Jehova i Amamas Long Wok Yu Givim Bel Olgeta Long Mekim
“Olgeta samting yupela i mekim, yupela i mas wok strong na mekim. I no olsem yupela i mekim wok bilong ol man. Nogat. Yupela i mekim wok bilong Bikpela.”—KOLOSI 3:23.
1, 2. (a) Wanem gutpela wok tru yumi inap mekim, i winim olgeta narapela wok? (b) Bilong wanem sampela taim yumi no inap mekim wok bilong God inap tru long mak yumi laikim?
WOK bilong Jehova em i nambawan gutpela wok yumi inap mekim. I gat as tru na inap longtaim pinis dispela nius i wok long kirapim ol Kristen long mekim wok bilong God, na sapos inap, ol i ken mekim wok bilong em “moa yet.” (1 Tesalonaika 4:1) Tasol sampela taim yumi no inap mekim wok bilong God inap tru long mak em bel bilong yumi i laik tru long mekim. Wanpela sista singel em i bin baptais olsem 40 yia i go pinis, em i tok: ‘I stap bilong mi i mekim na mi mas wok mani long olgeta de. Tasol mi no mekim bilong kisim ol gutpela gutpela bilas, o bilong limlimbur na raun long sip samting, nogat. Mi mas wok bambai mi ken baim ol samting mi mas kisim, na bilong baim dokta na marasin samting na baim dokta bilong stretim tit. Mi pilim olsem liklik hap taim na strong bilong mi i stap yet, em mi givim dispela tasol long Jehova.’
2 Pasin bilong laikim tru God i save kirapim yumi long mekim wok bilong autim tok inap tru long strong bilong yumi. Tasol sampela samting long i stap bilong yumi inap pasim yumi na yumi no inap mekim bikpela wok tumas. Sapos yumi gat sampela wok em Baibel i tok yumi mas mekim, na wok bilong lukautim famili, dispela inap pulim bikpela hap taim na strong bilong yumi. (1 Timoti 5:4, 8) Nau long dispela taim bilong “planti hevi nogut tru,” i stap bilong yumi i gat hatwok tru long en. (2 Timoti 3:1) Taim yumi no inap mekim bikpela wok tumas long autim tok olsem yumi laik mekim, ating yumi save bel hevi long dispela. Bai yumi ting God i no inap amamas long pasin bilong yumi long lotuim em.
Givim Bel Olgeta Long Wok Bilong God
3. Jehova i laik bai yumi olgeta i mekim wanem?
3 Long Song 103:14, Baibel i strongim bel bilong yumi na i tok, Jehova “i save olsem em i bin kisim graun na wokim yumi na em i tingim yumi i olsem das tasol.” Em i save gut olsem i gat sampela samting yumi no inap mekim. Em i no strong long yumi mas winim mak bilong samting yumi inap givim long em. Orait em i laik bai yumi givim wanem samting long em? Em wanpela samting olgeta man inap givim, maski ol i gat wanem kain sindaun: “Olgeta samting yupela i mekim, yupela i mas wok strong [olsem givim bel olgeta] na mekim. I no olsem yupela i mekim wok bilong ol man. Nogat. Yupela i mekim wok bilong Bikpela.” (Kolosi 3:23) Em nau, Jehova i laik bai yumi olgeta—i no wan wan tasol—i givim bel olgeta long mekim wok bilong em.
4. Olsem wanem long dispela tok, givim bel olgeta long mekim wok bilong Jehova?
4 Olsem wanem long dispela tok, givim bel olgeta long mekim wok bilong Jehova? Tok Grik bilong dispela tok ‘givim bel olgeta,’ insait bilong en i olsem “i kam long man yet.” Dispela tok “man” i makim man olgeta, wantaim olgeta strong na save bilong em long mekim wok. Olsem na taim yumi givim bel olgeta long mekim wok bilong God, i olsem yumi mekim dispela wok long olgeta save na strong bilong yumi, na yumi mekim inap tru long mak yumi inap winim. O yumi ken tok, yumi mas mekim wok bilong God inap tru long skel bilong yumi.—Mak 12:29, 30.
5. Taim yumi tingim ol aposel, olsem wanem dispela i soim yumi olsem yumi olgeta wan wan i no inap mekim wok bilong God long wankain skel?
5 Orait, bilong givim bel olgeta, yu ting dispela i makim olsem yumi mas mekim wok bilong God inap long wankain skel olsem ol narapela i mekim? Yumi no inap mekim olsem, long wanem, save bilong yumi na ol hevi long sindaun bilong yumi i narapela narapela kain. Yumi ken tingim ol gutpela aposel bilong Jisas. Olgeta i no inap mekim wok long wankain skel, nogat. Tru, yumi no save tumas long sampela aposel, olsem Saimon bilong Kana na Jems, pikinini bilong Alfius. Ating ol dispela aposel i no inap mekim bikpela wok tumas. (Matyu 10:2-4) Tasol Pita inap kisim planti bikpela wok—wanpela bikpela wok tru, em Jisas i givim “ol ki bilong kingdom” long em! (Matyu 16:19) Tasol Jisas i no litimapim nem bilong Pita na mekim olsem em i winim ol narapela aposel, nogat. Taim Jon i kisim driman bilong Nupela Jerusalem long Buk Kamapim Tok Hait (long yia 96 C.E. samting), em i lukim 12-pela as ston bilong dispela taun na i gat “nem bilong ol 12-pela aposel” i stap long ol dispela ston.a (KTH 21:14) Jehova i tingim tru wok bilong olgeta aposel, maski sampela inap mekim bikpela wok moa, winim ol narapela.
6. Long tok piksa bilong Jisas long man i tromoi pikinini wit, dispela wit i pundaun long “gutpela graun” em i mekim wanem? Wanem ol askim i kamap long dispela?
6 Na olsem tasol, Jehova i no tok yumi olgeta i mas lusim wankain aua long mekim wok autim tok. Jisas i kamapim dispela samting taim em i mekim tok piksa bilong man i tromoi pikinini wit long gaden. Wok bilong tromoi pikinini wit i makim wok bilong autim tok. Dispela pikinini wit i pundaun long kain kain graun, em i makim bel bilong ol man i harim gutnius i narapela narapela kain. Jisas i tok: “Dispela pikinini wit i pundaun long gutpela graun, em i olsem man i harim tok na i save gut as bilong en. Em i save karim kaikai, inap 100 o 60 o 30.” (Matyu 13:3-8, 18-23) Wanem dispela kaikai ol i karim, na bilong wanem sampela i karim planti na sampela i no planti?
7. Ol dispela pikinini wit i karim hamas kaikai? Olsem wanem na sampela i karim planti kaikai na sampela i no karim planti tumas?
7 Dispela pikinini wit em man i tromoi, em “gutnius bilong kingdom,” olsem na dispela kaikai em i karim i makim wok bilong autim dispela gutnius long ol narapela man. (Matyu 13:19) Ol i kamapim kaikai inap long narapela narapela skel—sampela i karim 30, sampela 60, sampela 100—long wanem, save bilong ol na ol hevi samting long sindaun bilong ol i narapela narapela kain. Man i no save sik tumas na em i gat strongpela skin, ating em inap lusim planti aua moa long autim tok, winim man em i gat bikpela sik o em i lapun na dispela i pinisim strong bilong em. Na ol yangpela singel em ol i no gat wok bilong lukautim famili, ating ol inap mekim bikpela wok moa bilong autim tok, winim man i mas mekim wok bilong skin long olgeta de bilong lukautim famili bilong em long kaikai samting.—Skelim wantaim Sindaun 20:29.
8. Jehova i ting olsem wanem long ol man i mekim wok bilong em inap tru long skel bilong ol?
8 Long ai bilong God, dispela man i givim bel olgeta na em i karim 30 tasol, yu ting em i no stap gut long wok bilong em olsem dispela man i karim 100? Nogat tru! Tru, sampela i karim planti kaikai na sampela i no planti tumas, tasol Jehova i amamas long dispela wok sapos yumi mekim inap tru long skel bilong yumi. Yumi mas tingim dispela samting: Ol manmeri i karim ol dispela kaikai, em sampela i karim planti na sampela i no planti tumas, bel bilong olgeta wantaim i olsem “gutpela graun.” Wanpela tok Grik (ka·losʹ) em yumi tanim olsem “gutpela,” em i makim samting i “naispela tru” na i “mekim bel i amamas, na ai i amamas long lukim.” Em nau, taim yumi mekim wok bilong God inap tru long skel bilong yumi, yumi ken save, bel bilong yumi i naispela tru long ai bilong God. Dispela save i mekim gut tru bel bilong yumi!
No Ken Skelim Wanpela Wantaim Narapela
9, 10. (a) Bel bilong yumi inap kirapim yumi long kisim wanem kain tingting kranki? (b) Tok piksa i stap long 1 Korin 12:14-26, olsem wanem em i kamapim klia olsem Jehova i no save skelim wok bilong yumi wantaim wok bilong ol narapela?
9 Tasol ating bel bilong yumi i gat sin long en i save skelim dispela samting long narapela kain pasin. Ating em i skelim wok bilong yumi wantaim wok bilong ol narapela. Em bai tingting olsem: ‘Ol narapela i save mekim bikpela wok moa bilong autim tok, winim mi. Olsem wanem Jehova inap amamas long wok mi save mekim?’—Skelim wantaim 1 Jon 3:19, 20.
10 Tingting na pasin bilong Jehova i winim tru tingting na pasin bilong yumi. (Aisaia 55:9) Taim yumi kaunim 1 Korin 12:14-26, yumi inap kisim sampela save long tingting bilong Jehova, em i ting olsem wanem long wok yumi mekim; ol dispela ves i tok kongrigesen i kain olsem bodi bilong man i gat planti hap bilong en, olsem ai, han, lek, yau, olsem. Orait yumi ken tingim bodi tru bilong man. Sapos yu skelim ai bilong yu wantaim han o lek o yau, em i pasin kranki tru, a? Olgeta wan wan hap bilong bodi i gat narapela narapela wok bilong en, tasol olgeta wantaim i gat wok bilong ol na ol i gutpela samting. Na olsem tasol Jehova i save laikim tru ol wok yu save givim bel olgeta long mekim, maski ol narapela i mekim bikpela wok moa o ol i mekim liklik wok tasol.—Galesia 6:4.
11, 12. (a) Bilong wanem sampela i pilim olsem ol i “no strong” o ol i “nogut liklik”? (b) Jehova i save ting olsem wanem long wok bilong yumi?
11 Yumi sampela i gat sik, o i lapun, o i gat sampela hevi moa i pasim yumi na yumi no inap mekim bikpela wok, olsem na sampela taim yumi ting olsem yumi “no strong” o yumi ting yumi “nogut liklik.” Tasol Jehova i no save ting olsem. Baibel i tok: “Ol hap bodi yumi save ting ol i no strong, sapos ol i no i stap, bai bodi i no inap i stap gut. Nogat tru. Na ol hap bodi yumi save ting ol i nogut liklik, yumi save bilasim ol moa. . . . Tasol . . . God i bin putim olgeta hap bilong bodi i stap wantaim. Na sampela hap ol i olsem ol i no gat nem, ol i save stap nambawan tru.” (1 Korin 12:22-24) Olsem na yumi olgeta wan wan inap i stap olsem gutpela samting tru long ai bilong Jehova. Em i save amamas long ol wok yumi inap mekim. Em nau, ating bel bilong yu i kirapim yu long wok strong long mekim wok bilong kain God olsem, em i save pilim tru ol hevi bilong yumi na em i sori long yumi.
12 Olsem na Jehova i no ting yu mas mekim wok bilong em inap tru long wok narapela i mekim, nogat. Em i laik bai yu mekim wok inap tru long skel bilong yu yet. Jehova i save tingim tru ol wok yumi olgeta wan wan i wok strong long mekim, na dispela i kamap klia long gutpela pasin Jisas i bin mekim long tupela meri klostu long taim em i dai, em tupela meri hia i narapela narapela kain.
Wanpela Meri i Givim Presen i Gat Bikpela Pe Tru Bilong En
13. (a) Wanem ol samting i kamap na nau Maria i kapsaitim sanda long het na lek bilong Jisas? (b) Olsem wanem long pe bilong dispela sanda bilong Maria?
13 Long Fraide long apinun, long namba 8 de bilong Nisan, Jisas i kamap long Betani, em wanpela liklik ples long arere bilong maunten Oliv long hap is, em i stap klostu long Jerusalem olsem 3-pela kilomita samting. Jisas i gat ol gutpela pren long dispela taun, em Maria, Marta, na brata bilong ol, Lasarus. Ating planti taim Jisas i bin slip long haus bilong ol. Tasol long Sarere long apinun, Jisas wantaim ol pren bilong em ol i go kaikai long haus bilong Saimon, em wanpela man bipo i gat sik lepra, tasol ating Jisas i bin oraitim em. Jisas i sindaun long tebol na Maria i mekim wanpela samting i kamapim klia olsem em i laikim tumas dispela man i bin kirapim bek brata bilong em taim em i dai. Em i brukim wanpela botol i gat sanda long en “i dia tumas.” Na tru tumas, dispela sanda i gat bikpela pe tru bilong en! Em inap olsem 300 dinari, em olsem pe wanpela wokman i kisim insait long wanpela yia olgeta. Maria i kapsaitim dispela gutpela sanda long het na lek bilong Jisas. Na em i mekim drai lek bilong Jisas long gras bilong em.—Mak 14:3; Luk 10:38-42; Jon 11:38-44; 12:1-3.
14. (a) Ol disaipel i ting olsem wanem long samting Maria i mekim? (b) Jisas i mekim wanem bilong helpim Maria?
14 Ol disaipel i kros tru long dispela samting! Ol i tok: “Bilong wanem em i pinisim nating dispela sanda?” Judas i haitim laik bilong em long stilim dispela mani na em i giaman na mekim olsem em i laik helpim ol rabisman, olsem na em i tok: “Sapos yumi bin larim ol man i baim [dispela sanda], bai yumi inap kisim samting olsem 300 mani silva long en na givim long ol rabisman.” Maria i pasim maus i stap. Tasol Jisas i tokim ol disaipel: “Yupela larim dispela meri. Watpo yupela i givim hevi long en? Em i bin mekim gutpela [olsem ka·losʹ] pasin tru long mi. . . . Samting dispela meri inap mekim, em i mekim pinis. Em i putim sanda long bodi bilong mi bilong redim bodi bilong mi long matmat. Mi tok tru long yupela, long olgeta hap graun ol i go long en na autim gutnius, ol bai i toktok tu long samting dispela meri i bin mekim, na ol bai i tingting long em.” Ating gutpela tok bilong Jisas i mekim gut bel bilong Maria.—Mak 14:4-9; Jon 12:4-8.
15. Olsem wanem na bel bilong Jisas i pilim tru dispela samting Maria i mekim? Dispela i skulim yumi olsem wanem long pasin bilong givim bel olgeta long wok bilong God?
15 Bel bilong Jisas i pilim tru dispela samting Maria i mekim. Long tingting bilong em, Maria i bin mekim wanpela gutpela wok tru. Jisas i no tingim bikpela pe bilong dispela presen, nogat; em i tingim gutpela pasin bilong Maria, olsem ‘samting em inap mekim, em i mekim pinis.’ Maria i lukim olsem em i gat rot long givim wanpela samting long Jisas, olsem na samting em inap givim, em i givim. Sampela Baibel ol i tanim dispela tok olsem, “Em i mekim olgeta samting em inap mekim,” o, “Em i mekim samting em i gat rot long mekim.” (An American Translation; The Jerusalem Bible) Yumi save Maria i givim bel olgeta long givim dispela samting, long wanem, em i givim samting inap tru long skel em inap givim. Na i wankain tu long man i givim bel olgeta long mekim wok bilong God.
Wanpela Rabismeri i Tromoi “Tupela Liklik Mani”
16. (a) Jisas i bin mekim wanem na nau em i lukim mani em wanpela rabismeri, man bilong en i dai pinis, em i tromoi long bokis? (b) Tupela mani em meri i tromoi, ol inap long baim planti samting o olsem wanem?
16 Sampela de bihain, long Nisan 11, Jisas i stap wanpela de olgeta long tempel na ol i wok long sutim ol askim long em olsem em i kisim we namba na strong bilong em long mekim dispela wok, na ol i askim em long pasin bilong tromoi takis, na ol man i dai pinis bai kirap bek, na sampela samting moa. Em i krosim ol saveman bilong lo na ol Farisi, long wanem, “ol i save trikim ol meri, man bilong ol i dai pinis, na stilim ol haus bilong ol,” na ol i mekim ol narapela samting i no stret. (Mak 12:40) Orait nau Jisas i sindaun, ating long Ples Bung Bilong Ol Meri; long dispela ples, stori bilong ol Juda i tok i gat 13 bokis mani bilong tempel i stap. Jisas i sindaun i stap, na em i lukluk long ol manmeri i kam tromoi mani long bokis. Planti maniman ol i kam, na ating sampela i mekim olsem ol i stretpela man, na ol i laik mekim moa yet long ai bilong ol man. (Skelim wantaim Matyu 6:2.) Orait nau Jisas i lukluk strong long wanpela meri. Ating ol man nating i no lukim olsem dispela meri o ofa bilong em i narapela kain tru. Tasol Jisas inap lukim bel bilong ol manmeri, olsem na em i save dispela meri em i “wanpela rabismeri, man bilong en i dai pinis.” Na tu, Jisas i save hamas mani stret dispela meri i tromoi long bokis—em “tupela liklik mani, inap olsem wan toea.”b—Mak 12:41, 42.
17. Jisas i ting olsem wanem long mani dispela meri i tromoi olsem ofa? Dispela inap skulim yumi olsem wanem long pasin bilong givim samting long God?
17 Jisas i singautim ol disaipel bilong em i kam, long wanem, em i laik bai ol i ken lukim wanpela samting em i laik skulim ol long en. Jisas i tok, dispela meri “i givim bikpela mani moa, i winim olgeta mani ol arapela manmeri i bin putim long bokis mani bilong tempel.” Long tingting bilong Jisas, meri hia i tromoi bikpela mani moa long bokis, winim mani em olgeta narapela wantaim i bin tromoi. Em i tromoi “olgeta mani bilong en”—em i no gat sampela mani moa. Taim em i mekim olsem, em i putim em yet long han bilong Jehova, em Man bilong tingim ol man. Em nau, dispela meri Jisas i ting olsem em i gutpela piksa tru bilong givim samting long God, em wanpela meri i bin givim liklik mani tru, i no inap baim wanpela samting long en. Tasol long ai bilong Jehova, i olsem em i tromoi bikpela mani moa yet!—Mak 12:43, 44; Jems 1:27.
Tingting Bilong Jehova Long Man i Givim Bel Olgeta Long Wok Bilong Em
18. Yumi kisim wanem save long pasin Jisas i bin mekim long dispela tupela meri?
18 Ol samting Jisas i bin mekim long dispela tupela meri inap skulim yumi olsem Jehova i gat wanem tingting long ol man i givim bel olgeta long mekim wok bilong em. (Jon 5:19) Jisas i no skelim dispela rabismeri wantaim Maria, nogat. Em i tingim tupela mani bilong rabismeri em inap tru long dispela sanda bilong Maria i gat bikpela pe tru bilong en. Tupela meri wantaim i bin givim samting inap tru long skel ol inap givim, olsem na long ai bilong God tupela ofa wantaim i gutpela tru. Olsem na sapos yu no inap mekim wok bilong God inap tru long mak yu laikim, na yu ting yu nogut tasol, orait yu no ken bel hevi. Jehova i amamas long ol wok yu mekim inap tru long skel bilong yu. Tingim dispela samting: Jehova i “save lukim tingting na laik bilong man,” olsem na em i save long bikpela laik i stap long bel bilong yu.—1 Samuel 16:7.
19. Bilong wanem yumi no ken skelim wok bilong God ol narapela i mekim?
19 Tingting bilong Jehova long ol man i givim bel olgeta long mekim wok bilong em, dispela i mas stiaim tingting bilong yumi, em yumi gat wanem tingting long ol wanbilip na yumi save mekim wanem kain pasin long ol. Sapos yumi skelim wok bilong ol narapela o yumi skelim wok bilong wanpela wantaim wok bilong narapela, dispela i no pasin sori, a? Sori tru, wanpela Kristen i tok: “Sampela taim sampela i mekim olsem sapos yu no wanpela painia, yu samting nating tasol. Mipela sampela i save hatwok tru long autim tok bilong Kingdom long olgeta mun, olsem na mipela i laik bai ol i tingim mipela tu na amamas long mipela.” Yumi no ken lusim tingting: Yumi no gat namba long skelim hamas aua wanpela Kristen i mas lusim bilong givim bel olgeta long mekim wok bilong God. (Rom 14:10-12) Jehova i amamas tru long wok bilong olgeta wan wan bilong ol milion milion manmeri i autim tok bilong Kingdom na ol i givim bel olgeta long mekim dispela wok, na yumi tu i mas amamas long wok ol i mekim.
20. I gutpela yumi ting olsem wanem long ol wanbilip bilong yumi?
20 Orait, olsem wanem sapos i olsem sampela i no mekim wok bilong God inap tru long skel bilong ol? Sapos wanpela wanbilip i no lusim planti aua moa long autim tok, ating long tingting bilong ol elda dispela i makim olsem ol i mas helpim o strongim bel bilong em. Tasol yumi no ken lusim tingting olsem wok bilong God em sampela i givim bel tru long mekim, em bai i kain olsem dispela tupela liklik mani em rabismeri i bin givim, na i no olsem dispela sanda bilong Maria i gat bikpela pe bilong en. I gutpela sapos yumi ting olsem ol brata sista bilong yumi ol i save laikim tru Jehova na dispela bai kirapim ol long mekim wok bilong em inap tru long skel bilong ol, na i no olsem ol i laik mekim liklik wok tasol. Ol wokboi bilong Jehova em bel bilong ol i kirapim ol long mekim wok bilong em, ol i no ting ol bai mekim liklik wok tasol na em inap, nogat tru!—1 Korin 13:4, 7.
21. Planti ol i save mekim wanem wok em ol i kisim ol gutpela blesing tru long en? Wanem ol askim i kamap long dispela?
21 Tasol planti manmeri i givim bel olgeta long mekim wok bilong God, ol i mekim wanpela wok ol i kisim ol gutpela blesing tru long en—em wok painia. Ol i kisim wanem ol gutpela blesing? Na olsem wanem long yumi sampela, em yumi no gat rot yet long mekim wok painia—olsem wanem yumi inap bihainim tingting na pasin olsem bilong painia? Bai yumi toktok long ol dispela askim long stori i kamap bihain long dispela.
[Ol Futnot]
a Matias i senisim Judas na kamap aposel, olsem na yumi save, nem bilong em—bilong Pol nogat—i stap long wanpela bilong ol dispela 12-pela as ston. Tru Pol em i wanpela aposel, tasol em i no wanpela bilong ol 12-pela aposel.
b Dispela tupela liklik mani wan wan, ol i kolim lepton, em liklik mani tru bilong ol Juda long dispela taim, no gat narapela mani bilong ol i liklik olsem. Tupela lepta em inap olsem pe ol wokman i kisim bilong mekim wok inap sampela minit tasol. Olsem Matyu 10:29 i soim yumi, wanpela liklik mani (inap olsem 8-pela lepta) em inap baim tupela liklik pisin, em kain pisin i gat liklik pe tru bilong en na ol rabisman i save baim bilong kaikai. Olsem na dispela meri em i rabismeri tru, long wanem, dispela mani bilong em i no inap long baim wanpela liklik pisin olsem, na dispela kain pisin i no skel bilong wanpela kaikai—em i liklik tumas.
Bai Yu Bekim Olsem Wanem?
◻ Olsem wanem long dispela tok, givim bel olgeta long mekim wok bilong Jehova?
◻ Tok piksa i stap long 1 Korin 12:14-26, olsem wanem em i kamapim klia olsem Jehova i no save skelim yumi wantaim ol narapela?
◻ Ol tok Jisas i mekim long sanda bilong Maria i gat bikpela pe tru bilong en, na tupela liklik mani bilong rabismeri, em i skulim yumi olsem wanem long pasin bilong givim bel olgeta long givim samting?
◻ Tingting bilong Jehova long man i givim bel olgeta long mekim wok bilong Em, dispela i mas stiaim yumi long ting olsem wanem long ol wanbilip bilong yumi?
[Piksa long pes 15]
Maria i givim samting inap tru long skel bilong em, na em i welim skin bilong Jisas long sanda i gat bikpela pe tru bilong en
[Piksa long pes 16]
Rabismeri i bin givim liklik mani tru, i no inap baim wanpela samting long en, tasol long ai bilong Jehova i olsem em i tromoi bikpela mani moa yet