Bikpela Bagarap i Klostu—“Tingting Gut Long Jisas”

“Ol Kristen brata, . . . yupela i mas tingting gut long Jisas, dispela Aposel na Hetpris yumi save bilip long en.”—HIBRU 3:1

1, 2. Yumi mas mekim wanem na bai bagarap bilong bipo, em piksa bilong en i stap long Rom, em inap helpim yumi?

LONG Rom i gat wanpela piksa i stap ol i bin katim long ston em i makim wanpela bikpela bagarap i bin kamap long bipo. Yu mas tingim gut dispela bikpela bagarap bilong bipo. Dispela piksa i makim Janeral Taitas i daunim na bagarapim Jerusalem long yia 70 C.E. I gat piksa bilong sampela Juda ol i kalabusim ol long sen, na ol soldia bilong Rom i karim i go ol gutpela samting bilong dispela taun.

² Yumi ol Kristen, sapos yumi skelim sampela tok aposel Pol i bin raitim 9-pela samting yia paslain long taim bilong dispela bikpela bagarap, dispela inap helpim yumi. Dispela tok i stap long pas Pol i raitim long ol Hibru i kamap Kristen na ol i stap long Jerusalem na Judia.

3. Wanem samting i givim hevi long ol Hibru long Jerusalem ol i kamap Kristen?

³ Ol brata bilong yumi long dispela taim bipo, ol i karim hevi. Ol Rom i bosim Judia, tasol planti Juda i bikhet long gavman bilong Rom. (Aposel 5:36, 37) Ol dispela Juda i mekim nogut long ol disaipel bilong Jisas, long wanem “ol i no bilong dispela graun” na ol i no laik helpim ol Juda long pait wantaim ol Rom. (Jon 17:16) Na ol Juda i mekim nogut long ol Hibru i kamap Kristen, long wanem ol Juda i ting ol yet i winim ol narapela man, long wanem God i bin makim ol na givim Lo long ol na mekim kontrak wantaim ol, na ol i gat lotu i gat ol pris bilong lain Livai na ol ofa o sakrifais.

4. (a) Olsem wanem Pol inap tok, “klostu taim i pinis” na Jisas i kamap long graun? (b) Jisas i tok profet olsem wanem long pinis bilong dispela taim bipo?

⁴ Tasol taim bilong ol Juda, na lotu bilong ol Juda, ol ofa na pris na bikpela bung na ol de Sabat, i pinis. Ol dispela samting i pinis pastaim taim Mesaia o Krais i dai olsem ofa. (Galesia 3:24, 25; Kolosi 2:13-17) Olsem na Pol inap stori long Pikinini Bilong God na tok, “klostu taim i pinis” na em i kamap long graun. (Hibru 9:26; 1:2) Liklik taim bihain haus lotu long Jerusalem i bagarap na taim bilong ol Juda i pinis. Jisas i tok profet long dispela bagarap na ol disaipel i tok, “Wanem taim bambai ol dispela samting i kamap?” (Matyu 23:37-24:3) Jisas i tok bai i gat pait, na hangre, na guria, na sik, na ol man bai autim tok bilong Kingdom long olgeta hap, na bihain tasol bai pinis i kamap. (Matyu 24:4-14; Luk 21:10, 11) Ol dispela samting Jisas i tok long en i painim ol manmeri namel long taim Jisas i mekim dispela tok na Pol i raitim pas i go long ol Hibru. Krais i tok, “bikpela hevi tru” bai painim Jerusalem, em kain hevi olsem i no bin kamap long bipo. (Matyu 24:21) Dispela bikpela bagarap i painim Jerusalem long yia 70 C.E. Kain bikpela hevi olsem i no bin kamap long Jerusalem bipo na i no ken kamap gen long dispela taun. Tasol ol dispela samting i kamap i liklik truim tasol bilong ol tok bilong Jisas. Olsem wanem na em i liklik truim tasol? Long wanem longtaim bihain “bikpela hevi tru” i mas painim olgeta manmeri bilong graun.

5. Olsem wanem na bihain bai i gat “bikpela hevi tru”?

⁵ Ol samting tru i bin kamap i soim yumi i gat bikpela truim bilong dispela tok profet bilong Jisas i mas kamap bihain, taim em i kam bek olsem king ‘na pasin bilong dispela graun i laik pinis.’ (Matyu 24:3) Planti yia bihain long taim bilong dispela hevi bilong Jerusalem, aposel Jon i raitim Revelesen. Revelesen sapta 6 tu i stori long pait na hangre na sik i mas kamap. Tasol ol dispela samting i no ken kamap long hap bilong Judia tasol. Nogat. Revelesen sapta 6 i tok, pait bai “tekewe gutaim bilong ol manmeri bilong graun.” (Revelesen 6:4) Ol samting i bin kamap long graun, kirap long taim bilong Namba Wan Pait Bilong Olgeta Hap (1914-1918) na i kam inap long nau i makim olsem yumi stap long las taim bilong dispela pasin nogut bilong nau. Liklik taim bai “bikpela hevi tru” i kamap. Dispela hevi bai pinisim pasin nogut long graun. Bai Kingdom bilong God i bosim graun na bai graun i kamap gutpela ples Paradais.

6. I gat wanem samting na yumi ken save ol tok bilong Pas bilong Ol Hibru i makim taim bilong yumi?

⁶ Ol tok Pol i raitim long ol Hibru i makim taim bilong yumi. Pol i tok, Krais i stap long heven na “wetim taim bilong God i putim ol birua bilong en i go aninit long em.” (Hibru 10:13) Na em i stori long taim “[God] i bringim namba wan Pikinini bilong en i kam gen long graun.” (Hibru 1:6, Baibel New World Translation) Nau God i mekim pinis dispela samting! Olgeta samting i makim Krais i kisim pinis wok king na em i bin daunim ol birua bilong God long heven. (Revelesen 12:7-12) Yumi no inap lukim Krais, tasol em i stap king pinis long heven na em i lukluk i kam daun long graun bilong mekim wok bilong em. Olsem Jisas i tok profet pinis, liklik taim bai bikpela bagarap tru i kamap, na bai olgeta birua bilong God i pinis long graun. Orait, dispela pas bilong ol Hibru i givim wanem gutpela tok long yumi?

“Tingting Gut long Jisas”

7, 8. Olsem wanem na i stret Pol i mekim bikpela tok long Jisas long pas em i raitim long ol Hibru?

⁷ Pol i mekim bikpela tok long Jisas. Em i raitim tok olsem: “Orait, het bilong dispela tok yumi mekim, em i olsem: Yumi gat dispela kain hetpris, na em i sindaun pinis long han sut bilong sia bilong Namba Wan King long heven.” (Hibru 8:1) Olsem wanem na dispela tok i stret bilong helpim ol Kristen i stap long taim bilong pinis bilong wanpela taim?

⁸ Inap longtaim pinis ol man i gat kain kain tingting kranki long Jisas. Ol Juda long taim bilong ol Kristen bilong pastaim ol i save hambak, long wanem ol i lain bilong Ebraham, na ol i bin kisim lotu bilong ol long han bilong Moses, na ol i gat ol pris bilong lain bilong Eron. Olsem na ol i ting Jisas em i no gat nem. Ating ol i ting olsem: ‘Dispela Jisas bilong Nasaret em i husat? Em i man nating bilong Galili, pikinini bilong kamda tasol.’ Ol i sutim tok long dispela Pikinini Bilong God na tok em i man bilong Sameria na wanpela spirit nogut i stap long em. (Jon 7:52; 8:39-41, 48; 9:24, 28, 29) Olsem na God i gat gutpela tingting na em i kirapim ol Hibru Kristen long “tingting gut long Jisas,” long wanem sapos ol i gat stretpela tingting long dispela Pikinini Bilong God na ol i stap stret wantaim em, dispela samting inap helpim ol long i stap gut long wok bilong God.

9. Pol i tok yumi mas “tingting gut long Jisas” na olsem wanem dispela tok i stret tru long nau? Yumi mas was gut long wanem samting?

⁹ Ol dispela tok bilong God long Pas bilong Ol Hibru em inap helpim yumi tu, long wanem long nau tu i gat planti tingting kranki long Jisas. Planti man long nau ol i no save daunim nem bilong Jisas olsem sampela Juda i bin mekim long bipo. Nogat. Tasol ol i save litimapim tumas nem bilong em. Ol misin bilong ol i tok Jisas em i God. Ol i tok i gat tripela God, em Papa na Pikinini na Holi Spirit na tripela i wanpela, olsem God Triwan. Tasol ol i save litimapim tru nem bilong husat long dispela tripela? Nem bilong Jisas. Ol i mekim bikpela toktok long Jisas na ol i no tingim Papa bilong em. Olsem na ol Kristen tru i mas was gut. Long Jon 14:28 Jisas i tok, ‘Papa i bikpela na i winim mi,’ na Sam 83:18 i tok God Jehova tasol em i “God Antap Tru.” Tasol nogut yumi tingim dispela tingting kranki bilong ol man, em ol i litimapim tumas nem bilong Jisas, na yumi daunim nem bilong Jisas na ol wok em i mekim. Nogat. Olsem ol Hibru Kristen olsem tasol yumi mas tingting gut long Jisas na kisim stretpela tingting long em na long ol wok bilong em. Dispela samting inap helpim tru yumi taim yumi tingim ol samting i laik kamap long bihain.

10. Pas bilong Ol Hibru i tok wanem long nem bilong Jisas?

¹⁰ Long kirap bilong Pas bilong Ol Hibru, Pol i kirapim yumi long tingim Krais em i gat bikpela nem. Nau em i wanpela spirit long heven na em i kisim pinis biknem, “em i wankain tru olsem God.” I no olsem Papa na Pikinini i wanpela skin tasol o wanpela god. Nogat. Long wanem Hibru 1:3 i tok moa olsem: Jisas i “sindaun long han sut bilong God.” Tok bilong Hibru 2:10 na 5:5, 8 tu i makim Jehova i bikpela na em i winim Pikinini. Tasol Krais i gat bikpela nem “winim nem bilong ol ensel.”—Hibru 1:4.

11. (a) Ol ensel bilong God i save mekim wanem long Krais Jisas? (b) Olsem wanem long tok bilong Hibru 1:6?

¹¹ Ol gutpela ensel i save long bikpela nem bilong Jisas na ol i save litimapim nem bilong em. Yumi tu mas mekim olsem. Hibru 1:6 i kolim tok bilong Sam 97:7 na i tok: “Olgeta ensel bilong God i mas lotu long em,” o ol i mas litimapim nem” bilong em, o “brukim skru” long em.a Ol tok bilong dispela ves i makim olsem ol ensel tu i save litimapim nem bilong Jisas, long wanem em i maus bilong God na em i Pikinini Bilong God na God i bin givim biknem long em. Ol i save, “God i litimapim em na i givim bikpela namba na biknem long em,” na em i kisim namba bilong bosim graun long bihain.—Hibru 2:5, 9.

12. Bilong wanem i bikpela samting yumi mas tingim gut ol tok bilong Jisas?

¹² Orait, dispela samting i mas mekim wanem long yumi? Pol i stori long Jisas i winim ol ensel, na bihain Pol i tok: “Olsem na dispela tok yumi harim pinis, yumi mas holimpas long tingting na bihainim. Nogut yumi slek long dispela tok na yumi lusim olgeta. (Hibru 2:1) Ol Hibru i kamap Kristen ol i save, ol Juda i no bihainim moa Tok bilong God o Lo bilong God ol i bin kisim long han bilong Moses. Tasol yumi mas moa tingim na bihainim ol tok bilong god yumi bin kisim long rot bilong Jisas.

13. Sapos ol Kristen i bihainim tok bilong Jisas, ating dispela inap helpim ol olsem wanem? Olsem wanem dispela samting i bin helpim ol Kristen bilong pastaim?

¹³ Tingim tok bilong Jisas, em i tok ol Kristen i mas ranawe taim ol i lukim ol ami i raunim Jerusalem.(Luk 19:43, 44; 21:20-24) Ol Juda i bikhet na ol Rom i kam raunim Jerusalem long yia 66 C.E., na bihain, wantu ol i lusim Jerusalem na i go bek. No gat as bilong dispela samting. Nau ol Kristen i ranawe lusim dispela taun. Ol i bihainim tok bilong Jisas, olsem na taim ol Rom i kam bek long yia 70 C.E. na bagarapim Jerusalem ol i no bagarap. Bikpela bagarap i painim Jerusalem, tasol ol Kristen i no bagarap, long wanem ol i bihainim tok bilong Jisas. Orait, yumi mas tingim dispela samting. Askim skin bilong yu yet: ‘Mi holimpas ol tok bilong Jisas na bihainim? Ol hap taim mi lusim long painim amamas, o tingting bilong mi long wok mani bilong mi, o tingting bilong mi long kisim skul, dispela i makim mi bihainim tok bilong Jisas long Luk 12:16-31 o nogat?’

14. (a) Olsem wanem Jisas em i “namba wan man tru bilong kisim bek” ol man? (b) Olsem wanem Jisas i kamap namba wan tru”?

¹⁴ Hibru 2:10 i kolim Jisas “namba wan man tru bilong kisim bek” ol man. Pastaim em i kamap man bilong kisim bek ol Kristen em spirit holi i makim ol na ol i “brata” bilong em. (Hibru 2:11-17) Tasol em i Man bilong helpim tu olgeta man i laik kisim laip i stap long Paradais long graun. Pol i raitim tok, olsem: “Jisas i Pikinini Bilong God, tasol em i karim pen, na dispela i skulim em tru long pasin bilong bihainim tok bilong God. Dispela i mekim em i kamap namba wan tru long bihainim tok. Olsem na em i kamap Man bilong helpim na kisim bek olgeta man i bihainim tok bilong em, bai ol i stap gut oltaim oltaim. Na God i makim em na i tok, ‘Yu stap hetpris’” (Hibru 5:8-10) Tru, taim Jisas i stap spirit long heven em i namba wan tru, na taim em i stap man long graun em i namba wan tru. Tasol em i gat wok olsem pris bilong helpim yumi na em i mas kamap namba wan tru long dispela tu. Taim em i stap long graun em i karim hevi na em i bihainim tok bilong God i go inap long taim em i dai. Dispela samting i skulim em na em i kamap namba wan tru—em i kamap gutpela hetpris em inap marimari long ol man.

Bilip Tru long Hetpris Bilong Yumi

15. Bilong wanem Pas bilong Ol Hibru i mekim bikpela tok long Ol Pris?

¹⁵ Pas Pol i raitim long ol Hibru i mekim bikpela tok long ol pris. Em bilong helpim yumi long save long dispela “Hetpris yumi save bilip long en,” em Jisas. (Hibru 3:1) Pol i tok, “Pasin bilong makim olgeta hetpris em i olsem: God i save kisim wanpela man na i save putim em long wok bilong God olsem helpim bilong ol manmeri. Em i gat wok bilong givim kain kain presen long God na mekim kain kain ofa bilong tekewe sin.” (Hibru 5:1; 8:3) Planti tok bilong kontrak bilong Lo i bilong makim ol man ol i sinman. Olsem na ol pris i mas mekim ol ofa bilong helpim ol. Ol pris i mas mekim ofa tu bilong tekewe sin bilong ol yet. Ol i kilim ol animal na mekim ofa planti taim moa, tasol ol dispela ofa i no daunim sin o mekim ol manmeri i kamap gutpela tru. (Hibru 7:11, 19, 27; 10:1-4, 11) Olsem na yumi save, i mas i gat nupela kontrak, na nupela ofa, na nupela hetpris.—Jeremaia 31:31-34.

16. Olsem wanem pris Jisas i winim ol pris bilong Isrel?

¹⁶ Krais em i dispela nupela hetpris. Em i pris kain olsem Melkisedek, em Baibel i no kolim lain tumbuna bilong Melkisedek, na Jisas i no kamap pris long lain bilong Livai o Eron. God yet i makim em bilong mekim dispela wok. (Hibru 7:1-3, 15-17; 5:5, 6) Sapos God i orait long dispela hetpris, Jisas, yumi ken bilip tru long em, a? Na em i no ken i dai na bai i mas i gat senis bilong em, olsem ol pris i stap aninit long kontrak bilong Lo. Krais i givim laspela ofa, em i givim bodi bilong em; dispela ofa i gutpela olgeta, olsem na em i givim dispela ofa wanpela taim tasol, em i no ken mekim planti taim. Krais, hetpris bilong yumi, em i kisim pe bilong blut bilong em i go long heven na givim long God. Krais i stap yet long heven na mekim wok pris bilong helpim yumi.—Hibru 9:24-28; 10:12-18.

17. Jisas i stap hetpris bilong yumi na dispela samting i helpim yumi olsem wanem?

¹⁷ Yumi ken bilip long dispela hetpris bilong yumi na yumi no ken pret long bikpela bagarap i laik kamap. Ol ofa ol pris i mekim aninit long Lo i no inap tekewe sin olgeta, tasol ofa bilong Krais i namba wan tru na em inap tekewe sin bilong yumi. Na em inap “klinim bel bilong yumi na i tekewe ol kain pasin i no gat laip tru bilong en [em ol pasin nogut bipo yumi bin mekim na ol wok yumi bin mekim bilong kamapim stretpela pasin bilong yumi yet] . Olsem na yumi ken holim wok bilong God i gat laip.” (Hibru 9:14; 10:1-4) Taim hevi na traim i painim yumi, sapos yumi gat klinpela bel long ai bilong God, dispela samting inap helpim tru yumi. (Hibru 10:19-22) I gat ol narapela samting tu na yumi ken amamas long Jisas i stap oltaim olsem hetpris bilong yumi long heven.

18. Olsem wanem na long bipo na long nau tu i gutpela yumi gat hetpris em i save sori long yumi?

¹⁸ Pas bilong Ol Hibru i tokim yumi, hetpris bilong yumi, Krais, em i sori long yumi. Ol Hibru long Jerusalem long bipo, em ol i bin kamap Kristen, ol i gat kain kain hevi na traim. Ol i stap namel long ol man i givim bel long helpim ples bilong ol yet, na ol i mas ranawe i go, lusim haus bilong ol na ol wantok na wanblut bilong ol na wok bilong ol. Tasol i no olsem ol i no gat man bilong helpim ol. Nogat. Pol i raitim tok long ol, olsem: “Yumi yet i no gat strong bilong daunim sin. Tasol hetpris bilong yumi em i no olsem man i no inap sori long yumi. Nogat. Olgeta traim i save kamap long yumi, dispela olgeta i bin kamap pinis long em bilong traim em tu. Tasol em i no mekim sin.” Dispela tok i strongim bel bilong ol dispela Kristen bilong bipo, na em inap strongim bel bilong yumi ol Kristen i stap long taim bilong pinis bilong dispela pasin bilong nau! Yumi gat gutpela hetpris em i save sori long yumi, olsem na “sapos yumi gat hevi, orait marimari bilong em bai i helpim yumi.” (Hibru 4:15, 16) Maski wanem wanem kain traim i painim yumi, “em inap long helpim ol man i gat traim i kamap long ol.”—Hibru 2:17, 18.

Man Bilong Inapim Tru Bilip Bilong Yumi

19, 20. Olsem wanem Jisas “inapim tru bilip bilong yumi”?

¹⁹ Taim yumi “tingting gut long Jisas,” yumi mas bilip. Pol i stori long “sin i save pas long yumi”—olsem yumi sot long bilip—na bihain em i tok, yumi mas “lukluk i go long Jisas, em i as bilong bilip bilong yumi, na bihain bai em inapim tru bilip bilong yumi.” (Hibru 12:1, 2) Bilong wanem i bikpela samting yumi mekim olsem nau long dispela taim bilong pinis?

²⁰ Kirap long namba wan tok profet long Jenesis 3:15, ol tok bilong Baibel i makim Krais. Planti samting Baibel i stori long en i olsem piksa na i makim Krais. Planti samting long Lo bilong Moses, em Pas bilong Ol Hibru i kolim, i olsem “tewel tasol bilong ol gutpela samting i laik kamap bihain.” (Hibru 9:23; 10:1) Tasol “Krais em i samting tru.” (Kolosi 2:17) Tru tumas, taim Jisas i kamap man long graun na mekim wok bilong em na i dai na kirap bek na mekim wok pris long heven, ol dispela samting inapim tru olgeta tok profet na tok piksa bilong dispela samting.

21. Long nau, long wanem narapela rot, Jisas i olsem Man bilong “inapim tru bilip bilong yumi”?

²¹ Pol i save, Krais em i man bilong “inapim tru bilip bilong yumi,” na yumi inap save moa yet long dispela samting long nau. Long wanem, nau yumi lukim bikpela truim bilong ol tok Jisas i bin mekim long mak bilong em i kam bek na dispela taim bai pinis. (Matyu 24:3) Olsem na nau bilip bilong yumi i gat as tru bilong en. Nau taim bilong i go insait long dispela “graun i laik kamap bihain,” dispela taim i kam klostu moa, winim taim bilong Pol. Olsem na yumi mas wok yet long “tingting gut long Jisas,” em man bilong inapim tru bilip bilong yumi. Yumi mas bilip tru olsem “God i save givim gutpela pe long ol man i wok long painim em” na ol i bilip. (Hibru 2:5; 11:6) Narapela tok bihain bai soim yumi olsem wanem ol tok bilong Pas bilong Ol Hibru em inap helpim yumi long kisim dispela bilip na tingting Kristen, bambai yumi inap kisim dispela gutpela pe.

[Futnot]

Yu Inap Bekim?

□ Olsem wanem yumi stap wankain olsem ol Kristen bilong bipo, em Pol i raitim Pas bilong Ol Hibru long ol?

□ Bilong wanem yumi mas kisim stretpela tingting long Jisas na bihainim ol tok bilong em?

□ Bilong wanem Pas bilong Ol Hibru i mekim bikpela tok long ol ofa na ol pris?

□ Yu ting olsem wanem long Jisas, em i hetpris bilong yumi na Man bilong inapim tru bilip bilong yumi?

[Blok long pes 18]

BRUKIM SKRU o LOTU LONG

Long Hibru 1:6 ating insait bilong dispela tok Grik proskynéo i olsem:

1. Lindaun o brukim skru o amamas long Jisas, long wanem God Jehova i bin givim biknem long em

2. Lotu long God Jehova long rot bilong Pikinini bilong em Jisas

[Piksa long pes 19]

Jisas i givim ofa em inap helpim ol man inap long olgeta taim bihain; ol ofa ol pris i mekim long haus lotu i helpim ol man inap liklik taim tasol