Haus i No Gat Man, Bilong Wanem Yumi Mas Raitim Long Notbuk?
1 Tupela Witnes marit i raun autim tok long moningtaim. Long dispela de yet ol i go painim ol man em pastaim ol i no stap long haus. Wanpela man i singautim ol i kam insait na em i putim gut yau. Em i kisim buk Stap Oltaim, na em i laik bai ol Witnes i kam lukim em gen. No gat wanpela taim bipo em i bin toktok wantaim ol Witnes Bilong Jehova na em i gat planti askim; tupela i kirapim Baibel-stadi wantaim em. Ol i amamas tru long painim dispela man i kain olsem sipsip. Olsem wanem? Yu tu yu laik painim kain man olsem? Sapos olsem, orait, raitim gut long notbuk ol haus i no gat man, na go bek hariap.
2 Planti taim ol brata i bin kirapim yumi long raitim gut ol haus i no gat man i stap, na ol i laik bai yumi go bek hariap. Ekspiriens i stap antap i kamapim klia, sapos yumi go bek gen long dispela de stret, ol gutpela samting inap kamap. Tasol sampela taim yumi no strong tumas long raitim ol haus i no gat man. Sampela i save tok: ‘Yumi raun long teritori long olgeta tupela o tripela wik; olsem na maski raitim, long wanem, bihain liklik, bai yumi raun gen long dispela hap.’ Tasol long kain teritori olsem, gutpela sapos yumi raitim long notbuk ol haus i no gat man na yumi go painim gen ol man bilong ol dispela haus; dispela bai helpim yumi long mekim gut wok bilong painim olgeta man i gat gutpela bel.
3 Olsem: Long planti hap, wanpela long olgeta tupela man ol i no stap long haus long san. Sapos yumi wok strong long bungim ol dispela man, bai i olsem teritori bilong yumi i kamap bikpela moa. Tasol maski yumi no autim tok planti taim long teritori, sapos yumi wok strong long painim olgeta man paslain long yumi givim mep i go bek long brata i lukautim, ating dispela bai helpim wok bilong yumi i kamap gutpela moa.
4 Sapos man i no stap long haus, gutpela sapos yumi go bek insait long wanpela wik. Planti brata sista ol i no go bek long wankain taim olsem pastaim—ol i go bek long narapela de na long narapela taim. Sapos namel long wik ol man i no stap long haus, orait, makim hap taim long Sarere o Sande na go bek painim ol. Long planti kongrigesen, ol brata sista i go painim gen ol man long apinun olsem 5 klok samting. Ating ol i painim wanpela long olgeta tupela man em pastaim ol i no stap long haus.
5 Yu mas raitim long hap pepa ol haus i no gat man i stap. Sapos yu no inap i go bek, givim dispela hap pepa long brata i lukautim grup, na em i ken givim long ol brata sista i autim tok wantaim grup long narapela de.
6 Sapos yumi wok strong long painim ol man em pastaim ol i no stap long haus, ating bai yumi bungim planti man i laik harim tok, na amamas bilong yumi bai go bikpela moa. Bai yumi belgut, long wanem, yumi mekim gut wok bilong painim na lukautim ol man i gat pasin kain olsem sipsip.—Ese 34:11-14.