Askim

◼ Olsem wanem? Kongrigesen i mas i gat wanpela bikpela mep i hangamap long banis bilong Haus Kingdom na i makim olgeta teritori bilong kongrigesen?

Yes, kongrigesen i mas i gat wanpela bikpela mep ol i hangamapim long banis insait long Haus Kingdom olsem ol i save hangamapim wanpela piksa, bambai olgeta i ken lukim. No ken putim mep long notis-bot. Mep i mas i gat ol mak i makim teritori olgeta bilong kongrigesen, na bilong olgeta wan wan teritori wantaim namba bilong ol. Mep i mas i gat mak i makim teritori bilong olgeta wan wan kongrigesen i mekim wok long wanpela Haus Kingdom. Dispela bai helpim ol pablisa na ol nupela man long save ol i sindaun long teritori bilong wanem kongrigesen. Makim long mep hap ol Buk-Stadi Bilong Kongrigesen i stap long en, na dispela bai helpim olgeta long save long Buk-Stadi ol elda i makim ol long i go long en. Sapos senis i kamap long teritori, mep i mas makim dispela senis.

Taim yupela i putim mep long wanpela hap olgeta i ken lukim, dispela bai helpim ol pablisa long save gut long teritori em Sosaiti i makim bilong kongrigesen i mas lukautim. Long sampela taim em i gutpela long ol pablisa yet i holim wanpela mep bilong wanpela teritori. Long kain taim olsem, bikpela mep inap helpim pablisa long kisim wanpela teritori i stap klostu long haus bilong em. Ating sampela taim bikpela mep inap helpim brata i lukautim bung bilong wok autim tok long soim hariap ol pablisa long wanem hap ol bai autim tok long en.

Na tu, bikpela mep i soim olsem kongrigesen i stretim gut ol samting bilong autim tok bilong Kingdom long teritori olgeta bilong ol.​—⁠Lu 9:⁠6.