Ol Miting Bilong Autim Tok i Save Helpim Yumi Long Mekim Gut Dispela Wok

1. Ol miting bilong autim tok i gat wanem wok bilong en?

¹ Wanpela taim, Jisas i bung wantaim 70 disaipel bilong em paslain long em i salim ol i go autim tok. (Luk 10:1-11) Em i strongim ol olsem taim ol i mekim dispela wok, ol yet i no inap mekim, “Bosman bilong bungim kaikai,” em Jehova, bai stap wantaim ol. Na tu, em i mekim ol tok we i strongim ol long mekim dispela wok, na em i stretim rot long ol i wok “2-pela 2-pela.” Long nau, ol miting yumi save mekim paslain long autim tok i mekim wankain wok—em i strongim, redim, na i helpim yumi long stretim gut ol wok bilong autim tok.

2. Yumi mas mekim miting bilong autim tok insait long hamas minit?

² Long nau, miting bilong autim tok i stap inap long 10 i go inap 15 minit, na wok bilong makim ol bratasista, makim teritori, na beten i insait long dispela haptaim. Ol i senisim nau dispela. Kirap long Epril, ol miting bilong wok autim tok bai sotpela, em bai 5-pela o 7-pela minit. Tasol sapos dispela miting i kamap bihain long wanpela miting bilong kongrigesen, em i mas sotpela moa, long wanem, ol bratasista i harim pinis ol gutpela tok bilong Baibel long miting bilong kongrigesen. Taim yupela i sotim miting bilong autim tok, dispela bai mekim na ol pablisa inap lusim bikpela haptaim moa bilong autim tok. Na tu, sapos ol painia o ol pablisa i kirap autim tok long moning paslain long miting bilong autim tok, ol bai stop liklik haptaim tasol bilong insait long dispela miting na kirap gen long autim tok.

3. Ol i mekim wanem bilong stretim ol miting bilong autim tok na dispela inap helpim ol pablisa?

³ Yupela i mas stretim gut ol miting bilong autim tok na dispela bai helpim gut ol pablisa. Long planti kongrigesen i gutpela long ol wan wan grup yet i mekim miting bilong ol bilong autim tok na ol i no ken bungim olgeta grup long wanpela hap tasol. Long dispela rot em i isi long ol pablisa i go long miting bilong autim tok na ating long teritori tu. Ol brata i lukautim miting bilong autim tok i ken makim hariap ol pablisa, na ating ol inap tingim gut ol pablisa i nidim helpim long ol. Lain elda i ken skelim gut ol samting na helpim gut ol. Paslain long ol i beten, ol pablisa i mas save pinis long wanem teritori ol bai wok long en, na husat ol bai wok wantaim.

4. Bilong wanem yumi mas tingim ol miting bilong autim tok i bikpela samting olsem ol narapela miting?

⁴ Em i Bikpela Samting Olsem Ol Miting Bilong Kongrigesen: Ol miting bilong autim tok i bilong helpim ol pablisa husat bai go long autim tok, na olgeta long kongrigesen i no go long dispela miting. Tasol dispela i no makim olsem yumi mas tingim dispela miting i liklik samting o i no bikpela samting olsem ol narapela miting bilong kongrigesen. Olsem ol narapela miting bilong kongrigesen, ol miting bilong autim tok i gutpela samting em Jehova i redim bilong strongim yumi long laikim narapela narapela, na mekim ol gutpela wok. (Hib. 10:24, 25) Olsem na brata i lukautim bung i mas redi gut bambai ol tok em i mekim bai litimapim nem bilong Jehova na i strongim ol pablisa husat i bung. Sapos i gutpela long mekim, ol pablisa husat i laik autim tok ol i mas go long miting bilong autim tok.

Yumi mas tingim ol miting bilong autim tok i bikpela samting olsem ol miting bilong kongrigesen, na yumi no ken ting em i liklik samting

5. (a) Wasman autim tok i save mekim wanem bilong stretim ol miting bilong autim tok? (b) Sista i mas bihainim wanem kain pasin taim em i lukautim miting bilong autim tok?

⁵ Brata i Lukautim Bung Bilong Autim Tok i Mas Redi Gut: Pablisa i mas kisim asainmen bilong em paslain bambai em i ken redi gut long mekim tok long miting. Dispela i wankain tu long ol miting bilong autim tok. Sapos i gat ol narapela narapela bung bilong autim tok, ol wasman bilong grup o helpim bilong em i mas lukautim miting bilong grup bilong ol. Tasol sapos olgeta grup i bung wantaim bilong autim tok, wasman autim tok bai makim wanpela brata long lukautim bung. Sampela wasman bai givim wan wan sediul long olgeta brata i save lukautim ol miting bilong autim tok na putim wanpela sediul long notisbot. Taim wasman autim tok i skelim na makim ol brata bilong lukautim dispela miting, em bai skelim olsem ol dispela brata inap mekim gut wok tisa na i stretim gut ol samting bilong wok autim tok, na dispela bai kamapim gutpela samting. Sapos i no gat elda, kongrigesen sevan, o narapela baptais brata i winim mak i stap em ol i makim em long lukautim grup sampela de, wasman autim tok i mas makim wanpela baptais sista husat inap long mekim dispela wok bilong lukautim miting bilong autim tok.—Lukim stori “Taim Sista i Lukautim Miting Bilong Autim Tok.”

6. Bilong wanem em i bikpela samting long brata i lukautim miting bilong autim tok i mas redi gut?

⁶ Taim yumi kisim wanpela asainmen long Skul Tiokratik Bilong Autim Tok o Miting Bilong Wok, yumi tingim dispela i bikpela samting na redi gut. Sampela i save wet inap long taim ol i go long miting, na nau ol i kirap tingting long wanem ol tok ol bai mekim. Tasol yumi no ken kisim dispela pasin taim yumi gat asainmen bilong lukautim miting bilong autim tok. Nau ol miting bilong autim tok bai sotpela, olsem na em i bikpela samting long redi gut na bai dispela i helpim ol pablisa husat i kam long dispela miting na pinis long taim stret. Wok bilong sekim na makim teritori pastaim em tu i insait long pasin bilong redi gut.

7. Wanem ol samting brata i lukautim miting bilong autim tok inap stori long en?—Lukim blok long pes 6.

⁷ Samting Yu Ken Stori Long En: Olgeta teritori i no wankain, olsem na gutpela wokboi i no kamapim stret wanpela samting tasol bilong stori long en long miting bilong autim tok, nogat. Kolim sampela samting brata i ken stori long en long blok “Long Miting Bilong Autim Tok, Yu Ken Skelim.” Long miting bilong autim tok olgeta i save stori long ol samting bai helpim yumi long wok autim tok. Sampela taim, yumi ken redim tu wanpela soim o lukim wanpela sotpela vidio long jw.org i stori long Baibel stadi samting. Bilong redim gut ol samting bilong autim tok, brata i lukautim grup i mas tingim ol samting bai strongim na i redim ol pablisa husat i go autim tok long dispela de.

Taim brata i redim ol hap bilong miting bilong autim tok, em i mas tingim ol tok bai strongim na i redim ol pablisa husat i go long autim tok long dispela de

8. Long ol Sarere na Sande, i gutpela tu long stori long wanem ol samting long ol miting bilong autim tok?

⁸ Olsem, long ol Sarere, planti pablisa i save tilim ol Wastaua na Kirap! Planti pablisa i autim tok long ol Sarere ol i no save kam autim tok namel long wik, olsem na ating ol i no inap tingim gut ol pasin bilong autim tok em ol i bin mekim prektis long en long taim bilong Famili Lotu. Olsem na bilong helpim ol i gutpela long brata i lukautim miting bilong autim tok long stori long wanpela pasin bilong autim tok i stap long baksait bilong Wok Kingdom. Na narapela rot em taim yumi tilim magasin yumi ken stori tu long wanpela nius, bikpela bung, o holide o stori long pasin bilong redim rot bilong mekim gobek sapos man bilong haus i kisim magasin. Sapos sampela long bung i bin tilim wanpela magasin, orait brata i lukautim grup i ken askim ol long stori liklik long sampela tok o ekspiriens bilong strongim ol pablisa. Long ol Sande, brata i lukautim miting bilong autim tok i mas bihainim wankain pasin long samting bilong tilim long mun. Ol buk samting bilong mekim Baibel stadi long en, olsem buklet Gutpela Nius, Harim Tok Bilong God na buk Baibel i Tok em yumi ken tilim long olgeta taim, olsem na brata i lukautim grup i ken stori liklik long hau yumi inap tilim wanpela bilong ol dispela buk samting.

9. Long ol wiken, brata i lukautim grup bilong autim tok inap stori long wanem samting taim yumi tilim invatesen pepa?

⁹ Sapos kongrigesen i insait long wok bilong tilim invatesen long wiken, orait brata i lukautim miting bilong autim tok bai stori long hau yumi ken tilim nupela magasin wantaim invatesen o liklik nius, o stori long yumi ken mekim wanem sapos man i laik harim tok. Narapela samting em ol i ken stori long wanpela ekspiriens i kamapim ol gutpela samting bilong dispela wok.

10, 11. Bilong wanem em i bikpela samting long ol pablisa long redi gut paslain long ol i go long miting bilong autim tok?

¹⁰ Samting Ol Pablisa i Ken Redim: Ol pablisa tu i mas redi gut long miting bilong autim tok na dispela bai helpim olgeta. Taim ol pablisa i redi paslain long autim tok, olsem long taim bilong famili lotu, ol bai gat samting bilong stori wantaim ol narapela pablisa. Taim yupela i redi long autim tok, yupela i mas redim tu ol magasin na buk samting paslain long go long miting bilong autim tok olsem na bai olgeta inap go hariap long teritori.

¹¹ Em i bikpela samting tu long go kamap long miting bilong autim tok paslain long bung i kirap. Tru, yumi wok strong long kamap long taim stret long ol miting bilong kongrigesen. Tasol, taim yumi go kamap leit long miting bilong autim tok, dispela inap pulim tingting bilong ol narapela pablisa. Olsem wanem yumi inap pulim tingting bilong ol? Brata i lukautim bung i bin tingim pinis ol samting paslain long em i makim grup na teritori. Sapos i gat planti liklik i kam long grup, em i ken salim i go long teritori we yumi save wok long en wan wan taim tasol. Sapos sampela i wokabaut i go long grup bilong autim tok na teritori i longwe liklik, em i ken makim ol dispela pablisa long wok wantaim ol pablisa i gat kar. Sapos teritori i stap long wanpela hap we i gat planti pasin raskol long en, orait em i mas makim ol brata long wok wantaim ol sista o wok klostu long ol. Ol pablisa i gat sik em i ken makim ol long wok long teritori we i no gat maunten long en o long ol haus i no gat planti step i go antap. Em i ken makim ol nupela pablisa long wok wantaim ol pablisa i save gut long wok autim tok. Tasol sapos ol pablisa i kam leit, em bai senisim gen ol poroman na bai ol pablisa husat i kam leit i ken wok wantaim sampela. Tru, ating i gat sampela as na yumi kam leit. Tasol sapos em i pasin bilong yumi long kam leit long olgeta taim, i gutpela long askim yumi yet, mi no amamas long miting bilong autim tok, o bikos mi no stretim gut ol samting paslain long mi go autim tok.

12. Sapos yu yet i laik makim ol poroman bilong wok wantaim, i gutpela long tingim wanem samting?

¹² Ol pablisa yet i ken makim ol poroman bilong ol paslain long miting bilong autim tok o brata i ken makim. Sapos yu laik makim ol poroman bilong wok wantaim, olsem wanem, yu inap wok wantaim sampela moa, olsem ol narapela narapela na yu no wok tasol wantaim ol pablisa em ol i pren bilong yu? (2 Kor. 6:11-13) Yu ting sampela taim yu inap stretim rot long wok wantaim nupela pablisa na helpim em long kamap gutpela tisa? (1 Kor. 10:24; 1 Tim. 4:13, 15) Putim gut yau long ol tok brata i mekim, na tu, long wanem hap grup bai kirap autim tok. Taim miting bilong autim tok i pinis, abrusim pasin bilong senisim gen ol poroman na go hariap long teritori.

13. Sapos ol pablisa i tingim gut ol dispela samting, orait ol miting bilong autim tok inap helpim yumi olsem wanem?

¹³ Bihain long autim tok, ol 70 disaipel em Jisas i salim ol long autim tok ol i “kam bek na ol i amamas.” (Luk 10:17) Yumi save, miting em Jisas i bin mekim wantaim ol paslain long ol i go autim tok i bin helpim ol long mekim gutpela wok. Long nau tu, yumi kisim wankain helpim long ol miting bilong autim tok. Sapos long olgeta taim ol pablisa i tingim gut ol dispela samting na mekim, ol miting bilong autim tok bai strongim, redim, na i helpim yumi long inapim gut wok bilong autim tok bilong yumi long “olgeta hap bilong graun.”—Mat. 24:14.

Taim Sista i Lukautim Miting Bilong Autim Tok

Sista i mas karamapim het bilong em na em bai sindaun taim em i lukautim miting bilong autim tok. Ol samting em i stori long en long miting bilong autim tok em i wankain long samting brata bai stori long en. Bilong abrusim pasin bilong mekim tok olsem em i skulim ol pablisa long grup, em i mas kirapim olgeta long grup long toktok wantaim. Na sapos em i askim narapela sista long mekim beten, orait dispela sista i mas karamapim het bilong em tu. Sapos brata i kam na miting bilong autim tok i kirap pinis, orait sista i ken askim brata long lukautim na pinisim miting bilong autim tok. Wasman autim tok i mas traim long luksave long ol kain samting inap kamap na givim sampela tok bilong stiaim ol lain bilong lukautim grup. Olsem, long taim wanpela yangpela baptais brata, i gat 9-12 krismas, i stap long miting bilong autim tok we wanpela sista ol elda i makim i lukautim, tasol ol elda i pilim olsem yangpela brata i no winim yet ol mak bilong lukautim dispela miting. Long kain taim olsem, wasman autim tok i mas toksave long sista na yangpela brata olsem ol elda i makim sista long lukautim dispela miting, tasol brata i mas mekim beten sapos ol elda i ting em i inapim ol mak long mekim. O ating wanpela baptais brata, em bikpela man, tasol ol elda i bin stretim em na em i no inap long lukautim ol miting bilong autim tok o beten long kongrigesen. Ol elda i no inap toksave long as na brata i no inap mekim, tasol ol bai toksave long sista ol i bin makim olsem em bai lukautim dispela miting na mekim beten maski brata i stap. Ol elda i mas toksave tu long brata long wanem ol de ol sista bai lukautim ol miting bilong autim tok.

Long Miting Bilong Autim Tok, Yu Ken Skelim:

Ol hap long pasin bilong autim tok i stap long ol Wok Kingdom.
Wanpela vidio i stap long jw.org i stori long Baibel stadi samting.
Wanpela gutpela rot bilong autim tok, olsem pasin bilong kirapim tok, mekim ol tok i opim rot long yu mekim gobek, o stori long kontribiusen taim man i kisim magasin samting.
Wanpela skripsa bilong strongim ol we i stret long wok autim tok.
Wanpela ekspiriens i bin kamap long wok autim tok long teritori o i stap long Wastaua samting.
Sampela tok long wanpela atikol long Wok Kingdom.
Wanpela tok i kamap nau tasol long hap bilong Miting Bilong Wok.
Wanpela stori bilong wok autim tok i stap long Wastaua.
Sampela tok bilong wok autim tok i stap long buk Skul Bilong Autim Tok na “Come Be My Follower.”
Wanpela hap long jw.org em yumi ken yusim long autim tok.
Sampela tok long buklet Tok i Go Pas Long Tok Bilong God em yumi ken yusim long autim tok.
Rot bilong kirapim tok wantaim wanpela long teritori husat i no bilip long God, em i bilip long evolusen, wanpela Hindu, o Buda.
Ol gutpela rot bilong bekim tok taim man i katim tok.
Rot bilong helpim poroman autim tok bilong yu long autim gut tok long man.
Rot bilong toktok wantaim man i gat narapela tokples.
Rot bilong insait long wanpela bilong ol wok bilong autim tok, olsem wok bilong painim ol man, long rot bilong autim tok long telefon, long ol pablik ples, mekim ol gobek, o ol Baibel stadi.
Kirapim ol pablisa long was gut, redi long senisim tok, mekim gutpela pasin, holim stretpela tingting, o kain pasin olsem.