong i go autim tok wantaim ol. Taim em i wok wantaim ol, em i ken kamapim sampela tok bilong helpim pasin bilong ol long autim tok i kamap gutpela moa. Em i no ken daunim ol—em i mas i gat laik long helpim ol. Na tu, em i ken go wantaim ol pablisa taim ol i mekim ol gobek na Baibel-stadi. Sapos sampela ol i no strong tumas, orait, em i ken go lukim ol na strongim ol insait long dispela wik em i kam lukim Buk-Stadi. Bihain, em i ken toksave long brata i lukautim Buk-Stadi long ol samting em i bin mekim bilong helpim ol dispela pablisa. Dispela pasin sori wasman i mekim i bin helpim tru sampela, na nau ol i kamap strong gen long wok autim tok.
6 Ol Bung Bilong Autim Tok: Wasman bilong wok autim tok i mas lukautim ol bung bilong autim tok long wik em i go lukim Buk-Stadi. Ol dispela bung i mas kirap long taim stret, maski wan wan pablisa tasol i kam bung. Dispela bung em inap 10-15 minit tasol, no ken kalapim ol minit bilong en. Sapos wasman i laik toktok long teks bilong de, em laik bilong em. Paslain long beten, olgeta pablisa i mas save, bai ol i autim tok long wanem hap na bai ol i wok wantaim husat. (1 Ko 14:33, 40) Wasman bilong wok autim tok i mas kirapim olgeta pablisa long lusim ples bung hariap na go autim tok.
7 Wasman bilong wok autim tok i save go lukim ol Buk-Stadi na dispela inap helpim tru kongrigesen. Taim em i kam lukim Buk-Stadi, sapos yumi olgeta wan wan i wok gut wantaim em, wok bilong yumi long autim tok bai kamap gutpela—bai yumi no mekim nabaut. Na tu, em bai kisim amamas long ol dispela wok em i mekim. (Hi 13:17) Ol man i kain olsem sipsip ol bai kam insait long lain bilong Jehova, na yumi bai amamas, long wanem, yumi save yumi inapim tru dispela wok God i bin givim long yumi, em wok bilong autim tok long olgeta man i laik harim.—Ais 61:1, 2; Ese 9:11; Jo 17:26.
[Ol Askim]
1. (a) Wasman bilong wok autim tok i gat wanem ol wok? (b) Olgeta wan wan pablisa i ken mekim wanem bilong helpim wasman bilong wok autim tok long lukautim gut wok bilong em?
2. (a) Wasman bilong wok autim tok i wok strong long mekim wanem? (b) Helpim bilong em i ken mekim wanem bilong helpim em?
3. Taim wasman bilong wok autim tok i laik i kam lukim Buk-Stadi, em na brata bilong lukautim Buk-Stadi i ken mekim wanem bilong redim gut ol samting? Bilong wanem brata i mas mekim Buk-Stadi insait long 45 minit tasol?
4. (a) Bilong wanem wasman bilong wok autim tok i save go lukim ol Buk-Stadi? (b) Tok bilong em i mas mekim wanem long ol pablisa?
5. Wasman bilong wok autim tok i mas i gat wanem laik taim em i wok wantaim ol pablisa long autim tok? Em i mas helpim ol long wanem kain pasin?
6. Kaunim 1 Korin 14:33, 40. Wasman bilong wok autim tok na ol pablisa i ken mekim wanem bilong bihainim dispela tok?