Tokaut Long Ol Samting Tru Bilong Jisas
1 Ol Kristen God i bin makim wantaim poroman bilong ol, em lain arapela sipsip, ol i gat wok long “autim tok bilong Jisas.” (KTH 12:17) Dispela i wanpela bikpela wok, long wanem, long rot bilong Jisas tasol God inap long kisim bek ol man.—Jo. 17:3; Ap. 4:12.
2 ‘Rot, Tok Tru, na Laip’: Jisas i tok: “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot. Nogat. Long mi tasol.” (Jo. 14:6) Jisas i “rot,” na long em tasol yumi inap i go klostu long God long beten, na em inap orait long yumi. (Jo. 15:16) Jisas em i “tok tru,” long wanem, em i truim ol tok profet na ol piksa bilong ol samting bai kamap bihain em Ol Skripsa Hibru i stori long en. (Jo. 1:17; Kl. 2:16, 17) Tru tumas, nambawan wok bilong ol trupela tok profet em bilong kamapim klia bikpela wok bilong Jisas insait long ol samting God i tingting pinis long mekim. (KTH 19:10) Na tu, Jisas em i “laip.” Bilong kisim blesing bilong laip oltaim, olgeta man i mas bilip long ofa bilong Jisas bilong baim bek ol man.—Jo. 3:16, 36; Hi. 2:9.
3 Em i Stap Het na Mekim Wok King: Ol man i mas save tu long bikpela namba Jehova i bin givim long Pikinini bilong em. God i putim Jisas i stap King long Kingdom bilong Em—“em bai i bosim olgeta lain manmeri.” (Stt. 49:10) Na tu, Jehova i bin makim em olsem Het bilong kongrigesen. (Ef. 1:22, 23) Yumi mas helpim ol sumatin long save long olsem wanem Jisas i bosim kongrigesen, na mekim wok long “wokboi i gat gutpela tingting” long givim ol kaikai bilong spirit “long taim bikman i makim.”—Mt. 24:45-47.
4 Hetpris i Gat Pasin Marimari: Jisas i bin i stap man long graun na karim ol hevi na pen, olsem na “em inap long helpim ol manmeri long taim ol traim i kamap long ol.” (Hi. 2:17, 18) Yumi ol sinman i belgut tru long save olsem Jisas i pilim hevi bilong yumi taim yumi mekim pasin kranki, na em i save askim God long helpim yumi! (Ro. 8:34) Long rot bilong ofa bilong Jisas na wok em i mekim olsem Hetpris, yumi inap i go klostu long Jehova ‘na yumi no pret,’ bambai em i ken “helpim yumi.”—Hi. 4:15, 16.
5 Ol samting yumi mekim bilong helpim ol narapela long save long ol samting tru bilong Jisas, dispela i ken kirapim ol long bihainim tok bilong em na wok wantaim yumi long mekim wok bilong em.—Jo. 14:15, 21.