Givim Bel Long Wok Autim Tok
Namba 5 Hap: Gutpela Samting Bilong Pasin Bilong Givim Bel Olgeta
1 Jehova i givim planti gutpela samting long ol wokboi i givim bel olgeta long mekim wok bilong em. (Sng 116:12) Taim yumi autim tok, yumi mas mekim wanem na bai Jehova i givim planti blesing long yumi? Bihain, bai yumi kisim wanem ol gutpela samting? Yumi mas mekim wanem na bai Jehova i orait long yumi na belgut tru long yumi?
2 Yumi Yet i Mas Wok Strong: Sapos yumi yet i wok strong long bihainim laik bilong God, bai God i givim planti gutpela samting long yumi. Aposel Pol i stori long wok autim tok na em i tok: “Wan wan bai i kisim pe inap long wok [em] i bin mekim.” (1 Ko 3:8) Olsem na yumi mas givim bel long mekim wok bilong autim tok inap long skel bilong yumi. Pol i bin helpim planti manmeri na sampela kongrigesen olgeta long kisim save long God, na dispela i olsem gutpela pe em i kisim. Em i lukim ol i stap strong long bilip na em i amamas tru! (1 Te 2:19, 20) Ating i gat sampela samting i mekim na yumi no inap mekim bikpela wok autim tok olsem Pol i bin mekim. Tasol sapos yumi helpim wanpela man o wanpela famili long wokabaut long rot i go long laip, em wanpela gutpela blesing, a? Dispela samting i mas kirapim yumi long wok strong long autim tok long ol man long haus na mekim ol gobek na Baibel-stadi!
3 Ol Gutpela Samting Bilong Kisim Bihain: Sapos yu givim bel olgeta long mekim wok, bai yu kisim gutpela samting olsem: Bai yu stap klostu moa long Jehova na Krais Jisas. (Mt 11:29, 30; 1 Ko 3:9) Na taim yu autim tok na yu pilim spirit bilong Jehova i helpim yu, bai yu amamas tru! (Mt 10:20; Jo 14:26) Na tu, sapos yu wok gut wantaim ol narapela insait long kongrigesen, dispela bai strongim pasin wanbel na pasin sori insait long kongrigesen.
4 Sapos yumi laik kisim planti gutpela samting long Jehova, olsem ol blesing, yumi mas wok gut wantaim dispela oganaisesen Em i mekim wok long en bilong kamapim laik bilong em nau long las taim. (Lukim 2 King 10:15.) Taim yumi wok gut wantaim dispela oganaisesen na givim bel olgeta long bihainim ol tok yumi kisim long rot bilong en, na yumi wok strong long mekim ol wok em kongrigesen i save mekim, orait dispela i save lukautim yumi na ol trik bilong Satan i no inap pundaunim yumi. Na dispela bai helpim yumi long mekim gutpela moa wok bilong autim tok.
5 Ol 5-pela hap bilong dispela stori long pasin bilong givim bel olgeta long wok autim tok, ol i bin kamapim sampela bikpela samting. Yu tingim?
a. Wanem ol samting inap helpim yumi long pilim tru ol gutpela pasin bilong Jehova na dispela i kirapim yumi long givim bel olgeta long mekim wok autim tok?—km-MP 10/91, Wik i Kirap Long Oktoba 7.—Mt 22:37-39; Hi 10:24, 25.
b. Bilong givim bel tru long wok autim tok, bilong wanem pasin bilong redi gut pastaim i bikpela samting? Yumi mas mekim wanem na bai yumi redi gut?—km-MP 11/91, Wik i Kirap Long Novemba 11.—Jo 2:17.
c. Ol pablisa i save gut long pasin bilong autim tok, ol i ken mekim wanem bilong helpim ol narapela long givim bel olgeta long wok autim tok?—km-MP 1/92, Wik i Kirap Long Janueri 6.—Ef 5:15, 16. Olsem wanem? Yu bin bihainim ol dispela tok?
6 Jehova i laik bai yumi bihainim ol tok bilong em na bai yumi kisim ol gutpela samting. (Ais 48:17) Na tu, sapos yumi givim bel olgeta long mekim wok autim tok, ol man i harim tok bilong yumi ol tu bai kisim ol gutpela samting. (1 Ti 4:15, 16) Taim yumi wok strong long mekim ol dispela wok, yumi save Jehova i lukim na em “bai i givim pe long [yumi], em ol dispela gutpela samting em i makim pinis bilong ol manmeri bilong en,” em laip i stap oltaim.—Kl 3:23, 24.
[Ol Askim]
1. Kaunim Buk Song 116:12. God i givim ol gutpela samting long yumi, na yumi ol wan wan i ken givim wanem ol askim long yumi yet?
2. (a) Tok bilong 1 Korin 3:8 i kamapim wanem lo? (b) Aposel Pol i kisim wanem gutpela pe? (c) Wanem samting i mas kirapim yumi long givim bel olgeta long mekim wok?
3. Kamapim sampela tok bilong Baibel na kolim 3-pela gutpela samting yu inap kisim sapos yu givim bel olgeta long mekim wok bilong Jehova.
4. Sapos yumi wok gut wantaim oganaisesen bilong Jehova, dispela bai helpim yumi olsem wanem?
5, 6. God i tok promis long mekim wanem, olsem Kolosi 3:23, 24 i tok?