Askim

Yumi mas i gat wanem tingting long baptais Kristen?

Planti bilong ol man i save kaunim dispela nius i baptais pinis, tasol dispela em i wanpela bikpela askim long ol, long wanem, ol i insait long en. Na ol man i laik kisim baptais, ol tu i insait long en. Pastaim bai yumi stori long ol man i laik kisim baptais, em ol i go insait tru long wara, ol i mas i gat wanem kain tingting long baptais.

Long Matyu 28:​19, 20, Jisas i tokim ol disaipel bilong em long go long olgeta lain na kamapim disaipel, na skulim ol na baptaisim ol. Em i no tok baptais i olsem wanpela samting bel bilong man i kirapim em nating long mekim, nogat. Samting Jisas i mekim i soim yumi olsem baptais i bikpela samting. Luk 3:21 i tok: “Jisas tu i kisim baptais. Em i kisim baptais pinis, orait em i beten i stap, na heven i op.” Tru tumas, Man bilong makim gutpela piksa long yumi i ting baptais i bikpela samting na em i beten. Yumi no inap ting olsem bihain long kisim baptais na lusim wara em i mekim wanpela mak long tupela pinga olsem em i win, o em i mekim wanpela kain singaut, o em i amamas na tromoi tupela han bilong em i go antap na kam daun, olsem sampela man long nau i bin mekim taim ol i baptais; nogat. Jon Bilong Baptais tasol i stap na Jisas i kirap na beten long Papa bilong em.

Tasol Baibel i no tok baptais i olsem samting yumi no ken amamas long en na yumi mas pes drai, na yumi mas mekim sampela samting olsem brukim skru o kolim long maus sampela tok o beten bilong lotu olsem ol narapela lotu i save mekim. Yumi ken tingim de Pentikos, taim planti tausen Juda na ol man bilong ol narapela lain i bihainim lotu Juda ol i kisim baptais Kristen. Ol i stadi pinis long Lo Bilong God na kamap pren bilong em. Olsem na ol i mas kisim tasol save long Mesaia, em Jisas, na bilip long em. Sapos ol i mekim olsem, ol inap kisim baptais.

Aposel 2:41 i tok: “Tok bilong Pita i sutim bel bilong planti manmeri, na ol i kisim baptais.” Baibel Weymouth i tok: “Ol man i amamas long tok bilong em, ol i kisim baptais.” Ol i bin amamas long harim gutnius bilong Mesaia, na dispela amamas i stap tu long taim ol i kisim baptais. Na ating planti handet man i bin lukim dispela baptais, ol tu i amamas. Na ol ensel long heven tu i lukim na ol i amamas. Tingim tok bilong Jisas: “Mi tok stret long yupela, wankain amamas i save kamap namel long ol ensel bilong God taim wanpela man bilong mekim sin em i tanim bel.”​—⁠Luk 15:⁠10.

I gat ol narapela narapela rot na yumi ken kamapim olsem baptais i bikpela samting na yumi amamas long en. Long sampela lotu ol man i kisim baptais i save pasim waitpela o blakpela klos. Tasol Baibel i no tok yumi mas mekim olsem. Tasol i no gutpela sapos man o meri i kisim baptais i pasim klos bilong waswas i no haitim gut skin. Na olsem yumi tok pinis, taim nupela Kristen i lusim wara em i no ken mekim sampela samting long han bilong makim olsem em i win. Ol narapela brata Kristen i amamas long nupela Kristen i kisim baptais. Em i mas pilim olsem baptais i olsem kirap tasol bilong longpela rot em i mas wokabaut long en bilong i stap gut long God na God i ken orait long em.​—⁠Matyu 16:⁠24.

Yumi ol man i lukim baptais, yumi tu i amamas. Na yumi amamas moa yet sapos wanpela wanblut o Baibel-stadi bilong yumi i kisim baptais. Tasol bilong pilim tru dispela samting, yumi mas harim tok olgeta bilong baptais wantaim ol man i laik kisim baptais, na harim ol i bekim ol askim long ai bilong ol man, na yumi mas insait long beten. Sapos yumi mekim olsem bai yumi kamapim stretpela tingting long baptais; bai yumi kamapim tingting olsem bilong God. Taim baptais i pinis, i no olsem ol man i kisim baptais i mas sanap long lain na ol man bai amamas long ol olsem ol i win pinis na ol i mas givim plaua long ol o wokim pati bilong litimapim nem bilong ol, nogat. Tasol yumi ken go na tok amamas long nupela brata o sista long gutpela samting em i mekim na yumi ken tok amamas long em i kam insait long lain brata Kristen.

Bilong tingim gen, yumi olgeta, na ol man i laik kisim baptais tu, i mas tingim baptais i olsem wanpela bikpela samting. Em i no taim bilong mekim sampela kain singaut, o taim bilong mekim pati, o bilong lap nabaut, nogat. Na tu, em i no taim bilong bel hevi na pes drai. Yumi olgeta i ken amamas long sampela nupela man i wokabaut wantaim yumi long rot i go long laip oltaim. Na yumi ken tok amamas long ol dispela nupela brata na sista bilong yumi.

[Piksa long pes 31]