Askim

◼ Ol brata sista i go lukim baptais ol i ken mekim wanem bilong kamapim amamas bilong ol?

Baptais em i taim bilong amamas. Yumi amamas long lukim ol nupela i kam insait long lain bilong Jehova na ol i tokaut long bilip bilong ol long ai bilong ol man. (Sng 40⁠:⁠8) Jisas i tok, dispela samting i kamapim bikpela amamas long heven. (Lu 15⁠:10) Famili bilong man o meri i baptais na pablisa i bin stadi wantaim em, ol i amamas moa yet long lukim ol nupela i mekim dispela bikpela samting. Tasol ol i ken mekim wanem bilong kamapim amamas bilong ol long pasin i stret?

Baptais bilong Jisas i stap olsem gutpela piksa bilong baptais Kristen long nau. Taim Jisas i baptais em i save, dispela samting em i mekim em i wanpela bikpela samting tru, na em i beten i stap. (Lu 3⁠:​21, 22) Em i save baptais em i taim bilong skelim gut ol tingting i stap long bel. Ol disaipel bilong em, ol tu ol i save, baptais em i bikpela samting. Long de Pentikos, long yia 33, spirit holi i kam daun long ol disaipel, na bihain, inap olsem 3,000 manmeri ol i baptais. Ol disaipel i lukim dispela samting ol i mekim wanem? “Ol manmeri i strong long harim tok bilong ol aposel, na long helpim ol brata, na long kam bung na kaikai wantaim, na long beten.” (Ap 2⁠:​41, 42) Ol disaipel i tingim ol samting bilong spirit na ol i singautim ol man i kam long haus bilong ol na lukautim gut ol.

Long ol kibung Kristen long nau i gat taim bilong kisim baptais. Taim ol brata sista i lukim ol nupela i kam insait long lain bilong Jehova, i stret ol i kamapim amamas bilong ol na paitim han na mekim gutpela tok amamas. No gat rong long dispela. Tasol i no stret ol brata sista i mekim pasin olsem: Bikmaus na wisel na tromoi han nabaut na kolim nem bilong ol man i baptais bilong pulim ai bilong ol. Dispela kain pasin i makim olsem ol i no tingim baptais i olsem wanpela samting holi. Na tu, taim ol nupela i lusim wara i kam, i no gutpela sapos ol narapela i givim ol plaua long ol o praisim ol, nogat. Taim man i kisim baptais, nau em i kirap long ran long resis bilong kisim laip. Yumi ken kamapim amamas bilong yumi na strongim ol nupela i kisim baptais sapos yumi helpim ol long save olsem baptais i opim rot bilong ol i ken i go klostu tru long Jehova na kamap pren bilong em.

Baptais i bikpela samting ol man i mas tingim gut, olsem na ples bilong baptais i no ples bilong mekim ol tok pani, o pilai, o waswas long wara, o mekim narapela kain pasin olsem. Yumi mas kamapim amamas bilong yumi long pasin i stret. Sapos pasin yumi mekim i makim olsem yumi tingim baptais i wanpela bikpela samting, orait, dispela bai helpim amamas bilong ol narapela i kamap bikpela moa.