Spesel Wok
Long Oktoba 16–Novemba 12!
1 “Pinis Bilong Lotu Giaman i Kam Klostu Tru!” Dispela em i het tok bilong Kingdom Nius Namba 37, em yumi bai tilim long olgeta hap bilong graun kirap long neks mun. Long Oktoba 1 i go 15 bai yumi tilim Wastaua na Kirap! Kirap long Mande, Oktoba 16 i go inap Sande, Novemba 12, bai yumi wok strong long tilim Kingdom Nius Namba 37. Long ol wiken namel long dispela taim bai yumi tilim dispela Kingdom Nius na Wastaua na Kirap! wantaim.
2 Husat i Insait: Olgeta pablisa bai i gat laik tru long insait long dispela wok. Sampela bai mekim wok painia haptaim. Olsem wanem? Sampela pikinini bilong yu o ol Baibel sumatin bilong yu i wok long kamap strong long ol samting bilong spirit? Helpim ol long go toktok wantaim ol elda na bai ol i ken save ol i winim mak bilong kamap ol pablisa i no baptais yet o nogat. Ol elda i mas toktok wantaim ol pablisa em ol i bin lusim wok autim tok na kirapim ol long insait long dispela spesel wok. Ating ol i ken wok wantaim ol pablisa i gat bikpela save long mekim wok autim tok.
3 Brens bai salim ol Kingdom Nius Namba 37 long ol kongrigesen na olgeta wan wan pablisa na painia inap kisim 50 nius. Ol nupela man, em ol i no kamap pablisa yet, inap kisim 5-pela nius bilong tilim long ol wanblut na ol pren. Ol pablisa na painia i mas kaunim hamas nius ol i tilim na raitim dispela long baksait bilong ripot bilong ol long mun Oktoba na Novemba. Kuskus bai bungim olgeta nius kongrigesen i tilim na raitim dispela long ripot bilong mun em ol i save salim long brens ofis. Sapos long pinis bilong dispela spesel wok i gat sampela Kingdom Nius i stap yet, orait yupela i ken tilim long ol narapela taim yupela autim tok.
4 Tok Bilong Mekim: Mekim sotpela tok, long dispela rot bai yu inap autim tok long planti man moa. Yu inap tok olsem: “Mi insait long wanpela wok ol i mekim long olgeta hap bilong graun bilong kamapim wanpela bikpela tok bilong helpim ol man. Dispela kopi em bilong yu, i no gat pe long en. Plis ritim.” No ken lusim tingting long raitim long notbuk nem bilong ol manmeri i laik harim tok.
5 Bilong Inapim Olgeta Teritori: No ken tilim ol Kingdom Nius long rot, nogat. Wok strong long inapim ol teritori i gat ol haus na ol bisnis. Raitim namba bilong ol haus we ol man i no stap na traim long go bek long narapela taim o de bilong wik. Kirap long Mande, Novemba 6, yu inap lusim wanpela Kingdom Nius long ol haus we ol man i no stap. Tasol sapos paslain long kirap bilong dispela wok ol elda i luksave olsem teritori bilong kongrigesen i bikpela tumas, na ol i no inap pinisim olgeta teritori insait long dispela taim, orait ating ol elda bai pasim tok olsem i gutpela long lusim ol nius long ol haus i no gat man kirap long Oktoba 16.
6 Bagarap bilong ‘Bikpela Babilon’ i wok long kam klostu hariap tru. Ol manmeri i mas lusim ‘Bikpela Babilon’ paslain long em i kisim bagarap. (KTH 14:8; 18:8) Kirap nau long stretim rot na bai yu inap insait tru long dispela spesel wok i kamap long olgeta hap bilong graun, em wok bilong tokaut long ol man olsem pinis bilong lotu giaman i klostu tru!