Autim Gutpela Tok—Long Teritori Yumi Autim Tok Long En Planti Taim
1 Long teritori yumi save autim tok long en planti taim, yumi gat sampela hevi yumi mas winim. Yumi ken autim wanem ol tok i olsem nupela tok long ol na bai ol man i amamas long harim? Yumi ken tok wanem long ol man em ol i pasim tok pinis long bel olsem ol i no laik tru long harim tok bilong yumi? Yumi ken tok wanem long ol man i tok yumi kam lukim ol planti taim tumas?
MAS TING OLSEM OL BAI HARIM
2 Sampela brata i ting sapos yumi autim tok planti taim long wanpela hap teritori, ol man bai les long harim tok bilong yumi. Tasol dispela tingting i kranki. Teritori yumi autim tok long en planti taim i save karim planti kaikai, winim teritori yumi autim tok long en long wan wan taim tasol. Olsem na yumi no ken ting olsem ol man bai les long harim tok bilong yumi sapos yumi go planti taim long haus bilong ol. Planti taim yumi mas givim rot long man long harim tok bilong Kingdom. Nogut yumi ting Jehova i skelim ol pinis na kot bai painim ol long wanem ol i no bin harim tok bilong yumi, maski yumi bin i go planti taim long ol.
3 Em i bikpela samting long yumi mas mekim pasin sori na pilim tru hevi bilong ol man long teritori yumi save autim tok long en planti taim. Sapos yumi kamapim tok i makim olsem yumi pilim tru ol hevi i bin painim ol, orait, dispela bai mekim na ating ol bai harim sampela tok bilong yumi, maski pastaim ol i no laik harim. Olsem wanem? Yu wok long kisim save long ol samting i kamap long graun? Sapos yumi save long ol hevi i wok long painim ol man, bai yumi inap redi gut long soim ol man bilong haus, olsem wanem tok bilong Baibel inap helpim ol, long painim rot bilong stretim ol hevi bilong ol.
MEKIM KAIN KAIN PASIN BILONG KIRAPIM TOK
4 Long teritori yumi save autim tok long en planti taim, i gutpela sapos yu senisim tok taim yu laik kirapim tok—nogut yu kamapim wankain tok long ol long olgeta taim na ol i les long harim. Sampela taim yu ken mekim wok long liklik nius bilong kirapim tok. Buk Reasoning long pes 9-15 i kolim kain kain pasin bilong kirapim tok, inap 40 samting. Na sampela taim yu ken kamapim ol dispela tok. Na sampela taim yu ken tokim man bilong haus olsem yu bin i kam long dispela hap long sampela wik i go pinis na nau yu kam lukim ol gen. Sapos yu tok olsem, orait nau ol yet i no ken kamapim dispela tok bilong pasim rot bilong yu long autim tok long ol. Sapos yu tingim sampela tok em man bilong haus i bin kamapim taim yu kam lukim em bipo, orait yu ken kamapim gen dispela tok em i bin mekim na ating dispela bai kirapim em long harim tok bilong yu.
5 Yumi mas bihainim pasin bilong Jehova long tingim ol man. Maski ol man i bin tok olsem ol i no laik tru long harim ol tok bilong yumi, yumi mas mekim pasin sori long ol na tingim ol. Planti taim Jehova i bin salim ol profet bilong em i go autim tok long lain bilong em, maski planti taim ol i no laik harim. (2 Sto 36:15; Jer 7:13) Planti man em pastaim ol i no laik harim tok bilong ol Witnes, nau ol i stap brata sista bilong yumi. Na sampela man, bipo ol i kros na ol i no laikim ol Witnes, bihain ol i senisim tingting bilong ol na ol i kam insait long tok i tru. Nau ol dispela man i tenkyu long yumi bin i go lukim ol bilong autim gutpela tok long ol.
RAITIM GUT OL SAMTING LONG NOTBUK
6 Taim yumi autim tok, yu mas raitim gut ol samting long notbuk. Sapos i no gat man i stap long haus, orait raitim atres bilong em, olsem namba bilong haus na nem bilong rot samting, long notbuk o pepa samting, na long narapela de bihain yu mas i go bek lukim em. Sapos yumi mekim olsem, yumi inap autim tok long olgeta man i stap long teritori bilong yumi. Na tu, sapos yumi bihainim dispela pasin, bai yumi no autim tok hariap tumas long teritori bilong yumi na em i pinis hariap. Na sampela brata sista em ol i save autim tok long namel bilong wik tasol, sapos sampela man i no i stap long haus, ol i raitim atres bilong ol long wanpela pepa na ol i givim dispela pepa long narapela brata o sista i save autim tok long Sarere Sande samting. Olsem na sapos yu autim tok long wanpela hap long namel bilong wik, na sampela man i no i stap long haus, orait gutpela sapos sampela brata sista i autim tok long dispela hap long Sarere Sande samting, bambai ol inap painim ol man em pastaim ol i no bin i stap long haus.
7 Jehova i save long bikpela wok yumi mekim long painim olgeta man i laik harim tok. Bai yumi wok yet long bihainim tok bilong Jehova long autim dispela tok, na yumi save, bai yumi inapim tru dispela wok insait long taim Jehova i bin makim.—Ese 9:11.
[Ol Askim]
1. Kolim sampela hevi yumi mas winim taim yumi autim tok long teritori yumi save autim tok long en planti taim?
2. Long teritori yumi save autim tok long en planti taim, gutpela sapos yumi kisim wanem kain tingting?
3. Bilong wanem i gutpela sapos yu kisim save long ol samting i kamap long graun nau long dispela taim?
4. Kolim sampela samting yumi ken mekim bilong kirapim man bilong haus long harim tok bilong yumi?
5. Planti brata na sista nau ol i tenkyu long wanem samting?
6. Bilong wanem i bikpela samting yu raitim gut atres bilong ol man i no stap long haus bilong ol?