Kongrigesen Bilong Yupela i Gat Bikpela Teritori?
1 Kirap long ol taun bilong Judia i go inap long ol ples bilong Galili, Jisas i autim gut tok long olgeta hap bilong bikpela teritori bilong Israel long bipo. (Mk. 1:38, 39; Lu. 23:5) Yumi tu i mas autim gutnius long planti man moa. (Mk. 13:10) Tasol i hatwok long mekim olsem. Bilong wanem?
2 Planti kongrigesen long Papua Niugini i gat bikpela teritori ausait long taun na ol i stap longwe. Yumi ken mekim wanem bilong helpim ol man i stap long ol dispela bikpela teritori long save long tok i tru bilong Jehova, Jisas, na Kingdom?
3 Stretim Gut Ol Samting: Wasman autim tok na brata i lukautim teritori i mas stretim gut ol wok na bai wok i karim gutpela kaikai. Ating ol i ken makim sampela Sarere bilong mekim wok na bai planti inap wok long de olgeta. Taim yupela i autim tok long ol longwe teritori, tingting long autim tok inap planti aua sapos inap, na kisim lans i go wantaim. Yupela i ken mekim bung bilong autim tok paslain long taim yupela i save mekim long ol narapela taim na bai yupela i gat taim bilong go long teritori, o yupela i ken mekim dispela bung klostu long hap yupela bai autim tok long en. Stretim rot bilong autim tok long ol longwe hap long taim bikpela ren samting i no bagarapim ples na ol rot.
4 Kisim planti buk na nius i go wantaim. Sapos yupela i no save autim tok planti taim long dispela teritori, ating em i gutpela long lusim liklik nius o olpela magasin long ol haus i no gat man. Yupela i mas givim liklik nius Yu Laik Kisim Sampela Save Moa Long Baibel? long olgeta man yupela i bungim na lusim long ol haus i no gat man.
5 Wok Gut Wantaim: Olgeta long kongrigesen i mas wok gut wantaim na bai yupela inap autim tok long bikpela teritori. Taim yupela i mas go long longpela rot, ol brata i kalap long ka i ken givim mani bilong baim disel samting. Bihainim gutpela tingting taim yu bungim wanpela man i laik toktok. Wok strong long bungim olgeta man long teritori, na tingim ol narapela long grup bilong yu. Sapos yu laik toktok moa wantaim man i laik harim tok, stretim rot na bai ol narapela long grup inap autim tok i go.
6 Stretim gut rot bilong i go lukim gen ol man i laik harim tok. Ating yu ken stadi wantaim ol long rot bilong pas, olsem na traim long kisim atres bilong ol. Ating yu inap kisim telefon namba bilong sampela man na bai yu ken toktok wantaim man i laik harim tok na autim tok moa long em. Sapos ol rot i no gat nem na ol haus i no gat namba, orait wokim wanpela mep o raitim sampela tok i helpim yu long painim man taim yu laik go lukim em gen.
7 Bikpela Wok Long Julai: Long 1999 em laspela taim ol i bin askim ol kongrigesen na grup long autim tok long ol longwe teritori. (km 6/99 p. 3) Long dispela yia olgeta kongrigesen na grup i mas autim tok long sampela longwe teritori. Ating sampela longwe teritori i insait long teritori bilong kongrigesen o em teritori bilong sampela grup em kongrigesen i lukautim. Olgeta kongrigesen na grup i mas makim tupela bikpela de long Julai 2002 bilong autim tok long ol dispela teritori. Wasman autim tok i mas makim sampela ples, taun, o hap we yupela i mas autim tok long en long dispela tupela de. Em i mas go pas tu long stretim ol grup na ol narapela samting bilong dispela tupela bikpela de.
8 Olgeta wasman autim tok long Lae na Port Moresby i mas wok gut wantaim wasman bilong biktaun bilong skelim wanem ol longwe teritori wan wan kongrigesen bai autim tok long en, nogut ol kongrigesen i autim tok long wankain teritori.
9 Yumi gat gutpela wok tru bilong bihainim tok bilong Jisas: “Sapos yupela i go insait long wanpela taun o wanpela ples, orait yupela i mas painimaut gut, wanem man bilong dispela ples em i gutpela na stretpela man.” (Mt. 10:11) Jehova bai blesim hatwok yupela i mekim taim yupela i givim yupela yet bilong mekim dispela gutpela wok!