Helpim Wasman Bilong Buk-Stadi Bilong Yu
1 Yumi olgeta wan wan i save kisim planti gutpela samting long Buk-Stadi Bilong Kongrigesen. Long mun i go pinis yumi bin stori long olsem wanem wasman bilong Buk-Stadi Bilong Kongrigesen i mekim wok bilong em. Tasol yumi ken mekim wanem bilong helpim em na dispela inap helpim yumi yet na ol narapela?
2 Go Long Olgeta Wik: Ol grup bilong Buk-Stadi i liklik, olsem na em i bikpela samting long yu mas i go long Buk-Stadi. Putim mak long go long Buk-Stadi long olgeta wik. Na tu, yu mas kamap paslain long Buk-Stadi i kirap, na bai wasman inap kirapim miting long taim stret.—1 Ko. 14:40.
3 Ol Tok i Strongim Man: Narapela samting yu ken mekim bilong helpim wasman, em long redim gut buk samting bilong stadi long en, na long mekim ol tok i strongim man. Sapos yu bekim tok na stori long wanpela samting tasol, dispela i gutpela moa na i kirapim ol narapela tu long bekim tok. No ken traim long toktok long olgeta samting long paragraf. Sapos yu pilim tru wanpela tok long paragraf, orait yu ken kamapim tingting bilong yu taim yu bekim tok, na dispela bai mekim Buk-Stadi i kamap gutpela moa.—1 Pi. 4:10.
4 Sapos yu save ritim ol paragraf long Buk-Stadi, wok strong long mekim gut dispela wok. Gutpela pasin bilong ritim ol tok bai mekim Buk-Stadi i kamap gutpela moa.—1 Ti. 4:13.
5 Grup Bilong Autim Tok: Ol bung bilong autim tok i save kamap long ol ples bilong Buk-Stadi, na pasin bilong yu long go long dispela bung i helpim wasman taim em i go pas long mekim wok autim tok. Tingim ol dispela bung olsem ol gutpela rot bilong pas gut moa wantaim ol brata na strongim ol.
6 Ol Ripot Bilong Wok Autim Tok: Narapela rot bilong helpim wasman em long givim kwik ripot bilong wok autim tok long pinis bilong olgeta wan wan mun. Yu ken givim stret ripot bilong yu long wasman o yu ken putim long bokis ol i makim bilong putim ol ripot long Haus Kingdom. Kuskus i ken yusim dispela bokis long bungim ol ripot em ol wasman bilong Buk-Stadi bai kisim.
7 Wasman bilong Buk-Stadi bai amamas tru long pasin bilong yu long wok gut wantaim em. Tasol bikpela samting moa yet, yu ken bilip tru olsem Jehova bai ‘i stap wantaim yu.’—Fl. 4:23.