Ensel i Go Lukim Maria

DISPELA naispela meri em Maria. Em i meri Israel, na em i stap long taun Nasaret. God i save olsem em i gutpela meri tru. Olsem na em i salim ensel Gebriel i go toktok wantaim Maria. Yu save Gebriel i kam givim wanem tok long Maria? Orait nau yumi ken stori long dispela.

Gebriel i tokim Maria: ‘Gude, meri. Jehova i belgut long yu na em i stap wantaim yu.’ Bipo Maria i no bin lukim dispela ensel. Em i tingting planti, long wanem, em i no save long as bilong tok bilong ensel. Tasol kwiktaim ensel i mekim Maria i stap bel isi.

Em i tok: ‘Maria, yu no ken pret. Jehova i belgut tru long yu. Olsem na em bai mekim wanpela gutpela samting long yu. I no longtaim na yu bai karim wanpela pikinini. Na yu mas kolim nem bilong em Jisas.’

Gebriel i tok moa olsem: ‘Dispela pikinini bai gat biknem, na bai ol i kolim em Pikinini Bilong God Antap Tru. Jehova bai putim em i stap king olsem Devit. Tasol Jisas bai stap king oltaim, na kingdom bilong em i no inap pinis!’

Maria i tok: ‘Olsem wanem bai dispela samting i kamap? Mi no marit yet. Mi no bin i stap wantaim wanpela man, na olsem wanem bai mi karim pikinini?’

Gebriel i tok: ‘Holi spirit bai i kam long yu. Olsem na ol bai kolim dispela pikinini olsem Pikinini Bilong God.’ Na em i tokim Maria: ‘Tingim wanblut bilong yu, Elisabet. Ol man i tok em i lapun pinis na em i no inap kamapim pikinini. Tasol klostu nau bai em i karim wanpela pikinini man. Olsem na i no gat wanpela samting em God i no inap mekim.’

Maria i tok: ‘Mi wokmeri bilong Jehova! Em i ken mekim long mi olsem yu tok pinis.’ Na ensel i lusim em.

Maria i hariap i go bilong lukim Elisabet. Taim Elisabet i harim nek bilong Maria, bebi i stap long bel bilong Elisabet em i amamas na kalap. Spirit bilong God i pulap long Elisabet, na em i tokim Maria: ‘Yu gat blesing i winim blesing bilong olgeta arapela meri.’ Maria i stap wantaim Elisabet inap 3-pela mun, na bihain em i go bek long Nasaret.

Ol i makim pinis Maria bilong maritim Josep. Tasol taim Josep i save olsem Maria i gat bel, em i ting em i no ken maritim Maria. Orait nau ensel bilong God i tokim Josep: ‘Yu no ken pret long kisim Maria olsem meri bilong yu. Long wanem, God yet i bin givim dispela pikinini man long em.’ Olsem na Josep i maritim Maria, na tupela i wetim Jisas i kamap.