I Stap na Wok Bilong Jisas
Taim Mama i No Karim Yet Em, Ol i Litimapim Nem Bilong Em
NAU TASOL Gebriel i bin tokim Maria olsem bai Maria i karim wanpela pikinini man na bai dispela pikinini i stap king inap oltaim oltaim. Tasol Maria i givim askim long ensel, olsem: ‘Dispela bai kamap olsem wanem? Mi no marit yet long wanpela man.’
Na ensel Gebriel i bekim tok olsem: ‘Spirit holi bai i kam long yu, olsem na dispela pikinini bai ol i kolim em Pikinini Bilong God.’ Bilong helpim Maria long save long as bilong dispela samting, ensel i tok moa olsem: ‘Kandere bilong yu Ilisabet em i lapun pinis na bipo ol i tok em i no inap karim pikinini, tasol nau em i gat bel na 6-pela mun bilong em i go pinis.’ Maria i bilipim dispela tok bilong ensel, na em i tok: ‘Bikpela i ken mekim long mi olsem yu tok.’
Gebriel i lusim em, na liklik taim bihain Maria i redi na em i go lukim Ilisabet. Ilisabet i stap wantaim man bilong em, Sekaraia, long ples maunten long Judia. Maria i mas lusim Nasaret na wokabaut i go longwe. Ating em i mas wokabaut inap tripela o fopela de.
Maria i kamap long haus bilong Sekaraia, na em i go insait na givim gude long Ilisabet. Nau spirit holi i pulap long Ilisabet na em i tok: ‘Yu gat blesing i winim blesing bilong olgeta narapela meri, na dispela pikinini i stap long bel bilong yu, em tu i gat blesing. Mi amamas tru mama bilong Bikpela bilong mi em i kam long mi. Harim! Yau bilong mi i harim gude bilong yu, na pikinini i stap long bel bilong mi em i amamas na i kalap.’
Maria i amamas tru, na em í tok: ‘Nau na bihain tu bai olgeta manmeri i tok long God i bin givim bikpela amamas long mi.’ Maria i stap wantaim Ilisabet inap 3-pela mun na helpim em, long wanem taim bilong Ilisabet i karim pikinini i klostu. Gutpela tru dispela tupela gutpela meri inap i stap wantaim long dispela taim God i bin givim bikpela amamas long tupela.
Taim mama i no karim yet Jisas, ol i bin litimapim nem bilong em. Ilisabet i kolim Jisas “Bikpela bilong mi.” Na taim Maria i kamkamap long haus bilong Ilisabet, pikinini i stap long bel bilong Ilisabet i amamas na i kalap. Tasol planti man i toknogutim Maria na dispela pikinini i stap long bel bilong em. Narapela “Wastaua” bihain bai kamapim stori bilong dispela samting. Tasol “Wastaua” bilong mun bihain bai stori moa long pikinini bilong Ilisabet, em Jon.
◆ Ensel Gebriel i tok wanem bilong helpim Maria long save olsem wanem bai em i gat bel?
◆ Taim mama i no karim yet Jisas, olsem wanem ol i litimapim nem bilong Jisas?
◆ Maria i stap wantaim Ilisabet inap hamas mun? Olsem wanem na i gutpela Maria i stap wantaim Ilisabet long dispela taim?