Kisim Gutpela Helpim Long Ol Bung Bilong Autim Tok
1 Ol gutpela bung bilong wok autim tok i strongim yumi na i kamapim ol gutpela tok bilong helpim yumi paslain long yumi go mekim wok autim tok. Ol i opim rot long yumi ken wok wantaim ol narapela pablisa bambai narapela i ken strongim na skulim narapela. (Snd. 27:17; Sav. 4:9, 10) Yumi ken mekim wanem na bai ol dispela bung i ken helpim tru yumi?
2 Brata i Lukautim Bung: Ol bung bilong autim tok i no gat autlain i makim ol tok brata bai mekim. Olsem na sapos yu lukautim bung bilong autim tok, yu mas redi gut. No ken ting long skelim teks bilong de long olgeta taim. Tasol sapos teks bilong de i toktok long wok autim tok, orait yu ken kamapim sampela tok bilong en tu. Tingim wanem ol tok i ken helpim ol pablisa i laik autim tok long dispela de. Olsem: Yu ken stori o mekim soim long pasin bilong autim tok. Yu ken skelim sampela tok bilong buk Toktok Gut, buk Skul Bilong Autim Tok, o wanpela hap bilong Miting Bilong Wok. Sampela taim yu ken stori long wanpela hevi inap kamap long teritori na ol samting ol brata i ken mekim. O yu ken stori long pasin bilong kirapim ol man long harim tok na kirapim ol Baibel stadi, na moa yet sapos planti pablisa i tingting long mekim ol gobek. Maski yu stori long wanem samting, yu mas amamas na mekim ol gutpela tok i strongim ol bratasista.
3 Kirapim bung long taim stret, maski yu save sampela bai kam leit. Bihainim gutpela tingting long tilim grup na stretim gut teritori na bai em inap long grup. Bung i no ken abrusim 10 i go inap 15 minit, na bung i mas sotpela moa sapos yupela i mekim bihain long miting bilong kongrigesen. Paslain long miting i pinis, olgeta i mas save long ol bai wok wantaim husat na long wanem hap. Wanpela i mas beten bilong pinisim bung.
4 Yupela Inap Helpim: Olsem long ol miting bilong kongrigesen, yumi kamapim pasin bilong rispek long Jehova na tingim ol narapela taim yumi kamap long bung long taim stret. Gutpela sapos yu insait long toktok i save kamap long bung. Yu inap larim brata i lukautim bung i makim yu long wok wantaim wanpela, o paslain long bung yu yet i ken pasim tok long wok wantaim wanpela. Sapos yu yet i laik makim poroman, wok strong long wok wantaim narapela narapela pablisa na no ken wok wantaim ol gutpela pren bilong yu tasol. (2 Ko. 6:11-13) Taim bung i pinis, no ken senisim poroman brata i makim, na lusim bung hariap bilong i go long teritori.
5 As na yumi mekim bung bilong autim tok i wankain olsem ol narapela miting bilong kongrigesen. Ol dispela bung i stap bilong yumi ken “tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin.” (Hi. 10:24, 25) Sapos yumi wok strong long kisim helpim long ol dispela bung, dispela bai helpim yumi long mekim wok autim tok—em wanpela gutpela wok tru!
[Askim Bilong Stadi]
1. Ol bung bilong autim tok inap helpim yumi olsem wanem?
2. Brata bilong lukautim bung i ken stori long wanem ol samting?
3. Bung bilong autim tok i mas hamas minit? Brata i lukautim bung i mas mekim wanem ol samting insait long dispela haptaim?
4. Wanem samting bai helpim olgeta long kisim gutpela helpim long bung bilong autim tok?
5. I gat wanem as na yumi mekim ol bung bilong autim tok?