Askim 1

◼ Wanem ol tok i gutpela long mekim long ol bung bilong wok autim tok?

Ol bung bilong autim tok i bilong helpim yumi long tingim gut wok yumi bai mekim bihain long bung​—⁠em wok autim tok. Olsem na brata i lukautim bung em i mas redi gut na kamapim sampela tok i strongim ol brata, i stret long wok autim tok, na i helpim ol brata long mekim wok. Sapos teks bilong de i stori long wok autim tok, ol i ken ritim na stori liklik long en. Tasol dispela bung i mas stori long ol samting bilong wok autim tok, helpim ol brata i redi long go autim tok bilong ol i ken mekim gut wok long dispela de.​—⁠2 Ti. 4:⁠5.

Brata i ken kamapim sampela tok i stap long Wok Kingdom bilong helpim olgeta long tingim samting bilong tilim long dispela mun na rot bilong tilim. Long De Magasin bihainim tok i stap long hap “Ol Tok Yu Ken Mekim Bilong Tilim Ol Nius” na mekim soim. Bilong tilim ol narapela samting, brata i ken kamapim wanpela o tupela tok long buk Toktok Gut i stret long teritori bilong yupela. Brata i ken toktok long wanpela samting bilong wok autim tok o mekim soim long en, olsem pasin bilong yusim Baibel long haus bilong man, yumi ken bekim wanem tok long man i katim tok, olsem wanem yumi ken kirapim man long stadi long Baibel, o mekim gobek long ol man i laik harim tok.

Ol bung bilong wok autim tok i no ken abrusim 10 i go inap 15 minit. Insait long dispela hap taim brata i mas makim ol poroman, makim teritori, na beten. Taim bung i pinis, olgeta i mas save long husat bai wok wantaim husat na ol bai wok we, na ol i mas kirap hariap na go long teritori. Dispela bung i sotpela, olsem na em i bikpela samting long olgeta i kam long taim stret. Taim bung bilong wok autim tok i kamap bihain stret long miting bilong kongrigesen, olsem Stadi Wastaua, orait bung i mas sotpela moa. I no gat wok long skelim teks bilong de, long wanem, yupela i bin toktok pinis long ol tok bilong Baibel.

Inap sampela de paslain long bung bilong wok autim tok, yupela i mas makim ol strongpela brata i baptais pinis long lukautim ol bung. Sapos i no gat brata bilong lukautim bung long dispela de, ol elda i mas skelim wanem ol sista i baptais pinis ol inap lukautim bung, sapos ol i mas mekim olsem. Sista bai sindaun, na em i ken kirapim grup long toktok long teks bilong de, o sampela narapela samting bilong wok autim tok, na em i toktok inap sotpela taim tasol. Em i mas karamapim het long laplap.

Ol bung bilong autim tok i gutpela samting tru bilong strongim na redim yumi long mekim wok autim tok. Taim brata bilong lukautim grup i redi gut, olgeta bai kisim gutpela helpim tru.