Yu Gat Laik Long Kisim Hap Teritori Bilong Yu Yet?
1 Hap teritori bilong yu yet em wanpela teritori ol i makim olsem teritori bilong yu long autim tok. Ating em i stap klostu long haus bilong yu na bai yu inap kamap long en hariap na yu wanpela o yu wantaim narapela pablisa i ken autim tok long en. Tru, i gutpela yu sapotim ol grup bilong autim tok, tasol taim yu yet i gat wanpela teritori bilong autim tok long en long ol narapela taim, dispela bai helpim wok bilong autim tok, na moa yet sapos kongrigesen bilong yu i gat bikpela hap teritori.—Ap. 10:42.
2 Ol Gutpela Samting Bilong En: Sampela i bin kisim hap teritori bilong ol yet klostu long ples wok na ol i bin autim tok long en long taim bilong belo o long taim wok i pinis. Na sampela famili i bin amamas long wok wantaim long autim tok inap wanpela aua samting long hap bilong ol, paslain long Buk Stadi Bilong Kongrigesen. Olsem na ol i kisim ol gobek na ol Baibel stadi klostu long hap bilong ol, na ol i no lusim bikpela hap taim na strong na mani long go bek lukim ol. Taim ol pablisa i holim hap teritori bilong ol yet, ol inap mekim planti wok moa insait long liklik hap taim, na ating dispela inap helpim sampela long kamap painia haptaim o painia oltaim. Na tu, taim yumi autim tok long teritori bilong yumi yet na save gut long ol lain i stap long dispela hap, bai ol i no pret long toktok wantaim yumi na yumi inap stori wantaim ol long samting ol i tingting planti long en, na wok autim tok bilong yumi bai kamap gutpela moa.
3 Wanpela painia, em wasman sekit i bin kirapim em long kisim wanpela teritori bilong em yet, i tok: “Mi bihainim tok bilong em na i no longtaim na mi save gut long ol lain i stap long teritori bilong mi. Mi save go lukim ol long taim i stret long ol, na long dispela rot mi mekim planti gobek. Pastaim mi gat 35 gobek long olgeta mun, na bihain dispela namba i go antap inap olsem 80, na mi gat 7-pela Baibel stadi.”
4 Rot Bilong Kisim: Sapos yu laik kisim wanpela teritori bilong yu yet, toksave long teritori sevan. Yu ken askim narapela pablisa long wok wantaim yu, na raitim long notbuk lista bilong ol haus i no gat man. Yu mas wok long pinisim dispela teritori insait long 4-pela mun. Sapos yu hatwok long mekim olsem, yu ken askim wasman bilong Buk Stadi o sampela narapela long helpim yu. Long pinis bilong 4-pela mun, yu ken givim teritori yu wokim pinis i go bek long teritori sevan o yu ken tokim em olsem yu laik autim tok gen long en. Tasol yu no ken holim wankain teritori olgeta taim. Yu mas givim i go bek na bai ol arapela i ken kisim sapos ol i gat laik. Sapos yu insait long wanpela kongrigesen we i no gat planti teritori, na yu no inap kisim wanpela teritori bilong yu yet, ating yu ken askim wasman bilong Buk Stadi bilong yu long kisim liklik hap tasol bilong wanpela teritori. Tasol yumi save i gat sampela teritori we i no seif long tupela pablisa tasol i go na autim tok, olsem na taim brata i makim teritori bilong ol, em i mas bihainim gutpela tingting.
5 Wok bilong yumi long autim tok “long olgeta hap bilong graun” em i wanpela bikpela wok. (Mt. 24:14) Bilong inapim dispela wok, olgeta i mas wok gut wantaim. Pasin bilong autim tok long wanpela teritori bilong yumi yet, na pasin bilong bung wantaim grup na autim tok, dispela inap helpim yumi long autim gutnius long planti man moa.
[Askim Bilong Stadi]
1. Teritori bilong yu yet em wanem samting?
2. Taim yumi gat teritori bilong yumi yet, olsem wanem dispela i gutpela?
3. Wanem gutpela samting i bin painim wanpela painia i bin kisim hap teritori bilong em yet?
4. Olsem wanem yumi inap kisim wanpela teritori bilong yumi yet na autim tok long en?
5. Bilong inapim wok bilong yumi long autim tok, yumi mas mekim wanem?