Pasin Bilong Maria Inap Lainim Yumi Long Wanem Samting?

Olsem wanem? I gat wanpela taim we yu bin kisim wanpela bikpela wok na yu pilim olsem dispela wok i bikpela wok tumas long yu? Yu pilim olsem strong bilong yu i pinis, long wanem, yu taitim bun oltaim long kisim ol samting bilong lukautim yu? Ating yu wanpela bilong planti milion manmeri husat i pret na tingting planti, long wanem, ol i bin lusim as ples bilong ol na i stap olsem refiuji. Na husat bilong yumi i no bin pilim bikpela bel hevi taim wanpela yumi laikim tumas em i dai?

OLSEM WANEM? Yu save olsem ol wankain hevi i bin painim Maria, em mama bilong Jisas? Tru, ol dispela samting i bin painim em, tasol em i no bin larim ol dispela samting i daunim em! Yumi inap lainim wanem samting long pasin bilong em?

Ol man long olgeta hap bilong graun i save long Maria. Na yumi no kirap nogut long dispela samting, long wanem, God i givim em wanpela narakain wok i insait long samting God i tingting pinis long mekim. Na tu, planti milion manmeri i adorim em. Misin Katolik i tingim em olsem wanpela gutpela Mama na em i stap gutpela piksa long pasin bilong bilip na wet long God, na pasin laikim. Planti i lain olsem long rot bilong Maria, ol i ken go klostu long God.

Yu gat wanem tingting long mama bilong Jisas? Na bikpela samting moa, God i gat wanem tingting long em?

Wanpela Wok i Narapela Kain

Maria, pikinini meri bilong Heli, em i wanpela Israel bilong lain Juda. Namba wan taim Baibel i stori long em, em taim wanpela narakain samting i bin kamap long em. Wanpela ensel i kam lukim em na i tok: “Gude, meri. Bikpela i stap wantaim yu, na em i bin blesim yu na mekim gut long yu.” Pastaim Maria i tingting planti olsem, “Dispela em i wanem kain tok?” Olsem na ensel i tokim em, God i bin makim em bilong mekim wanpela wok i narapela kain, tasol em i bikpela wok tru. Em bai gat bel na karim Pikinini Bilong God, na mekim bikpela long em.​—Luk 1:​26-33.

God i givim dispela yangpela meri i no marit yet, wanpela bikpela wok tru long mekim! Em i pilim olsem wanem? Ating pastaim Maria i ting husat bai bilipim stori bilong em. Olsem wanem? Ating dispela bel em i kisim inap mekim na Josep, em man ol i bin makim em long maritim bai i no gat laik moa long maritim em, o em bai kisim sem long ai bilong ol manmeri? (Lo 22:​20-24) Maria i no wet, wantu em i tok orait long mekim dispela bikpela wok.

Strongpela bilip bilong Maria i mekim na em inap bihainim laik bilong God Jehova. Em i bilip tru olsem God bai lukautim em. Em i tok: “Harim. Mi wokmeri bilong Bikpela. Em i ken mekim long mi olsem yu tok.” Maria i redi long mekim dispela bikpela wok, long wanem, em i luksave olsem long rot bilong dispela wok em inap givim ona long God.​—Luk 1:38.

Taim Maria i tokim Josep olsem em i gat bel, Josep i tingting long brukim tok promis bilong tupela long marit. Ating dispela em wanpela haptaim we tupela wantaim i tingting planti tru. Baibel i no tokim yumi long longpela bilong dispela haptaim, nogat. Tasol ating Maria tupela Josep i pilim gutpela tru taim ensel bilong Jehova i kamap long Josep. Dispela ensel i stori gut long Josep long dispela bel Maria i kisim i narapela kain, na em i tokim Josep long kisim Maria i go long haus olsem meri bilong em.​—Matyu 1:​19-24.

Taim Bilong Hevi

Long nau, taim ol mama i gat bel, ol i save lusim planti mun long redim ol samting bilong bebi, na ating Maria i bin mekim olsem tu. Dispela pikinini em namba wan pikinini bilong em. Tasol sampela samting i bin kamap na i bagarapim ol plen bilong em. Sisar Ogastus i putim lo long wokim sensas, em i laik bai olgeta manmeri i mas i go bek long as ples bilong ol na rejistaim nem bilong ol. Olsem na Josep i kisim Maria, em namba 9 mun bilong em i gat bel, na ating ol i kalap long donki, na raun i go inap 150 kilomita samting! Ol manmeri i pulap long Betlehem bilong rejistaim nem bilong ol. Olsem na Maria i mas painim wanpela hap i no gat man bambai em inap karim pikinini, tasol haus bilong ol animal tasol i stap. Ating i hatwok long Maria i karim pikinini long dispela hap. Ating em i no bin pilim gutpela na em i pret tu.

Yumi save, long kain taim olsem, Maria i beten na kamapim bel bilong em long Jehova, na em i bilip olsem Jehova bai lukautim em wantaim bebi bilong em. Bihain sampela wasman bilong sipsip i kam, ol i laik tru long lukim dispela bebi. Ol i tok olsem ol ensel i bin kolim dispela pikinini olsem “Bikpela, na . . . man God i makim bilong kisim bek ol manmeri.” Baibel i tok moa: “Maria i putim dispela olgeta tok long bel bilong en, na em i tingim i stap.” Em i bin tingim tingim long bel ol dispela tok na dispela i bin strongim em.​—Luk 2:​11, 16-19.

Olsem wanem long yumi? Ating yumi bai bungim ol hevi tu. Na tu, Baibel i tok, “taim nogut i save painim yumi olgeta” olsem na dispela bai putim kain kain hevi na hatwok long yumi. (Saveman 9:11) Sapos ol dispela samting i painim yumi, bai yumi bel nogut na sutim tok long God? I gutpela sapos yumi bihainim pasin bilong Maria na go klostu long God Jehova long rot bilong kisim save long Tok bilong Em,em Baibel, na tingim tingim long bel ol dispela tok yumi wok long lainim, laka? Taim yumi mekim olsem, dispela bai i helpim yumi long sanap strong na karim ol hevi.

Stap Rabis na Stap Olsem Wanpela Refiuji

Ol narapela hevi i painim Maria tu​—em i stap rabis na em i mas ranawe lusim as ples bilong em. Olsem wanem? Yu bin bungim ol kain hevi olsem? Wanpela ripot i tok, “fifti pesen bilong ol manmeri long olgeta hap bilong graun​—klostu olsem 3 bilion​—mani ol i kisim long ol wan wan de em olsem 5 kina tasol,” na planti milion i hatwok long painim mani maski ol i stap long ol kantri i gat planti mani samting. Olsem wanem long yu? Wok bilong lukautim famili bilong yu long kaikai, klos na haus samting long olgeta de, dispela i pinisim strong bilong yu na sampela taim i daunim yu olgeta?

Tok Baibel i mekim i soim olsem Josep na Maria i stap rabis. Olsem wanem yumi save long dispela? Sampela samting ol Gutnius​—Matyu, Mak, Luk, na Jon​—i kamapim long dispela tupela marit i olsem: 40 de bihain long taim Maria i karim Jisas, Maria wantaim Josep i go long tempel bilong mekim ofa olsem lo i tok. Ol i mas givim “tupela namba wan balus, o tupela yangpela namba 2 balus.”a (Luk 2:​22-24) Dispela ofa i givim rot long ol man i stap rabis em ol i no inap baim wanpela yangpela sipsip man bilong givim olsem ofa. Olsem na ating Josep wantaim Maria i hatwok long painim mani samting bilong baim kaikai samting. Tasol maski i olsem, wok bilong ol long kamapim pasin laikim insait long famili i kamap gutpela. Yumi save, pasin bilong tingim ol samting bilong lotu, em i bikpela samting long tupela.​—Lo 6:​6, 7.

I no longtaim bihain long Jisas i bon, bikpela senis i kamap gen long sindaun bilong Maria. Wanpela ensel i tokim Josep long kisim famili bilong em na ranawe i go long Isip. (Matyu 2:​13-15) Dispela em namba 2 taim Maria i mas lusim wanpela hap em i save gut long en, tasol long dispela taim em i mas i go long narapela kantri olgeta. Bikpela lain Juda i sindaun long Isip, olsem na ating Maria wantaim Josep i sindaun namel long ol wanlain bilong ol. Tasol maski i olsem, i gat hatwok long sindaun long nupela kantri. Olsem wanem? Yu wantaim famili bilong yu i sindaun namel long planti milion manmeri husat i bin lusim as ples bilong ol, long wanem, ating ol i laik bai ol pikinini bilong ol i kisim gutpela sindaun o ol i bin ranawe long hevi? Sapos olsem, orait yu inap pilim tru hevi bilong Maria long Isip.

Gutpela Maritmeri na Mama

Baibel i stori long Maria i karim Jisas na mekim bikpela long em, tasol Baibel i no mekim planti narapela stori long Maria, nogat. Tasol yumi save olsem Maria na Josep i kamapim sampela moa pikinini, olsem 6-pela samting. Ating yu kirap nogut long dispela, a? Tasol skelim tok ol Gutnius i mekim long dispela samting.

Josep i gat bikpela rispek long wok Maria i kisim bilong kamapim Pikinini Bilong God. Olsem na Josep i no slip wantaim Maria paslain long em i karim Jisas. Matyu 1:25 i tok olsem Josep “i no slip wantaim em, i go inap long taim Maria i karim pikinini.” Dispela tok “inap,” long dispela ves i makim olsem bihain long Maria i karim Jisas, Josep wantaim Maria i slip wantaim olsem tupela marit. Long dispela rot, ol Gutnius i tok, Maria i karim ol pikinini long Josep, ol pikinini man na ol pikinini meri. Jems, Josep, Saimon, na Judas, em ol hap brata bilong Jisas. Na tu, Maria i karim tupela pikinini meri. (Matyu 13:​55, 56) Tasol em na Josep i kamapim ol dispela pikinini.b

Maria em i meri bilong tingim tru pasin bilong em long pas gut wantaim God. Maski Lo i no tok long ol meri i mas i go long bikpela de bilong Pasova, Maria i save go wantaim Josep long Jerusalem long olgeta yia. (Luk 2:41) Bilong i go long Jerusalem na kam bek em inap olsem 300 kilomita, na long olgeta wan wan yia, famili olgeta i save go! Tasol yumi ken ting olsem em taim bilong famili long amamas wantaim.

Planti meri i bihainim gutpela pasin bilong Maria. Ol i wok strong long inapim ol wok em Baibel i makim bilong ol. Planti taim ol dispela gutpela maritmeri i kamapim pasin bilong stap isi na wet, sanap strong, na pasin daun! Ol i tingim pasin bilong Maria na dispela i helpim ol long putim ol samting bilong lotu na pasin bilong ol long pas gut wantaim God, i go pas long laik bilong ol long kisim gutpela sindaun na amamas. Olsem Maria, ol i save olsem pasin bilong ol long lotu wantaim man bilong ol na ol pikinini bilong ol, dispela i save strongim na bungim famili wantaim.

Wanpela taim bihain long wanpela bikpela bung, Maria na Josep i lusim Jerusalem na i go bek long ples​—ating wantaim ol pikinini bilong ol​—na tupela i luksave olsem Jisas husat i gat 12-pela krismas, em i no stap wantaim ol. Piksaim long tingting bikpela wari Maria i bin pilim taim em i raun painim painim pikinini bilong em inap 3-pela de? Taim em wantaim Josep i painim pinis Jisas long tempel, Jisas i tok: “Ating yutupela i no save, mi mas i stap long haus bilong Papa bilong mi?” Na Baibel i tok gen olsem Maria “i putim dispela olgeta tok long bel bilong en na i holim i stap.” Em narapela samting i soim yumi olsem Maria i tingim tru tingting bilong God long ol dispela samting. Em i tingim tingim long bel olgeta samting i kamap long Jisas. Sampela yia bihain, ating em i stori long ol man bilong raitim Gutnius, long dispela samting na ol narapela samting i bin kamap long i stap bilong Jisas kirap long taim em i liklik yet.​—Luk 2:​41-52.

Karim Hevi Bilong Pen na Dai

Wanem samting i painim Josep, waspapa bilong Jisas? Baibel i stori liklik tasol long em long taim Jisas i mangi yet, na bihain ol Gutnius i no stori moa long em. Sampela i ting olsem Josep i bin i dai sampela yia paslain long taim Jisas i kirapim wok autim tok bilong em na long dispela as ol Gutnius i no stori moa long em.c Maski wanem samting i kamap, i luk olsem Maria i kamap wido pinis klostu long taim Jisas i pinisim wok bilong em. Long taim Jisas i laik i dai, em i tokim aposel Jon long lukautim mama bilong em. (Jon 19:​26, 27) Jisas i no inap mekim olsem sapos Josep i bin stap laip yet.

Planti samting i bin painim Maria na Josep wantaim! Ol ensel i bin kam lukim tupela, tupela i bin ranawe long wanpela man nogut, na inap sampela taim ol i bin lusim hap ol i sindaun long en na i go long narapela hap, na ol i bin mekim bikpela long planti pikinini. Ating inap planti nait ol i bin sindaun wantaim na stori long ol samting bai kamap long Jisas, na ol i tingting planti long pasin bilong ol long lainim na redim em, olsem ol i mekim gut dispela wok o nogat? Tasol i no longtaim na Maria i stap wanpis.

Olsem wanem? Poroman marit bilong yu i bin i dai? Maski planti yia lus, tasol ating yu bel hevi yet na yu pilim hevi bilong i stap wanpis. Yumi ken ting olsem strongpela bilip bilong Maria na save bilong em olsem ol man i dai pinis ol bai i kirap bek,d dispela i bin strongim tru em. (Jon 5:​28, 29) Tasol dispela i no bin pinisim ol hevi bilong Maria. Olsem planti mama wanpis long nau, em wanpela i mas wok strong long lukautim ol pikinini bilong em.

I stret yumi ken ting olsem taim Josep i dai, Jisas i kisim ples bilong em long lukautim famili. Taim ol hap brata bilong Jisas i kamap bikpela, ol tu i mekim sampela wok bilong helpim famili. Taim Jisas “i gat samting olsem 30 krismas,” em i lusim haus na i kirapim wok autim tok bilong em. (Luk 3:23) Planti papamama bai wari taim wanpela pikinini man o pikinini meri i lusim haus. Ol i bin lusim bikpela hap taim na strong long mekim bikpela long ol pikinini na ol i save wari tru long ol, olsem na taim ol pikinini i lusim ol, ol i misim ol tru. Olsem wanem? Sampela pikinini man o pikinini meri bilong yu i bin lusim haus bilong kisim wanpela wok ol i laik mekim? Olsem wanem? Yu amamas long ol, tasol long wankain taim yu laik bai ol i stap klostu long yu? Orait nau yu ken save hau Maria i bin pilim taim Jisas i bin lusim haus.

Ol Hevi Em i No Bin Tingim

Narapela kain hevi i bin painim Maria. Taim Jisas i autim tok, planti manmeri i kirap bihainim em​—tasol ol brata bilong em, nogat. Baibel i tok: “Ol brata bilong en . . . ol i no bilip long em.” (Jon 7:5) Ating Maria i bin tokim ol long samting ensel i bin tokim em long en​—olsem Jisas em i “Pikinini Bilong God.” (Luk 1:35) Tasol long tingting bilong Jems, Josep, Saimon, na Judas, Jisas em i bikbrata bilong ol na em tasol. Olsem na Maria i stap insait long wanpela famili em ol i gat narapela narapela tingting long ol samting bilong lotu.

Olsem wanem? Maria i bin bel hevi na em i no wok strong moa long senisim tingting bilong ol pikinini bilong em? Nogat tru! Long wanpela taim Jisas i wok long autim tok long Galili, na em i go long wanpela haus long kaikai, na bikpela lain manmeri i kam bung bilong harim tok bilong em. Yu ting husat i stap ausait na i wok long painim em? Maria na ol brata bilong Jisas. So taim Jisas i wok long kam klostu long hap bilong famili, Maria i bihainim em na i kisim ol pikinini tu i go wantaim em, ating em i laik bai ol i senisim tingting ol i gat long Jisas.​—Matyu 12:​46, 47.

Ating wankain samting i kamap long yu, yu wok strong long bihainim Jisas, tasol sampela insait long famili i no laik mekim olsem. No ken bel hevi na givap! Olsem Maria, planti i no les long helpim famili bilong ol, na ol i mekim olsem inap planti yia, na bihain ol i lukim pasin bilong famili i senis. Maski sapos ol man i senisim pasin bilong ol o nogat, pasin bilong sanap strong na karim hevi, em i samting i dia tumas long ai bilong God.​—1 Pita 3:​1, 2.

Bikpela Hevi Tru

Baibel i stori long bikpela hevi tru i painim Maria, na dispela hevi i bagarapim tru bel bilong em. Maria i lukim dispela gutpela pikinini bilong em​—em ol Juda i bin givim baksait long em​—​i kisim bikpela pen na i dai. Taim wanpela pikinini i dai, maski em i pikinini yet o i bikpela man, ol i tok dispela em wanpela samting nogut tru. Olsem Baibel i bin tok profet planti yia paslain, Maria i bin pilim olsem wanpela bainat i sutim lewa bilong em!​—Luk 2:​34, 35.

Olsem wanem? Maria i larim dispela bikpela hevi tru i bagarapim tru bel na tingting bilong em o i mekim bilip bilong em long Jehova i go slek? Nogat. Baibel i stori gen long Maria olsem em i stap wantaim ol disaipel bilong Jisas, na insait long “beten” wantaim ol. Em i no stap wanpis, nogat. Ol arapela pikinini man bilong em i stap wantaim em, ol tu i kirap bilip long bikbrata bilong ol. Dispela i bin mekim gut bel bilong Maria!e​—Aposel 1:14.

Maria i bin stap gut long God, em i wanpela gutpela maritmeri, na gutpela mama. Planti gutpela samting i painim em taim em i mekim wok bilong God. Em i bin winim planti traim na hevi. Taim yumi bungim ol hevi, o taim yumi tingting planti long ol hevi bilong famili, yumi ken kisim skul long pasin bilong Maria long stap gut long wok bilong God maski planti hevi i painim em.​—Hibru 10:36.

Tasol olsem wanem long pasin bilong adorim Maria? Baibel i stori long Maria i mekim wanpela wok i narapela kain, olsem na yu ting dispela i mekim na yumi mas lotuim em?

[Ol Futnot]

[Blok/Piksa long pes 6]

Jisas i Gat Ol Brata na Susa?

Yes, em i gat. Sampela tisa bilong lotu i bin tok olsem dispela tok i no tru, maski ol Gutnius i tokaut klia olsem Jisas i gat ol brata na susa. (Matyu 12:​46, 47; 13:​54-56; Mak 6:3) Tasol taim ol saveman bilong Baibel i skelim ol tingting olsem Maria i no kamapim ol arapela pikinini, i gat tupela samting ol i luksave long en. Namba 1, as bilong ol dispela tingting, em wanpela bilip i bin kamap planti yia bihain, olsem long laip olgeta bilong Maria, em i bin stap olsem wanpela nupela meri. Namba 2, taim ol i skelim gut ol dispela tingting, ol i lukim olsem em i no stret wantaim ol narapela tok bilong Baibel.

Wanpela tingting ol i kamapim i olsem dispela tok “ol brata,” i makim ol pikinini bilong Josep long namba wan marit bilong em. Dispela tok i no gat as bilong en, long wanem, dispela bai tekewe raits bilong Jisas olsem fesbon na bai em i lus long kisim wok king i kam long lain bilong Devit.​—2 Samuel 7:​12, 13.

Narapela tingting ol i kamapim i olsem ol dispela brata em ol kasen bilong Jisas, tasol Ol Skripsa Grik i yusim ol narapela narapela tok olsem “brata,” “kasen,” na “wanblut.” Olsem na saveman Frank E. Gaebelein i tok ol dispela tingting bilong lotu i no stret liklik. Em i tok: “Dispela tok ‘ol brata’ . . . i makim ol pikinini man bilong Maria wantaim Josep, ol i brata bilong Jisas long sait bilong mama bilong em.”

[Blok long pes 7]

Em i No Pret Long Senisim Lotu

Mama i karim Maria insait long lain Juda, na em i bihainim lotu Juda. Em i save go long sinagog, em ples ol Juda i save bung bilong mekim lotu, na em i save go long tempel long Jerusalem. Taim save bilong Maria long laik bilong God i go bikpela, em i kirap luksave olsem ol pasin ol tumbuna bilong em ol i bin bihainim i no stret moa wantaim laik bilong God. Ol hetman bilong lotu Juda i kilim i dai Pikinini bilong em, em Mesaia. Paslain long dispela samting i kamap, Jisas i tokim ol: “Harim. Nau ples bilong yupela bai i bagarap na i stap nating.” (Matyu 23:38) God i tekewe blesing bilong em long dispela lotu em Maria i bin kamap bikpela long en.​—Galesia 2:​15, 16.

Taim kongrigesen Kristen i kamap nupela, ating Maria i gat 50 krismas samting. Em bai mekim wanem? Yu ting em i ting olsem mama i karim em insait long lotu Juda, olsem na i no gutpela long em i lusim lotu ol tumbuna bilong em i bin bihainim? Yu ting em i tok em i lapun pinis, olsem na em leit pinis long em i senis? Nogat, em i no bin ting olsem! Maria i kliagut olsem nau blesing bilong God i stap long kongrigesen Kristen. Strongpela bilip bilong em i mekim na em i no pret long senisim lotu bilong em.

[Piksa long pes 5]

Ranawe i go long Isip olsem refiuji

[Piksa long pes 8]

Bikpela hevi tru em wanpela mama i karim