“Mi Wokmeri Bilong Jehova!”

1, 2. (a) Maria i kisim wanem kain gude long man em i no save long en? (b) Olsem wanem Maria i mas mekim wanpela bikpela disisen?

MARIA i kirap nogut, ai bilong em i op, taim wanpela visita i kam insait long haus bilong em. Em i no askim Maria long singautim papa o mama i kam, nogat. Em i kam bilong lukim Maria! Dispela man i no bilong Nasaret; Maria i save tru long dispela. Long liklik taun olsem, em isi long luksave long ol man bilong narapela hap. Em isi long luksave olsem dispela man i bilong narapela hap. Gude em i givim long Maria i narapela kain tru, em i tok: “Gude, meri God i laikim tumas, Jehova i stap wantaim yu.”​—Ritim Luk 1:26-28.

² Baibel i kamapim stori bilong Maria, em pikinini meri bilong Heli, bilong taun Nasaret long Galili. Stori bilong em i kirap long taim em i mas mekim wanpela bikpela disisen. Ol i bin makim em bilong maritim wanpela kapenta, Josep, em i no maniman, tasol em i bilipman. Ating Maria i tingim pinis laip bilong em bai wanem kain—wanpela simpol laip olsem meri bilong Josep na em bai sapotim em, tupela bai lukautim famili bilong ol yet. Tasol dispela visita i tokim Maria long wanpela wok God i givim long em, dispela wok bai senisim tru laip bilong em.

3, 4. Bilong save long Maria, yumi no ken tingim wanem samting? Yumi mas tingim wanem samting?

³ Planti man i kirap nogut olsem Baibel i no stori tumas long Maria. I gat liklik stori tasol long bekgraun bilong em, Baibel i no stori tumas long pasin bilong em, na i no tokaut long lukluk bilong em. Tasol ol tok Baibel i mekim long em i lainim yumi long planti samting.

⁴ Bilong save gut long Maria, yumi no ken tingim tasol ol stori bilong Maria em ol lotu i kamapim bilong skulim ol man long en. Yumi no ken tingim ol “piksa” bilong Maria ol i bin penim, wokim long ston mabol, o simen samting. Na tu, yumi no ken tingim ol kain kain bilip bilong ol lotu na ol biknem ol i givim long dispela meri i gat pasin daun, olsem “Mama Bilong God,” na “Kwin Bilong Heven.” I gutpela yumi tingim ol tok Baibel yet i mekim long em. Baibel i givim planti gutpela save long strongpela bilip bilong em na hau yumi ken bihainim.

Wanpela Ensel i Visitim Em

5. (a) Yumi inap kisim wanem skul long samting Maria i mekim taim Gebriel i tok gude? (b) Yumi inap kisim wanem bikpela skul long Maria?

⁵ Visita bilong Maria i no wanpela man nating. Em ensel Gebriel. Taim em i tokim Maria, “meri God i laikim tumas,” Maria i “tingting planti tru” long tok bilong em na i laik kliagut long dispela narapela kain gude. (Luk 1:29) Husat i laikim em tumas? Maria i no ting ol man i mas laikim em tumas. Tasol ensel i tokim em olsem Jehova God i laikim em tumas. Dispela i bikpela samting long em. Tasol em i no hambak na ting olsem God i laikim em. Sapos yumi wok strong bambai God i ken laikim yumi, no ken hambak na ting God i laikim yumi pinis, bai yumi kisim wanpela bikpela skul long samting Maria i kliagut long en. God i save sakim ol man i gat pasin antap, tasol em i save laikim na helpim ol man i gat pasin daun.​—Jems 4:6.

6. Ensel i tokim Maria long wanem nambawan wok tru?

⁶ Maria i mas i gat dispela kain pasin daun, long wanem, ensel i tokim em long nambawan wok tru. Em i tokim Maria olsem em bai karim wanpela pikinini husat bai kamap nambawan man tru, winim olgeta narapela man. Gebriel i tok: “God Jehova bai givim em sia king bilong papa bilong em Devit, na em bai stap King long lain bilong Jekop inap oltaim oltaim, na bai i no gat pinis bilong Kingdom bilong em.” (Luk 1:32, 33) Maria i save long tok promis God i mekim long Devit winim wan tausen yia paslain—olsem wanpela tumbuna pikinini bilong em bai stap king inap oltaim oltaim. (2 Sml. 7:12, 13) Olsem na pikinini bilong em bai kamap Mesaia, em man lain bilong God i bin wetim inap planti handret yia!

7. (a) Askim bilong Maria i kamapim wanem tingting bilong em? (b) Ol yangpela long nau inap kisim wanem skul long Maria?

⁷ Na bikpela samting moa, ensel i tokim Maria, ol bai kolim pikinini bilong em olsem, “Pikinini bilong God Antap Tru.” Olsem wanem wanpela meri bilong graun inap karim Pikinini Bilong God? Na hau bai Maria inap karim pikinini? Ol i makim em long maritim Josep, tasol tupela i no marit yet. So Maria i askim stret ensel: “Olsem wanem dispela samting inap kamap? Mi no bin slip wantaim wanpela man.” (Luk 1:34) Maria i no sem long tokaut olsem em i no bin slip wantaim man. Em i ting dispela i gutpela samting. Long nau, planti yangpela i hariap long mekim maritpasin, na ol i tok bilas long ol yangpela i no laik mekim olsem. Tingting bilong ol manmeri i senis tru. Tasol tingting bilong Jehova i no senis. (Mal. 3:6) Olsem long taim bilong Maria, Jehova i laikim ol man i bihainim ol stretpela lo bilong em.​—Ritim Hibru 13:4.

8. Hau na Maria em meri i gat sin inap karim wanpela pikinini i gutpela olgeta?

⁸ Maria i gutpela wokmeri bilong God, tasol em i gat sin. Sapos olsem, hau bai em inap karim wanpela pikinini i gutpela olgeta, em Pikinini Bilong God? Gebriel i tokim em: “Holi spirit bai i kam i stap long yu, na strong bilong God Antap Tru bai karamapim yu. Olsem na dispela pikinini yu bai karim, ol bai kolim em holi na Pikinini Bilong God.” (Luk 1:35) Holi i makim samting i “klin.” Ol pikinini i save kisim sin long ol papamama bilong ol. Tasol pikinini em Maria bai karim i no olsem, long wanem, Jehova bai wokim wanpela mirakel i narapela kain tru. Em bai kisim laip bilong Pikinini bilong em long heven na putim long bel bilong Maria na yusim strong bilong em, o holi spirit, long “karamapim” Maria na banisim gut pikinini na bai sin i no ken pas long em. Yu ting Maria i bilipim tok promis bilong ensel? Maria i tok wanem?

Tok Maria i Mekim Long Gebriel

9. (a) Wai na ol man i gat tupela tingting i hatwok long bilip long stori bilong Maria? (b) Olsem wanem Gebriel i strongim bilip bilong Maria?

⁹ Ol man i gat tupela tingting, dispela i makim tu sampela tisa bilong lotu Kristendom, ol i hatwok long bilip olsem wanpela meri i no slip wantaim man em inap karim pikinini. Maski ol i bin kisim bikpela skul, ol i no kliagut long wanpela tok i tru. Gebriel i tok: “Olgeta samting God i tokaut long en bai kamap tru.” (Luk 1:37) Maria i bilipim tok bilong Gebriel, long wanem, em i wanpela yangpela meri i gat strongpela bilip. Tasol em i no bilip nating tasol. Olsem wanpela i gat gutpela tingting, Maria i laik lukim evidens we inap stap olsem as bilong bilip bilong em. Gebriel i kamapim sampela evidens moa long em. Em i tokim Maria long lapun wanblut bilong em, Elisabet, bipo yet ol man i save em i no inap karim pikinini. God i bin wokim mirakel na bai Elisabet inap kisim bel!

10. Wai na yumi no ken ting wok bilong Maria i no gat hatwok?

¹⁰ Orait Maria bai mekim wanem? Em i gat wok na evidens olsem God bai truim olgeta samting Gebriel i bin tok. Yumi no ken ting dispela wok i no gat hatwok long en. Ol i bin makim em bilong maritim Josep na em i mas tingim dispela. Taim Josep i save olsem em i gat bel, em bai i gat laik yet long maritim em o nogat? Na tu, ating em i pret long mekim dispela bikpela wok. Em bai i gat bel na karim nambawan gutpela samting God i wokim—Pikinini God i laikim tumas! Em i mas lukautim dispela pikinini taim em i bebi, na protektim em long ol manmeri nogut bilong dispela graun. Em i wanpela bikpela wok tru!

11, 12. (a) Sampela taim ol strongpela bilipman i mekim wanem taim ol i kisim ol bikpela wok long God? (b) Bekim bilong Maria long Gebriel i kamapim wanem samting long em yet?

¹¹ Baibel i soim olsem sampela taim ol strongpela bilipman i gat tupela tingting long kisim ol bikpela wok long God. Moses i tok em i no inap toktok gut long mekim wok olsem mausman bilong God. (Kis. 4:10) Jeremaia i tok em i “mangi tasol,” yangpela tumas long mekim wok God i givim long em. (Jer. 1:6) Na Jona i ranawe long wok bilong em! (Jna. 1:3) Olsem wanem long Maria?

¹² Tok bilong em i kamapim pasin daun na pasin bilong bihainim tok, olgeta bilipman i tingim ol dispela pasin bilong em. Em i tokim Gebriel: “Mi wokmeri bilong Jehova! Samting yu tok long en i ken kamap long mi.” (Luk 1:38) Wanpela wokmeri i no gat nem; em i mekim olgeta samting bosman bilong em i laikim. Maria i gat dispela tingting long Bosman bilong em, Jehova. Em i save em bai stap seif long han bilong God, na God i save stap gut long ol man i stap gut long em, na God bai blesim Maria taim em i givim bel long mekim dispela bikpela wok.​—Sng. 18:25.

13. Sapos God i tokim yumi long mekim wanpela samting i luk olsem i hatwok, hau bai stori bilong Maria i helpim yumi?

¹³ Sampela taim God i tokim yumi long mekim wanpela samting i luk olsem i hatwok, o yumi ting yumi no inap mekim. Baibel i kamapim planti as na yumi ken trastim em, putim yumi yet long han bilong em, olsem Maria. (Prov. 3:5, 6) Bai yumi trastim Jehova? Sapos yumi mekim olsem, em bai praisim yumi, dispela i stap olsem risen long yumi ken strongim bilip moa long em.

Em i Visitim Elisabet

14, 15. (a) Jehova i kamapim wanem sampela mak moa long Maria taim em i go lukim Elisabet na Sekaraia? (b) Tok bilong Maria long Luk 1:46-55 i kamapim wanem samting long em?

¹⁴ Ol tok Gebriel i mekim long samting i bin painim Elisabet, dispela i bikpela samting long Maria. Em i save olsem Elisabet inap pilim hevi bilong em. Maria i hariap i go long ples maunten bilong Juda, em wanpela raun we inap kisim 3-pela o 4-pela de samting. Taim em i go insait long haus bilong Elisabet na pris Sekaraia, Jehova i kamapim sampela mak moa long Maria bilong strongim bilip bilong em. Elisabet i harim gude bilong Maria, na wantu pikinini i stap long bel bilong Elisabet i kalap na amamas. Holi spirit i pulap long Elisabet na em i tok long Maria olsem “mama bilong Bikpela bilong mi.” God i kamapim long Elisabet olsem pikinini bilong Maria bai kamap Bikpela bilong em, em Mesaia. Na tu, holi spirit i kirapim em long mekim gutpela tok long Maria long pasin bilong em long bihainim tok, olsem: “Yu bilip na yu tu i ken amamas.” (Luk 1:39-45) Tru tumas, olgeta samting Jehova i bin promis long Maria bai kamap tru!

¹⁵ Na nau, Maria i toktok. Ol tok bilong em i stap long Baibel. (Ritim Luk 1:46-55.) Long ol narapela tok Maria i bin mekim, dispela em longpela tok tru em i bin mekim i stap long Baibel, na i kamapim planti samting long em. Dispela tok i soim tenkyu bilong em, em i amamas taim em i preisim Jehova long blesing em i kisim long kamap mama bilong Mesaia. Tok bilong Maria i soim strongpela bilip bilong em taim em i tok Jehova i save daunim ol man i gat pasin antap na ol strongpela man, na em i save helpim ol man i no gat nem na ol rabisman i laik mekim wok bilong em. Na tu, dispela tok i kamapim bikpela save bilong em. Wanpela wok painimaut i soim olsem Maria i kamapim winim 20 tok bilong Ol Skripsa Hibru!a

16, 17. (a) Olsem wanem Maria na pikinini man bilong em i kamapim pasin yumi mas bihainim? (b) Visit bilong Maria long Elisabet i helpim yumi long tingim wanem gutpela samting?

¹⁶ I klia tru olsem Maria i tingim tru Tok Bilong God. Em i holim yet pasin daun, na kamapim Tok Bilong God na em i no kamapim ol tok bilong em yet. Dispela pikinini man i wok long go bikpela insait long bel bilong em, bihain em tu bai bihainim wankain pasin, na i tok: “Tok mi skulim ol man long en i no bilong mi, em bilong man i salim mi i kam.” (Jon 7:16) I gutpela long askim yumi yet: ‘Mi save rispek na daun long Tok Bilong God? O mi save laikim ol tingting na tok bilong mi yet?’ Tingting bilong Maria i klia tru.

¹⁷ Maria i stap wantaim Elisabet inap 3-pela mun, yumi save tupela i wok long strongim na helpim narapela narapela. (Luk 1:56) Gutpela stori Baibel i mekim long dispela visit i helpim yumi long tingim ol gutpela samting pasin pren inap kamapim. Sapos yumi painim ol pren i laikim tru God bilong yumi, Jehova, yumi bai kamap strong long bilip na go klostu moa long Em. (Prov. 13:20) Orait nau, taim bilong Maria long go bek long ples. Josep bai tok wanem taim em i painimaut olsem Maria i gat bel?

Maria na Josep

18. Maria i kamapim wanem samting long Josep? Josep i mekim wanem?

¹⁸ Maria i no wet long bel bilong em i go bikpela pastaim na em bai tokim Josep. Em i mas toktok wantaim Josep. Pastaim Maria i tingting, dispela gutpela man i save pret long God bai ting wanem long tok em bai mekim? Maski i olsem, em i go na tokim Josep long olgeta samting i kamap long em. Ating yu inap tingim, Josep i tingting planti long dispela. Em i laik bilipim tok bilong dispela gutpela meri, tasol i luk olsem em i no stap gut long Josep. Baibel i no tokaut long tingting bilong Josep. Tasol Baibel i tok em i tingting long divosim em, long dispela taim, long tingting bilong ol man, man na meri i pasim tok long marit, i olsem tupela i marit pinis. Tasol Josep i no laik semim Maria long pablik na ol man bai tok nogut long em, so em i tingting long divosim em long pasin hait. (Mat. 1:18, 19) Ating Maria i bel hevi tru long lukim dispela gutpela man i tingting planti long dispela samting. Tasol Maria i no bel nogut long em.

19. Hau Jehova i helpim Josep long mekim samting i stret?

¹⁹ Jehova i helpim Josep long mekim samting i stret. Long driman, ensel bilong God i tokim em olsem Maria i gat bel long rot bilong mirakel. Ating dispela i mekim isi bel bilong Josep! Nau Josep i mekim samting Maria i bin mekim—em i mekim samting i stret wantaim laik bilong Jehova. Em i kisim Maria olsem meri bilong em, na redi long mekim dispela narapela kain wok tru bilong lukautim Pikinini Bilong Jehova.​—Mat. 1:20-24.

20, 21. Ol marit na lain i tingting long marit i ken kisim wanem skul long Maria na Josep?

²⁰ Ol marit—na lain i tingting long marit—i ken kisim skul long dispela tupela yangpela marit i stap 2,000 yia i go pinis. Taim Josep i lukim yangpela meri bilong em i mekim gut ol wok olsem mama na lukautim pikinini, ating em i amamas tru long ensel bilong Jehova i bin soim rot long em. Josep i lukim olsem em i bikpela samting long wetim Jehova i helpim em taim em i mekim ol bikpela disisen. (Sng. 37:5; Prov. 18:13) I klia tru olsem em i save skelim gut ol samting na long gutpela pasin em i mekim ol disisen olsem het bilong famili.

²¹ Tasol yumi ken kisim wanem tingting long pasin bilong Maria taim em i orait long maritim Josep? Maski pastaim Josep i hatwok long bilipim stori bilong em, em i wet long Josep long wokim disisen long samting em bai mekim, bikos em man husat bai stap het bilong famili. Dispela i bin skulim em gut, na inap skulim tu ol meri Kristen long nau. Na ating ol dispela samting i bin kamap i skulim Josep na Maria olsem em i bikpela samting long mekim pasin onest na toktok gut wantaim.​—Ritim Provep 15:22.

22. Wanem samting i stap olsem faundesen long marit bilong Josep na Maria? Tupela i gat wanem bikpela wok?

²² Tru tumas, marit bilong dispela tupela yangpela i gat strongpela faundesen. Tupela wantaim i laikim Jehova God winim ol narapela samting na ol i laik tru long amamasim em taim ol i mekim wok bilong ol olsem gutpela papamama. Tru tumas, ol bikpela blesing bai painim tupela—na ol bikpela hatwok tu. Ol i gat wok long lukautim Jisas, bihain em bai i go bikpela na planti man bai tingim em olsem nambawan man tru i winim olgeta narapela man.