Askim 2
◼ I stret long Kristen i kisim wanpela wok mani em wokman i mas karim gan, stik, o spia samting bilong pait long man?
Pasin bilong pait na bagarapim man i go bikpela, olsem na ating ol sekiuriti bilong was long ol beng samting, na ol polis i mas karim gan, stik, o spia samting, bilong ol i ken holim dispela wok mani.
Maski dispela wok i bilong lukautim ol man (o haus samting), man i bihainim Jisas i mas wok oltaim long i stap wanbel wantaim ol man. (Ro. 12:17, 18) Kristen i mas tingim ol dispela samting: Sapos wanpela bikpela samting i kamap na mi mas hariap na mekim sampela samting na dispela inap bagarapim laip bilong man, mi redi long karim hevi bilong dispela samting? Sapos wanpela samting i kamap, mi redi long yusim gan o stik samting, na nau mi gat asua long blut bilong man long ai bilong Jehova?—Sng. 51:14.
Kristen i mas painim wanpela wok mani i no gat wok long karim gan samting. Sampela Witnes i bin toktok wantaim bos long dispela samting, na bos i senisim wok bilong ol na ol i no gat wok long holim gan samting. Tasol ating i no olgeta bos inap mekim olsem. Sapos bos i no inap senisim wok bilong Kristen, orait em i mas painim narapela wok.—Ais. 2:4.
Sapos long ples wok brata i gat wok long karim gan, spia, banara, o stik samting, ol elda i ken givim 6-pela mun long em bilong senisim wok bilong em. Tasol sapos em i no mekim, em i no stap moa olsem gutpela piksa long kongrigesen. Bai em i no inap holim wanpela wok o mekim sampela wok insait long kongrigesen. Em i no inap stap olsem wanpela elda, kongrigesen sevent o painia.—1 Ti. 3:2; Ta. 1:5, 6; lukim Wastaua, Februeri 1, 1984, p. 21-22; Watchtower, Februeri 15, 1973, p. 127-128.
Ol Kristen i gat gutpela tingting ol inap abrusim ol samting inap kirapim ol long pait samting bilong lukautim skin bilong ol yet. (Snd. 15:1; 17:14; 26:17) Tasol sapos man nogut i laik bagarapim Kristen, orait Kristen i ken sakim han bilong man o tromoi han bilong sakim em bambai man nogut i no inap bagarapim em, o em i kirap nogut inap liklik taim na Kristen i gat rot long ranawe. Tasol i no gat wanpela taim i stret long Kristen i raun wantaim gan o stik samting bilong lukautim skin bilong em, na em i no ken kirap long kros pait na wok long bagarapim man. Sapos man nogut i traim long reipim meri Kristen, em bai mekim olgeta samting em inap mekim bilong sakim man, olsem singaut strong na paitim o kikim man.—Lo 22:23-27; 1 Ko. 6:18.
This is a repeat of article in km 4/95 and 8/98, unique to PNG.