Krais Jisas Inap Helpim Yumi Olsem Wanem?
OL SAMTING Krais Jisas i bin mekim bilong helpim ol manmeri taim em i stap long graun em ol gutpela samting tru. Wanpela man i bin lukim tru planti gutpela samting Jisas i bin mekim, em i tok: “I gat planti arapela samting tu Jisas i bin mekim. Tasol sapos ol i laik raitim ol buk i gat tok long olgeta dispela samting wan wan, ating graun bilong yumi bai i no gat ples inap long yumi ken putim ol dispela buk.” (Jon 21:25) Jisas i bin mekim planti samting taim em i stap long graun, olsem na yumi ken askim olsem: ‘Olsem wanem em inap i stap olsem helpim bilong yumi long heven? Olsem wanem pasin bilong Jisas long sori long ol man em inap helpim yumi long nau?’
Bekim bilong ol dispela askim i mekim gut bel bilong yumi na i strongim yumi. Baibel i tok, Krais i “go insait long heven stret. Na nau em i stap klostu tru long God, na em i wok long helpim yumi.” (Hibru 9:24) Em i helpim yumi olsem wanem? Aposel Pol i tok: “Krais i no kisim blut bilong meme na bilong pikinini bulmakau na i go insait long dispela haus lotu [“heven stret”]. Nogat. Em i mekim ofa long blut bilong em yet, na em i go insait long haus lotu wanpela taim tasol. Na em i baim bek yumi bilong oltaim oltaim.”—Hibru 9:12; 1 Jon 2:2.
Man! Dispela em gutpela tok tru, a? Taim Jisas i go long heven dispela i no pinisim ol gutpela wok em i mekim bilong helpim ol manmeri, nogat; dispela i helpim em long mekim sampela samting moa bilong helpim ol. Long bikpela pasin sori God i makim Jisas long “mekim wok pris”—olsem hetpris—“na em i sindaun pinis long han sut bilong sia bilong Namba Wan King long heven.”—Hibru 8:1, 2.
“Mekim Wok Pris”
Olsem na long heven Jisas i mekim wok pris bilong helpim ol manmeri. Em bai mekim wanpela wok em hetpris bilong Israel i bin mekim bilong helpim ol man i lotu long God long bipo. Na dispela em i wanem kain wok? Pol i tok: “[Ol] i gat wok bilong bringim ol presen i kam long God na bilong mekim ol ofa long em. Olsem na Hetpris Jisas tu i mas mekim ofa.”—Hibru 8:3.
Jisas i bin givim wanpela gutpela samting tru olsem ofa, winim tru ol ofa bilong ol hetpris bilong bipo. “Sapos . . . blut bilong meme na bilong bulmakau man” inap helpim ol Israel bilong bipo long kamap klin long ol samting bilong spirit, “blut bilong Krais i winim dispela. . . . Em i pinisim asua bilong yumi na yumi save olsem yumi stap klin tru long ai bilong God . . . na yumi ken mekim wok bilong God bilong i stap oltaim.”—Hibru 9:13, 14.
Na tu, Jisas em i nambawan man bilong mekim wok pris, long wanem, em i kisim laip i stap oltaim oltaim na i no inap i dai. Long Israel bilong bipo “planti man i save kamap pris, long wanem, ol i save dai na ol i no inap i stap pris oltaim.” Tasol olsem wanem long Jisas? Pol i tok: “Em i holim wok pris oltaim, na i no gat senis bilong en. Olsem na oltaim em inap tru long kisim bek ol manmeri i kam klostu long God long nem bilong em, long wanem, em i stap laip oltaim, na em i save beten long God long helpim ol.” (Hibru 7:23-25; Rom 6:9) Tru tumas, long han sut bilong God long heven, yumi gat wanpela man i mekim wok pris na ‘oltaim em i save beten long God long helpim yumi.’ Man! Dispela i mekim bikpela samting long yumi long nau, a?
Taim Jisas i bin stap long graun, ol manmeri i kam long em bambai em i ken helpim ol, na sampela ol i kam long ol longwe ples. (Matyu 4:24, 25) Nau Jisas i stap long heven, na ol manmeri bilong olgeta kantri ol i ken kam long em na em i mekim wok pris bilong helpim ol long olgeta taim.
Jisas Em i Wanem Kain Hetpris?
Ol stori bilong Krais Jisas long 4-pela Gutnius i kamapim long ples klia pasin bilong em long helpim ol man na bikpela sori bilong em. Em i man bilong daunim tru laik bilong em yet! Planti taim ol man i kam long em na long ol disaipel bilong em taim skin bilong ol i les tru na ol i laik malolo. Tasol em i no les long ol man na pilim olsem em i laik malolo na stap isi, nogat; “em i sori tru” long ol manmeri i kam long em bambai em i ken helpim ol. Na maski skin bilong em i les na em i hangre na dai long wara, “em i amamas long ol i kam” na em i redi long lusim kaikai bambai em i ken helpim ol sinman i gat gutpela bel.—Mak 6:31-34; Luk 9:11-17; Jon 4:4-6, 31-34.
Jisas i sori tru long ol man, na dispela i kirapim em long helpim ol long ol samting bilong skin, na bel, na spirit. (Matyu 9:35-38; Mak 6:35-44) Na tu, em i skulim ol long pasin bilong kisim malolo na ol samting bilong mekim gut bel bilong ol. (Jon 4:7-30, 39-42) Em i singautim ol man olsem: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. Yupela kisim save long mi na aninit long tok bilong mi, olsem yupela i kisim plang ol i save putim long nek bilong ol bulmakau bilong ol i ken pulim ol samting. Yupela kisim save long mi, long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo.”—Matyu 11:28, 29.
Jisas i laikim tru ol man, olsem na em i givim laip bilong em bilong helpim ol sinman bilong graun. (Rom 5:6-8) Long dispela samting aposel Pol i tok: ‘God [Jehova] i no bin pasim Pikinini bilong em yet, tasol em i bin salim em i kam bilong helpim yumi olgeta, orait ating em bai i givim yumi olgeta arapela samting tu. . . . Krais Jisas i bin i dai, na em i kirap bek tu. Na nau em i stap long han sut bilong God, na em i save askim God long helpim yumi.’—Rom 8:32-34.
Wanpela Hetpris i Save Sori Long Yumi
Taim Jisas i stap long graun, sampela taim em i hangre, dai long wara, skin i les, em i bel hevi, kisim pen, na em i dai. Ol hevi em i karim i mekim na em inap tru long mekim wok olsem Hetpris bilong helpim ol manmeri i karim pen na hevi. Pol i tok: “Long olgeta samting [Jisas] i mas kamap wankain tru olsem ol brata bilong en, na em bai inap i stap hetpris bilong ol na mekim wok bilong God. Em i kamap hetpris bilong sori long ol manmeri, na em i save bihainim olgeta tok bilong God na mekim wok bilong em, em wok bilong tekewe sin bilong ol manmeri. Ol traim i bin kamap long em na em yet i bin karim pen. Olsem na em inap long helpim ol manmeri long taim ol traim i kamap long ol.”—Hibru 2:17, 18; 13:8.
Jisas i kamapim klia olsem em inap tru na em i amamas long helpim ol man long i go klostu long God. Tasol olsem wanem? Dispela i makim olsem em i mas kirapim wanpela God i gat hatpela pasin na i no save marimari na i no laik lusim sin bilong ol man? Nogat tru! Baibel i tokim yumi olsem Jehova i “gutpela tru na [em i] save rausim sin bilong mipela.” Na em i tok moa: “Sapos yumi autim sin bilong yumi, orait God bai i mekim olsem em i bin tok. Em bai i mekim stretpela pasin na lusim sin bilong yumi. Na em bai i rausim olgeta pasin nogut i stap long yumi na mekim yumi i kamap klin.” (Song 86:5; 1 Jon 1:9) Ol gutpela tok na pasin bilong Jisas i kamapim pasin marimari na pasin sori bilong Papa bilong em.—Jon 5:19; 8:28; 14:9, 10.
Olsem wanem Jisas i givim malolo long ol sinman i tanim bel? Em i helpim ol long ol i ken belgut na amamas long ol wok ol i mekim bilong amamasim God. Pol i raitim pas i go long ol wanlain Kristen em God i bin makim ol long spirit holi, na em i tok: “Yumi gat bikpela hetpris i stap, na em i go insait tru long heven. Em Jisas, Pikinini Bilong God. Olsem na yumi mas holimpas dispela bilip yumi save tokaut long en. Yumi yet i no gat strong bilong daunim sin. Tasol yumi no ken ting, dispela hetpris bilong yumi em i no inap sori long yumi. Nogat. Olgeta traim i save kamap long yumi, dispela olgeta i bin kamap pinis long em bilong traim em tu. Tasol em i no mekim sin. Olsem na yumi ken i go klostu long God, na yumi no ken pret. Em i man bilong marimari. Yumi go long em, na bai yumi lukim em i sori long yumi. Na sapos yumi gat hevi, orait marimari bilong em bai i helpim yumi.”—Hibru 4:14-16.
“Em Bai Helpim Yumi”
Tasol yumi ken mekim wanem taim sampela hevi i painim yumi—olsem wanpela bikpela sik, o bel i kotim yumi, o bel bilong yumi i bagarap tru, o yumi bel hevi—na yumi pilim olsem ol dispela hevi i bikpela tumas na yumi no gat strong bilong karim ol? Yumi ken kisim strong long wankain samting em Jisas i bin kisim strong long en long olgeta taim—em beten. Olsem: Long dispela nait Jisas i givim laip bilong em bilong baim bek yumi “em i beten strong moa. Na tuhat bilong en i kamap olsem blut na i pundaun long graun.” (Luk 22:44) Tru tumas, Jisas i save pinis long pasin bilong beten strong long God. Em i “save mekim prea na beten long God. Em i save, God inap long kisim bek em, na em i no mas i dai, olsem na em i beten strong long God, na em i singaut strong na i krai planti. Em i save daunim laik bilong em yet na i aninit long God, olsem na God i harim beten bilong em.”—Hibru 5:7.
Jisas i save em i bikpela samting long ol man long “God i harim beten” bilong ol na i strongim ol. (Luk 22:43) Na em i givim tok promis olsem: “Sapos yupela i askim Papa long wanpela samting long nem bilong mi, orait em bai i givim long yupela. . . . Yupela i mas askim, na bai yupela i kisim, na bai amamas i ken pulap tru long bel bilong yupela.” (Jon 16:23, 24) Olsem na yumi inap beten askim God long larim Pikinini bilong em long mekim wok long namba bilong em na long pe bilong ofa bilong em bilong helpim yumi.—Matyu 28:18.
Jisas i kisim pinis namba bilong em long heven, olsem na yumi ken bilip tru olsem em bai helpim ol man long taim stret long kisim ol samting ol i sot long en. Olsem: Sapos yumi bin mekim wanpela rong na yumi bel hevi tru long en, yumi ken strongim bel, long wanem, “yumi gat Helpim bilong yumi, em i stap wantaim Papa. Em Jisas Krais, dispela man bilong mekim stretpela pasin olgeta.” (1 Jon 2:1, 2) Man bilong helpim yumi na mekim gut bel bilong yumi em i stap long heven, na em bai askim God long harim ol beten bilong yumi, em ol beten yumi mekim long nem bilong Jisas na i stret wantaim ol tok bilong Baibel.—Jon 14:13, 14; 1 Jon 5:14, 15.
Pilim Tru Ol Samting Krais i Mekim Bilong Helpim Yumi
Yumi ken beten long God long rot bilong Pikinini bilong em, tasol yumi ken mekim sampela samting moa. Long rot bilong pe bilong ofa bilong em Krais “i kisim bek” ol manmeri—i olsem em i “baim bek” ol manmeri bilong graun na ol i bilong em. (Galesia 3:13; 4:5; 2 Pita 2:1) Yumi ken soim olsem yumi amamas long ol samting Krais i bin mekim bilong helpim yumi taim yumi kamapim long ples klia olsem yumi bilong em, na yumi amamas long bihainim singaut bilong em, olsem: “Sapos wanpela man i laik bihainim mi, orait em i mas daunim laik bilong em yet, na em i mas karim diwai . . . bilong en long olgeta de, na em i mas bihainim mi.” (Luk 9:23) Bilong ‘daunim laik bilong yumi yet’ em i no inap long yumi tokaut tasol olsem nau yumi bilong Krais, nogat. Krais i dai “bilong helpim yumi ol man i stap laip, bai yumi no ken tingting moa long yumi yet na wokabaut. Nogat. Yumi ken tingting long dispela man i kisim ples bilong yumi na i dai pinis . . . Yumi ken tingting long em na wokabaut.” (2 Korin 5:14, 15) Olsem na sapos yumi pilim tru ofa bilong Krais, dispela bai mekim bikpela samting long tingting bilong yumi, na long ol mak yumi laik winim, na long ol pasin yumi save bihainim. Yumi gat bikpela dinau moa long Krais em i “lusim pinis laip bilong em yet, bilong kisim bek yumi,” na dispela i mas kirapim yumi long kisim sampela save moa long em na long gutpela Papa bilong em, God Jehova. Na tu, yumi laik bilip bilong yumi i mas i go bikpela, na yumi laik bihainim ol lo bilong God em ol i gutpela bilong helpim yumi, na yumi laik “mekim olgeta kain gutpela [wok].”—Taitus 2:13, 14; Jon 17:3.
Long rot bilong kongrigesen Kristen yumi ken kisim ol kaikai bilong spirit long taim stret, na ol samting bilong strongim yumi na bilong soim rot long yumi. (Matyu 24:45-47; Hibru 10:21-25) Sapos wanpela i sik long ol samting bilong spirit, em i ken “singautim ol hetman [olsem ol elda] bilong sios.” Bilong strongim bel bilong sikman, Jems i tok moa: “Ol [elda] i bilip long God na ol i prea, orait Bikpela bai i mekim orait dispela sikman na kirapim em gen. Na sapos em i bin mekim sin, orait Bikpela bai i lusim ol dispela sin.”—Jems 5:13-15.
Olsem: Wanpela man i kalabus long Saut Afrika, em i bin raitim pas i go long wanpela elda long kongrigesen bilong tok tenkyu long “olgeta Witnes Bilong Jehova em ol i save mekim dispela gutpela wok em Krais Jisas i bin kirapim bilong helpim ol man long painim Kingdom bilong God.” Na em i tok moa: “Mi amamas tru long kisim pas bilong yu. Yu laik helpim mi tru long ol samting bilong spirit, na mi pilim tru dispela samting. Olsem na mi gat as tru long kirap bihainim singaut bilong God Jehova long mi mas tanim bel. Inap 27 yia mi bin wok long pundaun na mekim ol kain kain sin, olsem giaman, pasin pamuk, pasin sem, na insait long ol lotu giaman. Bihain long mi kisim save long ol Witnes Bilong Jehova, mi pilim olsem mi painim pinis stretpela rot! Orait nau mi mas bihainim dispela rot.”
Sampela Helpim Moa Long Bihain
Ol hevi bilong dispela graun i go nogut moa, na dispela i kamapim long ples klia olsem yumi stap long wanpela bikpela taim em bai kamap paslain long kirap bilong “bikpela hevi.” Nau long dispela taim stret, wanpela bikpela lain bilong olgeta lain man na bilong olgeta kantri na bilong olgeta kain skin na bilong olgeta tok ples, ol i wok long “wasim ol klos bilong ol long blut bilong Pikinini Sipsip, na ol klos i kamap waitpela.” (KTH 7:9, 13, 14; 2 Timoti 3:1-5) Ol i bilip long ofa bilong Jisas, olsem na God i lusim sin bilong ol na ol i kamap pren tru bilong God.—Jems 2:23.
Pikinini Sipsip, em Krais Jisas, “em bai i stap wasman bilong ol [man i abrusim bagarap long taim bilong bikpela hevi tru]. Em bai i bringim ol i go long ol hul i gat wara i kamap, em wara bilong givim laip. Na God bai i mekim drai wara bilong ai bilong ol, na ol bai i no krai moa.” (KTH 7:17) Long dispela taim Krais bai inapim olgeta wok bilong em olsem Hetpris. Em bai helpim olgeta pren bilong God na bai “wara bilong givim laip” i ken helpim tru ol long ol samting bilong spirit, skin, tingting, na bel. Ol samting Jisas i kirap mekim long yia 33 C.E., na ol wok em i mekim yet long heven kirap long dispela taim, em bai kamap gutpela olgeta.
Olsem na no ken tru lusim pasin bilong pilim tru ol samting God na Krais i bin mekim—na ol i mekim yet—bilong helpim yumi. Aposel Pol i tok: “Oltaim yupela i mas amamas long Bikpela. . . . Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.”—Filipai 4:4, 6, 7.
I gat wanpela gutpela rot bilong kamapim olsem yu tenkyu tru long Krais Jisas, em Helpim bilong yumi long heven. Taim san i go daun pinis long Trinde, Epril 19, 2000, ol Witnes Bilong Jehova long olgeta hap bai bung bilong mekim Memorial bilong tingim indai bilong Krais. (Luk 22:19) Taim yu kam long dispela bung, dispela bai helpim yu long pilim tru ofa bilong Krais long baim bek yumi. Mipela i amamas long singautim yu long kam na harim ol tok long olsem wanem ol gutpela samting God i bin mekim bilong kisim bek yumi long rot bilong Krais em i ken helpim yu i go inap oltaim oltaim. Plis askim ol Witnes Bilong Jehova long hap bilong yu long wanem taim na ples stret ol bai mekim dispela bikpela bung.
[Piksa long pes 7]
Jisas i save pinis long pasin bilong beten strong long God
[Ol Piksa long pes 8]
Krais bai helpim yumi long karim ol hevi em yumi ting ol i bikpela tumas na yumi yet i no gat strong long karim
[Piksa long pes 9]
Krais i helpim yumi long rot bilong ol elda i gat pasin sori