Sapta 2

Taim Mama i No Karim Em Yet, Ol i Litimapim Nem Bilong Em

ENSEL Gebriel i tokim Maria, bai Maria i karim wanpela pikinini man na bai dispela pikinini i stap king inap oltaim oltaim. Tasol Maria i askim em olsem: “Dispela samting bai i kamap olsem wanem? Mi no marit yet long wanpela man.”

Ensel i tok: “Holi Spirit bai i kam long yu, na strong bilong God Antap Tru bai i karamapim yu. Olsem na dispela pikinini bihain bai yu karim, . . . ol bai i kolim em Pikinini Bilong God.”

Bilong helpim Maria long bilipim dispela tok, Gebriel i tok: ‘Kandere bilong yu Elisabet em i lapun pinis, na bipo ol i tok em i no inap karim pikinini, tasol nau em i gat bel na 6-pela mun bilong em i go pinis. I no gat wanpela samting God i no inap mekim.’

Maria i bilipim dispela tok bilong Gebriel, na em i tok: “Mi wokmeri bilong Bikpela. Em i ken mekim long mi olsem yu tok.”

Gebriel i lusim em, na bihain liklik Maria i go lukim Elisabet. Elisabet i stap wantaim man bilong em Sekaraia long ples maunten long Judia. Maria i lusim Nasaret na em i mas wokabaut inap 3-pela o 4-pela de bilong kamap long dispela ples i stap longwe.

Maria i kamap pinis long haus bilong Sekaraia, na em i go insait na givim gude long Elisabet. Nau spirit holi i pulap long Elisabet na em i tok: ‘God i givim blesing long yu i winim blesing em i givim long ol narapela meri, na pikinini i stap long bel bilong yu, em tu i kisim blesing. Mi amamas tru mama bilong Bikpela bilong mi em i kam long mi. Harim! Mi harim gude bilong yu, na pikinini i stap long bel bilong mi em i amamas na i kalap.’

Maria i amamas tru, na em i tok: “Bel bilong mi em i litimapim nem bilong Bikpela. . . . em i Helpim bilong mi na em i save mekim mi i stap gut tru. Mi wokmeri bilong en, mi samting nating, tasol em i lukim mi na em i marimari long mi. Nau na bihain tu bai olgeta lain manmeri i tok long God i bin givim bikpela amamas long mi. God I Gat Olgeta Strong, em i bin mekim narakain samting tru bilong helpim mi.” Maria i kisim dispela blesing, tasol em i no hambak; em i litimapim nem bilong God. Em i tok: “Nem bilong en i stap holi. Em i save marimari long ol manmeri i aninit long em. Em bai i mekim olsem tasol long ol manmeri i stap nau, na long ol manmeri i kamap bihain inap oltaim oltaim.”

Maria i mekim sampela tok moa olsem singsing bilong litimapim nem bilong God na em i kolim sampela samting i mas kamap bihain, em i tok: “Han bilong en i bin mekim strongpela wok. Ol man i save ting ol i nambawan tru na i litimapim nem bilong ol yet, em i bin rausim ol i go nabaut. Em i daunim ol strongpela king, na em i litimapim ol man i no gat nem. Em i givim planti gutpela samting long ol man i hangre, na bel bilong ol i pulap tru. Tasol ol man i gat planti samting, em i rausim ol i go nating. Em i helpim wokman bilong en, Israel, na em i tingim yet promis em i bin mekim long Abraham na long ol tumbuna bilong yumi, long em bai i marimari oltaim long ol lain bilong ol i kamap bihain.”

Maria i stap wantaim Elisabet inap 3-pela mun na helpim em, long wanem taim bilong Elisabet i karim pikinini i klostu. Gutpela tru dispela tupela gutpela meri inap i stap wantaim long dispela taim God i bin givim bikpela amamas long tupela!

Taim Maria i no karim yet Jisas, ol i bin litimapim nem bilong Jisas. Elisabet i kolim Jisas “Bikpela bilong mi.” Na taim Maria i kamkamap long haus bilong Elisabet, pikinini i stap long bel bilong Elisabet i amamas na i kalap. Tasol bihain planti man i toknogutim Maria na dispela pikinini i stap long bel bilong em. Luk 1:​26-56.

▪ Ensel Gebriel i tok wanem bilong helpim Maria long save olsem wanem bai em i gat bel?

▪ Taim Maria i no karim yet Jisas, olsem wanem ol i litimapim nem bilong Jisas?

▪ Taim Maria i mekim ol tok olsem singsing bilong litimapim nem bilong God, em i tok wanem?

▪ Maria i stap wantaim Elisabet inap hamas mun? Olsem wanem na i gutpela Maria i stap wantaim Elisabet long dispela taim?