Wetim Jehova i Strongim Yu
1 I gat planti as na yumi mas wetim Jehova i helpim yumi. Wok bilong autim gutnius “long olgeta hap bilong graun” i wanpela bikpela wok tru. (Mt. 24:14) Long olgeta taim yumi pait bilong daunim sin i stap long skin bilong yumi. (Ro. 7:21-23) Na tu, “yumi pait long . . . ol kain kain samting i gat strong, ol i save bosim graun long dispela taim bilong tudak.” (Ef. 6:11, 12) Olsem na yumi mas kisim helpim. Olsem wanem yumi inap kisim strong long Jehova?
2 Long Rot Bilong Beten: Jehova i save givim strongpela spirit holi bilong em long ol wokboi bilong em i askim em long givim dispela samting. (Lu. 11:13) Olsem wanem? Yu ting yu no save gut long pasin bilong autim tok long ol haus o long rot? Yu save pret long autim tok long kain kain taim na ples? Ol man i les long harim tok na dispela i mekim na yu no givim bel moa long wok autim tok? Olsem wanem sapos ol man i subim yu long mekim pasin i no stret wantaim bilip bilong yu o lusim pasin bilong stap gut long God? Wetim Jehova i helpim yu. Beten askim em long strongim yu.—Fl. 4:13.
3 Long Rot Bilong Stadi: Taim yumi kisim kaikai dispela i strongim skin bilong yumi, na olsem tasol pasin bilong ritim oltaim Tok Bilong God na ol buk na nius bilong “wokboi i gat gutpela tingting,” dispela i strongim yumi long ol samting bilong spirit. (Mt. 4:4; 24:45) Taim ol i askim Stanley Jones long wanem samting i bin helpim em long sanap strong taim em i stap wanpis long rum kalabus long Saina inap planti yia na em i no gat Baibel, em i tok: “Yumi inap sanap strong na holimpas bilip. Tru, yumi mas stadi pastaim. Yumi no gat strong sapos yumi no stadi.”
4 Long Rot Bilong Ol Miting: Long wanpela miting Kristen long taim bilong ol aposel, Judas na Sailas i “givim planti gutpela tok long ol Kristen, na long dispela pasin tupela i strongim bel bilong ol.” (Ap. 15:32) Long nau tu, ol tok yumi harim long ol miting i mekim na yumi amamas moa long ol gutpela pasin bilong Jehova, strongim bilip bilong yumi, na kirapim yumi long mekim wok autim tok. Long ol miting yumi bung oltaim wantaim ol brata em yumi ‘save mekim wok bilong Kingdom wantaim’ ol na ol i save ‘helpim yumi gut tru.’—Kl. 4:11.
5 Yumi mas kisim helpim long dispela taim bilong “planti hevi nogut tru.” (2 Ti. 3:1) Ol man i kisim strong i kam long Jehova, Baibel i tok promis long ol olsem: “Bai ol i flai olsem ol tarangau. Bai ol i ran na ol i no inap sotwin, na bai ol i wokabaut na ol i no inap les.”—Ais. 40:31.