Askim
Wok Krais Jisas i mekim olsem hetpris, em Hibru 4:15, 16 i toktok long en, i helpim ol “arapela sipsip” long nau olsem wanem?
Namba wan lain em wok bilong Jisas olsem Hetpris i helpim ol, em dispela lain ol bai stap wantaim em long heven, tasol long nau dispela wok i helpim tu ol Kristen i wet long kisim laip oltaim long graun.
Kirap long taim bilong Adam i kam inap nau, ol man i mas karim hevi bilong sin. Wankain olsem ol Israel, pen na hevi i save painim yumi, long wanem, yumi bin kisim sin long namba wan tumbuna. Ol Israel i bin go long ol hetpris na pris, na ol i mekim ofa bilong helpim ol yet na lain Israel. Bihain, God i makim Jisas olsem pris ‘wankain olsem Melkisedek.’ Jisas i kirap bek pinis, na bihain em i kamap long ai bilong Jehova bilong givim pe bilong gutpela skin bilong em olsem ofa.—Song 110:1, 4.
Dispela i helpim yumi olsem wanem long nau? Long pas bilong em long ol Hibru, Pol i stori long wok bilong Jisas olsem Hetpris. Hibru 5:1 i tok: “Pasin bilong makim olgeta hetpris em i olsem. God i save kisim wanpela man na em i save putim dispela man long mekim wok bilong em olsem helpim bilong ol manmeri. Hetpris i gat wok bilong givim ol kain kain presen long God na bilong mekim ol kain kain ofa bilong tekewe sin.” Na long ves 5 na 6 Pol i tokaut olsem Jisas i kamap wanpela hetpris, na dispela inap helpim yumi.
Em i helpim yumi olsem wanem? Pol i tok: “Jisas em i Pikinini Bilong God, tasol em i karim pen, na dispela i skulim em tru long pasin bilong bihainim tok bilong God. Dispela i mekim em i kamap nambawan man tru bilong bihainim tok . . . na em i kamap Man bilong helpim na kisim bek olgeta manmeri i bihainim tok bilong em, bai ol i stap gut oltaim oltaim.” (Hibru 5:8-10) Pastaim, ating dispela tok i mekim na yumi tingting long olsem wanem dispela ofa bai helpim yumi long nupela taim—taim ol man i stap gut long God na Jisas bai kisim ol gutpela samting, long wanem, ol i no gat sin moa na ol inap kisim laip oltaim oltaim. Dispela gutpela samting bai kamap long rot bilong ofa bilong Jisas na long wok bilong em olsem Hetpris.
Tasol wok Jisas i mekim olsem Hetpris i helpim yumi long nau tu. Lukim Hibru 4:15, 16: “Yumi yet i no gat strong bilong daunim sin. Tasol yumi no ken ting, dispela hetpris bilong yumi em i no inap sori long yumi. Nogat. Olgeta traim i save kamap long yumi, dispela olgeta i bin kamap pinis long em bilong traim em tu. Tasol em i no mekim sin. Olsem na yumi ken i go klostu long God, na yumi no ken pret. Em i man bilong marimari. Yumi go long em, na bai yumi lukim em i sori long yumi. Na sapos yumi gat hevi, orait marimari bilong em bai i helpim yumi.” Bai yumi go long em long wanem taim? Taim yumi laik em i marimari long yumi na helpim yumi. Yumi olgeta i mas pilim olsem, long wanem yumi sinman.
Hibru 4:15, 16 i kamapim tok olsem: Jisas—nau em i stap pris long heven—bipo em i bin i stap man long graun, olsem na em inap pilim hevi bilong man. Pilim hevi bilong husat? Bilong yumi. Na long wanem taim? Long nau. Taim Jisas i stap long graun em i kisim wankain hevi olsem ol narapela man bilong graun. Sampela taim Jisas i bin hangre na dai long wara. Na maski skin bilong em i nambawan olgeta, sampela taim skin bilong em i les. Dispela inap strongim bel bilong yumi. Strongim bel olsem wanem? Jisas i bin pilim ol hevi bilong skin, olsem skin i les samting, olsem na em inap pilim ol hevi yumi save pilim planti taim. Na tingim: Sampela taim pasin bilong bel nogut na tok kros i bin kamap namel long ol aposel na em i mas karim hevi bilong dispela. (Mak 9:33-37; Luk 22:24) Tru tumas, i gat sampela samting i bin mekim na dispela i givim bel hevi long Jisas. Olsem na yumi ken save, taim yumi bel hevi long sampela samting o wanpela wok bilong yumi i no kamap gutpela, Jisas inap pilim tru hevi bilong yumi.
Sapos kain hevi olsem i painim yu, yu inap mekim wanem? Yu ting Pol i tok, yu mas wet tasol inap long taim Hetpris bilong yu, Jisas, bai helpim yu long kamap gutpela olgeta long tingting na skin? Nogat. Pol i tok: “Bai yumi lukim em i sori long yumi. Na sapos yumi gat hevi, orait marimari bilong em bai i helpim yumi,” na em bai helpim yumi long nau tu. Yumi mas tingim tu, taim Jisas i stap man long graun em i bin kisim pen na hevi; “olgeta traim i save kamap long yumi, dispela olgeta i bin kamap pinis long em.” Olsem na taim kain hevi olsem i painim yumi, em bai helpim yumi, long wanem, em i save long hevi bilong yumi. Tasol taim yu tingim dispela samting, ating yu pilim tru gutpela pasin sori bilong em, a?
Nau lukim ves 16. Pol i tok yumi—em ol man God i makim na ol arapela sipsip—ken go klostu long God, na yumi no ken pret. (Jon 10:16) Aposel Pol i no laik tok olsem taim yumi beten long God yumi ken mekim kain kain tok nating, na tok kros na tok bilas long God. Tasol em i laik tok olsem, yumi bilip long ofa bilong Krais na wok em i mekim olsem Hetpris, olsem na yumi ken go klostu long God maski yumi sinman.
Hetpris bilong yumi, Krais Jisas, i helpim yumi tu long ol sin o popaia bilong yumi. Tru, yumi no ting long nau Jisas bai kamapim olgeta gutpela samting ofa bilong em bilong baim bek yumi bai mekim. Na maski em i mekim olsem, yumi no inap kisim laip oltaim yet. Tingim samting i painim wanpela man ol bun bilong em i dai olgeta, na ol man i tekewe hap rup bilong haus na slekim bet bilong em i go daun, em Luk 5:18-26 i stori long en. Jisas i tokim em: “Pren, mi lusim pinis ol sin bilong yu.” Tasol Jisas i no toktok long sampela popaia o sin man i bin mekim na bun bilong em i dai olgeta, nogat. Em i toktok long sin ol man i bin kisim long Adam, na ating em i bin kisim sampela sik long papamama, na dispela i bin givim hevi long em.
Long rot bilong ofa em bai mekim, Jisas inap tekewe sin bilong dispela man, wankain olsem meme ol i makim bilong Asasel bilong karim sin bilong lain Israel i go pinis long De Bilong God i Tekewe Sin Bilong Ol Manmeri. (Wok Pris 16:7-10) Tasol dispela man ol bun bilong em i dai olgeta, em i stap man yet. Em bai mekim gen sin, na bihain em bai dai, olsem ol sinman i mas i dai. (Rom 5:12; 6:23) Tok bilong Jisas i no makim olsem wantu tasol na dispela man i kisim laip oltaim, nogat. Tasol Jisas i tekewe sin bilong em long dispela taim.
Orait, tingim yumi long nau. Yumi no gutpela olgeta, olsem na yumi mekim pasin kranki long olgeta de. (Jems 3:2) Yumi ken mekim wanem long dispela? Long heven yumi gat wanpela gutpela Hetpris na long rot bilong em yumi ken go klostu long Jehova long rot bilong beten. Olsem aposel Pol i tok, yumi olgeta i “ken i go klostu long God, na yumi no ken pret. Em i man bilong marimari. Yumi go long em, na bai yumi lukim em i sori long yumi. Na sapos yumi gat hevi, orait marimari bilong em bai i helpim yumi.” Olsem na long nau, olgeta man bilong lain arapela sipsip i kisim gutpela samting long wok pris bilong Krais, na wanpela gutpela samting ol inap kisim, em bel i no gat tok.
Olgeta Kristen i wet long kisim laip oltaim long graun inap amamas long ol gutpela samting ol bai kisim long nupela taim klostu i kamap. Ol dispela samting bai winim tru ol gutpela samting long nau. Long dispela taim Hetpris bilong yumi long heven bai mekim wok long ofa bilong em na dispela bai pinisim sin bilong yumi olgeta. Na em bai helpim tu ol man na pinisim sik bilong ol long skin na long spirit. Na Jisas bai skulim olgeta man bilong God long graun, olsem bikpela wok ol pris bilong Israel i bin mekim long skulim ol Israel long Lo. (Wok Pris 10:8-11; Lo 24:8; 33:8, 10) Wok Krais i mekim olsem pris i helpim yumi long nau, tasol planti gutpela samting moa i wetim yumi!