Ol Bung Bilong Wok Autim Tok

1. Bilong wanem yumi laik stretim gut wok bilong autim tok?

¹ Jisas i stap olsem gutpela piksa long pasin bilong stretim gut wok bilong autim tok bilong Kingdom. Long nau tu, ol brata husat i lukautim wok bilong autim tok bilong Kingdom long olgeta hap bilong graun, ol i laik tru long stretim gut dispela wok. Bilong mekim olsem, ol kongrigesen long olgeta hap i save mekim ol bung bilong wok autim tok, em wanpela gutpela rot bilong stretim ol grup bilong ol pablisa long autim tok bilong Kingdom.​—⁠Mt. 24:​45-47; 25:21; Lu. 10:​1-7.

2. Wanem wok bilong ol bung bilong wok autim tok?

² Gutpela Bung: Ol kongrigesen i save mekim ol bung bilong wok autim tok bilong strongim ol pablisa, kamapim ol gutpela tok bilong helpim ol, na stiaim ol pablisa em ol bai go autim tok. Inap sotpela taim brata i lukautim bung i ken skelim teks bilong de, sapos dispela teks i stret wantaim wok bilong autim tok. Sampela taim, brata i ken toktok long sampela tok bilong Wok Kingdom, buk Toktok Gut, o buk Skul Bilong Autim Tok bilong helpim olgeta pablisa i stap long bung long redi gut long autim tok long dispela de. Em inap kamapim tu sotpela soim long tilim buk o nius. Paslain long mekim beten bilong pinisim bung, olgeta pablisa i mas save long ol bai wok wantaim husat na wanem teritori ol bai autim tok long en. Bung bilong autim tok i no ken abrusim 15 minit, na bihain stret olgeta i mas go long teritori.

3. Husat i mas stretim wok bilong ol bung bilong wok autim tok?

³ Ol i Stretim Olsem Wanem? Wasman autim tok i mas i go pas long stretim ol bung bilong autim tok. Ol brata i lukautim grup, o ol helpim bilong ol, ol i mas wok wantaim grup bilong ol long autim tok long wiken. Ating sampela wasman o kongrigesen seven inap wok wantaim ol grup namel long wik. Ol brata i lukautim grup ol i mas wok gut wantaim wasman autim tok na bai grup bilong ol i gat teritori inap long ol i ken autim tok long ol haus long wiken. Wasman autim tok bai stretim wok em ol brata bilong lukautim grup namel long wik bai mekim bilong autim tok wantaim ol pablisa.

4-6. (a) Olsem wanem ol bung bilong autim tok i mas helpim wok bilong autim tok long teritori bilong kongrigesen? (b) Ol i mas skelim wanem ol samting bilong save long wanem hap na wanem taim i gutpela long mekim ol bung bilong autim tok?

⁴ Mekim Ol Bung We na Wanem Taim? No ken stretim rot long kongrigesen olgeta i bung long wanpela hap. Ating i gutpela moa long mekim ol dispela bung long ol haus bilong ol brata long narapela narapela hap bilong teritori na bai ol pablisa i ken autim gut tok long olgeta hap bilong teritori. Ol i ken mekim tu ol bung bilong autim tok long ol Haus Kingdom. Planti kongrigesen i yusim Haus Kingdom bilong mekim ol bung bilong autim tok bihain liklik long ol miting long Sande. Ol elda i mas stretim gut ol bung bambai ol pablisa i no lusim longpela taim tumas long go kamap long teritori. Long Papua Niugini, planti taim ol i mekim ol bung bilong autim tok long teritori. Sapos ol i mekim olsem, ol i mas bihainim stretpela tingting na no ken mekim ol bung long ples we i pulim planti man. Ol i mas skelim ol hap we ol i save mekim ol bung long en, olsem ol dispela hap i stret yet bilong helpim ol pablisa long wokim gut olgeta hap bilong teritori o nogat.

⁵ Ol i mas skelim wanem kain teritori ol bai wok long en, na makim gutpela taim bilong mekim ol bung bilong autim tok, na hamas taim bai ol i mekim ol bung namel long wik. Ol askim i kamap bihain long dispela inap stiaim ol long save long wanem hap na wanem taim i gutpela long mekim ol bung.

⁶ Yumi mas tingim gut moa wanem teritori? Wanem taim i gutpela long autim tok long ol haus? I gutpela long makim taim long apinun bilong autim tok long ol haus o long mekim ol gobek? Putim olgeta sediul bilong autim tok long notisbot bilong kongrigesen. Olgeta pablisa bilong Kingdom i laik autim gut tok long teritori bilong ol na bai ol i ken mekim wankain tok olsem aposel Pol: “Nau mi no gat wok moa long dispela hap.”​—⁠Ro. 15:⁠23.

7. Brata ol i makim bilong lukautim grup i gat wanem wok?

⁷ Lukautim Ol Bung Bilong Wok Autim Tok: Brata ol i makim bilong lukautim dispela bung i soim rispek long dispela wok tiokratik sapos em i redi gut. Ol i mas kirapim ol dispela bung long taim stret, na bung i mas skulim gut ol pablisa, na no ken abrusim 10 i go 15 minit. Paslain long bung, brata i lukautim grup i mas save pinis long wanem teritori ol bai wok long en. Taim bung bilong autim tok i pinis, i no gat wok long wetim ol pablisa i kam bihaintaim, tasol sapos ol i lusim wanpela toksave long wanem hap grup bai wok long en, dispela inap helpim ol dispela pablisa. Kwiktaim bihain long bung i pinis, olgeta i mas go long teritori. Sapos ol i stretim gut bung na skulim gut ol pablisa, dispela bai stiaim gut ol pablisa i kam long bung long ol i ken mekim gut wok autim tok long dispela de.​​—⁠Snd. 11:⁠14.

8. Long wanem ol rot ol pablisa husat i kam long ol bung bilong wok autim tok ol inap wok gut wantaim ol brata i go pas long wok?

⁸ Go Long Ol Bung Bilong Wok Autim Tok: Em i bikpela samting long olgeta i wok gut wantaim. (Hi. 13:17) Sapos inap, brata i lukautim grup bai helpim olgeta pablisa husat i mas i gat poroman long wok wantaim. Ol pablisa i save gut long autim tok, i gutpela long ol i kam long bung na bai ol i ken helpim ol nupela pablisa na ol pablisa i no save tumas long autim tok. Ol pablisa husat i redi long autim tok wantaim sampela narapela pablisa, ol inap helpim gut wok. (Snd. 27:17; Ro. 15:​1, 2) Olgeta i mas wok strong long kamap long taim stret. Taim yumi rispektim dispela wok tiokratik na tingim ol wanwok bilong yumi, dispela bai kirapim yumi long mekim sampela senis na bai yumi inap helpim dispela wok.​​—⁠2 Ko. 6:​3, 4; Fl. 2:⁠4.

9. Long wanem ol gutpela rot ol painia inap helpim dispela bung?

⁹ Helpim i Kam Long Ol Painia: Sapos ol painia i kam long bung bilong autim tok, dispela i gutpela na i strongim ol narapela. Yumi save, ol painia i gat planti wok. Ol i save mekim ol Baibel stadi na gobek, na ating ol i mas mekim sampela wok bilong helpim famili na mekim wok mani. Olsem na ol painia i no ken ting ol i mas go long olgeta bung bilong autim tok em kongrigesen i save mekim, na moa yet sapos kongrigesen i save mekim ol bung long olgeta de. Tasol ating ol painia inap sapotim sampela bung bilong autim tok long olgeta wik. Ol bung bilong autim tok i bilong skulim ol pablisa, na save bilong ol painia long ol tok bilong Baibel na wok bilong autim tok inap helpim gut ol narapela. Ol i save autim tok long olgeta taim na dispela i mekim na ol i kisim gut save long wok bilong autim tok. Ol inap helpim ol narapela long rot bilong dispela save. Pasin bilong ol long givim bel tru long autim tok na kam long ol bung bilong autim tok, dispela i mekim na ol i stap olsem gutpela piksa long ol narapela i ken bihainim. Na ol bratasista i amamas tru long pasin bilong ol long insait long ol dispela miting.

10. Bilong wanem i stret long olgeta pablisa bilong Kingdom i givim bel tru long sapotim bung bilong autim tok?

¹⁰ Olsem Jisas na ol disaipel bilong em i bin mekim, bikpela hap bilong wok bilong autim tok bilong Kingdom em long autim tok long ol haus. Ol bung bilong autim tok i bilong narapela i ken strongim bel bilong narapela na ol i ken mekim gut dispela wok. Olgeta pablisa bilong autim gutnius i mas helpim dispela wok tiokratik inap long skel bilong ol. (Ap. 5:42; 20:20) Yumi olgeta i laik givim bel tru long sapotim dispela bung. Taim yumi mekim olsem, yumi ken save tru olsem Jehova bai blesim yumi na yumi inap mekim bel bilong Lida bilong yumi, Jisas Krais, i amamas taim yumi autim gutnius bilong Kingdom Bilong God.​—⁠Mt. 25:​34-40; 28:​19, 20.